ಬೇಸಗೆಯ ಬಿಸಿಲಿಗೆ ದೇಹದ ಉಷ್ಣತೆ ಹೆಚ್ಚಿಸುವ ಹವ್ಯಾಸಗಳಿವು; ಇಂದೇ ಬಿಟ್ಟುಬಿಡಿ

ಬೆಂಗಳೂರು, ಮೇ 28: ದೇಶದಾದ್ಯಂತ ಬಿಸಿಲಿನ ತಾಪಮಾನ ಏರಿಕೆಯಾಗುತ್ತಲೇ ಇದೆ. ಕೇವಲ ಹಗಲಷ್ಟೇ ಅಲ್ಲ,ರಾತ್ರಿಯ ಸಮಯದಲ್ಲೂ ಉಷ್ಣಾಂಶ ದಾಖಲೆ ಮಟ್ಟದಲ್ಲಿ ಏರುತ್ತಿದೆ. ಇದರ ಪರಿಣಾಮ ನಿರ್ಜಲೀಕರಣ, ಹೀಟ್ ಸ್ಟ್ರೋಕ್‌ನಂತಹ ಅನೇಕ ಸಮಸ್ಯೆಗಳು ಕಾಡುತ್ತವೆ. ಇನ್ನು ತಾಪಮಾನವು ಸಾಮಾನ್ಯ ದೇಹದ ಉಷ್ಣತೆಯನ್ನು ಮೀರಿದಾಗ, ದೇಹದ ಆಂತರಿಕ ಥರ್ಮೋಸ್ಟಾಟ್ ಹೆಚ್ಚುವರಿ ಶಾಖವನ್ನು ಹೊರಹಾಕಲು ಶ್ರಮಿಸುತ್ತದೆ. ಇದು ಬಳಲಿಕೆ ಮತ್ತು ಕೆಲವು ಸಂದರ್ಭಗಳಲ್ಲಿ ಹೃದಯರಕ್ತನಾಳದ ಒತ್ತಡಕ್ಕೆ ಕಾರಣವಾಗುತ್ತದೆ. ಹಾಗಾಗಿ ಕೆಲವೊಂದು ಅಭ್ಯಾಸಗಳನ್ನು ನಾವು ತಪ್ಪಿಸುವ ಮೂಲಕ ಇದಕ್ಕೆ ಪರಿಹಾರ ಪಡೆಯಬಹುದು.

ದೇಹದ ಉಷ್ಣತೆಯನ್ನು ಹೆಚ್ಚಿಸುವ ಅಭ್ಯಾಸಗಳು ಯಾವುವು?

ಅತಿಯಾಗಿ ತಣ್ಣಗಿರುವ ನೀರು ಕುಡಿಯುವುದು: ಬಾಯಾರಿಕೆ ಆಯಿತು ಅಂದಾಗ ಅತೀಯಾಗಿ ತಣ್ಣಗಿರುವ ಫ್ರಿಡ್ಜ್‌ನಲ್ಲಿಟ್ಟ ನೀರನ್ನು ಕುಡಿಯುತ್ತೇವೆ. ಆದರೆ ಇದು ದೇಹವನ್ನು ತಣ್ಣಗಿರಿಸುವ ಬದಲು ಉಷ್ಣತೆ ಹೆಚ್ಚಿಸುತ್ತದೆ. ದೇಹದ ರಕ್ತನಾಳಗಳನ್ನು ಸಂಕುಚಿತಗೊಳಿಸಿ, ಉಷ್ಣತೆಯು ಹೊರಹೋಗದಂತೆ ತಡೆಯುತ್ತದೆ

ತಪ್ಪು ಬಟ್ಟೆಗಳ ಆಯ್ಕೆ: ನೀವು ಧರಿಸುವ ಬಟ್ಟೆಯು ನಿಮ್ಮ ದೇಹದ ಉಷ್ಣತೆಯ ಮೇಲೆ ಪರಿಣಾಮ ಬೀರುತ್ತದೆ. ಪಾಲಿಸ್ಟರ್ ಮತ್ತು ನೈಲಾನ್‌ನಂತಹ ಬಟ್ಟೆಗಳು ದೇಹದ ಶಾಖವನ್ನು ಹೊರಹೋಗಲು ಬಿಡದೆ ಒಳಗೆಯೇ ಹಿಡಿದಿಡುತ್ತವೆ. ಹತ್ತಿ ಮತ್ತು ಲಿನಿನ್‌ನಂತಹ ನೈಸರ್ಗಿಕ ಬಟ್ಟೆಗಳು ನಿಮ್ಮ ಚರ್ಮಕ್ಕೆ ಉಸಿರಾಡಲು ಅನುವು ಮಾಡಿಕೊಡುತ್ತದೆ.

ಬ್ರೇಕ್‌ಫಾಸ್ಟ್‌ ಸ್ಕಿಪ್‌ ಮಾಡ್ತಿದ್ದೀರಾ? ಈ ಆರೋಗ್ಯ ಸಮಸ್ಯೆ ಕಾಡಬಹುದು!

ಆಹಾರ ಪದ್ಧತಿಯಲ್ಲಿ ನಿರ್ಲಕ್ಷ್ಯ: ಮಸಾಲೆಯುಕ್ತ ಆಹಾರಗಳು ಮತ್ತು ಕೊಬ್ಬಿನ ಆಹಾರಗಳು ದೇಹದ ಉಷ್ಣತೆಯನ್ನು ಹೆಚ್ಚಿಸಬಹುದು. ಇವುಗಳನ್ನು ಜೀರ್ಣಿಸಲು ದೇಹಕ್ಕೆ ಹೆಚ್ಚಿನ ಶಕ್ತಿ ಬೇಕಾಗುವುದರಿಂದ ಆಂತರಿಕ ಉಷ್ಣತೆ ಹೆಚ್ಚುತ್ತದೆ.

​ಅತಿಯಾದ ಕೆಫೀನ್ ಮತ್ತು ಆಲ್ಕೋಹಾಲ್ ಸೇವನೆ: ಕಾಫಿ, ಚಹಾ, ಸೋಡಾ ಮತ್ತು ಆಲ್ಕೋಹಾಲ್ ಮೂತ್ರ ವರ್ಧಕಗಳಾಗಿವೆ. ಅವು ನಿಮ್ಮನ್ನು ಆಗಾಗ್ಗೆ ಮೂತ್ರ ವಿಸರ್ಜಿಸಲು ಒತ್ತಾಯಿಸುತ್ತವೆ. ಇದರಿಂದ ದೇಹದ ಉಷ್ಣತೆ ಕೂಡ ಹೆಚ್ಚಾಗುತ್ತದೆ.

ಒಲೆಯ ಅತಿಯಾದ ಬಳಕೆ: ಬೇಸಗೆಯ ತಿಂಗಳುಗಳಲ್ಲಿ ಒಳಾಂಗಣದಲ್ಲಿ ಅಡುಗೆ ಮಾಡುವುದರಿಂದ ನಿಮ್ಮ ವಾಸಸ್ಥಳ ಬಿಸಿಯಾಗಬಹುದ. ಒಲೆ ಮೇಲೆ ಅವಲಂಬಿತರಾಗುವ ಬದಲು, ನಿಮ್ಮ ಮನೆಯನ್ನು ಬಿಸಿ ಮಾಡದೆಯೇ ಊಟ ತಯಾರಿಸಲು ಮೈಕ್ರೋವೇವ್ ಅಥವಾ ಗ್ರಿಲ್ ಅನ್ನು ಬಳಸಿ.

​ಏನು ಮಾಡಬೇಕು?

• ಮಡಕೆ ನೀರು ಅಥವಾ ಕೋಣೆಯ ಉಷ್ಣಾಂಶದಲ್ಲಿರುವ ನಾರ್ಮಲ್ ನೀರನ್ನು ಕುಡಿಯಿರಿ.
• ಗಾಳಿಯಾಡುವ, ಹಗುರವಾದ ಮತ್ತು ತಿಳಿ ಬಣ್ಣದ ಹತ್ತಿ ಲಿನಿನ್ ಬಟ್ಟೆಗಳನ್ನು ಧರಿಸಿ.
• ಹರ್ಬಲ್ ಟೀ ಅಥವಾ ನೈಸರ್ಗಿಕ ತಂಪು ಪಾನೀಯಗಳನ್ನು ಬಳಸಿ.
• ಕೋಣೆಯ ಉಷ್ಣಾಂಶ ತೀವ್ರವಾಗಿದ್ದಾಗ, ಕಿಟಕಿ-ಬಾಗಿಲುಗಳನ್ನು ತೆರೆಯಿರಿ.