Pralhad Joshi: ನವೀಕರಿಸಬಹುದಾದ ಇಂಧನ ಉತ್ಪಾದನೆಯಲ್ಲಿ ಭಾರತ ಶೇ.86 ರಷ್ಟು ಪ್ರಗತಿಯ ದಾಖಲೆ ನಿರ್ಮಿಸಿದೆ: ಪ್ರಲ್ಹಾದ್‌ ಜೋಶಿ

ನವದೆಹಲಿ: ನವೀಕರಿಸಬಹುದಾದ ಇಂಧನ ಕ್ಷೇತ್ರದಲ್ಲಿ ಎನ್‌ಡಿಎ ಸರ್ಕಾರದ (NDA Government) ಅವಧಿಯಲ್ಲಿ ಜಗತ್ತೇ ಬೆರಗಾಗುವಂತೆ ಭಾರತ ಅಸಾಮಾನ್ಯ ಸಾಧನೆಗೈಯುತ್ತಿದೆ ಎಂದು ಕೇಂದ್ರ ಹೊಸ ಮತ್ತು ನವೀಕರಿಸಬಹುದಾದ ಇಂಧನ ಸಚಿವ ಪ್ರಲ್ಹಾದ್‌ ಜೋಶಿ (Pralhad Joshi) ತಿಳಿಸಿದ್ದಾರೆ.

2004-2014 ರ ಯುಪಿಎ ಅವಧಿಗೆ ಹೋಲಿಸಿ ನೋಡಿದರೆ 2014-2024ರ ಅವಧಿಯ ಎನ್‌ಡಿಎ ಸರ್ಕಾರದ ಅವಧಿಯಲ್ಲಿ ಜಗತ್ತೇ ಭಾರತದತ್ತ ದಿಟ್ಟಿಸಿ ನೋಡುವಂತೆ ನವೀಕರಿಸಬಹುದಾದ ಇಂಧನ ಉತ್ಪಾದನೆಯಲ್ಲಿ ಸಕ್ರೀಯವಾಗಿದೆ ಎಂದು ಸಚಿವರು ತಮ್ಮ ʼಎಕ್ಸ್‌ʼ ಖಾತೆಯಲ್ಲಿ ತಿಳಿಸಿದ್ದಾರೆ.

ಕಳೆದೊಂದು ದಶಕದಲ್ಲಿ ನವೀಕರಿಸಬಹುದಾದ ಇಂಧನ ಉತ್ಪಾದನೆಯಲ್ಲಿ ಭಾರತ ಶೇ.86 ರಷ್ಟು ಪ್ರಗತಿಯ ದಾಖಲೆ ನಿರ್ಮಿಸಿದೆ. 2013-14ರಲ್ಲಿ 193.50 ಬಿಲಿಯನ್ ಯುನಿಟ್ ಇದ್ದರೆ, 2023-24ರ ಈ ದಶಕದಲ್ಲಿ ಬರೋಬ್ಬರಿ 359.89 ಬಿಲಿಯನ್ ಉತ್ಪಾದನೆಗೈದು ತಮ್ಮ ಸರ್ಕಾರ ದೇಶದ ಇಂಧನ ಸ್ವಾವಲಂಬನೆಗೆ ಅಮೂಲ್ಯ ಕೊಡುಗೆ ನೀಡುತ್ತಿದೆ ಎಂದಿದ್ದಾರೆ.

ಸೋಲಾರ್ ಘಟಕ ಅಳವಡಿಕೆ ಅಪರಿಮಿತ

ಸೋಲಾರ್ ಘಟಕಗಳ ಅಳವಡಿಕೆ ಸಾಮರ್ಥ್ಯದಲ್ಲಿ ಅಪರಿಮಿತ ಅಂದರೆ, 93 GW, ಶೇ.3200ರಷ್ಟು ಏರಿಕೆ ದಾಖಲಿಸಿದೆ. 2004 ರಿಂದ 14ರವರೆಗೆ ಕೇವಲ 2.84 Gw ಇತ್ತು. ಇನ್ನು, ಗಾಳಿ ವಿದ್ಯುತ್ ಶಕ್ತಿ ಘಟಕಗಳ ಅಳವಡಿಕೆಯಲ್ಲಿ (2004-14ರಲ್ಲಿ 21 Gw) 48 gw, ಶೇ 128ರಷ್ಟು ಹೆಚ್ಚಳ ಕಂಡಿದೆ.

ನವೀಕರಿಸಬಹುದಾದ ಇಂಧನ ಸಾಮರ್ಥ್ಯ (2004-14ರಲ್ಲಿ 75.52 gw) ಈಗ 220 GW ಸಾಧಿಸಿದೆ. ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರ ಸಮರ್ಥ ಆಡಳಿತ ಮತ್ತು ಅಗತ್ಯ ಸಹಕಾರದಿಂದ ಭಾರತ ಸೌರ, ಗಾಳಿ ಮತ್ತು ಶುದ್ಧ ಇಂಧನ ಶಕ್ತಿ ಸಾಮರ್ಥ್ಯದಲ್ಲಿ ಹೀಗೆ ಗಮನಾರ್ಹ ಪ್ರಗತಿಯ ಜತೆಗೆ ಇಂಧನ ಕ್ಷೇತ್ರದಲ್ಲಿ ಸ್ವಾವಲಂಬನೆ ಸಾಧಿಸುತ್ತಿದೆ ಎಂದು ಸಚಿವರು ಹೇಳಿದ್ದಾರೆ.

ಈ ಸುದ್ದಿಯನ್ನೂ ಓದಿ | ತೆಂಡೂಲ್ಕರ್‌ಗೆ ಜೀವಮಾನ ಶ್ರೇಷ್ಠ: 2023-24ರ ಸಾಲಿನ ಬಿಸಿಸಿಐ ಪ್ರಶಸ್ತಿ ವಿಜೇತರ ವಿವರ!

ಹಸಿರು ಇಂಧನ ಶಕ್ತಿ ಭಾರತ ಪ್ರೇರಣೆ

ಹಸಿರು ಇಂಧನ ಶಕ್ತಿಯಲ್ಲಿ ಭಾರತ ವಿಶ್ವಕ್ಕೆ ಪ್ರೇರಣೆಯಾಗಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ಇಚ್ಛಾಶಕ್ತಿ, ಮಾರ್ಗದರ್ಶನ ಮತ್ತು ಅಗತ್ಯ ಸಹಕಾರದಿಂದ ಭಾರತದಲ್ಲಿ ಪರಿಸರಸ್ನೇಹಿ ಇಂಧನ ಶಕ್ತಿ ಸಾಮರ್ಥ್ಯ ಇದೀಗ ದ್ವಿಗುಣಗೊಂಡಿದೆ. ಇದು ದೇಶದ ಸುಸ್ಥಿರತೆ ಮತ್ತು ಶಕ್ತಿಯ ಸುರಕ್ಷತೆಯನ್ನು ನಿರೂಪಿಸುತ್ತಿದೆ ಎಂದು ಸಚಿವ ಪ್ರಲ್ಹಾದ್‌ ಜೋಶಿ ಹೇಳಿದ್ದಾರೆ.