ಕರ್ನಾಟಕ ನೇಮಕಾತಿ ಪರೀಕ್ಷೆ ಹಗರಣ: 50 ಲಕ್ಷ ರೂ. ಲಂಚ ಕೊಟ್ಟರೆ ಸರ್ಕಾರಿ ಹುದ್ದೆ ಪಕ್ಕಾ ಎಂದಿದ್ದ ಅಧಿಕಾರಿಗಳು, ಬಯಲಾಯ್ತು ಕರ್ಮಕಾಂಡ

ಬೆಂಗಳೂರು, ಅ.8: ಕರ್ನಾಟಕ ನೇಮಕಾತಿ ಪರೀಕ್ಷೆಯಲ್ಲಿ ಹಗರಣ ನಡೆದಿದೆ. ಜನವರಿಯಲ್ಲಿ ನಡೆದ ಕರ್ನಾಟಕ ಸರ್ಕಾರಿ ನೇಮಕಾತಿ ಪರೀಕ್ಷೆಗೆ (Karnataka Recruitment Exam Scam) ಹಾಜರಾಗಿದ್ದ ಹತ್ತು ಅಭ್ಯರ್ಥಿಗಳನ್ನು ಬೆಂಗಳೂರಿನ ಹೊರವಲಯದಲ್ಲಿರುವ ರೆಸಾರ್ಟ್‌ಗೆ ಕರೆದೊಯ್ದು, ಪರೀಕ್ಷೆಗೆ ಒಂದು ದಿನ ಮೊದಲು 80 ಪ್ರಶ್ನೆಗಳಿಗೆ ಸರಿಯಾದ ಉತ್ತರಗಳನ್ನು ನೀಡಿ 50 ಲಕ್ಷ ರೂಪಾಯಿಗಳವರೆಗೆ ಲಂಚ ನೀಡಲಾಗಿದೆ ಎಂದು ಜಾರಿ ನಿರ್ದೇಶನಾಲಯ (ED) ತಿಳಿಸಿದೆ.

ಈ ಅಭ್ಯರ್ಥಿಗಳು ಈ ವರ್ಷದ ಜನವರಿ 8 ಮತ್ತು 9ರಂದು ನಡೆದ ಕರ್ನಾಟಕ ಲೋಕಸೇವಾ ಆಯೋಗದ (KPSC) ಪಶುವೈದ್ಯಾಧಿಕಾರಿಗಳ ನೇಮಕಾತಿ ಪರೀಕ್ಷೆಗೆ ಹಾಜರಾಗಿದ್ದರು. ಈ ಪರೀಕ್ಷೆಯಲ್ಲಿ 400 ಹುದ್ದೆಗಳ ಭರ್ತಿಗೆ ನೇಮಕಾತಿ ನಡೆಯುತ್ತಿತ್ತು. ಅಭ್ಯರ್ಥಿಗಳನ್ನು ರೆಸಾರ್ಟ್‌ಗೆ ಕರೆದೊಯ್ಯಲಾಯಿತು. ಅಲ್ಲಿ ಅವರಿಗೆ ಸರಿಯಾದ ಉತ್ತರ ಆಯ್ಕೆಗಳೊಂದಿಗೆ 80 ಪ್ರಶ್ನೆಗಳನ್ನು ಹೊಂದಿರುವ ಪ್ರಶ್ನೆಪತ್ರಿಕೆಯನ್ನು ನೀಡಿ, ಅವುಗಳನ್ನು ಕಂಠಪಾಠ ಮಾಡಿಕೊಳ್ಳುವಂತೆ ಸೂಚಿಸಲಾಗಿತ್ತು ಎಂದು ಇಡಿ ಅಧಿಕಾರಿಗಳು ಹೇಳಿದ್ದಾರೆ.

ಕೆಪಿಎಸ್‌ಸಿ ಪರೀಕ್ಷಾ ನಿಯಂತ್ರಕ ಜ್ಞಾನೇಂದ್ರ ಕುಮಾರ್ ಗಂಗ್ವಾರ್ ಅವರು ತಮ್ಮ ಸಹಚರ ಬಸವರಾಜ ಕನ್ನಾಳೆ ಮೂಲಕ ಈ ಪ್ರಶ್ನೆಪತ್ರಿಕೆಯನ್ನು ಸೋರಿಕೆ ಮಾಡಿದ್ದಾರೆ ಎಂದು ಇಡಿ ತಿಳಿಸಿದೆ. ನೇಮಕಾತಿ ಪರೀಕ್ಷೆಯಲ್ಲಿ ಅಂತಿಮ ಆಯ್ಕೆಗೆ ಅನುಕೂಲ ಮಾಡಿಕೊಡಲು ಕನ್ನಾಳೆ ಅವರು ಪ್ರತಿ ಅಭ್ಯರ್ಥಿಯಿಂದ 40 ಲಕ್ಷದಿಂದ 50 ಲಕ್ಷ ರೂ.ಗಳವರೆಗೆ ಹಣವನ್ನು ಸಂಗ್ರಹಿಸಿದ್ದಾರೆ ಎಂದು ಆರೋಪಿಸಲಾಗಿದೆ.

5 ರಿಂದ 70 ಲಕ್ಷವರೆಗೂ ಪ್ರಶ್ನೆ ಪತ್ರಿಕೆಗಳ ಮಾರಾಟ: ಅ.19ರವರೆಗೆ ಸಾಹುಕಾರ್‌ ಡಾ.ಗೀತಾ ಇಡಿ ಕಸ್ಟಡಿಗೆ

ಇಡಿ ಅಧಿಕಾರಿಗಳು ಈ ಹಿಂದೆ ಪರೀಕ್ಷೆಯಲ್ಲಿ ಯಶಸ್ವಿಯಾದ ಅಭ್ಯರ್ಥಿಯೊಬ್ಬರಿಂದ 80 ಲಕ್ಷ ರೂ. ಮೌಲ್ಯದ ಸಹಿ ಮಾಡಲಾದ ಖಾಲಿ ಚೆಕ್‌ಗಳು ಹಾಗೂ ಸಹಿ ಮಾಡಲಾದ ಖಾಲಿ ಪ್ರಾಮಿಸರಿ ನೋಟ್‌ಗಳನ್ನು ವಶಪಡಿಸಿಕೊಂಡಿದ್ದರು. ಇದುವರೆಗೆ ನಡೆಸಿದ ತನಿಖೆಯಲ್ಲಿ, ಸೋರಿಕೆಯಾದ ಪರೀಕ್ಷಾ ಸಾಮಗ್ರಿಯನ್ನು ಪಡೆದಿದ್ದಾರೆ ಎನ್ನಲಾದ 10 ಅಭ್ಯರ್ಥಿಗಳನ್ನು ತನಿಖಾ ಸಂಸ್ಥೆ ಗುರುತಿಸಿದೆ.

ಅಲ್ಲದೆ, ಪರೀಕ್ಷೆ ಆರಂಭವಾಗುವ ಕೆಲವೇ ಸಮಯದ ಮೊದಲು ಆರು ಅಭ್ಯರ್ಥಿಗಳಿಗೆ, ತಲಾ 20 ಲಕ್ಷ ರೂ.ಗಳಿಂದ 40 ಲಕ್ಷ ರೂ.ವರೆಗೆ ಲಂಚದ ಹಣಕ್ಕೆ ಬದಲಾಗಿ, ಅವರ ಹೆಸರಿಗೆ ನಿರ್ದಿಷ್ಟವಾಗಿ ಸಿದ್ಧಪಡಿಸಲಾದ ಉತ್ತರ ಕೀಗಳನ್ನು ನೀಡಲಾಗಿತ್ತು ಎಂಬುದನ್ನೂ ತನಿಖೆಯಲ್ಲಿ ಪತ್ತೆಹಚ್ಚಲಾಗಿದೆ. ಪರೀಕ್ಷಾ ಅಕ್ರಮಕ್ಕೆ ಸಂಬಂಧಿಸಿದ ಪ್ರಕರಣದಲ್ಲಿ ಗಂಗ್ವಾರ್ ಮತ್ತು ಕನ್ನಾಲೆ ಅವರನ್ನು ಜಾರಿ ನಿರ್ದೇಶನಾಲಯ ಬಂಧಿಸಿದೆ. ಗಂಗ್ವಾರ್ ಅವರನ್ನು ಸೆಪ್ಟೆಂಬರ್ 18ರಂದು ಬಂಧಿಸಲಾಗಿದ್ದು, ಕನ್ನಾಲೆ ಅವರನ್ನು ಅದಕ್ಕೂ ಒಂದು ದಿನ ಮುನ್ನ ಬಂಧಿಸಲಾಗಿತ್ತು.

ಅಮಾನತುಗೊಂಡಿರುವ ಕೆಪಿಎಸ್‌ಸಿ ಅಧ್ಯಕ್ಷ ಶಿವಶಂಕರಪ್ಪ ಸಾಹುಕರ್ ಮತ್ತು ಕೆಪಿಎಸ್‌ಸಿ ಸದಸ್ಯೆ ಬಿ.ವಿ. ಗೀತಾ ಅವರನ್ನು ಇಡಿ ಬಂಧಿಸಿತ್ತು. ಗೀತಾ ಅವರು ಗಂಗ್ವಾರ್ ಅವರಿಂದ ಸೋರಿಕೆಯಾದ ಉತ್ತರದ ಕೀಲಿಗಳನ್ನು ಪಡೆದುಕೊಂಡಿದ್ದಾರೆ. ಒಬ್ಬ ಅಭ್ಯರ್ಥಿಯಿಂದ 40 ಲಕ್ಷ ರೂ. ಒಪ್ಪಂದದ ಲಂಚಕ್ಕೆ ಬದಲಾಗಿ ಮುಂಗಡವಾಗಿ 20 ಲಕ್ಷ ರೂ.ಗಳನ್ನು ಪಡೆದಿದ್ದಾರೆ ಎಂದು ಇಡಿ ಆರೋಪಿಸಿದೆ. ಸಾಹುಕರ್ ಅವರು ಒಪ್ಪಿಕೊಂಡ 20 ಲಕ್ಷ ರೂ. ಲಂಚಕ್ಕೆ ಬದಲಾಗಿ ಮುಂಗಡವಾಗಿ 10 ಲಕ್ಷ ರೂ.ಗಳನ್ನು ಪಡೆದಿದ್ದಾರೆ ಎಂದು ಆರೋಪಿಸಲಾಗಿದೆ.

ತನಿಖೆಯಲ್ಲಿ ಕೆಪಿಎಸ್‌ಸಿಯ ಗೌಪ್ಯ 1:3 ಮೆರಿಟ್ ಪಟ್ಟಿಯನ್ನು ದುರುಪಯೋಗಪಡಿಸಿಕೊಂಡಿರುವ ಆರೋಪವೂ ಬೆಳಕಿಗೆ ಬಂದಿದೆ. ಅಧಿಕಾರಿಗಳು ಅಭ್ಯರ್ಥಿಗಳ ಮೆರಿಟ್ ಸ್ಥಾನಗಳನ್ನು ಪಡೆದುಕೊಂಡು, ಆಯ್ಕೆಯಾಗುವ ಸಾಧ್ಯತೆ ಇರುವ ಅಭ್ಯರ್ಥಿಗಳನ್ನು ಸಂಪರ್ಕಿಸಿದ್ದರು ಎಂದು ತನಿಖಾ ಸಂಸ್ಥೆ ತಿಳಿಸಿದೆ. ಅವರ ಆಯ್ಕೆಯನ್ನು ಖಚಿತಪಡಿಸಿಕೊಳ್ಳುವ ಸಲುವಾಗಿ 10 ಲಕ್ಷದಿಂದ 50 ಲಕ್ಷ ರೂ.ಗಳವರೆಗೆ ಬೇಡಿಕೆ ಇಟ್ಟಿದ್ದಾರೆ ಎಂದು ತನಿಖಾ ಸಂಸ್ಥೆ ತಿಳಿಸಿದೆ.