Lokayukta Raid: ಖಾತೆ ಮಾಡಲು ₹1 ಲಕ್ಷ ಲಂಚ: ಸಿಕ್ಕಿಬಿದ್ದ ಆರ್.ಐ. ನಾಗೇಶ್

ವರ್ಷಗಳಿಂದ ಬೀಡು ಬಿಟ್ಟಿರುವ ಅಧಿಕಾರಿಗಳನ್ನು ಜಿಲ್ಲೆಯಿಂದ ಹೊರ ಕಳಿಸಿ "ಉಪ ಮುಖ್ಯಮಂತ್ರಿಗಳು ಹಾಗೂ ಕಂದಾಯ ಇಲಾಖೆ ಸಚಿವರ ತವರು ಜಿಲ್ಲೆಯಲ್ಲಿ ದಿನನಿತ್ಯ ರೈತರು ತಮ್ಮ ಕೆಲಸಗಳನ್ನು ಮಾಡಿಕೊಳ್ಳಲು ಅಲೆದಾಡುತ್ತಿದ್ದಾರೆ. ಲಂಚದ ಹಣ ನೀಡದಿದ್ದರೆ ಕೆಲಸವೇ ಆಗುವುದಿಲ್ಲ. ಪೌತಿ ಖಾತೆ ಆಂದೋಲನದಲ್ಲಿ ₹1 ಲಕ್ಷ ಲಂಚ ಕೇಳಿದ ಆರ್.ಐ. ನಾಗೇಶ್ ಅವರನ್ನು ತಕ್ಷಣವೇ ಸೇವೆಯಿಂದ ವಜಾಗೊಳಿಸಬೇಕು. ಜಿಲ್ಲೆಯಲ್ಲಿ ಅನೇಕ ವರ್ಷಗಳಿಂದ ಬೀಡು ಬಿಟ್ಟಿರುವ ಆರ್.ಐ., ವಿ.ಎ., ಗ್ರೇಡ್-2 ಸೇರಿದಂತೆ ಹಲವು ಅಧಿಕಾರಿಗಳನ್ನು ತಕ್ಷಣವೇ ಜಿಲ್ಲೆಯಿಂದ ಹೊರಕಳಿಸಬೇಕು. ಇವರು ವರ್ಷಗಳಿಂದ ಇಲ್ಲೇ ತಿಕಾಣಿ ಹೂಡಿರುವ ಕಾರಣ ಭ್ರಷ್ಟಾಚಾರ ಮಿತಿ ಮೀರಿದ್ದು, ಸಾಲು ಸಾಲು ರಾಜಕಾಲುವೆ ಹಾಗೂ ಕೆರೆ-ಕಟ್ಟೆಗಳು ಭೂಮಾಫಿಯಾದವರ ಪಾಲಾಗಿವೆ. ಈ ಭ್ರಷ್ಟ ಅಧಿಕಾರಿಗಳ ವಿರುದ್ಧ ಕಂದಾಯ ಸಚಿವರು ತಕ್ಷಣವೇ ಕಠಿಣ ಕಾನೂನು ಕ್ರಮ ಜರುಗಿಸಬೇಕು."

ಟೈಗರ್ ನಾಗ್ (ಜೆಟ್ಟಿ ಅಗ್ರಹಾರ ನಾಗರಾಜು), ಸಾಮಾಜಿಕ ಹೋರಾಟಗಾರ

ಭ್ರಷ್ಟ ಅಧಿಕಾರಿಯನ್ನು ಕೆಲಸದಿಂದ ವಜಾ ಮಾಡಿ "ಡಿಸಿಎಂ ಮತ್ತು ಕಂದಾಯ ಸಚಿವರ ತವರಲ್ಲಿ ಅಧಿಕಾರಿಗಳು ಲಂಚವಿಲ್ಲದೆ ಯಾವ ಕೆಲಸವನ್ನೂ ಮಾಡುತ್ತಿಲ್ಲ. ಸರ್ಕಾರವೇ ಪೌತಿ ಖಾತೆ ಆಂದೋಲನ ಮಾಡುತ್ತಿದೆ. ಆದರೆ ಒಂದು ಪೌತಿ ಖಾತೆಗೆ ₹1 ಲಕ್ಷ ಕೇಳಿದರೆ ರೈತರು ಯಾಕೆ ಲಂಚ ಕೊಡಬೇಕು? ಮಾನ್ಯ ಡಿಸಿಎಂ ಮತ್ತು ಕಂದಾಯ ಸಚಿವರು ಇಂತಹ ಭ್ರಷ್ಟ ಅಧಿಕಾರಿಗಳನ್ನು ಮುಲಾಜಿಲ್ಲದೆ ಸರ್ಕಾರಿ ಕೆಲಸದಿಂದ ವಜಾ ಮಾಡಬೇಕು."

ಮಹೇಶ್ ಮಧುಗಿರಿ, ಸಾಮಾಜಿಕ ಹೋರಾಟಗಾರ

ಬಡ ರೈತರು ಲಂಚ ಎಲ್ಲಿಂದ ತರಬೇಕು? "ರಾಜ್ಯಾದ್ಯಂತ ತೀವ್ರ ಬರಗಾಲದ ಪರಿಸ್ಥಿತಿ ನಿರ್ಮಾಣವಾಗಿದೆ. ರೈತರು ತಮ್ಮ ಪೂರ್ವರೀಕರಿಂದ ಬಂದ ಜಮೀನನ್ನು ಪೌತಿ ಖಾತೆ ಮಾಡಿಕೊಳ್ಳಲು ಅರ್ಜಿ ಸಲ್ಲಿಸಿದರೆ ₹1 ಲಕ್ಷ ಲಂಚ ಕೇಳಿದರೆ ಬಡ ರೈತರು ಎಲ್ಲಿಂದ ಕೊಡಬೇಕು? ಜಿಲ್ಲಾ ಮತ್ತು ತಾಲೂಕು ಆಡಳಿತ ಯಾವ ಮಟ್ಟಕ್ಕೆ ಇಳಿದಿದೆ ಎಂಬುದಕ್ಕೆ ಈ ಕಾರ್ಯಾಚರಣೆ ಸಾಕ್ಷಿಯಾಗಿದೆ. ಹಣ ಕೊಟ್ಟರೆ ಮಾತ್ರ ತಾಲೂಕು ಕಚೇರಿಯಲ್ಲಿ ಕೆಲಸ ನಡೆಯುತ್ತದೆ."

ರಫೀಕ್ ಪಾಷ, ಸಾಮಾಜಿಕ ಹೋರಾಟಗಾರ