Rajinikanth: 'ಜೈಲರ್ 2' ಸಿನಿಮಾವು 1000 ಕೋಟಿ ಕ್ಲಬ್ ತಲುಪುವುದಿಲ್ಲವೇ? ಚಿತ್ರತಂಡ ಎಡವಿದ್ದೆಲ್ಲಿ?

'ಸೂಪರ್ ಸ್ಟಾರ್' ರಜನಿಕಾಂತ್ ಮತ್ತು ನಿರ್ದೇಶಕ ನೆಲ್ಸನ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದಿರುವ ‘ಜೈಲರ್ 2’ ಚಿತ್ರ ಬಾಕ್ಸ್ ಆಫೀಸ್‌ನಲ್ಲಿ ಹಳೆಯ ದಾಖಲೆಗಳನ್ನು ಧೂಳೀಪಟ ಮಾಡುತ್ತಿದೆ. ಬಿಡುಗಡೆಯಾದ ಮೊದಲ ದಿನದಿಂದಲೇ ಭರ್ಜರಿ ಗಳಿಕೆ ಮಾಡುತ್ತಿರುವ ಈ ಸಿನಿಮಾ, ಕಾಲಿವುಡ್ ಇತಿಹಾಸದಲ್ಲೇ ಅತ್ಯಂತ ವೇಗವಾಗಿ ರೂ. 700 ಕೋಟಿ ಗಡಿ ದಾಟಿ ಹೊಸ ದಾಖಲೆಗಳನ್ನು ಬರೆದಿದೆ.

'2.0', 'ಲಿಯೋ' ಮುಂತಾದ ಚಿತ್ರಗಳ ಲೈಫ್‌ಟೈಮ್ ಕಲೆಕ್ಷನ್ ಅನ್ನು ಹಿಂದಿಕ್ಕಿ 'ಇಂಡಸ್ಟ್ರಿ ಹಿಟ್' ಆಗಿ ಹೊರಹೊಮ್ಮಿದೆ. ಆರಂಭದಲ್ಲಿ ಈ ಚಿತ್ರವು ಸುಲಭವಾಗಿ 1,000 ಕೋಟಿ ರೂ. ಕ್ಲಬ್ ಸೇರಲಿದೆ ಎಂದು ಅಂದಾಜಿಸಲಾಗಿತ್ತು. ಆದರೆ, ಪ್ರಸ್ತುತ ಬಾಕ್ಸ್ ಆಫೀಸ್ ಟ್ರೆಂಡ್ ಗಮನಿಸಿದರೆ, ಸಾವಿರ ಕೋಟಿಯ ಮೈಲಿಗಲ್ಲನ್ನು ತಲುಪುವುದು 'ಜೈಲರ್ 2' ಚಿತ್ರತಂಡಕ್ಕೆ ಕಷ್ಟಕರ ಎಂದೇ ಬಾಕ್ಸ್ ಆಫೀಸ್ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ. ಇಂಥದ್ದೊಂದು ಸಂದೇಹ ಮೂಡಲು ಚಿತ್ರತಂಡದ ಕೆಲವೊಂದು ನಿರ್ಧಾರಗಳೂ ಕಾರಣ ಎಂಬ ಮಾತಿದೆ!

ಸೆಕೆಂಡ್ ಹಾಫ್‌ನಲ್ಲಿ ಇರಬೇಕಿತ್ತು ಇನ್ನಷ್ಟು ರೋಚಕತೆ!

ವಿಶ್ವಾದ್ಯಂತ ಇದುವರೆಗೆ ಬರೋಬ್ಬರಿ ರೂ. 730 ಕೋಟಿಗೂ ಅಧಿಕ ಗ್ರಾಸ್ ಕಲೆಕ್ಷನ್ ಮಾಡಿರುವ 'ಜೈಲರ್ 2' ಸಿನಿಮಾದ ಲೈಫ್‌ಟೈಮ್ ಕಲೆಕ್ಷನ್ 850 ಕೋಟಿ ರೂ.ವರೆಗೂ ತಲುಪುವ ಸಾಧ್ಯತೆಗಳಿವೆ. ಒಂದು ಪ್ರಾದೇಶಿಕ ಭಾಷಾ ಚಿತ್ರಕ್ಕೆ ಇದು ದೊಡ್ಡ ಸಾಧನೆಯೇ ಸರಿ. ಆದರೂ, 1,000 ಕೋಟಿ ರೂ. ಮೈಲಿಗಲ್ಲು ಕೈತಪ್ಪಲು ಕೆಲವೊಂದು ಬಲವಾದ ಕಾರಣಗಳು ಕಾಣಸಿಗುತ್ತವೆ. ಮೊದಲ ಭಾಗಕ್ಕೆ ಹೋಲಿಸಿದರೆ ಸೀಕ್ವೆಲ್‌ನ ಚಿತ್ರಕಥೆಯ ವೇಗ ಕೊಂಚ ತಗ್ಗಿದ್ದು, ಕ್ಲೈಮ್ಯಾಕ್ಸ್ ಕುರಿತು ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗಿದ್ದು ಕಲೆಕ್ಷನ್ ಮೇಲೆ ಪರಿಣಾಮ ಬೀರಿದೆ.

ಕೇವಲ ರಜನಿಕಾಂತ್ ಅವರ ಸ್ವಾಗ್, ಅನಿರುದ್ಧ್ ಅವರ ಅಬ್ಬರದ ಹಿನ್ನೆಲೆ ಸಂಗೀತ ಮತ್ತು ಅತಿಥಿ ಪಾತ್ರಗಳ ಮ್ಯಾಜಿಕ್ ಚಿತ್ರವನ್ನು ಮೊದಲ ವಾರದಲ್ಲೇ ದಾಖಲೆ ಮಟ್ಟಕ್ಕೆ ಕೊಂಡೊಯ್ದವು. ಆದರೆ, ದೀರ್ಘಾವಧಿಯಲ್ಲಿ ಪ್ರೇಕ್ಷಕರನ್ನು ಮತ್ತೆ ಮತ್ತೆ ಚಿತ್ರಮಂದಿರಕ್ಕೆ ಸೆಳೆಯುವಲ್ಲಿ ದ್ವಿತೀಯಾರ್ಧ ಕೊಂಚ ಎಡವಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ.

Jailer 2 Update: ಜೈಲರ್ 2 ಸಿನಿಮಾ ಬಗ್ಗೆ ಬಿಗ್‌ ಅಪ್‌ಡೇಟ್‌ ಕೊಟ್ಟ ರಜನಿಕಾಂತ್! ಕಮಲ್‌ ಜೊತೆಗಿನ ಮೂವಿ ಬಗ್ಗೆ ಹೇಳಿದ್ದನು?

ಉತ್ತರ ಭಾರತದ ಮಾರುಕಟ್ಟೆ ಕಡೆಗೆ ಗಮನ ಕೊಡಬೇಕಿತ್ತು

ಇದೆಲ್ಲದರ ಜೊತೆಗೆ ಉತ್ತರ ಭಾರತದಲ್ಲಿ ಎದುರಾದ ಚಿತ್ರಮಂದಿರಗಳ ಸಮಸ್ಯೆ ಪ್ರಮುಖ ಕಾರಣ ಎನ್ನಲಾಗಿದೆ. ಹಿಂದಿ ಬೆಲ್ಟ್‌ನಲ್ಲಿ ಮಲ್ಟಿಪ್ಲೆಕ್ಸ್ ಚೈನ್‌ ಜೊತೆಗಿನ ಒಟಿಟಿ ವಿಂಡೋ ನಿಯಮಾವಳಿಗಳ ಕಾರಣದಿಂದ ಪೂರ್ಣ ಪ್ರಮಾಣದ ಪರದೆಗಳು ಸಿಗದಿರುವುದು 'ಜೈಲರ್ 2' ಸಿನಿಮಾದ ಗಳಿಕೆಗೆ ದೊಡ್ಡ ಹೊಡೆತ ನೀಡಿದೆ. ಉತ್ತರ ಭಾರತದಲ್ಲಿ ಸರಿಯಾದ ಪ್ರಚಾರ ಮತ್ತು ಪರದೆಗಳ ಕೊರತೆಯಿಂದಾಗಿ ಅಲ್ಲಿ ನಿರೀಕ್ಷಿತ ಮಟ್ಟದಲ್ಲಿ ಕಲೆಕ್ಷನ್ ದಾಖಲಾಗಲಿಲ್ಲ. ಹಿಂದಿ ಮಾರುಕಟ್ಟೆಯಿಂದ ಕನಿಷ್ಠ ರೂ. 150 ರಿಂದ ರೂ. 200 ಕೋಟಿ ಕಲೆಕ್ಷನ್ ಬಂದಿದ್ದರೆ 'ಜೈಲರ್ 2' ಸುಲಭವಾಗಿ 1,000 ಕೋಟಿ ರೂ. ಕ್ಲಬ್ ಸೇರುತ್ತಿತ್ತು ಎಂದು ಸಿನಿಮಾ ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಆ ಕ್ಷಣಕ್ಕಾಗಿ ತಲೈವಾ ಅಭಿಮಾನಿಗಳ ವೆಯ್ಟಿಂಗ್!

ಏನೇ ಆದರೂ, 75ರ ಹರೆಯದಲ್ಲೂ ಬಾಕ್ಸ್ ಆಫೀಸ್‌ನಲ್ಲಿ ಈ ಮಟ್ಟದ ಅಬ್ಬರ ಸೃಷ್ಟಿಸುವುದು ಕೇವಲ ರಜನಿಕಾಂತ್ ಅವರಿಂದ ಮಾತ್ರ ಸಾಧ್ಯ ಎಂಬುದು ಮತ್ತೊಮ್ಮೆ ಸಾಬೀತಾಗಿದೆ. ತಮಿಳುನಾಡು ಮಾತ್ರವಲ್ಲದೆ ಕರ್ನಾಟಕ, ತೆಲುಗು‌ ರಾಜ್ಯಗಳು ಹಾಗೂ ವಿದೇಶಗಳಲ್ಲಿ ಲಾಭದ ಹೊಳೆಯನ್ನೇ ಹರಿಸಿದ 'ಜೈಲರ್ 2', ಬಾಕ್ಸ್ ಆಫೀಸ್‌ನಲ್ಲಿ ಮ್ಯಾಜಿಕ್ ಮಾಡಿ ಸಾವಿರ ಕೋಟಿ ಕ್ಲಬ್ ಸೇರಿದರೆ, ಈ ಸಾಧನೆ ಮಾಡಿದ ಮೊದಲ ತಮಿಳು ಸಿನಿಮಾ ಎನಿಸಿಕೊಳ್ಳಲಿದೆ. ಆ ಐತಿಹಾಸಿಕ ಕ್ಷಣಕ್ಕಾಗಿ ತಲೈವಾ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.