ಇದೆಂಥಾ ದುಷ್ಕೃತ್ಯ?! ಪ್ರಸಾದಕ್ಕಾಗಿ ದೇವಸ್ಥಾನದ ಸೇವಕನನ್ನೇ ಕೊಂದ ಕಿಡಿಗೇಡಿಗಳು

ನವದೆಹಲಿ: ದೆಹಲಿಯ (Delhi) ಪ್ರಸಿದ್ಧ ಕಲ್ಕಾಜಿ ದೇವಾಲಯದಲ್ಲಿ (Kalkaji Temple) ಶುಕ್ರವಾರ ರಾತ್ರಿ 9:30ರ ಸುಮಾರಿಗೆ ಪ್ರಸಾದ ವಿತರಣೆಗೆ (Distribution of Prasadam) ಸಂಬಂಧಿಸಿದ ವಾಗ್ವಾದವು ಭೀಕರ ಕೊಲೆಗೆ ಕಾರಣವಾಯಿತು. ದೇವಾಲಯದಲ್ಲಿ 15 ವರ್ಷಗಳಿಂದ ಸೇವಕನಾಗಿ ಸೇವೆ ಸಲ್ಲಿಸುತ್ತಿದ್ದ ಯೋಗೇಂದ್ರ ಸಿಂಗ್ (35) ಎಂಬಾತನ ಮೇಲೆ ದಕ್ಷಿಣಪುರಿಯ ನಿವಾಸಿ ಅತುಲ್ ಪಾಂಡೆ (30) ನೇತೃತ್ವದ ಗುಂಪೊಂದು ದೊಣ್ಣೆಯಿಂದ ಕ್ರೂರವಾಗಿ ಹಲ್ಲೆ ನಡೆಸಿ ಕೊಲೆ ಮಾಡಿದೆ. ಈ ಘಟನೆಯಿಂದ ಭಕ್ತರು ಆಘಾತಕ್ಕೊಳಗಾಗಿದ್ದಾರೆ.

ಪೊಲೀಸರ ಪ್ರಕಾರ, ದೇವಾಲಯದಲ್ಲಿ ಜಗಳದ ಬಗ್ಗೆ ಪಿಸಿಆರ್ ಕರೆ ಬಂದ ನಂತರ ತಂಡವು ಸ್ಥಳಕ್ಕೆ ಧಾವಿಸಿತು. ತನಿಖೆಯ ವೇಳೆ, ದರ್ಶನಕ್ಕೆ ಬಂದಿದ್ದ ಆರೋಪಿಗಳು ಯೋಗೇಂದ್ರ ಸಿಂಗ್‌ ಅವರಿಂದ ಪ್ರಸಾದ ಕೇಳಿದ್ದಾರೆ. ಆದರೆ ಯೋಗೇಂದ್ರ ಸಿಂಗ್ ಪ್ರಸಾದ ನೀಡಲು ನಿರಾಕರಿಸಿದಾಗ ವಾಗ್ವಾದ ಉಂಟಾಯಿತು. ಈ ಜಗಳವು ಶೀಘ್ರದಲ್ಲೇ ಹಿಂಸಾತ್ಮಕ ಘರ್ಷಣೆಗೆ ತಿರುಗಿತು. ಆರೋಪಿಗಳು ಯೋಗೇಂದ್ರ ಸಿಂಗ್‌ ಅವರ ಮೇಲೆ ದೊಣ್ಣೆಯಿಂದ ತೀವ್ರವಾಗಿ ಹಲ್ಲೆ ನಡೆಸಿದ್ದು, ಅವರು ಗಂಭೀರವಾಗಿ ಗಾಯಗೊಂಡಿದ್ದರು.

ಈ ಸುದ್ದಿಯನ್ನು ಓದಿ: Viral Video: ವಿದ್ಯಾರ್ಥಿಗಳಿಗೆ ಚಿತ್ರಹಿಂಸೆ ನೀಡಿದ ಸರ್ಕಾರಿ ಶಾಲಾ ಶಿಕ್ಷಕ; ವಿಡಿಯೊ ವೈರಲ್ ಬೆನ್ನಲ್ಲೇ ಅಮಾನತು

ಯೋಗೇಂದ್ರ ಸಿಂಗ್ ಉತ್ತರ ಪ್ರದೇಶದ ಹಾರ್ದೋಯ್‌ನ ಫತ್ತೇಪುರದ ನಿವಾಸಿಯಾಗಿದ್ದು, ದೀರ್ಘಕಾಲ ದೇವಾಲಯದ ಸೇವಕನಾಗಿ ಕಾರ್ಯನಿರ್ವಹಿಸುತ್ತಿದ್ದರು. ಗಾಯಗೊಂಡ ಅವರನ್ನು ತಕ್ಷಣವೇ ಏಮ್ಸ್ ಟ್ರಾಮಾ ಸೆಂಟರ್‌ಗೆ ಕರೆದೊಯ್ಯಲಾಯಿತು. ವೈದ್ಯರು ಎಲ್ಲ ಪ್ರಯತ್ನಗಳನ್ನೂ ಮಾಡಿದರೂ, ಗಾಯಗಳ ತೀವ್ರತೆಯಿಂದ ಯೋಗೇಂದ್ರ ಸಿಂಗ್ ಮೃತಪಟ್ಟಿದ್ದಾರೆ.

ಪೊಲೀಸರು ಭಾರತೀಯ ನ್ಯಾಯ ಸಂಹಿತೆಯ ಸೆಕ್ಷನ್ 103(1) ಮತ್ತು 3(5) ಅಡಿಯಲ್ಲಿ ಕೊಲೆ ಪ್ರಕರಣ ದಾಖಲಿಸಿದ್ದಾರೆ. ತನಿಖೆಯನ್ನು ತೀವ್ರಗೊಳಿಸಲಾಗಿದ್ದು, ಆರೋಪಿಗಳಾದ ಅತುಲ್ ಪಾಂಡೆ ಮತ್ತು ಗುಂಪಿನ ಇತರ ಸದಸ್ಯರ ವಿರುದ್ಧ ಕಠಿಣ ಕಾನೂನು ಕ್ರಮಕ್ಕೆ ಭರವಸೆ ನೀಡಲಾಗಿದೆ. ಈ ಘಟನೆಯು ದೇವಾಲಯದಂತಹ ಪವಿತ್ರ ಸ್ಥಳದಲ್ಲಿ ಸುರಕ್ಷತೆಯ ಕೊರತೆಯ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎತ್ತಿದೆ. ಭಕ್ತರು ಮತ್ತು ಸ್ಥಳೀಯರು ಆರೋಪಿಗಳಿಗೆ ಕಠಿಣ ಶಿಕ್ಷೆಯಾಗಬೇಕೆಂದು ಒತ್ತಾಯಿಸಿದ್ದಾರೆ.