Goa Night Club Fire: ಕ್ಲಬ್ ಹೊತ್ತಿ ಉರಿಯುವಾಗಲೇ ಥೈಲ್ಯಾಂಡ್ಗೆ ಎಸ್ಕೇಪ್; ಲೂತ್ರಾ ಸಹೋದರರ ಪತ್ತೆ ಮಾಡಿದ್ದೇ ರೋಚಕ
Luthra Brothers Arrested: ಗೋವಾ ನೈಟ್ಕ್ಲಬ್ ದುರಂತದ ಪ್ರಕರಣದಲ್ಲಿ ಪರಾರಿಯಾದ ಲೂತ್ರಾ ಸಹೋದರರನ್ನು ಥೈಲ್ಯಾಂಡ್ನಲ್ಲಿ ಬಂಧಿಸಲಾಗಿದೆ. ಭಾರತ ಮತ್ತು ಥಾಯ್ ಅಧಿಕಾರಿಗಳ ಸಹಯೋಗದೊಂದಿಗೆ, ಅವರ ಚಲನವಲನವನ್ನು ಶೀಘ್ರವಾಗಿ ಪತ್ತೆಹಚ್ಚಲಾಗಿದ್ದು, ಕಾನೂನು ಕ್ರಮ ಮುಂದುವರೆಯುತ್ತಿದೆ. ಆರೋಪಿ ಸಹೋದರರು ಪ್ರಸ್ತುತ ಥಾಯ್ ಬಂಧನದಲ್ಲಿದ್ದಾರೆ.
ಲೂತ್ರಾ ಸಹೋದರರು (ಸಂಗ್ರಹ ಚಿತ್ರ) -
ಪಣಜಿ, ಡಿ.11: ಗೋವಾದ ಬಿರ್ಚ್ ಬೈ ರೋಮಿಯೋ ಲೇನ್ನಲ್ಲಿ ಸಂಭವಿಸಿದ ಬೆಂಕಿ ಅವಘಡದಲ್ಲಿ (Goa Nightclub Tragedy) 25 ಜನರು ಮೃತಪಟ್ಟಿದ್ದಾರೆ. ಈ ದುರ್ಘಟನೆ ನಡೆದ ಕೂಡಲೇ ಥೈಲ್ಯಾಂಡ್ಗೆ (Thailand) ಪರಾರಿಯಾದ ನೈಟ್ಕ್ಲಬ್ನ ಮಾಲೀಕರಾದ ಗೌರವ್ ಮತ್ತು ಸೌರಭ್ ಲೂತ್ರಾ (Luthra Brothers) ಅವರನ್ನು ಬಂಧಿಸಲಾಗಿದ್ದು, ಶೀಘ್ರದಲ್ಲೇ ಅವರನ್ನು ಭಾರತಕ್ಕೆ ಕರೆತರುವ ನಿರೀಕ್ಷೆಯಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇಬ್ಬರನ್ನೂ ಫುಕೆಟ್ನಲ್ಲಿರುವ ಬಂಧನ ಕೇಂದ್ರಗಳಿಗೆ ಕರೆದೊಯ್ಯಲಾಗಿದೆ. ಅವರನ್ನು ವಾಪಸ್ ಕಳುಹಿಸುವ ಪ್ರಕ್ರಿಯೆಯನ್ನು ಪ್ರಾರಂಭಿಸಲಾಗಿರುವುದರಿಂದ ಭಾರತೀಯ ತಂಡಗಳು ಥಾಯ್ ಅಧಿಕಾರಿಗಳೊಂದಿಗೆ ಸಂಪರ್ಕವನ್ನು ಸಾಧಿಸಿವೆ.
ಭಾರತೀಯ ವಲಸೆ ಅಧಿಕಾರಿಗಳು ಅವರ ನಿರ್ಗಮನವನ್ನು ಖಚಿತ ಪಡಿಸಿದ ಬಳಿಕ ಬಹು-ಏಜೆನ್ಸಿ ಕಾರ್ಯಾಚರಣೆ ಪ್ರಾರಂಭವಾಯಿತು ಎಂದು ಉನ್ನತ ಸರ್ಕಾರಿ ಮೂಲಗಳು ತಿಳಿಸಿವೆ.
"ನಾವು ಸಹ ಸಂತ್ರಸ್ತರು" ಗೋವಾ ನೈಟ್ ಕ್ಲಬ್ ಮಾಲೀಕರಿಂದ ಬಂಧನ ಪೂರ್ವ ಜಾಮೀನು ಅರ್ಜಿ
ಅಧಿಕಾರಿಗಳ ಪ್ರಕಾರ, ಈ ಜಾಡು ಭಾರತೀಯ ವಲಸೆ ಕಚೇರಿಗಳಿಂದ ಆರಂಭವಾಯಿತು. ಮೊದಲು ಸಹೋದರರು ದೇಶವನ್ನು ತೊರೆದು ಫುಕೆಟ್ಗೆ ಪ್ರಯಾಣಿಸಿದ್ದಾರೆ ಎಂದು ಅಧಿಕಾರಿಗಳು ದೃಢಪಡಿಸಿದರು. ಈ ಹುಡುಕಾಟ ಭಾರತದ ವಲಸೆ ಕಚೇರಿಯಿಂದ ಪ್ರಾರಂಭವಾಯಿತು ಎಂದು ಹಿರಿಯ ಅಧಿಕಾರಿ ಹೇಳಿದರು. ಸಹೋದರರ ಚಲನವಲನಗಳನ್ನು ಪರಿಶೀಲಿಸಿದ ನಂತರ, ಮಾಹಿತಿಯನ್ನು ತಕ್ಷಣವೇ ಥಾಯ್ ಪೊಲೀಸರಿಗೆ ರವಾನಿಸಲಾಯಿತು.
ಭಾರತ ಹಂಚಿಕೊಂಡ ವಿವರಗಳಿಗೆ ಹೊಂದಿಕೆಯಾಗುವ ಇಬ್ಬರು ವ್ಯಕ್ತಿಗಳ ಪ್ರವೇಶವನ್ನು ಥಾಯ್ ವಲಸೆ ಅಧಿಕಾರಿಗಳು ದೃಢಪಡಿಸಿದರು. ದೃಢೀಕರಣದೊಂದಿಗೆ, ಥಾಯ್ ಕಾನೂನು ಜಾರಿ ಸಂಸ್ಥೆಗಳು ದ್ವೀಪದಾದ್ಯಂತ ಹುಡುಕಾಟವನ್ನು ಪ್ರಾರಂಭಿಸಿದವು. ಮೂಲಗಳು ಹೇಳುವಂತೆ, ಸಹೋದರರು ಫುಕೆಟ್ನಲ್ಲಿ ಮೊದಲಿದ್ದ ವಸತಿಯಿಂದ ಸ್ಥಳಾಂತರಗೊಂಡರು. ಇದು ಹುಡುಕಾಟಕ್ಕೆ ಸವಾಲಾಗಿತ್ತು. ಆದರೆ, ಹಲವಾರು ಸ್ಥಳಗಳಲ್ಲಿ ದಾಳಿ ನಡೆಸಿದ ನಂತರ, ಥಾಯ್ ಪೊಲೀಸರು ಅಂತಿಮವಾಗಿ ಅವರನ್ನು ಪತ್ತೆಹಚ್ಚಿ ಬಂಧಿಸಿದರು.
ಕಾನೂನು ಔಪಚಾರಿಕ ಪ್ರಕ್ರಿಯೆಗಳು
ನಡೆಯುತ್ತಿರುವುದರಿಂದ, ಆರೋಪಿ ಸಹೋದರರು ಪ್ರಸ್ತುತ ಥಾಯ್ ಬಂಧನದಲ್ಲಿದ್ದಾರೆ. ಎರಡೂ ಕಡೆಯ ಅಧಿಕಾರಿಗಳು ಈಗ ಅವರನ್ನು ಮರಳಿ ಕರೆತರಲು ಭಾರತಕ್ಕೆ ಅಗತ್ಯವಿರುವ ದಾಖಲೆಗಳನ್ನು ಸಂಯೋಜಿಸುತ್ತಿದ್ದಾರೆ. ಕಾನೂನು ಪ್ರಕ್ರಿಯೆ ನಡೆಯುತ್ತಿದೆ ಮತ್ತು ಅವರನ್ನು ಶೀಘ್ರದಲ್ಲೇ ಗಡೀಪಾರು ಮಾಡಲಾಗುವುದು ಎಂದು ಮೂಲಗಳು ದೃಢಪಡಿಸಿವೆ.
ಬೆಂಕಿ ಅವಘಡ ಸಂಭವಿಸಿದ ತಕ್ಷಣ ಥೈಲ್ಯಾಂಡ್ಗೆ ಪಲಾಯನ ಮಾಡಿದ ಇಬ್ಬರ ಪಾಸ್ಪೋರ್ಟ್ಗಳನ್ನು ಗೋವಾ ಪೊಲೀಸರು ಅಮಾನತುಗೊಳಿಸಿದ ಕೆಲವೇ ಗಂಟೆಗಳಲ್ಲಿ ಈ ಕ್ರಮ ಕೈಗೊಳ್ಳಲಾಗಿದೆ.
ಗೋವಾ ನೈಟ್ ಕ್ಲಬ್ ಅಗ್ನಿ ದುರಂತ: ಬೆಂಕಿ ಕಾಣಿಸಿಕೊಳ್ಳಲು ಕಾರಣವಾದ ವಿಡಿಯೊ ಇಲ್ಲಿದೆ ನೋಡಿ
ಕ್ಲಬ್ನಲ್ಲಿ ಜನಜಂಗುಳಿಯಿಂದ ನೃತ್ಯ ಪ್ರದರ್ಶನವನ್ನು ಆನಂದಿಸುತ್ತಿದ್ದಾಗ ಮತ್ತು ಕಾರ್ಯಕ್ರಮಕ್ಕೆ ಮೆರುಗು ನೀಡಲು ಎಲೆಕ್ಟ್ರಾನಿಕ್ ಪಟಾಕಿಗಳನ್ನು ಸಿಡಿಸಿದಾಗ ಅಗ್ನಿ ದುರಂತ ಉಂಟಾಯಿತು. ತುರ್ತು ತಂಡಗಳು ಬೆಂಕಿಯನ್ನು ನಿಯಂತ್ರಿಸಲು ಹೆಣಗಾಡುತ್ತಿದ್ದಾಗಲೂ ಮಾಲೀಕರು ಥೈಲ್ಯಾಂಡ್ಗೆ ವಿಮಾನ ಟಿಕೆಟ್ಗಳನ್ನು ಬುಕ್ ಮಾಡಿದ್ದಾರೆ ಎಂದು ತಿಳಿದುಬಂದಿದೆ. ಎಕ್ಸ್ನಲ್ಲಿ ಪೋಸ್ಟ್ ಮಾಡಿದ ಪೊಲೀಸರು, ನೈಟ್ಕ್ಲಬ್ನಲ್ಲಿ ಬೆಂಕಿ ಕಾಣಿಸಿಕೊಂಡ ಸ್ವಲ್ಪ ಸಮಯದ ನಂತರ, ಡಿಸೆಂಬರ್ 7 ರಂದು ಬೆಳಿಗ್ಗೆ 1.17 ಕ್ಕೆ ಮೇಕ್ಮೈಟ್ರಿಪ್ನಲ್ಲಿ ಇಬ್ಬರೂ ಟಿಕೆಟ್ಗಳನ್ನು ಬುಕ್ ಮಾಡಿದ್ದಾರೆ ಎಂದು ತಿಳಿಸಿದ್ದಾರೆ.
ವೈದ್ಯಕೀಯ ಆಧಾರದ ಮೇಲೆ ನಾಲ್ಕು ವಾರಗಳ ನಿರೀಕ್ಷಣಾ ಜಾಮೀನು ಕೋರಿ, ನಾವು ಕೂಡ ಸಂತ್ರಸ್ತರು ಎಂದು ನ್ಯಾಯಾಲಯಕ್ಕೆ ತಿಳಿಸಿದ್ದರೂ, ಕೋರ್ಟ್, ಇಬ್ಬರಿಗೂ ಬಂಧನದಿಂದ ತಕ್ಷಣದ ಮಧ್ಯಂತರ ರಕ್ಷಣೆ ನೀಡಲು ನಿರಾಕರಿಸಿತು.
ಲೂತ್ರಾ ಸಹೋದರರು ಈ ಮೊದಲಿನಿಂದಲೂ ಅಪರಾಧಿಗಳಾಗಿದ್ದರು ಎಂದು ಗೋವಾದ ಸ್ಥಳೀಯ ಸಾಮಾಜಿಕ ಕಾರ್ಯಕರ್ತರೊಬ್ಬರು ಹೇಳಿದ್ದಾರೆ. ಅವರು ಉನ್ನತ ಮಟ್ಟದ ಅಧಿಕಾರಿಗಳೊಂದಿಗೆ ಸಂಪರ್ಕ ಹೊಂದಿದ್ದಾರೆ. ಅಕ್ರಮಗಳ ಕುರಿತು ನಮ್ಮ ಎಲ್ಲಾ ದೂರುಗಳನ್ನು ನಿರ್ಲಕ್ಷಿಸಲಾಗಿದೆ. ನಾವು ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಿದ ನಂತರವೇ ನಮಗೆ ಬೆಂಬಲ ಮತ್ತು ನ್ಯಾಯ ಸಿಕ್ಕಿತು. ಆ ಪ್ರಕರಣದಲ್ಲೂ ನಾವು ನ್ಯಾಯಾಂಗ ನಿಂದನೆ ಅರ್ಜಿ ಸಲ್ಲಿಸಿ ದೂರನ್ನು ಮರು ಸಲ್ಲಿಸಬೇಕಾಯಿತು ಎಂದು ಹೇಳಿದರು.
