'ನೆಲಕ್ಕೆ ಬಿದ್ದ TMC' ; ಬಂಗಾಳದಲ್ಲಿ ಬಿಜೆಪಿ ಗೆಲುವಿನ ಓಟದ ಕುರಿತು ಸುವೇಂದು ಅಧಿಕಾರಿ ಹೇಳಿದ್ದೇನು?

ಕೊಲ್ಕತ್ತಾ: ಪಶ್ಚಿಮ ಬಂಗಾಳದಲ್ಲಿ ಟಿಎಂಸಿ ಹಾಗೂ ಬಿಜೆಪಿ (TMC vs BJP) ನಡುವೆ ಭಾರೀ ಪೈಪೋಟಿ ಏರ್ಪಟ್ಟಿತ್ತು. ಮತದಾರ ಬಿಜೆಪಿಯತ್ತ ಒಲವು (West Bengal Election 2026) ತೋರಿದ್ದು, ಭಾರತೀಯ ಜನತಾ ಪಕ್ಷ ಗೆಲುವಿನತ್ತ ಮುನ್ನಗ್ಗುತ್ತಿದೆ. ಗೆಲುವಿನ ಕುರಿತು ಮಾತನಾಡಿದ ಸುವೆಂದು ಅಧಿಕಾರಿ ಪಶ್ಚಿಮ ಬಂಗಾಳದಲ್ಲಿ ಹಿಂದೂಗಳ ಬಲವರ್ಧನೆ ಹೆಚ್ಚಾಗಿದೆ ಎಂದು ಹೇಳಿದ್ದಾರೆ. ಹಿಂದಿನ ಚುನಾವಣೆಗಳಲ್ಲಿ ಮಾಡಿದಂತೆ ಮುಸ್ಲಿಮರು ತೃಣಮೂಲ ಕಾಂಗ್ರೆಸ್ (ಟಿಎಂಸಿ) ಗೆ ಮತ ಹಾಕಿಲ್ಲ ಎಂದು ಅವರು ಹೇಳಿದರು. ರಾಜ್ಯದಲ್ಲಿ ಕೇಸರಿ ಪಕ್ಷ ಸರ್ಕಾರ ರಚಿಸುವುದು ಖಚಿತ ಎಂದು ಅವರು ಹೇಳಿದ್ದಾರೆ.

"ಈ ಬಾರಿ ಹಿಂದೂಗಳ ಬಲವರ್ಧನೆ ಇದೆ, ಮತ್ತು ಮುಸ್ಲಿಮರು ಟಿಎಂಸಿಗೆ ಮತ ಹಾಕುವ ರೀತಿ, ಈ ಬಾರಿ ಅವರು ಹಾಗೆ ಮಾಡಿಲ್ಲ. ಕೆಲವು ಮತಗಳು ಮುಸ್ಲಿಂ ಪರ ಪಕ್ಷಕ್ಕೆ ಹೋಗಿವೆ. ಬಿಜೆಪಿ ಕೂಡ ಸ್ವಲ್ಪ ಪ್ರಮಾಣದಲ್ಲಿ ಪಡೆದುಕೊಂಡಿದೆ" ಎಂದು ಅಧಿಕಾರಿ ಹೇಳಿದರು. "ಆಡಳಿತ ವಿರೋಧಿ ಅಲೆ ಇದೆ, ಜೊತೆಗೆ ಹಿಂದೂಗಳು ಕಮಲದ ಪರವಾಗಿ ಒಗ್ಗೂಡಿದ್ದಾರೆ. ಇದು ನಮಗೆ ಒಳ್ಳೆಯ ಸೂಚನೆ. ವಿಶೇಷವಾಗಿ ಮಾಲ್ಡಾ, ಮುಷಿದಾಬಾದ್ ಮತ್ತು ಉತ್ತರ ದಿನಾಜ್‌ಪುರದಲ್ಲಿ ಮುಸ್ಲಿಂ ಮತಗಳ ವಿಭಜನೆಯೂ ಆಗಿದೆ" ಎಂದು ಅವರು ಹೇಳಿದರು.

ಪಶ್ಚಿಮ ಬಂಗಾಳದಲ್ಲಿ ಒಟ್ಟು 294 ಸ್ಥಾನಗಳಿರುವ ಬಿಜೆಪಿ ಈಗಾಗಲೇ 148 ಸ್ಥಾನಗಳ ಬಹುಮತವನ್ನು ದಾಟಿದೆ. ಬಿಜೆಪಿ 180 ಸ್ಥಾನಗಳಲ್ಲಿ ಮುನ್ನಡೆಯಲ್ಲಿದ್ದರೆ, ಬ್ಯಾನರ್ಜಿ ಪಕ್ಷ 111 ಸ್ಥಾನಗಳಲ್ಲಿ ಮುಂದಿದೆ. 2021 ರ ಹಿಂದಿನ ಚುನಾವಣೆಯಲ್ಲಿ ಬಿಜೆಪಿ 77 ಸ್ಥಾನಗಳನ್ನು ಗೆದ್ದಿದ್ದರೆ, ಟಿಎಂಸಿ ಮೂರನೇ ಎರಡರಷ್ಟು ಬಹುಮತವನ್ನು ಪಡೆದು 215 ವಿಧಾನಸಭಾ ಕ್ಷೇತ್ರಗಳನ್ನು ಗೆದ್ದಿತ್ತು.

2026 ರ ಪಶ್ಚಿಮ ಬಂಗಾಳ ಚುನಾವಣೆಗೆ ಏಪ್ರಿಲ್ 23 ಮತ್ತು 29 ರಂದು ಎರಡು ಹಂತಗಳಲ್ಲಿ ಮತದಾನ ನಡೆದಿದ್ದು, ರಾಜ್ಯವು ಶೇ. 92.47 ರಷ್ಟು ಮತದಾನವನ್ನು ದಾಖಲಿಸಿದೆ, ಇದು ಸ್ವಾತಂತ್ರ್ಯದ ನಂತರದ ಅತ್ಯಧಿಕ ಮತದಾನವಾಗಿದೆ ಎಂದು ಭಾರತೀಯ ಚುನಾವಣಾ ಆಯೋಗ (ECI) ತಿಳಿಸಿದೆ.

ಪಶ್ಚಿಮ ಬಂಗಾಳದಲ್ಲಿ ಅಧಿಕಾರದತ್ತ ಬಿಜೆಪಿ: ಸುವೇಂದು ವಿರುದ್ಧ ಮಮತಾ ಮುನ್ನಡೆ

2021ರ ಚುನಾವಣೆಯಲ್ಲಿ ನಂದಿಗ್ರಾಮದಲ್ಲಿ ಮಮತಾರನ್ನು ಸೋಲಿಸಿದ್ದ ಸುವೇಂದು ಅಧಿಕಾರಿ, ಈ ಬಾರಿಯೂ ಭವಾನಿಪುರ ಕ್ಷೇತ್ರದಲ್ಲಿ ಮಮತಾಗೆ ಪೈಪೋಟಿ ನೀಡಲು ಮುಂದಾಗಿದ್ದರು. ಆದರೆ ಸದ್ಯದ ಮತ ಎಣಿಕೆಯ ಫಲಿತಾಂಶ ನೋಡುವಾಗ ಮಮತಾ ಅವರು 2000 ಮತಗಳ ಅಂತರದಿಂದ ಮುನ್ನಡೆ ಸಾಧಿಸಿದ್ದಾರೆ.