ಏಷ್ಯನ್ ಗೇಮ್ಸ್ ಮಿಶ್ರ ಡಬಲ್ಸ್‌ ಟಿಟಿ, ಸ್ಕ್ವಾಶ್‌ನಲ್ಲಿ ಸೆಮಿ ಪ್ರವೇಶ; ಭಾರತಕ್ಕೆ 2 ಪದಕ ಖಾತ್ರಿ

ನಗೋಯಾ, ಸೆ.25: ಏಷ್ಯನ್ ಕ್ರೀಡಾಕೂಟದ ಮಿಶ್ರ ಡಬಲ್ಸ್ ಟೇಬಲ್‌ ಟೆನಿಸ್‌ ವಿಭಾಗದಲ್ಲಿ, ಮತ್ತು ಮಿಶ್ರ ಡಬಲ್ಸ್ ಸ್ಕ್ವಾಶ್ ಸ್ಪರ್ಧೆಯಲ್ಲಿ ಭಾರತೀಯ ಜೋಡಿಗಳು ಸೆಮಿಫೈನಲ್‌ ಪ್ರವೇಶಿಸುವ ಮೂಲಕ ಎರಡು ಪದಕಗಳನ್ನು ಖಚಿತಪಡಿಸಿದ್ದಾರೆ.

ಶುಕ್ರವಾರ ಬೆಳಗ್ಗೆ ನಡೆದ ಟಿಟಿ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಹಾಂಗ್‌ಕಾಂಗ್‌ನ ವಾಂಗ್ ಚುನ್-ಟಿಂಗ್ ಮತ್ತು ಡೂ ಹೋಯ್ ಕೆಮ್ ವಿರುದ್ಧ ಭರ್ಜರಿ ಜಯ ಸಾಧಿಸಿದರು. ಭಾರತೀಯ ಜೋಡಿಯು ವಿಶ್ವದ 4ನೇ ಶ್ರೇಯಾಂಕದ ಜೋಡಿಯನ್ನು 3-1 (11-6, 13-15, 11-9, 11-5) ಅಂತರದಿಂದ ಸೋಲಿಸಿ ಸೆಮಿಫೈನಲ್ ಪ್ರವೇಶಿಸಿ ಭಾರತಕ್ಕೆ ಟೇಬಲ್ ಟೆನಿಸ್ ಪದಕವನ್ನು ಖಚಿತಪಡಿಸಿತು.

ಮನುಷ್ ಮತ್ತು ದಿಯಾ ಇಂದೇ ನಡೆಯಲಿರುವ ಸೆಮಿಫೈನಲ್‌ನಲ್ಲಿ ಚೀನಾದ ವಿಶ್ವದ 2ನೇ ಶ್ರೇಯಾಂಕದ ಜೋಡಿಯಾದ ವಾಂಗ್ ಚುಕಿನ್ ಮತ್ತು ಸುನ್ ಯಿಂಗ್‌ಶಾ ಅವರನ್ನು ಎದುರಿಸಲಿದ್ದಾರೆ. ಈ ಪಂದ್ಯದಲ್ಲಿ ಗೆಲುವು ಸಾಧಿಸಿದರೆ, ಏಷ್ಯನ್ ಗೇಮ್ಸ್ ಟೇಬಲ್ ಟೆನ್ನಿಸ್ ಸ್ಪರ್ಧೆಯ ಫೈನಲ್‌ಗೆ ಪ್ರವೇಶಿಸಿದ ಭಾರತದ ಮೊದಲ ಜೋಡಿ ಎಂಬ ಹೆಗ್ಗಳಿಕೆಗೆ ಅವರು ಪಾತ್ರರಾಗಲಿದ್ದಾರೆ.

Asian Games 2026: ಮಿಶ್ರ 4x400 ಮೀಟರ್ ರಿಲೇಯಲ್ಲಿ ಭಾರತಕ್ಕೆ ಬೆಳ್ಳಿ ಪದಕ!

ಏಷ್ಯನ್ ಗೇಮ್ಸ್‌ನ ಮಿಶ್ರ ಡಬಲ್ಸ್ ವಿಭಾಗದಲ್ಲಿ ಭಾರತಕ್ಕೆ ಲಭಿಸುತ್ತಿರುವ ಎರಡನೇ ಪದಕ ಇದಾಗಿದೆ. 2018ರಲ್ಲಿ ಜಕಾರ್ತಾದಲ್ಲಿ ನಡೆದ ಕ್ರೀಡಾಕೂಟದಲ್ಲಿ ಶರತ್ ಕಮಲ್ ಮತ್ತು ಮಣಿಕಾ ಬಾತ್ರಾ ಜೋಡಿ ಕಂಚಿನ ಪದಕ ಗೆದ್ದಿತ್ತು. ಅಲ್ಲದೆ, ಏಷ್ಯನ್ ಗೇಮ್ಸ್ ಇತಿಹಾಸದಲ್ಲಿ ಭಾರತಕ್ಕೆ ಲಭಿಸುತ್ತಿರುವ ಒಟ್ಟಾರೆ ನಾಲ್ಕನೇ ಟೇಬಲ್ ಟೆನ್ನಿಸ್ ಪದಕ ಇದಾಗಿದೆ.

ಮಿಶ್ರ ಡಬಲ್ಸ್ ಸ್ಕ್ವಾಶ್‌ನಲ್ಲಿ ಪದಕ ಖಚಿತ

ಮಿಶ್ರ ಡಬಲ್ಸ್ ಸ್ಕ್ವಾಶ್ ಸ್ಪರ್ಧೆಯ ಕ್ವಾರ್ಟರ್ ಫೈನಲ್‌ನಲ್ಲಿ, ಅನುಭವಿ ಆಟಗಾರ್ತಿ ಜೋಶ್ನಾ ಚಿನ್ನಪ್ಪ ಮತ್ತು ವೇಲವನ್ ಸೆಂಥಿಲ್‌ಕುಮಾರ್ ಜೋಡಿಯು ಫಿಲಿಪ್ಪೀನ್ಸ್‌ನ ಡೇವಿಡ್ ಪೆಲಿನೊ ಮತ್ತು ಜೆಮಿಕಾ ಅರಿಬಾಡೊ ವಿರುದ್ಧ ಜಯಗಳಿಸಿ ಸೆಮಿಫೈನಲ್‌ಗೆ ಪ್ರವೇಶಿಸಿತು ಹಾಗೂ ಪದಕವನ್ನು ಖಚಿತಪಡಿಸಿಕೊಂಡಿತು. ಭಾರತೀಯ ಜೋಡಿಯು 11-3, 11-5 ಅಂತರದ ಭರ್ಜರಿ ಗೆಲುವು ಸಾಧಿಸಿತು. ಶನಿವಾರ ನಡೆಯಲಿರುವ ಸೆಮಿಫೈನಲ್‌ನಲ್ಲಿ ಅವರು ಹಾಂಗ್‌ಕಾಂಗ್‌ನ ಯೋ ಕಾ ಲೀ ಮತ್ತು ಮಿಂಗ್ ಹಾಂಗ್ ಟ್ಯಾಂಗ್ ಅವರನ್ನು ಎದುರಿಸಲಿದ್ದಾರೆ.

40 ವರ್ಷದ ಜೋಶ್ನಾ ಅವರಿಗೆ ಇದು ಆರನೇ ಏಷ್ಯನ್ ಗೇಮ್ಸ್ ಪದಕವಾಗಿದೆ. ಈ ಕ್ರೀಡಾಕೂಟದಲ್ಲಿ ಅವರು ಈಗಾಗಲೇ ಎರಡು ಬೆಳ್ಳಿ ಮತ್ತು ಮೂರು ಕಂಚಿನ ಪದಕಗಳನ್ನು ಗೆದ್ದಿದ್ದಾರೆ.