ಏಷ್ಯನ್ ಗೇಮ್ಸ್; ಮಿಶ್ರ ಸ್ಕೀಟ್‌ನಲ್ಲಿ ಕಂಚು ಗೆದ್ದ ಅನಂತಜೀತ್, ಪರಿನಾಜ್ ಜೋಡಿ

ನಗೋಯಾ, ಸೆ.23: ಅನಂತಜೀತ್ ಸಿಂಗ್ ನರೂಕಾ ಮತ್ತು ಪರಿನಾಜ್ ಧಲಿವಾಲ್ ಅವರು ಮಿಶ್ರ ಸ್ಕೀಟ್ ತಂಡದ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆಲ್ಲುವ ಮೂಲಕ ಏಷ್ಯನ್ ಗೇಮ್ಸ್‌ನಲ್ಲಿ ಭಾರತದ ಶೂಟಿಂಗ್ ಪದಕಗಳ ಪಟ್ಟಿಗೆ ಮತ್ತೊಂದು ಪದಕವನ್ನು ಸೇರಿಸಿದರು.

ಗುರುವಾರ ನಡೆದ ಸ್ಫರ್ಧೆಯಲ್ಲಿ ಭಾರತೀಯ ಜೋಡಿಯು 44 ಹಿಟ್‌ಗಳೊಂದಿಗೆ ಫೈನಲ್‌ನಲ್ಲಿ ಮೂರನೇ ಸ್ಥಾನ ಪಡೆಯಿತು. 52 ಹಿಟ್‌ಗಳೊಂದಿಗೆ ಚೀನಾ ಚಿನ್ನದ ಪದಕ ಗೆದ್ದರೆ, 51 ಹಿಟ್‌ಗಳೊಂದಿಗೆ ದಕ್ಷಿಣ ಕೊರಿಯಾ ಬೆಳ್ಳಿ ಪದಕ ಜಯಿಸಿತು.

ಪದಕ ಸುತ್ತಿನ ಆರು ಸರಣಿಗಳ ನಂತರ ಭಾರತ ಮತ್ತು ಕೊರಿಯಾ ತಲಾ 44 ಅಂಕಗಳೊಂದಿಗೆ ಸಮಬಲ ಸಾಧಿಸಿದ್ದವು. ಆದರೆ, ಅಂಕಗಳು ಸಮನಾಗಿದ್ದರಿಂದ ಅರ್ಹತಾ ಹಂತದ ಶ್ರೇಯಾಂಕವನ್ನು ಪರಿಗಣಿಸಲಾಯಿತು.

ಕೊರಿಯಾ ತಂಡವು ಉತ್ತಮ ಅರ್ಹತಾ ಶ್ರೇಯಾಂಕದೊಂದಿಗೆ ಅಂತಿಮ ಹಂತವನ್ನು ಪ್ರವೇಶಿಸಿದ್ದರಿಂದ, ಚಿನ್ನದ ಪದಕಕ್ಕಾಗಿ ನಡೆಯುವ ಸ್ಪರ್ಧೆಯಲ್ಲಿ ತನ್ನ ಸ್ಥಾನವನ್ನು ಉಳಿಸಿಕೊಂಡಿತು. ಅದೇ ವೇಳೆ ಭಾರತ ತಂಡವು ಸ್ಪರ್ಧೆಯಿಂದ ಹೊರಬಿದ್ದು ಕಂಚಿನ ಪದಕವನ್ನು ಪಡೆಯಿತು. ಅಂತಿಮ ಸ್ಪರ್ಧೆಯಲ್ಲಿ ಭಾರತದ ಅಂಕಗಳ ಪ್ರಗತಿಯು ಆರು ಸರಣಿಗಳಲ್ಲಿ ಕ್ರಮವಾಗಿ 7, 14, 21, 29, 36 ಮತ್ತು 44 ಆಗಿತ್ತು.

ನರುಕಾ ಮತ್ತು ಪರಿನಾಜ್ ಅವರು ಅರ್ಹತಾ ಸುತ್ತಿನಲ್ಲಿ 150 ಗುರಿಗಳ ಪೈಕಿ 138 ಅಂಕಗಳನ್ನು ಗಳಿಸಿ ನಾಲ್ಕನೇ ಸ್ಥಾನದೊಂದಿಗೆ ಪದಕದ ಸುತ್ತಿಗೆ ಪ್ರವೇಶಿಸಿದ್ದರು. ಅರ್ಹತಾ ಸುತ್ತಿನಲ್ಲಿ ಕತಾರ್ 145 ಅಂಕಗಳೊಂದಿಗೆ ಅಗ್ರಸ್ಥಾನ ಪಡೆದರೆ, ದಕ್ಷಿಣ ಕೊರಿಯಾ 143 ಮತ್ತು ಚೀನಾ 140 ಅಂಕಗಳೊಂದಿಗೆ ನಂತರದ ಸ್ಥಾನಗಳನ್ನು ಪಡೆದಿದ್ದವು. ಭಾರತೀಯ ಜೋಡಿಯು 44, 47 ಮತ್ತು 47 ಅಂಕಗಳ ಸರಣಿಯನ್ನು ದಾಖಲಿಸುವ ಮೂಲಕ ಅಗ್ರ ನಾಲ್ಕು ತಂಡಗಳ ಪೈಕಿ ಸ್ಥಾನ ಪಡೆಯಿತು.

ಐಪಿಎಲ್ 2027ರ ಮಿನಿ ಹರಾಜಿನ ನಿಯಮಗಳು, ನಿಬಂಧನೆಗಳು ಯಾವುವು?

ಈ ಕಂಚಿನ ಪದಕದೊಂದಿಗೆ, ಇಬ್ಬರೂ ಶೂಟರ್‌ಗಳು ತಲಾ ಎರಡು ಪದಕಗಳೊಂದಿಗೆ ಏಷ್ಯನ್ ಕ್ರೀಡಾಕೂಟದಿಂದ ಹೊರಹೊಮ್ಮಿದಂತಾಗಿದೆ. ನರುಕಾ ಅವರು ಈ ಹಿಂದೆ ಹಿರಿಯ ಶೂಟರ್‌ಗಳಾದ ಮೈರಾಜ್ ಅಹ್ಮದ್ ಖಾನ್ ಮತ್ತು ಭವ್‌ತೇಗ್ ಸಿಂಗ್ ಗಿಲ್ ಅವರೊಂದಿಗೆ ಸೇರಿ ಪುರುಷರ ಸ್ಕೀಟ್ ತಂಡದ ಸ್ಪರ್ಧೆಯಲ್ಲಿ ಭಾರತಕ್ಕೆ ಕಂಚಿನ ಪದಕ ಗೆಲ್ಲಲು ನೆರವಾಗಿದ್ದರು. ವೈಯಕ್ತಿಕ ವಿಭಾಗದಲ್ಲಿಯೂ ನರುಕಾ ನಾಲ್ಕನೇ ಸ್ಥಾನ ಪಡೆದಿದ್ದರು.

ಇನ್ನೊಂದೆಡೆ, ಪರಿನಾಜ್ ಅವರು ಬುಧವಾರ ರೈಜಾ ಧಿಲ್ಲೋನ್ ಮತ್ತು ಮಹೇಶ್ವರಿ ಚೌಹಾಣ್ ಅವರೊಂದಿಗೆ ಸೇರಿ ಮಹಿಳೆಯರ ಸ್ಕೀಟ್ ತಂಡದ ಸ್ಪರ್ಧೆಯಲ್ಲಿ ಕಂಚಿನ ಪದಕ ಗೆದ್ದ ಭಾರತೀಯ ತಂಡದ ಭಾಗವಾಗಿದ್ದವರು. ಮಹಿಳೆಯರ ಸ್ಕೀಟ್ ತಂಡದ ಸ್ಪರ್ಧೆಯಲ್ಲಿ ಭಾರತಕ್ಕೆ ಏಷ್ಯನ್ ಕ್ರೀಡಾಕೂಟದ ಇತಿಹಾಸದಲ್ಲೇ ಮೊದಲ ಪದಕವನ್ನು ತಂದುಕೊಟ್ಟವು. ಈ ಸ್ಪರ್ಧೆಯಲ್ಲಿ ಚೀನಾ ಚಿನ್ನದ ಪದಕವನ್ನು ಗೆದ್ದರೆ, ಕಝಾಕಿಸ್ತಾನ್ ಬೆಳ್ಳಿ ಪದಕವನ್ನು ಪಡೆಯಿತು.

ಬುಧವಾರ ಗೆದ್ದ ಎರಡು ತಂಡದ ಕಂಚಿನ ಪದಕಗಳ ನಂತರ, ಮಿಶ್ರ ಸ್ಕೀಟ್ ವಿಭಾಗದ ಈ ಪದಕದೊಂದಿಗೆ ಐಚಿ-ನಗೋಯಾದಲ್ಲಿ ಭಾರತದ ಸ್ಕೀಟ್ ಪದಕಗಳ ಒಟ್ಟು ಸಂಖ್ಯೆ ಮೂರಕ್ಕೇರಿದೆ.