ʻಬ್ಯಾಟ್‌ ಟಚ್‌ ಆಗಿಲ್ಲʼ: 199 ರನ್‌ಗೆ ಔಟ್‌ ಆಗಿ ಅಂಪೈರ್ ವಿರುದ್ಧ ದೇವದತ್ ಪಡಿಕ್ಕಲ್ ಕಿಡಿ! ವಿಡಿಯೊ
ನ್ಯೂಜಿಲೆಂಡ್ ಎ ವಿರುದ್ಧದ ಪಂದ್ಯದಲ್ಲಿ ದೇವದತ್ ಪಡಿಕ್ಕಲ್ 199 ರನ್‌ಗಳಿಗೆ ಔಟಾಗಿ ದ್ವಿಶತಕವನ್ನು ಕೇವಲ ಒಂದು ರನ್‌ನಿಂದ ತಪ್ಪಿಸಿಕೊಂಡರು. ಔಟಾದ ಬಳಿಕ ಅವರು ಅಸಮಾಧಾನ ವ್ಯಕ್ತಪಡಿಸಿದರು. ಅವರ ಭರ್ಜರಿ ಬ್ಯಾಟಿಂಗ್ ನೆರವಿನಿಂದ ಭಾರತ ಎ ತಂಡ 113 ರನ್‌ಗಳಿಗೆ ಆಲೌಟ್ ಆದ ಸ್ಥಿತಿಯಿಂದ ಚೇತರಿಸಿಕೊಂಡು 8 ವಿಕೆಟ್‌ಗೆ 488 ರನ್ ಗಳಿಸಿತು. ಈ ಮೂಲಕ 288 ರನ್‌ಗಳ ಮುನ್ನಡೆ ಸಾಧಿಸಿತು.
ಅಂಪೈರ್ ವಿರುದ್ಧ ದೇವದತ್ ಪಡಿಕ್ಕಲ್ ಕಿಡಿ. -
ನವದೆಹಲಿ: ನ್ಯೂಜಿಲೆಂಡ್ ಎ ವಿರುದ್ಧದ ಮೊದಲ ಅನಧಿಕೃತ ಟೆಸ್ಟ್‌ನ (IND A vs NZ A) ಮೂರನೇ ದಿನದಾಟದಲ್ಲಿ ಭಾರತ ಎ ತಂಡದ ಬ್ಯಾಟರ್ ದೇವದತ್ ಪಡಿಕ್ಕಲ್ (Devdutt Padikkal) ದ್ವಿಶತಕದ ಹೊಸ್ತಿಲಲ್ಲಿ ನಿರಾಸೆ ಅನುಭವಿಸಿದರು. ಕೇವಲ ಒಂದು ರನ್ ಬಾಕಿ ಇರುವಾಗ, 199 ರನ್ ಗಳಿಸಿದ್ದ ಅವರನ್ನು ಅಂಪೈರ್ ಔಟ್‌ ಎಂದು ತೀರ್ಪು ನೀಡಿದರು. ಈ ನಿರ್ಧಾರದಿಂದ ಪಡಿಕ್ಕಲ್ ತೀವ್ರ ಅಸಮಾಧಾನಗೊಂಡರು. ಮಧ್ಯಮ ವೇಗಿ ಝಾಕ್ ಗಿಬ್ಸನ್ ಬೌಲಿಂಗ್‌ನಲ್ಲಿ ಲೆಗ್‌ ಸೈಡ್‌ನಲ್ಲಿ ಕ್ಯಾಚ್‌ ಔಟ್‌ ಎಂದು ಅಂಪೈರ್ ತೀರ್ಪು ನೀಡಿದರು. ಆದರೆ, ಪಡಿಕ್ಕಲ್ ಚೆಂಡನ್ನು ಬ್ಯಾಟ್‌ಗೆ ತಾಗಿಸಿಲ್ಲ ಎಂಬಂತೆ ಸನ್ನೆ ಮಾಡಿ ತಮ್ಮ ಅಸಮಾಧಾನ ವ್ಯಕ್ತಪಡಿಸಿದರು. ಕೆಲಕಾಲ ಕ್ರೀಸ್‌ನಲ್ಲೇ ನಿಂತ ಬಳಿಕ ಪೆವಿಲಿಯನ್‌ಗೆ ಮರಳಿದರು.
ಪಂದ್ಯದಲ್ಲಿ ಡಿಆರ್‌ಎಸ್‌ (DRS) ಅಥವಾ ಸ್ನಿಕೋಮೀಟರ್‌ ಸೌಲಭ್ಯವಿಲ್ಲದ ಕಾರಣ ಅಂಪೈರ್ ನಿರ್ಧಾರವನ್ನು ಪ್ರಶ್ನಿಸಲು ಪಡಿಕ್ಕಲ್‌ಗೆ ಅವಕಾಶವಿರಲಿಲ್ಲ. 248 ಎಸೆತಗಳನ್ನು ಎದುರಿಸಿದ ಪಡಿಕ್ಕಲ್ 23 ಬೌಂಡರಿ ಮತ್ತು ಮೂರು ಸಿಕ್ಸರ್‌ಗಳ ನೆರವಿನಿಂದ 199 ರನ್ ಗಳಿಸಿದರು. ಮೊದಲ ದಿನ ಕೇವಲ 113 ರನ್‌ಗಳಿಗೆ ಆಲೌಟ್ ಆಗಿದ್ದ ಭಾರತ ಎ ತಂಡ, ಅವರ ಅದ್ಭುತ ಇನಿಂಗ್ಸ್‌ನ ನೆರವಿನಿಂದ ಎರಡನೇ ಇನಿಂಗ್ಸ್‌ನಲ್ಲಿ 8 ವಿಕೆಟ್‌ಗೆ 488 ರನ್ ಗಳಿಸಿ ಚೇತರಿಸಿಕೊಂಡಿತು. ಇದೀಗ ಭಾರತ ಎ ತಂಡ ಮೂರನೇ ದಿನದಾಟದ ಅಂತ್ಯಕ್ಕೆ 288 ರನ್‌ಗಳ ಮುನ್ನಡೆಯನ್ನು ಪಡೆದಿದೆ.
IND vs NZ: ಆರಂಭಿಕ ಪಂದ್ಯಗಳಲ್ಲಿ ಭುವನೇಶ್ವರ್‌ ಕುಮಾರ್‌ ವೈಫಲ್ಯಕ್ಕೆ ಕಾರಣವೇನು? ಮೊರ್ನೆ ಮಾರ್ಕೆಲ್‌ ಹೇಳಿದ್ದಿದು!
ಭಾರತ ತಂಡದ 3ನೇ ಕ್ರಮಾಂಕದ ಸ್ಥಾನಕ್ಕೆ ಪಡಿಕ್ಕಲ್ ಪ್ರಬಲ ಪೈಪೋಟಿ
ನ್ಯೂಜಿಲೆಂಡ್ ವಿರುದ್ಧದ ಮುಂಬರುವ ಟೆಸ್ಟ್ ಸರಣಿಗೂ ಮುನ್ನ ಭಾರತ ತಂಡದ ಮೂರನೇ ಕ್ರಮಾಂಕದ ಸ್ಥಾನಕ್ಕೆ ದೇವದತ್ ಪಡಿಕ್ಕಲ್ ತಮ್ಮ ಆಯ್ಕೆಯನ್ನು ಗಟ್ಟಿ ಮಾಡಿಕೊಂಡಿದ್ದಾರೆ. ಶ್ರೀಲಂಕಾ ಪ್ರವಾಸದಲ್ಲಿ ಸತತ ಎರಡು ಟೆಸ್ಟ್ ಶತಕಗಳನ್ನು ಗಳಿಸಿದ್ದ ಅವರು, ಇದೀಗ ನ್ಯೂಜಿಲೆಂಡ್ ಎ ವಿರುದ್ಧದ ಪಂದ್ಯದಲ್ಲೂ 199 ರನ್ ಸಿಡಿಸಿ ಗಮನ ಸೆಳೆದಿದ್ದಾರೆ.
🔴DEVDUTT PADIKKAL ANGRY OVER A CONTROVERSIAL UMPIRING DECISION! 🤯 - Padikkal was batting on 199 when the bowler delivered the ball wide. - Padikkal tried to play the delivery, but the umpire suddenly declared him out, apparently believing the ball had edged the bat. - Padikkal was left shocked by the decision. Note: There is no DRS in unofficial Test matches. ❌ https://t.co/WfZMaQfAXM
— Sam (@cricsam02) October 26, 2026
ಗಾಯದಿಂದ ಚೇತರಿಸಿಕೊಂಡು ತಂಡಕ್ಕೆ ಮರಳಿರುವ ಸಾಯಿ ಸುದರ್ಶನ್ ಅವರ ಪ್ರದರ್ಶನವನ್ನು ಪರಿಶೀಲಿಸುವುದು ಭಾರತ ತಂಡದ ಟೀಮ್‌ ಮ್ಯಾನೇಜ್‌ಮೆಂಟ್‌ನ ಉದ್ದೇಶವಾಗಿತ್ತು. ಸುದರ್ಶನ್ 91 ರನ್‌ಗಳ ಆಕರ್ಷಕ ಇನಿಂಗ್ಸ್‌ ಆಡಿದರು. ಮೂರನೇ ವಿಕೆಟ್‌ಗೆ ಪಡಿಕ್ಕಲ್ ಮತ್ತು ಸುದರ್ಶನ್ ಜೋಡಿ 210 ರನ್‌ಗಳ ಮಹತ್ವದ ಜೊತೆಯಾಟವಾಡಿತು. 184 ಎಸೆತಗಳನ್ನು ಎದುರಿಸಿದ ಸುದರ್ಶನ್ 12 ಬೌಂಡರಿಗಳನ್ನು ಬಾರಿಸಿದರು. ಆದರೆ, ಜೊತೆಯಾಟ ಮುಂದುವರಿದಂತೆ ಪಡಿಕ್ಕಲ್ ತಮ್ಮ ಹೊಡೆತಗಳ ಆಯ್ಕೆ ಮತ್ತು ಬ್ಯಾಟಿಂಗ್ ನಿಯಂತ್ರಣದಲ್ಲಿ ಹೆಚ್ಚು ಆತ್ಮವಿಶ್ವಾಸ ತೋರಿದರು.
ಮೂರನೇ ದಿನ ಪಿಚ್ ಬ್ಯಾಟಿಂಗ್‌ಗೆ ನೆರವು ನೀಡಿತು
ಮೂರನೇ ದಿನ ಪಿಚ್ ಬ್ಯಾಟಿಂಗ್‌ಗೆ ಹೆಚ್ಚು ಅನುಕೂಲಕರವಾಗಿತ್ತು. ಚೆಂಡಿನ ಚಲನೆ ಕಡಿಮೆಯಾಗಿದ್ದಲ್ಲದೆ, ಬೌನ್ಸ್ ಕೂಡ ಇಳಿಕೆಯಾಗಿತ್ತು. ಪಡಿಕ್ಕಲ್ ಶಾರ್ಟ್ ಬಾಲ್‌ಗಳನ್ನು ಆತ್ಮವಿಶ್ವಾಸದಿಂದ ಎದುರಿಸಿದರು. ಎಡಗೈ ಸ್ಪಿನ್ನರ್ ಜೇಡೆನ್ ಲೆನಾಕ್ಸ್ ವಿರುದ್ಧ ಉತ್ತಮವಾಗಿ ಫುಟ್‌ವರ್ಕ್‌ ಬಳಸಿ ಬ್ಯಾಟಿಂಗ್ ನಡೆಸಿದರು. ಅವರು ಬಾರಿಸಿದ ಮೂರು ಸಿಕ್ಸರ್‌ಗಳಲ್ಲಿ ಎರಡು ಲೆನಾಕ್ಸ್ ಬೌಲಿಂಗ್‌ನಲ್ಲೇ ಬಂದವು.
ದೇವದತ್ತ ಪಡಿಕ್ಕಲ್ ಅಬ್ಬರದ ಬ್ಯಾಟಿಂಗ್ ಪ್ರದರ್ಶನ; ಸೋಲಿನ ಭೀತಿಯಿಂದ ಪಾರಾದ ಭಾರತ 'ಎ'
ಲೆನಾಕ್ಸ್ ಬೌಲಿಂಗ್‌ನಲ್ಲಿ ಪಡಿಕ್ಕಲ್ ನೇರವಾಗಿ ಬಾರಿಸಿದ ಮೊದಲ ಸಿಕ್ಸರ್ ಅವರ ಶತಕವನ್ನು ಪೂರ್ಣಗೊಳಿಸಿತು. ಬಳಿಕ ಲಾಂಗ್‌-ಆನ್‌ ದಿಕ್ಕಿನಲ್ಲಿ ಮತ್ತೊಂದು ಸಿಕ್ಸರ್ ಸಿಡಿಸಿದರು. ನಂತರ ಫ್ರೇಸರ್ ಶೀಟ್ ಬೌಲಿಂಗ್‌ನಲ್ಲಿ ಸ್ಕ್ವೇರ್ ಲೆಗ್‌ ದಿಕ್ಕಿಗೆ ಪುಲ್‌ ಶಾಟ್‌ ಹೊಡೆದು ಮತ್ತೊಂದು ಸಿಕ್ಸರ್ ಬಾರಿಸಿದರು.
ಸಾಯಿ ಸುದರ್ಶನ್ ಶತಕ ಗಳಿಸಲು ವಿಫಲರಾದ ಬಳಿಕ ಪಡಿಕ್ಕಲ್‌ಗೆ ಯಶ್ ರಾಥೋಡ್ ಉತ್ತಮ ಬೆಂಬಲ ನೀಡಿದರು. ರಾಥೋಡ್ 72 ಎಸೆತಗಳಲ್ಲಿ 66 ರನ್ ಗಳಿಸಿದರು. ಈ ಜೋಡಿ 142 ರನ್‌ಗಳ ಜೊತೆಯಾಟವಾಡುವ ಮೂಲಕ ಭಾರತ ಎ ತಂಡವನ್ನು ಬಲಿಷ್ಠ ಸ್ಥಿತಿಯತ್ತ ಕೊಂಡೊಯ್ದಿತು.