KKR vs LSG: ಮೂರನೇ ಅಂಪೈರ್‌ನ ಕೆಟ್ಟ ತೀರ್ಪಿಗೆ ಔಟ್‌ ಆದ ಫಿನ್‌ ಆಲೆನ್‌! ವಿಡಿಯೊ

ಕೋಲ್ಕತಾ: ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ (IPL 2026) ಟೂರ್ನಿಯಲ್ಲಿ ಮತ್ತೊಂದು ಅಂಪೈರಿಂಗ್ ದೋಷ ಬೆಳಕಿಗೆ ಬಂದಿದೆ. ಏಪ್ರಿಲ್ 9 ರಂದು ಗುರುವಾರ ನಡೆದಿದ್ದ ಕೋಲ್ಕತಾ ನೈಟ್‌ ರೈಡರ್ಸ್‌ ಹಾಗೂ ಲಖನೌ ಸೂಪರ್‌ ಜಯಂಟ್ಸ್‌ ನಡುವಣ ಪಂದ್ಯದಲ್ಲಿ(LSG vs KKR) ಈ ಘಟನೆ ನಡೆದಿದೆ. ಕೆಕೆಆರ್ ಆರಂಭಿಕ ಬ್ಯಾಟ್ಸ್‌ಮನ್ ಫಿನ್‌ ಆಲೆನ್‌ (Finn Allen) ತಪ್ಪು ತೀರ್ಪಿನಿಂದ ತನ್ನ ವಿಕೆಟ್ ಕಳೆದುಕೊಂಡರು. ಮೂರನೇ ಅಂಪೈರ್ ಕೆಎನ್‌ ಅನಂತ ಪದ್ಮನಾಭನ್‌ ಅವರು ಫೀಲ್ಡರ್ ದಿಗ್ವೇಶ್‌ ರಾಥಿ ಕ್ಯಾಚ್‌ ಪಡೆಯುವ ವೇಳೆ ಬೌಂಡರಿ ರೋಪ್ ಮೇಲೆ ಕಾಲಿಟ್ಟಿದ್ದರೂ, ಅದನ್ನು ಗಮನಿಸದೇ ಔಟ್ ಎಂದು ತೀರ್ಪು ಪ್ರಕಟಿಸಿದರು.

ಈ ವಿವಾದಾತ್ಮಕ ತೀರ್ಪು ಮತ್ತೊಮ್ಮೆ ಐಪಿಎಲ್‌ ಟೂರ್ನಿಯಲ್ಲಿ ಅಂಪೈರಿಂಗ್ ಗುಣಮಟ್ಟದ ಬಗ್ಗೆ ಪ್ರಶ್ನೆಗಳನ್ನು ಎಬ್ಬಿಸಿದೆ. ಈ ಘಟನೆ ಈ ಪಂದ್ಯದ ಎರಡನೇ ಓವರ್‌ನಲ್ಲಿ ಪ್ರಿನ್ಸ್‌ ಯಾದವ್‌ ಬೌಲಿಂಗ್‌ನಲ್ಲಿ ಸಂಭವಿಸಿತು. ಫಿನ್‌ ಆಲೆನ್‌ ನಾಲ್ಕನೇ ಬಾಲ್‌ಗೆ ಟಾಪ್-ಎಡ್ಜ್ ಮಾಡಿಕೊಂಡರು. ಅದು ಥರ್ಡ್-ಮ್ಯಾನ್ ಪ್ರದೇಶದ ಕಡೆಗೆ ಹಾರಿತು.

ಅಲ್ಲಿ ಫೀಲ್ಡಿಂಗ್‌ನಲ್ಲಿದ್ದ ದಿಗ್ವೇಶ್‌ ರಾಥಿ ಆರಂಭದಲ್ಲಿ ಬಾಲ್‌ನ ದಿಕ್ಕನ್ನು ಸರಿಯಾಗಿ ಅಂದಾಜಿಸಲು ವಿಫಲರಾದರು ಮತ್ತು ಬೌಂಡರಿ ಲೈನ್‌ನಿಂದ ಒಳಗೆ ನಡೆದು ಬಂದರು. ತಮ್ಮ ತಪ್ಪನ್ನು ಅರಿತ ತಕ್ಷಣ ಹಿಂದಕ್ಕೆ ಓಡುತ್ತಾ ಬೌಂಡರಿ ರೋಪ್ ಕಡೆಗೆ ಹಿಂತಿರುಗಿ ಕ್ಯಾಚ್ ಪೂರ್ಣಗೊಳಿಸಲು ಪ್ರಯತ್ನಿಸಿದರು.

LSG vs KKR: ಮುಕುಲ್‌ ಚೌಧರಿ ಫಿಫ್ಟಿ, ಕೋಲ್ಕತಾಗೆ ಮಣ್ಣು ಮುಕ್ಕಿಸಿದ ಲಖನೌ ಸೂಪರ್‌ ಜಯಂಟ್ಸ್‌!

ದಿಗ್ವೇಶ್‌ ರಾಥಿ ಬಾಲ್‌ನ್ನು ಹಿಡಿಯಲು ಯಶಸ್ವಿಯಾದರೂ, ಆ ಪ್ರಕ್ರಿಯೆಯಲ್ಲಿ ಅವರು ಬೌಂಡರಿ ರೋಪ್ ಮೇಲೆ ಕಾಲಿಟ್ಟಂತೆ ಕಾಣಿಸಿತು. ಆದರೂ, ಮೂರನೇ ಅಂಪೈರ್ ಕೆಎನ್‌ ಅನಂತ ಪದ್ಮನಾಭನ್‌ ಈ ಘಟನೆಗೆ ಬಹಳ ಕಡಿಮೆ ಸಮಯದಲ್ಲಿ ಪರಿಶೀಲನೆ ನಡೆಸಿ, ಅವರ ಕಾಲು ರೋಪ್‌ಗೆ ಅತ್ಯಂತ ಸಮೀಪದಲ್ಲಿದ್ದರೂ ಫಿನ್‌ ಆಲೆನ್‌ Finn ಅವರನ್ನು ಔಟ್ ಎಂದು ತೀರ್ಮಾನ ಕೊಟ್ಟರು.

ಈ ತೀರ್ಪು ಸ್ಪಷ್ಟವಾದ ದೊಡ್ಡ ತಪ್ಪಾಗಿ ಹೊರಹೊಮ್ಮಿತು. ರಿಪ್ಲೇಗಳಲ್ಲಿ ಸ್ಪಷ್ಟವಾಗಿ ಕಾಣಿಸಿಕೊಂಡಂತೆ, ಕ್ಯಾಚ್ ಪೂರ್ಣಗೊಳಿಸುವ ವೇಳೆ ರಾಥಿ ಅವರ ಎಡ ಕಾಲು ಬೌಂಡರಿ ರೋಪ್‌ಗೆ ತಗುಲಿತ್ತು. ಈ ಘಟನೆಗೆ ಕ್ರಿಕೆಟ್ ಅಭಿಮಾನಿಗಳು ಸಾಮಾಜಿಕ ಜಾಲತಾಣ ಎಕ್ಸ್‌ ಖಾತೆಯಲ್ಲಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. ವಿವಾದಾತ್ಮಕ ಕ್ಯಾಚ್‌ಗಳಿಗೆ ಸಂಬಂಧಿಸಿದ ಮತ್ತೊಂದು ಕೆಟ್ಟ ತೀರ್ಪು ಎಂದು ಅವರು ಟೀಕಿಸಿದರು.

“ಬ್ಯಾಟ್ಸ್‌ಮನ್ ತಲೆಯ ಮೇಲೆ ಮೂರು ಅಡಿ ಎತ್ತರದಲ್ಲಿ ಹೋದ ವೈಡ್‌ನ್ನು ಪರಿಶೀಲಿಸಲು ನಾವು 15 ನಿಮಿಷ ತೆಗೆದುಕೊಳ್ಳುತ್ತೇವೆ. ಆದರೆ ಪಂದ್ಯದಲ್ಲಿನ ಅತಿ ದೊಡ್ಡ ವಿಕೆಟ್ ಔಟ್ ಆಗಿದೆಯೇ ಇಲ್ಲವೇ ಎನ್ನುವುದನ್ನು ನಿರ್ಧರಿಸಲು ಕೇವಲ 5 ಸೆಕೆಂಡ್‌ ಮಾತ್ರ ನೋಡುತ್ತಾರೆ ಮತ್ತು ಅವರನ್ನು ಹೊರಗೆ ಕಳುಹಿಸುತ್ತಾರೆ,” ಎಂದು ಒಬ್ಬ ಅಭಿಮಾನಿ ಆಕ್ರೋಶ ವ್ಯಕ್ತಪಡಿಸಿದರು.

ಐಪಿಎಲ್ 2026ರಲ್ಲಿ ಕಳಪೆ ಅಂಪೈರಿಂಗ್

2026ರ ಸಾಲಿನಲ್ಲಿ ಅಂಪೈರ್‌ಗಳ ವಿವಾದ ಇದು ಮೊದಲನೆಯದಲ್ಲ. ಟೂರ್ನಮೆಂಟ್‌ನ ಮೊದಲ ಪಂದ್ಯದಲ್ಲೇ ಇಂತಹದೇ ಒಂದು ಘಟನೆ ನಡೆದಿತ್ತು, ಅಲ್ಲಿ ಫಿಲ್‌ ಸಾಲ್ಟ್‌ ಅವರು ಹೆನ್ರಿಕ್‌ ಕ್ಲಾಸೆನ್‌ ಅವರ ಕ್ಯಾಚ್ ಪಡೆದಿದ್ದರು.

IPL 2026 ಟೂರ್ನಿಯಿಂದ ಹೊರಗುಳಿಯಿರಿ: ಎಂಎಸ್‌ ಧೋನಿಗೆ ಆರ್‌ ಅಶ್ವಿನ್‌ ಮನವಿ!

ಆ ಪಂದ್ಯದಲ್ಲಿ, ಕ್ಲಾಸೆನ್ ಲೆಗ್ ಸೈಡ್‌ಗೆ ಹೊಡೆದ ಶಾಟ್ ಎತ್ತರಕ್ಕೆ ಹಾರಿತು ಮತ್ತು ಮಿಡ್‌ವಿಕೆಟ್ ಬೌಂಡರಿ ಕಡೆಗೆ ಹೋಗುತ್ತಿತ್ತು. ಅಲ್ಲಿ ಫಿಲ್‌ ಸಾಲ್ಟ್‌ ಬಾಲ್ ಕೆಳಗೆ ನಿಂತು, ನೆಲಕ್ಕೆ ಬಿದ್ದುಕೊಂಡೇ ಕ್ಯಾಚ್ ಪೂರ್ಣಗೊಳಿಸಿದರು. ಬೌಂಡರಿ ಕುಶನ್‌ಗೆ ಸಮೀಪದಲ್ಲಿದ್ದ ಕಾರಣ, ಈ ತೀರ್ಪನ್ನು ಮೂರನೇ ಅಂಪೈರ್ ಪರಿಶೀಲನೆಗೆ ಕಳುಹಿಸಲಾಗಿತ್ತು.

ಆ ಘಟನೆಯಲ್ಲಿ, ಮೂರನೇ ಅಂಪೈರ್ ಬ್ರಾಡ್ಕಾಸ್ಟರ್‌ನಿಂದ ಟಾಪ್ ಆಂಗಲ್ ದೃಶ್ಯವನ್ನು ಕೇಳಿದ್ದರು. ಆದರೆ ಪ್ರಸಾರ ತಂಡ ಅದನ್ನು ಒದಗಿಸಲು ಸಾಧ್ಯವಾಗಲಿಲ್ಲ. ಸಂಪೂರ್ಣವಾಗಿ ಪರಿಶೀಲನೆ ನಡೆಸುವ ಬದಲು, ಅಂಪೈರ್ ಫೀಲ್ಡಿಂಗ್ ತಂಡದ ಪರವಾಗಿ ತೀರ್ಪು ನೀಡಿದರು. ನಂತರ, ಅಭಿಮಾನಿಗಳು ಗಮನಿಸಿದಂತೆ, ಫಿಲ್‌ ಸಾಲ್ಟ್‌ ವಾಸ್ತವವಾಗಿ ಬೌಂಡರಿ ರೋಪ್‌ಗೆ ತಾಕಿದ್ದರು ಎಂಬುದು ಸ್ಪಷ್ಟವಾಯಿತು.