ವೈಭವ್ ಸೂರ್ಯವಂಶಿ ಬ್ಯಾಟ್ನಲ್ಲಿ 'AI ಚಿಪ್'? ಕ್ಯಾತೆ ತೆಗೆದ ಪಾಕಿಸ್ತಾನಿ ತಜ್ಞ!
ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯಲ್ಲಿಈಗ ವೈಭವ್ ಸೂರ್ಯವಂಶಿ ಅವರದ್ದೇ ಸದ್ದು. 15 ವರ್ಷದ ಯುವ ಎಡಗೈ ಬ್ಯಾಟರ್ ತಮ್ಮ ಸ್ಪೋಟಕ ಬ್ಯಾಟಿಂಗ್ ಮೂಲಕ ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾರೆ. ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ವೈಭವ್ ಕೇವಲ 36 ಎಸೆತಗಳಲ್ಲಿ ಶತಕ ಬಾರಿಸಿದ ಬೆನ್ನಲ್ಲೇ, ಅವರ ಬ್ಯಾಟ್ನಲ್ಲಿ 'ಎಐ ಚಿಪ್' ಬಳಕೆ ಮಾಡುತ್ತಿದ್ದಾರೆ ಎಂಬ ವಿಚತ್ರ ಆರೋಪ ಪಾಕಿಸ್ತಾನದಿಂದ ಕೇಳಿಬಂದಿದೆ.
ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ. -
ಬೆಂಗಳೂರು: ಇಂಡಿಯನ್ ಪ್ರೀಮಿಯರ್ ಲೀಗ್ ಟೂರ್ನಿಯ 2026ರ ಆವೃತ್ತಿಯಲ್ಲಿ ಸ್ಪೋಟಕ ಬ್ಯಾಟಿಂಗ್ ಮೂಲಕ ಗಮನ ಸೆಳೆದಿರುವ 15 ವರ್ಷದ ಯುವ ಬ್ಯಾಟರ್ ವೈಭವ್ ಸೂರ್ಯವಂಶಿ, ಈಗ ವಿಚಿತ್ರ ಆರೋಪದ ಕೇಂದ್ರಬಿಂದುವಾಗಿದ್ದಾರೆ. ಪಾಕಿಸ್ತಾನದ ಪ್ರಸಿದ್ಧ ಕ್ರಿಕೆಟ್ ವಿಶ್ಲೇಷಕ ನೌಮನ್ ನಿಯಾಜ್, ವೈಭವ್ ತನ್ನ ಬ್ಯಾಟ್ನಲ್ಲಿ 'AI ಚಿಪ್' ಬಳಸುತ್ತಿದ್ದಾರೆ ಎಂದು ತಲೆ ಬುಡ ಇಲ್ಲದ ಹೇಳಿಕೆ ನೀಡಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಚರ್ಚೆಗೆ ಕಾರಣರಾಗಿದ್ದಾರೆ.
ಇತ್ತೀಚೆಗೆ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಪಂದ್ಯದಲ್ಲಿ ಕೇವಲ 36 ಎಸೆತಗಳಲ್ಲಿ ಶತಕ ಸಿಡಿಸಿದ ವೈಭವ್, ಕ್ರಿಕೆಟ್ ಜಗತ್ತಿನ ಗಮನವನ್ನು ಮತ್ತೊಮ್ಮೆ ತಮ್ಮತ್ತ ಸೆಳೆದಿದ್ದರು. ಅವರ ಅದ್ಭುತ ಶಕ್ತಿ ಮತ್ತು ಸ್ಟ್ರೋಕ್ಪ್ಲೇ ನೋಡಿ ಅಚ್ಚರಿಗೊಂಡ ನಿಯಾಜ್, "ಈ ಹುಡುಗನ ಬ್ಯಾಟ್ ಪರೀಕ್ಷಿಸಬೇಕು. ವಾಡಾ ಡೋಪ್ ಟೆಸ್ಟ್ ಮಾಡುವಂತೆ ಈತನ ಬ್ಯಾಟನ್ನು ಲ್ಯಾಬ್ಗೆ ಕಳುಹಿಸಿ ಪರೀಕ್ಷಿಸಬೇಕು. ಅವನು ಬ್ಯಾಟ್ನಲ್ಲಿ AI ಚಿಪ್ ಬಳಸಿರಬಹುದು," ಎಂದು ವಿಚಿತ್ರ ಆರೋಪ ಮಾಡಿದ್ದಾರೆ.
ವೈಭವ್ ಸೂರ್ಯವಂಶಿ ಬಗ್ಗೆ ಮನು ಭಾಕರ್ ಬಳಿ ಪ್ರಶ್ನೆ ಕೇಳಿದ ಪತ್ರಕರ್ತನನ್ನು ಟೀಕಿಸಿದ ನೆಟ್ಟಿಗರು!
ಆದರೆ ಈ ಹೇಳಿಕೆಯನ್ನು ಗಂಭೀರವಾಗಿ ತೆಗೆದುಕೊಳ್ಳುವವರಿಗಿಂತ ಅದನ್ನು ಹಾಸ್ಯಾಸ್ಪದವಾಗಿ ತೆಗೆದುಕೊಂಡವರೇ ಹೆಚ್ಚು. ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಚಾರ ವೈರಲ್ ಆಗಿದ್ದು, ಅಭಿಮಾನಿಗಳು ಮತ್ತು ನೆಟಿಜನ್ಸ್ ಈ ಆರೋಪವನ್ನು ದೊಡ್ಡ "ಜೋಕ್" ಎಂದು ಪರಿಗಣಿಸಿ ನಿಯಾಜ್ ಅವರನ್ನು ಟ್ರೋಲ್ ಮಾಡುತ್ತಿದ್ದಾರೆ.
ನಿಜಕ್ಕೂ ಕ್ರಿಕೆಟ್ ನಿಯಮಗಳ ಪ್ರಕಾರ, ಬ್ಯಾಟ್ನಲ್ಲಿ ಯಾವುದೇ ತಾಂತ್ರಿಕ ಸಾಧನ ಅಥವಾ ಚಿಪ್ ಬಳಕೆ ಸಂಪೂರ್ಣವಾಗಿ ನಿಷೇಧಿತವಾಗಿದೆ. ಇಂತಹದ್ದೇನಾದರೂ ಪತ್ತೆಯಾದರೆ ಆಟಗಾರನಿಗೆ ಕಠಿಣ ಶಿಕ್ಷೆ ಎದುರಾಗುತ್ತದೆ. ಆದರೆ ಈಗಿನ ತನಕ ವೈಭವ್ ವಿರುದ್ಧ ಯಾವುದೇ ಅಧಿಕೃತ ಆರೋಪ ಬಂದಿಲ್ಲ ಅಥವಾ ತನಿಖೆ ಕೂಡ ನಡೆದಿಲ್ಲ.
SRH vs RR: 36 ಎಸೆತಗಳಲ್ಲಿ ಶತಕ ಬಾರಿಸಿ ಇತಿಹಾಸ ಬರೆದ ವೈಭವ್ ಸೂರ್ಯವಂಶಿ!
ವೈಭವ್ ಸೂರ್ಯವಂಶಿ ಕೇವಲ 15 ವರ್ಷದವರಾಗಿದ್ದರೂ, ಐಪಿಎಲ್ನಲ್ಲಿ ಅವರು ತೋರಿಸುತ್ತಿರುವ ಆಕ್ರಮಣಕಾರಿ ಆಟ ಎಲ್ಲರನ್ನೂ ಅಚ್ಚರಿಗೊಳಿಸಿದೆ. ಅವರ ಸ್ಟ್ರೈಕ್ರೇಟ್ 200ಕ್ಕಿಂತ ಹೆಚ್ಚಿದ್ದು, ವಿಶ್ವದ ಘಟಾನುಘಟಿ ಬೌಲರ್ಗಳ ವಿರುದ್ಧವೂ ಅವರು ಭಯವಿಲ್ಲದೆ ಸಿಕ್ಸರ್ಗಳನ್ನು ಹೊಡೆದು ನೋಡುಗರನ್ನು ನಿಬ್ಬೆರಗಾಗಿಸಿದ್ದಾರೆ.
ಕ್ರಿಕೆಟ್ ತಜ್ಞರ ಅಭಿಪ್ರಾಯದಲ್ಲಿ, ವೈಭವ್ ಯಶಸ್ಸಿನ ರಹಸ್ಯವು ತಾಂತ್ರಿಕ ಸಾಧನಗಳಲ್ಲಿ ಅಲ್ಲ. ಅವರ ಸಾಮರ್ಥ್ಯ ಅವರ ಟೆಕ್ನಿಕಲ್ ಬ್ಯಾಟಿಂಗ್, ಕೈಚಳಕ ಮತ್ತು ಆತ್ಮವಿಶ್ವಾಸದಲ್ಲಿದೆ. ನಿಯಾಜ್ ಅವರ ಹೇಳಿಕೆ ಕೂಡ ಒಂದು ರೀತಿಯಲ್ಲಿ ಪ್ರಶಂಸೆಯ ಸ್ವರೂಪದಲ್ಲಿಯೇ ಬಂದಿದ್ದು, ಯುವ ಆಟಗಾರನ ಪ್ರತಿಭೆಯನ್ನು ಅತಿರಂಜಿತವಾಗಿ ವಿವರಿಸುವ ಪ್ರಯತ್ನವೆಂದು ಕೆಲವರು ಹೇಳುತ್ತಾರೆ.
IPL 2026: ಮಂಡಿರಜ್ಜು ಗಾಯಕ್ಕೆ ತುತ್ತಾದ ವೈಭವ್ ಸೂರ್ಯವಂಶಿ; ರಾಜಸ್ಥಾನ್ಗೆ ಆತಂಕ!
ಒಟ್ಟಿನಲ್ಲಿ, 'AI ಚಿಪ್' ಆರೋಪವು ಯಾವುದೇ ಪುರಾವೆಗಳಿಲ್ಲದ ವಿಚಿತ್ರ ಹೇಳಿಕೆಯಾಗಿ ಉಳಿದಿದ್ದು, ವೈಭವ್ ಸೂರ್ಯವಂಶಿ ತಮ್ಮ ಅದ್ಭುತ ಆಟದ ಮೂಲಕವೇ ಇದಕ್ಕೆ ಉತ್ತರಿಸುತ್ತಿದ್ದಾರೆ. ಮುಂದಿನ ದಿನಗಳಲ್ಲಿ ಅವರು ಇನ್ನಷ್ಟು ದಾಖಲೆಗಳನ್ನು ನಿರ್ಮಿಸುವ ಸಾಧ್ಯತೆ ಇರುವುದರಿಂದ, ಈ ಯುವ ಪ್ರತಿಭೆಯ ಮೇಲೆ ವಿಶ್ವದ ಕಣ್ಣುಗಳೇ ನೆಟ್ಟಿವೆ.