IPL 2025: ಚೆಂಡಿಗೆ ಎಂಜಲು ಬಳಕೆ ನಿಷೇಧ ತೆರವುಗೊಳಿಸಿದ ಬಿಸಿಸಿಐ

ಮುಂಬಯಿ: ಪಂದ್ಯದ ವೇಳೆ ಆಟಗಾರರು ಚೆಂಡಿನ ಮೇಲೆ ಎಂಜಲು ಅಥವಾ ಲಾಲಾರಸ ಹಚ್ಚುವುದರ ಮೇಲೆ ನಿಷೇಧವನ್ನು ಬಿಸಿಸಿಐ(BCCI lifts saliva ban) ತೆಗೆದುಹಾಕಿದೆ. ಗುರುವಾರ(ಮಾ.20) ಮುಂಬೈಯಲ್ಲಿ ನಡೆದ ಐಪಿಎಲ್‌(IPL 2025) ಫ್ರಾಂಚೈಸಿಗಳ ನಾಯಕರ ಸಭೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ. ಈ ಪ್ರಸ್ತಾವಕ್ಕೆ ಫ್ರಾಂಚೈಸಿಗಳ ಬಹುತೇಕ ನಾಯಕರು ಒಪ್ಪಿಗೆ ಸೂಚಿಸಿದ ಬಳಿಕ ಬಿಸಿಸಿಐ ನಿರ್ಧಾರ ಪ್ರಕಟಿಸಿದೆ. ಈ ಹಿಂದಿನ ಆವೃತ್ತಿಯಲ್ಲಿ ಆಟಗಾರನೊಬ್ಬ ಚೆಂಡಿಗೆ ಎಂಜಲು ಅಥವಾ ಲಾಲಾರಸ ಹಚ್ಚಿದರೆ ದಂಡದ ಶಿಕ್ಷೆ ಅನುಭವಿಸಬೇಕಿತ್ತು.

ಕೋವಿಡ್‌ ಹಿನ್ನೆಲೆಯಲ್ಲಿ 2022ರಲ್ಲಿ ಚೆಂಡಿಗೆ ಎಂಜಲು ಸವರುವುದನ್ನು ಐಸಿಸಿ ಶಾಶ್ವತವಾಗಿ ನಿಷೇಧಿಸಿತ್ತು. ಈ ನಿಷೇಧ ತೆರವಿಗೆ ಅನೇಕ ವೇಗಿಗಳು ಮನವಿ ಮಾಡಿಕೊಂಡಿದ್ದರೂ ಐಸಿಸಿ ಅದನ್ನು ಪರಿಗಣಿಸಿಲ್ಲ. ಆದರೆ ಎಂಜಲಿನ ಬದಲು ಬೆವರು ಹಚ್ಚಲಷ್ಟೇ ಅವಕಾಶ ನೀಡಿತ್ತು. ಇದೀಗ ಬಿಸಿಸಿಐ ಈ ನಿಯವನ್ನು ಐಪಿಎಲ್‌ನಿಂದ ತೆಗೆದು ಹಾಕಿದೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಐಸಿಸಿ ಕೂಡ ಈ ನಿಯಮವನ್ನು ಕೈ ಬಿಡುವ ಸಾಧ್ಯತೆ ಅಧಿಕವಾಗಿದೆ. ಏಕೆಂದರೆ ಐಸಿಸಿಯ ಅಧ್ಯಕ್ಷರಾಗಿರುವುದು ಈ ಹಿಂದೆ ಬಿಸಿಸಿಐ ಕಾರ್ಯದರ್ಶಿಯಾಗಿದ್ದ ಜಯ್‌ ಶಾ.

ಗುರುವಾರ ನಡೆದ ಸಭೆಯಲ್ಲಿ ಎಲ್ಲ 10 ತಂಗಳ ನಾಯಕರಿಗೂ ಟೂರ್ನಿಯ ಹೊಸ ಮತ್ತು ಬದಲಾದ ನಿಯಮಾವಳಿಗಳ ಬಗ್ಗೆಯೂ ಸ್ಪಷ್ಟ ವಿವರಣೆ ನೀಡಲಾಯಿತು. ಮಾ.22ರಂದು ಟೂರ್ನಿಗೆ ಚಾಲನೆ ಸಿಗಲಿದ್ದು, ಉದ್ಘಾಟನಾ ಪಂದ್ಯದಲ್ಲಿ ಹಾಲಿ ಚಾಂಪಿಯನ್‌ ಕೋಲ್ಕತಾ ನೈಟ್‌ ರೈಡರ್ಸ್‌ ತಂಡ ಆರ್‌ಸಿಬಿ ವಿರುದ್ಧ(RCB vs KKR) ಸೆಣಸಾಡಲಿದೆ.

ಇದನ್ನೂ ಓದಿ IPL 2025: ರಾಜಸ್ಥಾನ್‌ ರಾಯಲ್ಸ್‌ 3 ಪಂದ್ಯಗಳಿಗೆ ರಿಯಾನ್‌ ಪರಾಗ್ ನಾಯಕ

2 ಹೊಸ ಚೆಂಡು ಬಳಕೆ

ರಾತ್ರಿ ಪಂದ್ಯಕ್ಕೆ ಎರಡು ಹೊಸ ಚೆಂಡುಗಳನ್ನು ಬಳಸಲು ನಿರ್ಧರಿಸಲಾಗಿದೆ. ಹೊಸ ಮಾರ್ಗಸೂಚಿಗಳ ಪ್ರಕಾರ, ಪಂದ್ಯಗಳ ಫಲಿತಾಂಶದ ಮೇಲೆ ಇಬ್ಬನಿಯ ಪರಿಣಾಮವನ್ನು ತಪ್ಪಿಸುವ ಸಲುವಾಗಿ ಎರಡು ಹೊಸ ಚೆಂಡುಗಳನ್ನು ಬಳಸಲಾಗುತ್ತದೆ. 10ನೇ ಓವರ್ ನಂತರ ಎರಡನೇ ಹೊಸ ಚೆಂಡನ್ನು ಕೇಳುವ ಆಯ್ಕೆಯನ್ನು ನಾಯಕನಿಗೆ ಇರುತ್ತದೆ. ಆದರೆ ಚೆಂಡನ್ನು ಬದಲಾಯಿಸಲು ಅವಕಾಶ ನೀಡುವುದು ಅಂಪೈರ್ ಅವರ ವಿವೇಚನೆಗೆ ಬಿಟ್ಟದ್ದಾಗಿದೆ.

ಐಪಿಎಲ್‌ನ ನಿಯಮಗಳು ಹಿಂದಿಗಿಂತ ಈ ಬಾರಿ ಸ್ವಲ್ಪ ಬಿಗಿಯಾಗಿವೆ. ಆಟಗಾರರು ತಂಡದ ಬಸ್‌ನಲ್ಲೇ ಪ್ರಯಾಣಿಸಬೇಕು, ಆಟಗಾರರ ಡ್ರೆಸ್ಸಿಂಗ್‌ ರೂಮ್‌ಗೆ ಕುಟುಂಬಸ್ಥರು ಬರುವಂತಿಲ್ಲ, ಸ್ಲಿàವ್‌ಲೆಸ್‌ ಜೆರ್ಸಿಯಲ್ಲಿ ಬಹುಮಾನ ವಿತರಣೆಯಲ್ಲಿ ಪಾಲ್ಗೊಳ್ಳುವಂತಿಲ್ಲ, ಪಂದ್ಯದ ದಿನ ಅಭ್ಯಾಸ ಅಥವಾ ಫಿಟ್‌ನೆಸ್‌ ಪರೀಕ್ಷೆಯಲ್ಲಿ ಪಾಲ್ಗೊಳ್ಳುವಂತಿಲ್ಲ.

ಆಟಗಾರರ ಬದಲಾವಣೆ ನಿಯಮದಲ್ಲಿ ಬದಲಾವಣೆ ತರಲಾಗಿದೆ. ಪ್ರಸ್ತುತ ಐಪಿಎಲ್‌ ವೇಳೆ, ಗಾಯಕ್ಕೀಡಾಗಿರುವ ಆಟಗಾರರನ್ನು ಈ ಬಾರಿ ಲೀಗ್‌ ಹಂತದ ಆರಂಭಿಕ 12ನೇ ಪಂದ್ಯದವರೆಗೂ ಬದಲಾಯಿಸಲು ಅವಕಾಶವಿದೆ. ಈ ಹಿಂದೆ ಇದು ಲೀಗ್‌ 7 ಪಂದ್ಯಗಳಿಗೆ ಮಾತ್ರ ಅವಕಾಶವಿತ್ತು.