Ravindra Jadeja: ರಾಜಸ್ಥಾನ್‌ ಸೇರಿದ ಬಗ್ಗೆ ಜಡೇಜಾ ಮೊದಲ ಪ್ರತಿಕ್ರಿಯೆ

ಕೋಲ್ಕತಾ: 2026 ರ ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2026) ಆವೃತ್ತಿಗೆ ಮುಂಚಿತವಾಗಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ನಿಂದ ರಾಜಸ್ಥಾನ ರಾಯಲ್ಸ್ (RR) ಗೆ ಹೈ ಪ್ರೊಫೈಲ್ ವರ್ಗಾವಣೆಯನ್ನು ಪೂರ್ಣಗೊಳಿಸಿದ ನಂತರ ಸ್ಟಾರ್ ಆಲ್‌ರೌಂಡರ್ ರವೀಂದ್ರ ಜಡೇಜಾ(Ravindra Jadeja) ತಮ್ಮ ಮೊದಲ ಪ್ರತಿಕ್ರಿಯೆಯನ್ನು ನೀಡಿದರು.

ಶನಿವಾರ ಬೆಳಿಗ್ಗೆ ಐಪಿಎಲ್ ಆಡಳಿತ ಮಂಡಳಿಯು ವಿನಿಮಯ ಒಪ್ಪಂದವನ್ನು ದೃಢಪಡಿಸಿತು, ಇದರ ಪರಿಣಾಮವಾಗಿ ಜಡೇಜಾ 14 ಕೋಟಿ ರೂ.ಗೆ ಉದ್ಘಾಟನಾ ಚಾಂಪಿಯನ್‌ಗಳೊಂದಿಗೆ ಸೇರಿಕೊಂಡರು. ಸಂಜು ಸ್ಯಾಮ್ಸನ್ 18 ಕೋಟಿ ರೂ.ಗೆ ಐದು ಬಾರಿಯ ಚಾಂಪಿಯನ್‌ ಚೆನ್ನೈ ತಂಡದೊಂದಿಗೆ ಒಪ್ಪಂದವನ್ನು ಮಾಡಿಕೊಂಡರು.

"ರಾಜಸ್ಥಾನ್ ರಾಯಲ್ಸ್ ನನಗೆ ನನ್ನ ಮೊದಲ ವೇದಿಕೆ ಮತ್ತು ಮೊದಲ ಗೆಲುವಿನ ರುಚಿಯನ್ನು ನೀಡಿದ ತಂಡ. ಮತ್ತೆ ಈ ತಂಡಕ್ಕೆ ಮರಳುವುದು ವಿಶೇಷವೆನಿಸುತ್ತದೆ. ಇದು ನನಗೆ ಕೇವಲ ಒಂದು ತಂಡವಲ್ಲ, ಇದು ತವರು. ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿ ನಾನು ನನ್ನ ಮೊದಲ ಐಪಿಎಲ್ ಗೆದ್ದಿದ್ದೇನೆ ಮತ್ತು ಪ್ರಸ್ತುತ ಆಟಗಾರರ ಗುಂಪಿನೊಂದಿಗೆ ಹೆಚ್ಚಿನದನ್ನು ಗೆಲ್ಲಲು ನಾನು ಆಶಿಸುತ್ತೇನೆ" ಎಂದು ಜಡೇಜಾ ಹೇಳಿದರು.

ಐಪಿಎಲ್‌ನ ಮೊದಲ ಎರಡು ಸೀಸನ್‌ಗಳಲ್ಲಿ ಜಡೇಜಾ ರಾಯಲ್ಸ್ ತಂಡವನ್ನು ಪ್ರತಿನಿಧಿಸಿದ್ದರು. ಆ ಅವಧಿಯಲ್ಲಿ ಅಂದಿನ ನಾಯಕನಾಗಿದ್ದ ಶೇನ್ ವಾರ್ನ್ ಅವರು ಜಡೇಜಾಗೆ "ರಾಕ್‌ಸ್ಟಾರ್" ಎಂಬ ಬಿರುದು ನೀಡಿದ್ದರು. 2012 ರಿಂದ, 36 ವರ್ಷ ವಯಸ್ಸಿನ ಜಡೇಜಾ ಚೆನ್ನೈ ತಂಡದ ಪ್ರಮುಖ ಭಾಗವಾಗಿದ್ದರು. 2016 ಮತ್ತು 2017 ರಲ್ಲಿ ಫ್ರಾಂಚೈಸಿಯನ್ನು ಅಮಾನತುಗೊಳಿಸಿದಾಗ. ಅವರು ಗುಜರಾತ್‌ ತಂಡದ ಪರ ಆಡಿದ್ದರು. ವಿಶೇಷವಾಗಿ 2023 ರ ಪ್ರಶಸ್ತಿ ಗೆಲುವಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಿದ್ದರು. ಗುಜರಾತ್ ಟೈಟಾನ್ಸ್ ವಿರುದ್ಧ ಅಹಮದಾಬಾದ್‌ನಲ್ಲಿ ನಡೆದಿದ್ದ ಫೈನಲ್‌ನಲ್ಲ ಕೊನೆಯ ಎರಡು ಎಸೆತಗಳಲ್ಲಿ 10 ರನ್ ಗಳಿಸಿ ತಂಡವನ್ನು ಚಾಂಪಿಯನ್‌ ಪಟ್ಟಕ್ಕೇರಿಸಿದ್ದರು.

254 ಐಪಿಎಲ್ ಪಂದ್ಯಗಳನ್ನು ಆಡಿರುವ ಜಡೇಜ ಈಗ ರಾಯಲ್ಸ್ ತಂಡಕ್ಕೆ ಅಪಾರ ಅನುಭವವನ್ನು ತಂದಿದ್ದಾರೆ. ಆಲ್‌ರೌಂಡರ್ ಆಗಮನವು ತಂಡವನ್ನು ಗಮನಾರ್ಹವಾಗಿ ಬಲಪಡಿಸುತ್ತದೆ ಎಂದು ಆರ್‌ಆರ್‌ನ ಕ್ರಿಕೆಟ್ ನಿರ್ದೇಶಕ ಕುಮಾರ್ ಸಂಗಕ್ಕಾರ ಹೇಳಿದರು.

ಇದನ್ನೂ ಓದಿ ಟೆಸ್ಟ್‌ನಲ್ಲಿ ಅಪರೂಪದ ಸಾಧನೆ ಮಾಡಿದ ರವೀಂದ್ರ ಜಡೇಜಾ

"ಜಡೇಜ ರಾಯಲ್ಸ್‌ಗೆ ಮರಳುವುದು ನಮಗೆಲ್ಲರಿಗೂ ನಂಬಲಾಗದಷ್ಟು ವಿಶೇಷವಾಗಿದೆ. ಆರ್‌ಆರ್‌ನ ಐಪಿಎಲ್ ವಿಜೇತ ಅಭಿಯಾನದ ಭಾಗವಾಗಿದ್ದ ಅವರು ಫ್ರಾಂಚೈಸಿ ಮತ್ತು ಅಭಿಮಾನಿಗಳನ್ನು ಅರ್ಥಮಾಡಿಕೊಂಡಿದ್ದಾರೆ" ಎಂದು ಸಂಗಕ್ಕಾರ ಹೇಳಿದರು.

"ವರ್ಷಗಳಲ್ಲಿ, ಅವರು ಪ್ರತಿಯೊಂದು ವಿಭಾಗದಲ್ಲೂ ಆಟದ ಮೇಲೆ ಪ್ರಭಾವ ಬೀರುವ ಆಟಗಾರನಾಗಿ ಬೆಳೆದಿದ್ದಾರೆ. ಅವರ ಅನುಭವ, ಶಾಂತತೆ ಮತ್ತು ಸ್ಪರ್ಧಾತ್ಮಕತೆ ನಮ್ಮ ಗುಂಪಿಗೆ ಅಪಾರ ಮೌಲ್ಯವನ್ನು ನೀಡುತ್ತದೆ" ಎಂದು ಸಂಗಕ್ಕಾರ ಹೇಳಿದರು.