World Para Athletics: ಚಿನ್ನದ ಪದಕ ಗೆದ್ದ ಸುಮಿತ್ ಅಂಟಿಲ್

ನವದೆಹಲಿ: ವಿಶ್ವ ಪ್ಯಾರಾ ಅಥ್ಲೆಟಿಕ್ಸ್ ಚಾಂಪಿಯನ್‌ಶಿಪ್‌(World Para Athletics Championships)ನಲ್ಲಿ ಮಂಗಳವಾರ ಭಾರತಕ್ಕೆ ಎರಡು ಪದಕ ಒಲಿದಿದೆ. ಸುಮಿತ್ ಅಂಟಿಲ್(Sumit Antil) ಚಿನ್ನ ಗೆದ್ದರೆ, ಯೋಗೇಶ್‌ ಕಥುನಿಯಾ(Yogesh Kathuniya) ಬೆಳ್ಳಿ ಪದಕ ಗೆದ್ದರು.

ದೆಹಲಿಯ ಜವಾಹರಲಾಲ್ ನೆಹರು ಕ್ರೀಡಾಂಗಣದಲ್ಲಿ ನಡೆದ F64 ವಿಭಾಗದಲ್ಲಿ ಸುಮಿತ್ ಅಂಟಿಲ್ ಚಿನ್ನದ ಪದಕ ಗೆದ್ದರೂ, ತಮ್ಮದೇ ಆದ ವಿಶ್ವ ದಾಖಲೆಯನ್ನು ಮುರಿಯುವ ಅವಕಾಶವನ್ನು ಕಳೆದುಕೊಂಡರು. ಸುಮಿತ್ ತಮ್ಮ ಮೂರನೇ ಪ್ರಯತ್ನದಲ್ಲಿ 71.37 ಮೀಟರ್ ಎಸೆಯುವ ಮೂಲಕ ಚಿನ್ನಕ್ಕೆ ಕೊರಳೊಡ್ಡಿದರು.

ಥಾಮಸ್ ಸೊಟೊ ಬೆಳ್ಳಿ ಗೆದ್ದರೆ, ರುಫತ್ ಖಬಿಬುಲಿನ್ ಕಂಚಿನ ಪದಕ ಜಯಿಸಿದರು. ಪರ್ದೀಪ್ ಕುಮಾರ್ 42.72 ಮೀಟರ್ ದೂರ ಎಸೆಯುವ ಮೂಲಕ ಐದನೇ ಸ್ಥಾನ ಪಡೆದರು. ವಿಶೇಷ ಅತಿಥಿಯಾಗಿ ಜಾವೆಲಿನ್ ತಾರೆ ನೀರಜ್ ಚೋಪ್ರಾ ಕೂಡ ಹಾಜರಿದ್ದರು.

ಇದನ್ನೂ ಓದಿ Mohsin Naqvi: ಮೊಹ್ಸಿನ್ ನಖ್ವಿ ವಿರುದ್ಧ ಬಿಸಿಸಿಐ ವಿಚಾರಣೆ; ಐಸಿಸಿಗೆ ದೂರು

ಬೆಳ್ಳಿ ಗೆದ್ದ ಯೋಗೇಶ್‌ ಕಥುನಿಯಾ

ಪುರುಷರ ಡಿಸ್ಕಸ್ ಥ್ರೋ F56 ಸ್ಪರ್ಧೆಯಲ್ಲಿ ಯೋಗೇಶ್‌ ತಮ್ಮ ಎರಡನೇ ಪ್ರಯತ್ನದಲ್ಲಿ 42.49 ಮೀ ದೂರ ಎಸೆಯುವಲ್ಲಿ ಯಶಸ್ವಿಯಾಗುವ ಮೂಲಕ ಬೆಳ್ಳಿಗೆ ತೃಪ್ತಿಪಟ್ಟರು. ಇದು ಈ ಕೂಟದಲ್ಲಿ ಯೋಗೇಶ್‌ಗೆ ಒಲಿದ ಸತತ ಮೂರನೇ ಬೆಳ್ಳಿ ಪದಕವಾಗಿದೆ. 2023 ಮತ್ತು 2024 ರಲ್ಲಿ ಫ್ರಾನ್ಸ್ ಮತ್ತು ಜಪಾನ್‌ನಲ್ಲಿ ನಡೆದ ಆವೃತ್ತಿಗಳಲ್ಲಿಯೂ ಅವರು ಬೆಳ್ಳಿ ಗೆದ್ದಿದ್ದರು.