Viral Video: ಸಿರಿಯಾ ಮೇಲೆ ಇಸ್ರೇಲ್ ವೈಮಾನಿಕ ದಾಳಿ; ನೇರ ಪ್ರಸಾರ ನಡೆಯುವಾಗಲೇ ಎದ್ದು ಓಡಿದ ನಿರೂಪಕಿ

ಡೆಮಾಸ್ಕಸ್‌: ಸಿರಿಯಾ ಹಾಗೂ ಇಸ್ರೇಲ್‌ ನಡುವಿನ ಕದನ ನಿಂತಿಲ್ಲ. ವಾರ್ತಾ ನಿರೂಪಕಿಯೊಬ್ಬರು ನೇರ ಪ್ರಸಾರದಲ್ಲಿದ್ದಾಗಲೇ ಇಸ್ರೇಲ್ (Viral Video) ಡಮಾಸ್ಕಸ್ ಮೇಲೆ ವೈಮಾನಿಕ ದಾಳಿ ನಡೆಸಿದೆ. ದಾಳಿ ಮಾಡಿದ ಬೆನ್ನಲ್ಲೇ ಆಕೆ ಅರ್ಧಕ್ಕೆ ಬಿಟ್ಟು ತನ್ನ ಜೀವ ಉಳಿಸಿಕೊಳ್ಳಲು ಓಡಿ ಹೋಗುತ್ತಿರುವ ವಿಡಿಯೋ ಸಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಸುದ್ದಿ ಪ್ರಸಾರವಾಗುತ್ತಿದ್ದಾಗ ಆ ಪ್ರದೇಶದಲ್ಲಿ ಸ್ಫೋಟಗಳು ಸಂಭವಿಸಿದ ಕ್ಷಣವನ್ನು ಲೈವ್ ಆಗಿ ಸೆರೆಹಿಡಿಯಲಾಯಿತು. ಎಚ್ಚರಿಕೆಗಳು ಸದ್ದು ಮಾಡುತ್ತಿದ್ದಂತೆ ಪ್ರಸಾರವು ಹಠಾತ್ತನೆ ಸ್ಥಗಿತಗೊಂಡಾಗ ಆಂಕರ್ ಸುರಕ್ಷತೆಗಾಗಿ ಓಡಿಹೋಗುತ್ತಿರುವುದು ಕಂಡುಬಂದಿತು.

ಇಸ್ರೇಲ್ ರಕ್ಷಣಾ ಸಚಿವ ಇಸ್ರೇಲ್ ಕಾಟ್ಜ್ ಈ ಕುರಿತು ಸ್ಪಷ್ಟನೆ ನೀಡಿ, ಸಾಮಾಜಿಕ ಮಾಧ್ಯಮದಲ್ಲಿ ದಾಳಿಯನ್ನು ದೃಢಪಡಿಸಿದರು. ಸಿರಿಯಾಗೆ ಎಚ್ಚರಿಕೆ ನೀಡುವುದು ಕೊನೆಯಾಗಿವೆ. ಇನ್ನೇನಿದ್ದರೂ ಹೊಡೆಯುವುದು ಎಂದು ಹೇಳಿದ್ದಾರೆ. ಇಸ್ರೇಲ್ ಇತ್ತೀಚೆಗೆ ಸಿರಿಯಾಕ್ಕೆ ತನ್ನ ಮಿಲಿಟರಿ ಕಾರ್ಯಾಚರಣೆಯನ್ನು ವಿಸ್ತರಿಸಿದೆ, ವಿಶೇಷವಾಗಿ ಸುವೈಡಾದಲ್ಲಿ, ಅಲ್ಪಸಂಖ್ಯಾತ ಡ್ರೂಜ್ ಸಮುದಾಯ ಮತ್ತು ಇತರ ಸಶಸ್ತ್ರ ಗುಂಪುಗಳ ನಡುವೆ ಘರ್ಷಣೆಗಳು ಭುಗಿಲೆದ್ದಿವೆ. ಇಸ್ರೇಲ್‌ನ ಸ್ವಂತ ಡ್ರೂಜ್ ನಾಗರಿಕರನ್ನು ಉದ್ದೇಶಿಸಿ ಮಾತನಾಡಿದ ಕ್ಯಾಟ್ಜ್, ಇಸ್ರೇಲ್ ರಕ್ಷಣಾ ಪಡೆಗಳು (IDF) ಸಿರಿಯಾದಲ್ಲಿರುವ ತಮ್ಮ ಸಮುದಾಯವನ್ನು ರಕ್ಷಿಸುತ್ತೇವೆ ಎಂದು ಹೇಳಿದ್ದಾರೆ. ಪ್ರಧಾನಿ ನೆತನ್ಯಾಹು ಮತ್ತು ರಕ್ಷಣಾ ಸಚಿವರಾಗಿ ನಮ್ಮ ನಾಗರಿಕರನ್ನು ರಕ್ಷಿಸುವುದು ನಮ್ಮ ಕರ್ತ್ಯವ್ಯ ಎಂದು ಹೇಳಿದ್ದಾರೆ.

ಈ ಸುದ್ದಿಯನ್ನೂ ಓದಿ: Israel-Gaza War: ಕದನ ವಿರಾಮ ಉಲ್ಲಂಘನೆ... ಇಸ್ರೇಲ್‌-ಗಾಜಾ ನಡುವೆ ಯುದ್ಧೋನ್ಮಾದ; ಏರ್‌ಸ್ಟ್ರೈಕ್‌ನಲ್ಲಿ 200 ಜನ ಬಲಿ

ಸಿರಿಯನ್ ಅಧ್ಯಕ್ಷತೆಯು ಇಸ್ರೇಲ್‌ ದಾಳಿಯನ್ನು ಖಂಡಿಸಿದೆ. ಇಸ್ರೇಲ್‌ನ ಕ್ರಮಗಳನ್ನು "ಕ್ರಿಮಿನಲ್ ಮತ್ತು ಕಾನೂನುಬಾಹಿರ ನಡವಳಿಕೆ" ಎಂದು ಬಣ್ಣಿಸಿದೆ. ಸುವೈದಾ ಪ್ರದೇಶದಲ್ಲಿ ಡ್ರೂಜ್ ಮಿಲಿಟಿಯಾಗಳು ಮತ್ತು ಬೆಡೋಯಿನ್ ಬುಡಕಟ್ಟು ಜನಾಂಗದವರ ನಡುವೆ ನಡೆಯುತ್ತಿರುವ ಸಂಘರ್ಷವನ್ನು ಸಹ ಹೇಳಿಕೆಯು ಉಲ್ಲೇಖಿಸಿದೆ. ಆಂತರಿಕ ಸ್ಥಿರತೆಗೆ ತನ್ನ ಬದ್ಧತೆಯನ್ನು ಪುನರುಚ್ಚರಿಸುತ್ತಾ, ಸಿರಿಯನ್ ಸರ್ಕಾರವು "ಎಲ್ಲಾ ಸಂಬಂಧಿತ ಘಟನೆಗಳನ್ನು ತನಿಖೆ ಮಾಡುತ್ತದೆ" ಮತ್ತು ಜವಾಬ್ದಾರಿಯುತರನ್ನು ಹೊಣೆಗಾರರನ್ನಾಗಿ ಮಾಡುತ್ತದೆ ಎಂದು ಹೇಳಿದೆ. ಯಾವುದೇ ಪಕ್ಷವು ಸಿರಿಯಾದ "ಭದ್ರತೆ ಮತ್ತು ಸ್ಥಿರತೆಯನ್ನು" ರಾಜಿ ಮಾಡಿಕೊಳ್ಳಲು ಅವಕಾಶ ನೀಡುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದೆ.