BJP Leader: ಫತೇಪುರ್ ಸಮಾಧಿಯ ಫೋಟೋಗೆ ಆರತಿ ಮಾಡಿದ ಬಿಜೆಪಿ ನಾಯಕ; ವಿಡಿಯೊ ವೈರಲ್

ಫತೇಪುರ: ಉತ್ತರ ಪ್ರದೇಶದ (Uttar Pradesh) ಫತೇಪುರ (Fatehpur) ಜಿಲ್ಲೆಯ ಬಿಜೆಪಿ ಅಧ್ಯಕ್ಷ ಮುಖ್‌ಲಾಲ್ ಪಾಲ್ (Mukhlal Pal) ತಮ್ಮ ಮನೆಯಲ್ಲಿ ವಿವಾದಿತ ಸಮಾಧಿಯ (Disputed Mausoleum) ಫೋಟೋ ಮುಂದೆ 'ಆರತಿ' ಮಾಡುತ್ತಿರುವ ವಿಡಿಯೋವೊಂದು ಜನ್ಮಾಷ್ಟಮಿ ಆಚರಣೆಯ ಸಂದರ್ಭದಲ್ಲಿ ವೈರಲ್ ಆಗಿದೆ. ಈ ವಿಡಿಯೋ ಈಗ ಭಾರೀ ವಿವಾದಕ್ಕೆ ಕಾರಣವಾಗಿದೆ. ಮುಖ್‌ಲಾಲ್ ಪಾಲ್, ತಾವು “ಸನಾತನಿ” ಎಂದು ಹೇಳಿಕೊಂಡು, ವಿವಾದಿತ ಸ್ಥಳಕ್ಕೆ ಭೇಟಿ ನೀಡಲು ಸಾಧ್ಯವಾಗದ ಕಾರಣ ಮನೆಯಲ್ಲಿಯೇ ಫೋಟೋಗೆ ಪೂಜೆ ಸಲ್ಲಿಸಿದ್ದಾಗಿ ಸ್ಪಷ್ಟಪಡಿಸಿದ್ದಾರೆ. ಜನರು ಮನೆಯಲ್ಲಿಯೇ ಧಾರ್ಮಿಕ ಕಾರ್ಯಗಳನ್ನು ನಡೆಸಬೇಕೆಂದು ಅವರು ಕರೆ ನೀಡಿದ್ದಾನೆ.

ವಿವಾದದ ಹಿನ್ನೆಲೆ

ಆಗಸ್ಟ್ 11ರ ರಾತ್ರಿ ಬಲಪಂಥೀಯ ಗುಂಪುಗಳ ಸದಸ್ಯರು ಫತೇಪುರದ ಸಮಾಧಿಗೆ ನುಗ್ಗಿ ಅವುಗಳಿಗೆ ಹಾನಿ ಮಾಡಿದರು. ಆಗಸ್ಟ್ 7ರಂದು ಹಿಂದೂ ಸಂಘಟನೆಯೊಂದು ಸಮಾಧಿಯನ್ನು “ಸ್ವಚ್ಛಗೊಳಿಸಿ ಸೌಂದರ್ಯೀಕರಣ” ಮಾಡಲು ಅನುಮತಿ ಕೋರಿತ್ತು. ಆ ಸ್ಥಳವು ಮೂಲತಃ ಹಿಂದೂ ದೇವಾಲಯವೆಂದು ಅವರು ವಾದಿಸಿದ್ದಾರೆ. ಆದರೆ ಅನುಮತಿ ನಿರಾಕರಿಸಿದರೂ, ಜನರು ಬ್ಯಾರಿಕೇಡ್‌ಗಳನ್ನು ಒಡೆದು ಕೇಸರಿ ಧ್ವಜಗಳನ್ನು ಹಾರಿಸಿ ಧಾರ್ಮಿಕ ಕಾರ್ಯಗಳನ್ನು ನಡೆಸಿ, ಸಮಾಧಿಗಳನ್ನು ವಿನಾಶಗೊಳಿಸಿದರು. ಹಾನಿಗೊಳಗಾದ ಭಾಗಗಳನ್ನು ನಂತರ ದುರಸ್ತಿಗೊಳಿಸಲಾಗಿದೆ.

ಈ ಸುದ್ದಿಯನ್ನೂ ಓದಿ: Viral Video: ಯುವಕನೊಬ್ಬನನ್ನು ಕಟ್ಟಿ ಹಾಕಿ ಅಮಾನುಷವಾಗಿ ಥಳಿತ; ಅಪ್ಪ ಎಂದು ಕರೆಯುವಂತೆ ಧಮ್ಕಿ ಹಾಕಿದ ಕಿಡಿಗೇಡಿಗಳು, ವಿಡಿಯೊ ವೈರಲ್

ಕಾನೂನು ಕ್ರಮ

ಈ ಘಟನೆಗೆ ಸಂಬಂಧಿಸಿದಂತೆ ಫತೇಪುರ ಪೊಲೀಸ್ ಠಾಣೆಯಲ್ಲಿ 10 ಜನರು ಮತ್ತು 150 ಅಪರಿಚಿತ ವ್ಯಕ್ತಿಗಳ ವಿರುದ್ಧ ಎಫ್‌ಐಆರ್ ದಾಖಲಾಗಿದೆ. ರಾಜ್ಯ ವಿಧಾನಸಭೆಯಲ್ಲಿ ವಿರೋಧ ಪಕ್ಷದ ನಾಯಕ ಮಾತಾ ಪ್ರಸಾದ್ ಪಾಂಡೆ, ಬಿಜೆಪಿಯ ಜಿಲ್ಲಾ ಘಟಕದ ಮುಖ್ಯಸ್ಥರ ಹೆಸರನ್ನು ಎಫ್‌ಐಆರ್‌ನಲ್ಲಿ ಏಕೆ ಸೇರಿಲ್ಲ ಎಂದು ಪ್ರಶ್ನಿಸಿದ್ದಾರೆ.

ತನಿಖೆ ಮತ್ತು ಭದ್ರತೆ

ಪ್ರಯಾಗ್‌ರಾಜ್ ವಿಭಾಗೀಯ ಆಯುಕ್ತ ವಿಜಯ್ ವಿಶ್ವಾಸ್ ಪಂತ್‌ಗೆ ತನಿಖೆ ನಡೆಸಿ ವರದಿ ಸಲ್ಲಿಸಲು ಸೂಚಿಸಲಾಗಿದೆ. ಪಂತ್, ಪ್ರಯಾಗ್‌ರಾಜ್ ಐಜಿಪಿ ಅಜಯ್ ಮಿಶ್ರಾ ಜೊತೆ ಸ್ಥಳಕ್ಕೆ ಭೇಟಿ ನೀಡಿ, ಜಿಲ್ಲಾಧಿಕಾರಿ ಮತ್ತು ಪೊಲೀಸ್ ವರಿಷ್ಠಾಧಿಕಾರಿಗಳೊಂದಿಗೆ ಪರಿಸ್ಥಿತಿಯನ್ನು ಮೌಲ್ಯಮಾಪನ ಮಾಡಿದ್ದಾರೆ. ಸಮಾಧಿಯ ಸುತ್ತಮುತ್ತ 300ಕ್ಕೂ ಹೆಚ್ಚು ಪೊಲೀಸರನ್ನು, ಎರಡು ಪೊಲೀಸ್ ತುಕಡಿಗಳನ್ನು ಮತ್ತು ವಿಶೇಷ ಕಾರ್ಯಪಡೆಯನ್ನು ನಿಯೋಜಿಸಲಾಗಿದೆ. ಡ್ರೋನ್ ಮೂಲಕ ನಿರಂತರವಾಗಿ ನಿಗಾವಹಿಸಲಾಗುತ್ತಿದೆ.