ಮನದಲ್ಲಿ ಪ್ರಿಯಕರನ ನೆನಪು, ಕೈಯಲ್ಲಿ ಟವರ್ ಏಣಿ: ಉತ್ತರ ಪ್ರದೇಶದ ವಿವಾಹಿತ ಮಹಿಳೆಯ ಹೈಡ್ರಾಮ

ಲಖನೌ, ಏ. 29: ಉತ್ತರ ಪ್ರದೇಶದ ಹತ್ರಾಸ್ ಜಿಲ್ಲೆಯಲ್ಲಿ ಮಂಗಳವಾರ (ಏಪ್ರಿಲ್‌ 28) ಮಧ್ಯಾಹ್ನ ವಿವಾಹಿತ ಮಹಿಳೆಯೊಬ್ಬಳು ಮೊಬೈಲ್ ಟವರ್ ಏರಿ ಸುಮಾರು ಮೂರು ಗಂಟೆಗಳ ಕಾಲ ಭಾರೀ ಹೈಡ್ರಾಮ ಸೃಷ್ಟಿಸಿದ ಘಟನೆ ನಡೆದಿದೆ. ತಾನು ತನ್ನ ಪ್ರಿಯಕರನ ಜತೆ ಇರಲು ಬಯಸುವುದಾಗಿ ಹಠ ಹಿಡಿದು ಟವರ್ ಏರಿದ ಈಕೆಯನ್ನು ಕೆಳಗಿಳಿಸಲು ಪೊಲೀಸರು ಮತ್ತು ಅಗ್ನಿಶಾಮಕ ಸಿಬ್ಬಂದಿ ಹರಸಾಹಸ ಪಡಬೇಕಾಯಿತು.

ಸಾಸಿನಿ ಪೊಲೀಸ್ ಠಾಣಾ ವ್ಯಾಪ್ತಿಯ ಲುತ್ಸಾನ್ ರಸ್ತೆಯಲ್ಲಿ ಈ ಘಟನೆ ನಡೆದಿದ್ದು, ಸುಮಾರು 30 ವರ್ಷದ ಮಹಿಳೆ ಟವರ್‌ನ ತುತ್ತತುದಿಗೆ ಏರಿದ್ದನ್ನು ಕಂಡು ಸ್ಥಳೀಯರು ಮತ್ತು ಅಧಿಕಾರಿಗಳಲ್ಲಿ ಆತಂಕಕ್ಕೆ ಒಳಗಾದರು. ಪೊಲೀಸರ ಮಾಹಿತಿ ಪ್ರಕಾರ, ಪೂಜಾ ಎಂದು ಗುರುತಿಸಲಾದ ಈ ಮಹಿಳೆಗೆ ಸುಮಾರು ಎರಡು ವರ್ಷಗಳ ಹಿಂದೆ ಹತ್ರಾಸ್ ಜಂಕ್ಷನ್ ವ್ಯಾಪ್ತಿಯ ಬರ್ಮಾನೆ ಗ್ರಾಮದ ವ್ಯಕ್ತಿಯೊಂದಿಗೆ ವಿವಾಹವಾಗಿತ್ತು. ಮಂಗಳವಾರ ಮಧ್ಯಾಹ್ನ ತನ್ನ ಅತ್ತೆ ಮನೆಯಿಂದ ಹೊರಬಂದಿದ್ದ ಪೂಜಾ, ದಾರಿಯಲ್ಲಿದ್ದ ಮೊಬೈಲ್ ಟವರ್ ಏರಿ ಆತಂಕ ಸೃಷ್ಟಿಸಿದ್ದಾಳೆ.

3 ಗಂಟೆ ಪೊಲೀಸರ ಹರಸಾಹ

ಸ್ಥಳಕ್ಕೆ ಧಾವಿಸಿದ ಸಾಸಿನಿ ಠಾಣಾಧಿಕಾರಿ ವಿಪಿನ್ ಚೌಧರಿ ಮತ್ತು ಅಗ್ನಿಶಾಮಕ ದಳದ ಸಿಬ್ಬಂದಿ, ಆಕೆಯ ಬಳಿ ಕೆಳಗಿಳಿಯುವಂತೆ ಪದೇ ಪದೆ ಮನವಿ ಮಾಡಿದರು. ಆದರೆ ಆಕೆ ತನ್ನ ಪಟ್ಟು ಸಡಿಲಿಸದೆ ಗಂಟೆಗಟ್ಟಲೆ ಮೇಲೆ ಕುಳಿತು ಹಠ ಹಿಡಿದಿದ್ದಳು. ಕೆಳಗೆ ನೂರಾರು ಜನರು ಜಮಾಯಿಸಿದ್ದು, ತೀವ್ರ ಬಿಸಿಲಿನ ತಾಪದ ನಡುವೆಯೂ ಮಹಿಳೆಯ ಈ ಸಾಹಸವನ್ನು ಕಂಡು ಬೆರಗಾಗಿದ್ದರು. ಕೊನೆಗೆ ಪೊಲೀಸರು ಆಕೆಗೆ ಸಮಾಧಾನದ ಮಾತುಗಳ ಮೂಲಕ ಮನವೊಲಿಸುವಲ್ಲಿ ಯಶಸ್ವಿಯಾದರು. "ಸುದೀರ್ಘ ಸಮಾಲೋಚನೆಯ ನಂತರ ಆಕೆಯನ್ನು ಸುರಕ್ಷಿತವಾಗಿ ಕೆಳಗಿಳಿಸಲಾಯಿತು" ಎಂದು ಚೌಧರಿ ತಿಳಿಸಿದ್ದಾರೆ.

ರೋಲ್ಸ್ ರಾಯ್ಸ್ ಕಾರಿನಲ್ಲಿ ಚಹಾ ಮಾರಿದ ಇನ್​ಫ್ಲುಯೆನ್ಸರ್‌

ಪ್ರಿಯಕರನ ಸೇರಲು ಹಠ

ಪ್ರಾಥಮಿಕ ತನಿಖೆಯ ಪ್ರಕಾರ, ಪೂಜಾ ತನ್ನ ವೈವಾಹಿಕ ಜೀವನದಿಂದ ಅತೃಪ್ತಳಾಗಿದ್ದಳು ಎಂದು ತಿಳಿದುಬಂದಿದೆ. ಪತಿಯನ್ನು ತೊರೆದು ಸಮೀಪದ ಗ್ರಾಮವೊಂದರ ತನ್ನ ಪ್ರಿಯಕರನ ಜತೆ ಹೋಗಲು ಆಕೆ ಹಂಬಲಿಸುತ್ತಿದ್ದಳು. ಇದೇ ಕಾರಣಕ್ಕೆ ಆಕೆ ಇಂತಹ ದುಸ್ಸಾಹಸಕ್ಕೆ ಕೈಹಾಕಿದ್ದಾಳೆ ಎಂದು ಪೊಲೀಸರು ಹೇಳಿದ್ದಾರೆ.

ಸುಮಾರು ಮೂರು ಗಂಟೆಗಳ ಕಾಲ ನಡೆದ ಈ ಹೈಡ್ರಾಮಾದಿಂದಾಗಿ ಸ್ಥಳೀಯ ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿತ್ತು. ಅಂತಿಮವಾಗಿ ಮಹಿಳೆಯನ್ನು ಕೆಳಗಿಳಿಸಿದ ಪೊಲೀಸರು, ಆಕೆಯನ್ನು ಕೌನ್ಸೆಲಿಂಗ್‌ಗೆ ಒಳಪಡಿಸಿದ್ದಾರೆ. ಉರಿಬಿಸಿಲಿನಲ್ಲೂ ಟವರ್ ಏರಿ ಕುಳಿತಿದ್ದ ಮಹಿಳೆಯ ಸಾಹಸ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ. ಸಾರ್ವಜನಿಕರು ಈ ನಾಟಕೀಯ ದೃಶ್ಯಗಳನ್ನು ಕಂಡು ಆಶ್ಚರ್ಯಚಕಿತರಾದರು ಮತ್ತು ಪೊಲೀಸರು ಸಕಾಲದಲ್ಲಿ ಸ್ಪಂದಿಸಿ ಅಹಿತಕರ ಘಟನೆ ನಡೆಯದಂತೆ ತಡೆದಿದ್ದಕ್ಕೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.