ಭೈರಪ್ಪನವರ ಬದುಕಿನ ಒಳನೋಟಗಳು

ರಾಜಶೇಖರ್, ಚಿಂತಾಮಣಿ

ಎಸ್.ಎಲ್.ಭೈರಪ್ಪನವರು ಬರಹವನ್ನೇ ಬದುಕಾಗಿಸಿಕೊಂಡು ತಪಸ್ವಿಯಂತೆ ಗಂಭೀರವಾಗಿ ಬರೆದವರು. ತಮ್ಮ ಕಾದಂಬರಿಗಳ ಮೂಲಕವೇ ಜಗತ್ತಿನ ಸಹಸ್ರಾರು ಓದುಗರನ್ನು ತಲುಪಿ ಜನಪ್ರಿ ಯತೆ ಗಳಿಸಿದವರು. ಭೈರಪ್ಪನವರದ್ದು ಪರ್ವತ ಸಾಧನೆ. ಅಧ್ಯಯನ ಹಾಗೂ ಸುತ್ತಾಟವಿಲ್ಲದೆ ಅವರು ಏನನ್ನೂ ಬರೆದವರಲ್ಲ. ಬರೆದಂತೆಯೇ ಬದುಕಿದ ಅಪರೂಪದ ಲೇಖಕ.

ಭೈರಪ್ಪನವರ ಬರವಣಿಗೆಯಷ್ಟೇ ಬದುಕೂ ಚೊಕ್ಕವಾದದ್ದು. ನಾಡು ಮಾತ್ರವಲ್ಲದೇ ಭಾಷೆ-ಗಡಿಗಳನ್ನೂ ಮೀರಿ ವಿಶ್ವಸಾಹಿತ್ಯವೂ ಮೆಚ್ಚಿಕೊಂಡ ಭೈರಪ್ಪನವರ ಖಾಸಗಿ ಬದುಕು ಹಾಗೂ ವ್ಯಕ್ತಿತ್ವದ ಬಗೆಗೆ ಅನೇಕರಿಗೆ ಅಷ್ಟಾಗಿ ತಿಳಿದಿಲ್ಲ. ಇಂತದ್ದೇ ವಿಚಾರಗಳನ್ನು ಓದುಗನಿಗೆ ಮೊಗೆದು ಕೊಡುವ ಕೃತಿ ಲೇಖಕ ದೀಕ್ಷಿತ್ ನಾಯರ್ ಅವರು ಬರೆದಿರುವ ‘ಎತ್ತರೆತ್ತರ ಭೈರಪ್ಪ-ಅಗೆದಷ್ಟೂ ಆಳ ಮೊಗೆದಷ್ಟೂ ಬೆರಗು’.

ಇದನ್ನೂ ಓದಿ: Hari Paraak Column: ಬಿಜೆಪಿಗರಿಗೆ ಡಿಕೆಶಿನ ಸಿಎಂ ಮಾಡೋ ʼತಿಂಡಿʼ

ಇತ್ತೀಚಿಗೆ ಬಿಡುಗಡೆಗೊಂಡ ಈ ಕೃತಿಯಲ್ಲಿ ಲೇಖಕರು ಭೈರಪ್ಪನವರ ವೈಯಕ್ತಿಕ ಬದುಕಿನ ಅನೇಕ ಪ್ರಸಂಗಗಳನ್ನು ಯಾವ ಹೆಚ್ಚುಗಾರಿಕೆ ಹಾಗೂ ಉತ್ಪ್ರೇಕ್ಷೆ ಇಲ್ಲದ ಹಾಗೆ ಕಟ್ಟಿಕೊಟ್ಟಿದ್ದಾರೆ. ಹಿರಿಯರು ಮಾತ್ರವಲ್ಲದೇ ಕಿರಿಯರೂ ನಿರಾಯಾಸವಾಗಿ ಓದಿ ಮೆಚ್ಚಿಕೊಂಡು, ಆದರ್ಶಗಳನ್ನು ಮೈಗೂಡಿಸಿಕೊಳ್ಳುವಂತೆ ಈ ಕೃತಿಯನ್ನು ಭೈರಪ್ಪಮಯಗೊಳಿಸಿದ್ದಾರೆ.

ಎಸ್.ಎಲ್.ಭೈರಪ್ಪನವರು ಬದುಕಿದ ರೀತಿ, ಬಾಲ್ಯದ ಬಡತನದಲ್ಲಿ ಪಟ್ಟ ಪಡಿಪಾಟಲು, ಬದುಕು ಎಸೆದ ಸವಾಲುಗಳೆಲ್ಲವನ್ನೂ ಮೆಟ್ಟಿನಿಂತು ವಿಶ್ವ ಮಟ್ಟದ ಸಾಹಿತಿಯಾದ ಬಗ್ಗೆ, ಅವರ ವ್ಯಕ್ತಿತ್ವ, ಪ್ರತಿಭೆ, ಸ್ವಭಾವ, ನಿಸ್ವಾರ್ಥ, ಮಾನವೀಯ ಗುಣ ಹೀಗೆ ಅನೇಕ ವಿಚಾರಗಳ ಕುರಿತಾದ ಬಹುಪಾಲು ಜನರಿಗೆ ತಿಳಿಯದ ಅಪರೂಪದ ಪ್ರಸಂಗಗಳು ಇಲ್ಲಿವೆ.

ಇಲ್ಲಿನ ಅನೇಕ ಪ್ರಸಂಗಗಳನ್ನು ಓದುವಾಗ ಒಬ್ಬ ಸಾಹಿತಿ ಹೀಗೆಲ್ಲ ಬದುಕಬಹುದಾ? ಎಂದೆನಿಸಿ ಬಿಡುತ್ತದೆ. ಭೈರಪ್ಪನವರು ಕಾಲಾನಂತರ ತಮ್ಮದೇ ಕುಟುಂಬವಿದ್ದೂ ತಮ್ಮೆಲ್ಲ ಆಸ್ತಿ-ಹಣವನ್ನು ಸಮಾಜಕ್ಕಾಗಿ ಮುಡಿಪಿಟ್ಟವರು. ಆದರೆ ತಾವಿರುವ ತನಕವೂ ಸಮಾಜ ಮತ್ತು ಜನರ ನೋವಿಗೆ ಸ್ಪಂದಿಸಿದ ಸಂಗತಿಗಳನ್ನು ಅವರೆಂದೂ ಎಲ್ಲೂ ಪ್ರಸ್ತಾಪಿಸಿದವರಲ್ಲ. ಈ ಪುಸ್ತಕದಲ್ಲಿ ಲೇಖಕರು ಭೈರಪ್ಪನವರು ಹೇಗೆ ಸದ್ದು ಗದ್ದಲವಿಲ್ಲದೆ ಸಹಾಯ ಮಾಡುತ್ತಿದ್ದರು, ಯಾವುದಕ್ಕೂ ಆಸೆ ಪಡದ ಭೈರಪ್ಪನವರಿಗೆ ಪ್ರಶಸ್ತಿಗಳ ಮೇಲಿದ್ದ ನಿರ್ಮೋಹ, ಬರವಣಿಗೆಯ ಸಂದರ್ಭದಲ್ಲಿನ ವಿಶೇಷ ಘಟನೆ ಗಳು, ಕಾದಂಬರಿಯ ವಸ್ತುಗಳಿಗಾಗಿ ನಡೆಸಿದ ಅಧ್ಯಯನ, ಸುತ್ತಾಟ, ಅವರಿಗಿದ್ದ ಹವ್ಯಾಸ, ಅವರ ಜನಪ್ರಿಯತೆಯ ಕುರಿತಾದ ಅನೇಕ ಅಪರೂಪದ ಪ್ರಸಂಗಗಳಿವೆ.

ಇಲ್ಲಿನ ’ಡೇರ್ ಡೆವಿಲ್ ಭೈರಪ್ಪ, ಕೋರ್ಟ್‌ನಲ್ಲಿ ಸಾಕ್ಷಿ, ಭೈರಪ್ಪನವರೂ ಅತ್ತರು, ಸಾಹಿತಿ ಬಾರ್ ಮುಚ್ಚಿಸಿದರು, ಹುಟ್ಟಿದ ಊರಿಗೆ ಕೆರೆ ತುಂಬಿಸಿದ್ದು, ರೈಲ್ ಟಿಕೆಟ್ ಇಲ್ಲದೆ ಪ್ರಯಾಣ’- ಹೀಗೆ ಅನೇಕ ಪ್ರಸಂಗಗಳನ್ನು ಓದುತ್ತಿದ್ದಂತೆ ನಿಜಕ್ಕೂ ಬೆರಗು ಮೂಡುತ್ತದೆ. ಭೈರಪ್ಪನಂತವರೂ ಹೀಗೆಲ್ಲ ಬದುಕಿರಬಹುದಾ ಅನ್ನಿಸುತ್ತದೆ. ಅವರ ಮೇಲಿದ್ದ ಗೌರವ ನೂರ್ಮಡಿಗೊಳ್ಳುತ್ತದೆ. ಲೇಖಕರು ಈ ಎಲ್ಲಾ ಪ್ರಸಂಗಗಳನ್ನು ಹೆಕ್ಕಲು ನಡೆಸಿದ ಪ್ರಾಮಾಣಿಕ ಹುಡುಕಾಟ ಮತ್ತು ಶ್ರಮ ಅಪಾರ.