Dr Sadhanashree Column: ಋತುವಿಗೆ ತಕ್ಕ ಆಹಾರವೇ ಆರೋಗ್ಯದ ಆಧಾರ

ಸ್ವಾಸ್ಥ್ಯವೆಂಬ ಸ್ವಾತಂತ್ರ್ಯ

ಮಳೆಗಾಲದ ನಂತರ ಬರುವ ಶರದೃತು ಪ್ರಕೃತಿಯಲ್ಲಿಯೂ, ನಮ್ಮ ದೇಹದಲ್ಲಿಯೂ ಹಲವು ಬದಲಾವಣೆಗಳನ್ನು ತರುವ ಕಾಲ. ಮಳೆಗಾಲದಲ್ಲಿ ವಾತಾವರಣ ತಂಪಾಗಿದ್ದು, ಜೀರ್ಣಾಗ್ನಿ ಮಂದವಾಗುವ ಸಾಧ್ಯತೆ ಇರುತ್ತದೆ. ಶರದೃತುವಿನಲ್ಲಿ ಮಳೆ ಕಡಿಮೆಯಾಗಿ ಸೂರ್ಯನ ತಾಪ ಹೆಚ್ಚಾಗುತ್ತಿದ್ದಂತೆ ದೇಹದಲ್ಲಿ ಸಂಚಿತವಾಗಿದ್ದ ಪಿತ್ತವು ಪ್ರಕೋಪಗೊಳ್ಳುತ್ತದೆ ಎಂದು ಆಯುರ್ವೇದ ವಿವರಿಸುತ್ತದೆ.

ಆದ್ದರಿಂದ ಈ ಋತುವಿನಲ್ಲಿ ಅತಿಯಾದ ಖಾರ, ಹುಳಿ, ಉಪ್ಪು, ಎಣ್ಣೆಯುಕ್ತ ಹಾಗೂ ಜೀರ್ಣಕ್ಕೆ ಜಡವಾದ ಆಹಾರವನ್ನು ಕಡಿಮೆ ಮಾಡಿ, ಮಿತ ವಾದ, ಸುಲಭವಾಗಿ ಜೀರ್ಣವಾಗುವ ಆಹಾರ ವನ್ನು ಸೇವಿಸುವುದು ಹಿತಕರ. ನಮ್ಮ ದೈನಂದಿನ ಆಹಾರದಲ್ಲಿ ಸೊಪ್ಪು ಮತ್ತು ತರಕಾರಿಗಳಿಗೆ ವಿಶೇಷ ಸ್ಥಾನವಿದೆ. ಆದರೆ ಋತುವಿಗೆ ಅನುಗುಣವಾಗಿ ಅವುಗಳನ್ನು ಆಯ್ಕೆ ಮಾಡುವುದು ಮತ್ತು ಸೂಕ್ತ ಸಂಸ್ಕಾರ ನೀಡಿ ಸೇವಿಸುವುದು ಕೂಡ ಅಷ್ಟೇ ಮುಖ್ಯ.

ಸೌತೆಕಾಯಿ: ಸೌತೆಕಾಯಿ ಶೀತಲ ಸ್ವಭಾವ ಹೊಂದಿದ್ದು, ದೇಹದ ಉಷ್ಣತೆ ಮತ್ತು ದಾಹ ವನ್ನು ಶಮನಗೊಳಿಸಲು ಸಹಾಯಕ. ಶರದೃತು ವಿನಲ್ಲಿ ಉಂಟಾಗುವ ಉಷ್ಣತೆಯ ಸಂದರ್ಭ ದಲ್ಲಿ ಮಿತವಾಗಿ ಬಳಸಬಹುದು. ಆದರೆ ಜೀರ್ಣಶಕ್ತಿ ಮಂದವಾಗಿರುವವರು ಅಥವಾ ಹೊಟ್ಟೆ ಉಬ್ಬರಕ್ಕೆ ಒಳಗಾಗುವವರು ಕಚ್ಚಾ ಸೌತೆಕಾಯಿಯನ್ನು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವ ಬದಲು ಸೂಕ್ತವಾಗಿ ಬೇಯಿಸಿದ ರೂಪದಲ್ಲಿ ಸೇವಿಸುವುದು ಒಳಿತು.

ಸೋರೆಕಾಯಿ: ಸೋರೆಕಾಯಿ ಮೃದುವಾದ, ಶೀತಲ ಮತ್ತು ಸುಲಭವಾಗಿ ಜೀರ್ಣವಾಗುವ ತರಕಾರಿ. ದೇಹಕ್ಕೆ ತೇವಾಂಶವನ್ನು ನೀಡುವ ಗುಣ ಹೊಂದಿದೆ. ಶರದೃತುವಿನಲ್ಲಿ ಪಿತ್ತವನ್ನು ಹೆಚ್ಚಿಸದ ಸರಳ ಆಹಾರವಾಗಿ ಬಳಸಬಹುದು. ಸೋರೆಕಾಯಿಯನ್ನು ಸಾರು, ಪಲ್ಯ, ಕೂಟು ಅಥವಾ ಸೂಪ್ ರೂಪದಲ್ಲಿ ಸೇವಿಸುವುದು ಉತ್ತಮ.

ಬೂದುಗುಂಬಳಕಾಯಿ: ಬೂದುಗುಂಬಳ ಕಾಯಿ ಅಥವಾ ಕುಷ್ಮಾಂಡವು ಆಯುರ್ವೇದ ದಲ್ಲಿ ವಿಶೇಷವಾಗಿ ಉಖವಾಗುವ ತರಕಾರಿ. ಇದು ಶೀತಲ ಸ್ವಭಾವ ಹೊಂದಿದ್ದು, ಪಿತ್ತವನ್ನು ಶಮನ ಗೊಳಿಸಲು ಸಹಾಯಕ. ದೇಹದಲ್ಲಿ ಉಷ್ಣತೆ ಮತ್ತು ದಾಹ ಹೆಚ್ಚಾಗುವ ಸಂದರ್ಭಗಳಲ್ಲಿ ಸೂಕ್ತ ಪ್ರಮಾಣದಲ್ಲಿ ಬಳಸಬಹುದು. ಮೃದುವಾದ ಸ್ವಭಾವದಿಂದಾಗಿ ವಿವಿಧ ರೀತಿಯ ಅಡುಗೆಗಳಲ್ಲಿ ಬಳಸಲು ಅನುಕೂಲಕರವಾಗಿದೆ.

ಇದನ್ನೂ ಓದಿ: Dr Sadhanashree Column: ಮಳೆ ಹೋಯಿತು ಬಿಸಿಲು ಬಂತು: ʼಇದೇ ಶರದೃತುʼ

ಹೀರೆಕಾಯಿ: ಹೀರೆಕಾಯಿ ಹಗುರವಾದ ತರಕಾರಿ. ಸರಳವಾಗಿ ಬೇಯಿಸಿ ಸೇವಿಸಿದಾಗ ಸುಲಭವಾಗಿ ಜೀರ್ಣವಾಗುತ್ತದೆ. ಶರದೃತುವಿ ನಲ್ಲಿ ಹೆಚ್ಚು ಎಣ್ಣೆ ಮತ್ತು ಮಸಾಲೆ ಬಳಸದೆ ತಯಾರಿಸಿದ ಹೀರೆಕಾಯಿ ಪಲ್ಯ ಅಥವಾ ಕೂಟು ಉತ್ತಮ ಆಯ್ಕೆಯಾಗಬಹುದು.

ತೊಂಡೆಕಾಯಿ: ತೊಂಡೆಕಾಯಿ ರುಚಿಕರವಾದ ತರಕಾರಿ. ಇದನ್ನು ಸರಳವಾಗಿ ಬೇಯಿಸಿ ಪಲ್ಯ ಅಥವಾ ಇತರ ಅಡುಗೆಗಳಲ್ಲಿ ಬಳಸಬಹುದು. ಹೆಚ್ಚು ಎಣ್ಣೆಯಲ್ಲಿ ಕರಿಯುವುದಕ್ಕಿಂತ ಕಡಿಮೆ ಎಣ್ಣೆಯಲ್ಲಿ ಬೇಯಿಸಿ ಸೇವಿಸುವುದು ಉತ್ತಮ.

ಬೀಟ್ರೂಟ್: ಬೀಟ್ರೂಟ್ ಮಧುರ ಸ್ವಭಾವ ಹೊಂದಿದ್ದು, ಹಲವು ಪೋಷಕಾಂಶಗಳನ್ನು ಒಳಗೊಂಡಿರುವ ತರಕಾರಿ. ಇದನ್ನು ಬೇಯಿಸಿ ಪಲ್ಯ ಅಥವಾ ಇತರ ಆಹಾರಗಳೊಂದಿಗೆ ಬಳಸ ಬಹುದು. ಯಾವುದೇ ಒಂದು ತರಕಾರಿಯನ್ನು ಅತಿಯಾಗಿ ಸೇವಿಸುವುದಕ್ಕಿಂತ ವಿವಿಧ ತರಕಾರಿ ಗಳನ್ನು ಪರ್ಯಾಯವಾಗಿ ಸೇವಿಸುವುದು ಉತ್ತಮ.

ಬೀನ್ಸ್: ಬೀನ್ಸ್‌ನಲ್ಲಿ ನಾರಿನಂಶ ಇರುವುದರಿಂದ ಆಹಾರದಲ್ಲಿ ಸೂಕ್ತ ಪ್ರಮಾಣದಲ್ಲಿ ಸೇರಿಸ ಬಹುದು. ಆದರೆ ಕೆಲವರಿಗೆ ಇದು ಹೊಟ್ಟೆ ಉಬ್ಬರ ಮತ್ತು ವಾಯುವನ್ನು ಉಂಟುಮಾಡ ಬಹುದು. ಆದ್ದರಿಂದ ಚೆನ್ನಾಗಿ ಬೇಯಿಸಿ, ವ್ಯಕ್ತಿಯ ಜೀರ್ಣಶಕ್ತಿಗೆ ಅನುಗುಣವಾಗಿ ಸೇವಿಸು ವುದು ಒಳಿತು.

ಶರದೃತುವಿನಲ್ಲಿ ಬಳಸಬಹುದಾದ ಸೊಪ್ಪುಗಳು: ಸೊಪ್ಪುಗಳು ನಾರಿನಂಶ, ಖನಿಜಾಂಶ ಮತ್ತು ವಿವಿಧ ಸೂಕ್ಷ್ಮ ಪೋಷಕಾಂಶಗಳನ್ನು ಒದಗಿಸುವ ಪ್ರಮುಖ ಆಹಾರ. ಆದರೆ ಸೊಪ್ಪು ಗಳನ್ನೂ ವ್ಯಕ್ತಿಯ ಪ್ರಕೃತಿ ಮತ್ತು ಜೀರ್ಣಶಕ್ತಿಗೆ ಅನುಗುಣವಾಗಿ ಬಳಸಬೇಕು.

ಹರಿವೆ ಸೊಪ್ಪು: ಹರಿವೆ ಸೊಪ್ಪು ಮೃದುವಾದ ಹಾಗೂ ಪೋಷಕಾಂಶಗಳಿಂದ ಕೂಡಿದ ಸೊಪ್ಪು. ಚೆನ್ನಾಗಿ ಬೇಯಿಸಿ ಮಿತವಾಗಿ ಸೇವಿಸಿದರೆ ದೈನಂದಿನ ಆಹಾರದಲ್ಲಿ ಉತ್ತಮವಾಗಿ ಸೇರಿಸಬಹುದು.

ದಂಟಿನ ಸೊಪ್ಪು: ದಂಟಿನ ಸೊಪ್ಪು ಮತ್ತು ಅದರ ಮೃದುವಾದ ದಂಟುಗಳನ್ನು ಚೆನ್ನಾಗಿ ಬೇಯಿಸಿ ಬಳಸಬಹುದು. ಇದು ನಾರಿನಂಶ ವನ್ನು ಒದಗಿಸುತ್ತದೆ. ಜೀರ್ಣಶಕ್ತಿ ದುರ್ಬಲ‌ ವಾಗಿರುವವರು ಅಥವಾ ವಾತಪ್ರಧಾನ ತೊಂದರೆ ಇರುವವರು ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದನ್ನು ತಪ್ಪಿಸುವುದು ಒಳಿತು.

ಪಾಲಕ್ ಸೊಪ್ಪು: ಪಾಲಕ್ ಸೊಪ್ಪಿನಲ್ಲಿ ನಾರಿನಂಶ ಮತ್ತು ಹಲವು ಸೂಕ್ಷ್ಮ ಪೋಷಕಾಂಶ ಗಳಿವೆ. ಇದನ್ನು ಚೆನ್ನಾಗಿ ಬೇಯಿಸಿ ಸೇವಿಸು ವುದು ಉತ್ತಮ. ಕಚ್ಚಾ ಪಾಲಕ್ ಅನ್ನು ಹೆಚ್ಚಿನ ಪ್ರಮಾಣ ದಲ್ಲಿ ಸೇವಿಸುವುದಕ್ಕಿಂತ ಬೇಯಿಸಿದ ರೂಪದಲ್ಲಿ ಸೇವಿಸುವುದು ಜೀರ್ಣಕ್ರಿಯೆಯ ದೃಷ್ಟಿಯಿಂದ ಸೂಕ್ತ.

ಮೆಂತ್ಯೆ ಸೊಪ್ಪು: ಮೆಂತ್ಯೆ ಸೊಪ್ಪು ಕಹಿ ಮತ್ತು ತೀಕ್ಷ್ಣ ಸ್ವಭಾವ ಹೊಂದಿದೆ. ಜೀರ್ಣಕ್ರಿಯೆಗೆ ಸಹಾಯಕವಾಗಬಹುದು.

ಸೊಪ್ಪು ತರಕಾರಿಗಳನ್ನು ಹೇಗೆ ಸೇವಿಸ ಬೇಕು?: ತರಕಾರಿಗಳು ನಮ್ಮ ಆಹಾರದ ಪ್ರಮುಖ ಭಾಗ. ಆದರೆ ಆಯುರ್ವೇದದ ದೃಷ್ಟಿಯಲ್ಲಿ ಆಹಾರದ ಗುಣಮಟ್ಟವನ್ನು ನಿರ್ಧರಿಸುವುದು ಅದರ ಮೂಲ ವಸ್ತುವಿನಿಂದ ಮಾತ್ರ ವಲ್ಲ. ಅದನ್ನು ಹೇಗೆ ಸಂಸ್ಕರಿಸಿ, ಯಾವ ಪ್ರಮಾಣದಲ್ಲಿ ಮತ್ತು ಯಾವ ರೀತಿಯಲ್ಲಿ ಸೇವಿಸುತ್ತೇವೆ ಎಂಬುದೂ ಬಹಳ ಮುಖ್ಯ. ತರಕಾರಿಗಳಲ್ಲಿ ನಾರಿನಂಶ ಹೆಚ್ಚಾಗಿರುತ್ತದೆ. ವಿಶೇಷವಾಗಿ ಹಸಿ ತರಕಾರಿಗಳಲ್ಲಿರುವ ನಾರಿ ನಂಶವನ್ನು ನಮ್ಮ ಜೀರ್ಣಾಂಗವು ಸಂಪೂರ್ಣ ವಾಗಿ ಜೀರ್ಣಿಸಿಕೊಳ್ಳುವುದಿಲ್ಲ. ಆದ್ದರಿಂದ ಅತಿಯಾದ ಹಸಿ ತರಕಾರಿ ಸೇವನೆ ಕೆಲವು ವ್ಯಕ್ತಿಗಳಲ್ಲಿ ಜೀರ್ಣಕ್ರಿಯೆಗೆ ತೊಂದರೆ, ಹೊಟ್ಟೆ ಉಬ್ಬರ, ಹೊಟ್ಟೆ ಬಿಗಿತ, ವಾಯು ಮತ್ತು ಹಸಿವು ಕಡಿಮೆಯಾಗುವಂತಹ ಸಮಸ್ಯೆಗಳಿಗೆ ಕಾರಣವಾಗಬಹುದು. ಆಯುರ್ವೇದದಲ್ಲಿ ಹಸಿ ತರಕಾರಿಗಳ ರೂಕ್ಷತೆಯನ್ನೂ ಪರಿಗಣಿಸಲಾ ಗುತ್ತದೆ. ಆದ್ದರಿಂದ ತರಕಾರಿಗಳಿಗೆ ಸರಿಯಾದ ಸಂಸ್ಕಾರ ನೀಡಿ ಸೇವಿಸುವುದು ಮುಖ್ಯ.

೧. ತರಕಾರಿಗಳನ್ನು ಬೇಯಿಸಿ ಸೇವಿಸಿ: ತರಕಾರಿಗಳನ್ನು ಸಾಧ್ಯವಾದಷ್ಟು ಬೇಯಿಸಿ ಸೇವಿಸುವುದು ಉತ್ತಮ. ಬೇಯಿಸುವುದ ರಿಂದ ಅವು ಮೃದುವಾಗಿ ಜೀರ್ಣಕ್ರಿಯೆಗೆ ಅನುಕೂಲ ವಾಗುತ್ತವೆ. ಅತಿಯಾಗಿ ಬೇಯಿಸಿ ಅವುಗಳ ಸ್ವಾಭಾವಿಕ ಗುಣಗಳನ್ನು ಹಾಳು ಮಾಡುವ ಬದಲು ಅಗತ್ಯವಿರುವಷ್ಟು ಮಾತ್ರ ಬೇಯಿಸುವುದು ಸೂಕ್ತ.

೨. ಸೂಕ್ತ ಪ್ರಮಾಣದ ಎಣ್ಣೆ ಅಥವಾ ತುಪ್ಪ ಬಳಸಿ: ತರಕಾರಿಗಳಲ್ಲಿ ಸ್ವಾಭಾವಿಕ ಸ್ನಿಗ್ಧತೆ ಕಡಿಮೆ ಇರುವುದರಿಂದ ಅವುಗಳನ್ನು ತಯಾರಿಸುವಾಗ ಸೂಕ್ತ ಪ್ರಮಾಣದಲ್ಲಿ ಎಣ್ಣೆ ಅಥವಾ ತುಪ್ಪ ಬಳಸುವುದು ಆಯುರ್ವೇ ದದ ದೃಷ್ಟಿಯಿಂದ ಉಪಯುಕ್ತ. ನಮ್ಮ ಪ್ರದೇಶದಲ್ಲಿ ಪಾರಂಪರಿಕವಾಗಿ ಬಳಕೆಯಲ್ಲಿರುವ ಎಣ್ಣೆಗಳಿಗೆ ಆದ್ಯತೆ ನೀಡುವುದು ಉತ್ತಮ. ನಮ್ಮ ಆಹಾರ ಪದ್ಧತಿ ಮತ್ತು ದೇಹಕ್ಕೆ ಪರಿಚಿತವಾಗಿರುವ ಸ್ಥಳೀಯ ಆಹಾರ ಪದ್ಧತಿಯನ್ನು ಗೌರವಿಸುವುದು ಮುಖ್ಯ.

೩. ಭಾರತೀಯ ಸಾಂಪ್ರದಾಯಿಕ ಅಡುಗೆ ವಿಧಾನಗಳನ್ನು ಅನುಸರಿಸಿ: ತರಕಾರಿಗಳನ್ನು ಕಚ್ಚಾ ರೂಪದಲ್ಲಿ ಸೇವಿಸುವುದಕ್ಕಿಂತ ನಮ್ಮ ಸಾಂಪ್ರದಾಯಿಕ ಅಡುಗೆ ವಿಧಾನಗಳಲ್ಲಿ ಬಳಸಬಹುದು.ಒಗ್ಗರಣೆಯ ಪಲ್ಯ, ಕೂಟು, ಅವಿಯಲ, ಗೊಜ್ಜು, ಹುಳಿ, ತಂಬುಳಿ, ಪಳದ್ಯ, ಸಾರು ಮತ್ತು ಸೂಪ್ ಮುಂತಾದ ವಿವಿಧ ರೂಪಗಳಲ್ಲಿ ತರಕಾರಿಗಳನ್ನು ಬಳಸಬಹುದು. ಈ ರೀತಿಯ ಸಂಸ್ಕಾರವು ಆಹಾರವನ್ನು ಹೆಚ್ಚು ರುಚಿಕರವಾಗಿಸುವುದರ ಜೊತೆಗೆ ದೇಹಕ್ಕೆ ಹೊಂದುವಂತೆ ಮಾಡುತ್ತದೆ.

೪. ದೇಶೀಯ ಮಸಾಲೆಗಳನ್ನು ಸೂಕ್ತವಾಗಿ ಬಳಸಿ: ತರಕಾರಿಗಳನ್ನು ಬೇಯಿಸುವಾಗ ಜೀರಿಗೆ, ಧನಿಯಾ, ಕಾಳುಮೆಣಸು, ಚಕ್ಕೆ, ಲವಂಗ ಮುಂತಾದ ಸಾಂಪ್ರದಾಯಿಕ ಮಸಾಲೆಗಳನ್ನು ಸೂಕ್ತ ಪ್ರಮಾಣದಲ್ಲಿ ಒಗ್ಗರಣೆಯಲ್ಲಿ ಬಳಸಬಹುದು. ಇವು ಆಹಾರಕ್ಕೆ ರುಚಿಯನ್ನು ನೀಡುವುದರ ಜೊತೆಗೆ ಜೀರ್ಣಕ್ರಿಯೆಗೆ ಸಹಾಯಕವಾಗ ಬಹುದು.ಆದರೆ ಮಸಾಲೆಯ ಪ್ರಮಾಣ ಅತಿಯಾಗ ಬಾರದು. ವಿಶೇಷವಾಗಿ ಶರದೃತುವಿನಲ್ಲಿ ಪಿತ್ತದ ಪ್ರಕೋಪವನ್ನು ಗಮನದಲ್ಲಿಟ್ಟುಕೊಂಡು ಅತಿಯಾದ ಖಾರ ಮತ್ತು ತೀಕ್ಷ್ಣ ಮಸಾಲೆಗಳನ್ನು ತಪ್ಪಿಸುವುದು ಒಳಿತು.

೫. ಸ್ಟೀಮ್ ಮಾಡಿದ ತರಕಾರಿಗಳನ್ನು ಸರಿಯಾಗಿ ಸೇವಿಸಿ: ತರಕಾರಿಗಳನ್ನು ಸ್ಟೀಮ್ ಮಾಡಿ ಸೇವಿಸುವುದೂ ಉತ್ತಮ ವಿಧಾನ. ಆದರೆ ಕೇವಲ ಒಣಗಿದ ರೀತಿಯಲ್ಲಿ ಸೇವಿಸುವ ಬದಲು ಸೂಕ್ತ ಪ್ರಮಾಣದ ಎಣ್ಣೆ ಅಥವಾ ತುಪ್ಪ ಮತ್ತು ಉಪ್ಪು ಸೇರಿಸಿ ಸೇವಿಸಬಹುದು. ಇದರಿಂದ ಆಹಾರಕ್ಕೆ ರುಚಿ ಮತ್ತು ಅಗತ್ಯವಾದ ಸ್ನಿಗ್ಧತೆ ದೊರೆಯುತ್ತದೆ.

೬. ಹಸಿ ತರಕಾರಿಗಳ ಜ್ಯೂಸ್ ಸೇವಿಸುವ ಅಭ್ಯಾಸ ಬೇಡ: ಹಸಿಯಾಗಿದ್ದರೆ ಹೆಚ್ಚು ಪೌಷ್ಟಿಕ ಎಂಬ ಕಲ್ಪನೆಯಿಂದ ತರಕಾರಿಗಳನ್ನು ಹಿಂಡಿ ರಸವನ್ನು ಮಾತ್ರ ಕುಡಿಯುವ ಅಭ್ಯಾಸವನ್ನು ರೂಢಿಸಿಕೊಳ್ಳಬೇಕಾಗಿಲ್ಲ. ತರಕಾರಿಗಳ ರಸ, ಸೊಪ್ಪಿನ ಜ್ಯೂಸ್ ಅಥವಾ ವಿವಿಧ ಹಸಿ ತರಕಾರಿಗಳ ಜ್ಯೂಸ್ ಅನ್ನು ಪ್ರತಿದಿನ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವು ದಕ್ಕಿಂತ, ಪೂರ್ಣ ತರಕಾರಿಯನ್ನು ಸೂಕ್ತ ವಾಗಿ ಸಂಸ್ಕರಿಸಿ ಸೇವಿಸುವುದು ಹೆಚ್ಚು ಸಮತೋಲನದ ಆಹಾರ ಪದ್ಧತಿ.

೭. ಸಲಾಡ್‌ಗಳನ್ನು ಮಿತವಾಗಿ ಬಳಸಿ: ಹಸಿ ತರಕಾರಿಗಳ ಸಲಾಡ್‌ಗಳನ್ನು ಸಂಪೂರ್ಣವಾಗಿ ನಿಷೇಧಿಸುವ ಅಗತ್ಯವಿಲ್ಲ. ಆದರೆ ಅವುಗಳನ್ನು ಅತಿಯಾಗಿ ಸೇವಿಸುವುದೂ ಸೂಕ್ತವಲ್ಲ. ವಿಶೇಷ ವಾಗಿ ಜೀರ್ಣಶಕ್ತಿ ದುರ್ಬಲವಾಗಿರುವವರು, ಹೊಟ್ಟೆ ಉಬ್ಬರ ಅಥವಾ ವಾತಪ್ರಧಾನ ತೊಂದರೆ ಇರುವ ವರು ಹಸಿ ತರಕಾರಿಗಳ ಪ್ರಮಾಣವನ್ನು ಕಡಿಮೆ ಮಾಡಿ, ಬೇಯಿಸಿದ ತರಕಾರಿಗಳಿಗೆ ಆದ್ಯತೆ ನೀಡಬಹುದು.

೮. ಸ್ಥಳೀಯ ಮತ್ತು ಋತುಸಹಜ ತರಕಾರಿ ಗಳಿಗೆ ಆದ್ಯತೆ ನೀಡಿ: ಆಯುರ್ವೇದದಲ್ಲಿ ದೇಶ ಮತ್ತು ಕಾಲಕ್ಕೆ ಮಹತ್ವವಿದೆ. ಆದ್ದರಿಂದ ನಮ್ಮ ಪ್ರದೇಶದಲ್ಲಿ, ನಮ್ಮ ಹವಾ ಮಾನಕ್ಕೆ ಅನುಗುಣವಾಗಿ ಆ ಋತುವಿನಲ್ಲಿ ದೊರೆಯುವ ತರಕಾರಿಗಳಿಗೆ ಆದ್ಯತೆ ನೀಡುವುದು ಉತ್ತಮ ಆಹಾರ ಪದ್ಧತಿ. ದೂರದ ಪ್ರದೇಶಗಳಿಂದ ಅಥವಾ ಬೇರೆ ದೇಶಗಳಿಂದ ಬರುವ ತರಕಾರಿಗಳನ್ನು ಪ್ರತಿ ದಿನದ ಆಹಾರದ ಅವಿಭಾಜ್ಯ ಭಾಗವನ್ನಾಗಿ ಮಾಡಿಕೊಳ್ಳುವುದಕ್ಕಿಂತ ಸ್ಥಳೀಯ ಮತ್ತು ಋತುಸಹಜ ತರಕಾರಿಗಳ ವೈವಿಧ್ಯತೆಯನ್ನು ಹೆಚ್ಚಿಸುವುದು ಸೂಕ್ತ.

೯. ಹಸಿಗಿಂತ ಸಂಸ್ಕಾರ ಮುಖ್ಯ: ಆಯುರ್ವೇದದ ಆಹಾರ ಪದ್ಧತಿಯ ವಿಶೇಷತೆಯೆಂದರೆ ಆಹಾರ ವಸ್ತುವಿನ 8M5 ಸ್ವಾಭಾವಿಕ ಗುಣಗಳನ್ನು ಮಾತ್ರವಲ್ಲದೆ, ಅದಕ್ಕೆ ನೀಡುವ ಸಂಸ್ಕಾರದಿಂದ ಆಗುವ ಬದಲಾ ವಣೆಯನ್ನೂ ಪರಿಗಣಿಸುವುದು. ಹೀಗಾಗಿ ತರಕಾರಿಗಳನ್ನು ಸರಿಯಾದ ಪ್ರಮಾಣದಲ್ಲಿ, ಸೂಕ್ತ ಎಣ್ಣೆ ಅಥವಾ ತುಪ್ಪ ದೊಂದಿಗೆ, ದೇಶೀಯ ಮಸಾಲೆಗಳನ್ನು ಬಳಸಿ, ಚೆನ್ನಾಗಿ ಬೇಯಿಸಿ ಸೇವಿಸುವುದು ಆಹಾರವನ್ನು ದೇಹಕ್ಕೆ ಹೆಚ್ಚು ಹೊಂದುವಂತೆ ಮಾಡಬಹುದು.

ತರಕಾರಿಗಳು ನಮ್ಮ ಆಹಾರದಲ್ಲಿ ಅತ್ಯಂತ ಅಗತ್ಯವಾದವು. ಆದರೆ ತರಕಾರಿ ಆರೋಗ್ಯಕರವೇ? ಎಂಬ ಪ್ರಶ್ನೆಯ ಜೊತೆಗೆ ಯಾವ ಋತು ವಿನಲ್ಲಿ, ಯಾವ ತರಕಾರಿ, ಎಷ್ಟು ಪ್ರಮಾಣದಲ್ಲಿ, ಯಾವ ರೀತಿಯಲ್ಲಿ ಸಂಸ್ಕರಿಸಿ ಸೇವಿಸ ಬೇಕು? ಎಂಬ ಪ್ರಶ್ನೆಗಳಿಗೂ ಅಷ್ಟೇ ಮಹತ್ವವಿದೆ. ಶರದೃತುವಿನಲ್ಲಿ ಪಿತ್ತದ ಪ್ರಕೋಪವನ್ನು ಗಮನದಲ್ಲಿಟ್ಟುಕೊಂಡು, ತಾಜಾ ಹಾಗೂ ಋತು ಸಹಜ ತರಕಾರಿಗಳನ್ನು ಆಯ್ಕೆ ಮಾಡಿ, ಅವುಗಳಿಗೆ ಸೂಕ್ತವಾದ ಸಂಸ್ಕಾರ ನೀಡಿ, ಮಿತ ವಾದ ಸ್ನಿಗ್ಧತೆ ಮತ್ತು ಜೀರ್ಣಕ್ರಿಯೆಗೆ ಸಹಾಯಕವಾದ ಮಸಾಲೆಗಳೊಂದಿಗೆ ಸೇವಿಸು ವುದು ಹಿತಕರ. ಹಸಿ ತರಕಾರಿಗಳು, ಜ್ಯೂಸ್ ಗಳು ಅಥವಾ ಸಲಾಡ್‌ಗಳನ್ನೇ ಆರೋಗ್ಯದ ಸಂಕೇತವೆಂದು ಭಾವಿಸುವ ಬದಲು, ನಮ್ಮ ದೇಹದ ಜೀರ್ಣಶಕ್ತಿಯನ್ನು ಗಮನಿಸುವುದು ಮುಖ್ಯ.

ಆಹಾರವು ಕೇವಲ ಹೊಟ್ಟೆ ತುಂಬಿಸುವುದಲ್ಲ; ಅದು ದೇಹದ ಧಾತುಗಳನ್ನು ಪೋಷಿಸುವ ಸಾಧನ. ಆದ್ದರಿಂದ ಪ್ರಕೃತಿ, ದೇಶ, ಕಾಲ, ವಯಸ್ಸು ಮತ್ತು ಜೀರ್ಣಶಕ್ತಿಯನ್ನು ಪರಿಗಣಿಸಿ ಆಹಾರವನ್ನು ಆಯ್ಕೆ ಮಾಡೋಣ. ಋತುವಿಗೆ ತಕ್ಕ ಆಹಾರ, ದೇಹಕ್ಕೆ ತಕ್ಕ ಪ್ರಮಾಣ, ಸರಿಯಾದ ಸಂಸ್ಕಾರ, ಇವೇ ಆರೋಗ್ಯದ ಸುಂದರ ಸೂತ್ರಗಳು.