Vishweshwar Bhat Column: ಒಂದು ಗಾದೆಯ ಕುರಿತು

ಸಂಪಾದಕರ ಸದ್ಯಶೋಧನೆ

ಚೀನಾದಲ್ಲಿ ಒಂದು ಸುಪ್ರಸಿದ್ಧ ಗಾದೆಯಿದೆ. ‘ಒಂದು ಮರವನ್ನು ನೆಡಲು ಅತ್ಯಂತ ಸೂಕ್ತವಾದ ಸಮಯ 20 ವರ್ಷಗಳ ಹಿಂದೆ ಆಗಿತ್ತು. ಎರಡನೇ ಅತ್ಯಂತ ಸೂಕ್ತ ಸಮಯ ಈಗ’. ಈ ಸಾಲುಗಳು ಕೇವಲ ಗಿಡ-ಮರಗಳ ಬಗ್ಗೆ ಮಾತ್ರವಲ್ಲ, ನಮ್ಮ ಜೀವನದ ಪ್ರತಿಯೊಂದು ನಿರ್ಧಾರ ಮತ್ತು ಗುರಿಗಳ ಬಗ್ಗೆಯೂ ಬೆಳಕು ಚೆಲ್ಲುತ್ತವೆ.

ನಾವೆಲ್ಲರೂ ಆಗಾಗ ‘ಅಯ್ಯೋ, ನಾನು ಈ ಕೆಲಸವನ್ನು ಮೊದಲೇ ಮಾಡಬೇಕಿತ್ತು’ ಎಂದು ಪಶ್ಚಾತ್ತಾಪ ಪಡುತ್ತೇವೆ. ಇಪ್ಪತ್ತು ವರ್ಷಗಳ ಹಿಂದೆ ಒಂದು ಮರವನ್ನು ನೆಟ್ಟಿದ್ದರೆ, ಇಂದು ಅದು ನಮಗೆ ನೆರಳು, ತಂಪುಗಾಳಿ ಮತ್ತು ಹಣ್ಣುಗಳನ್ನು ನೀಡುತ್ತಿತ್ತು. ಹಾಗೆಯೇ, ಬಾಲ್ಯದಲ್ಲಿ ಒಂದು ಕಲೆಯನ್ನು ಕಲಿತಿದ್ದರೆ ಅಥವಾ ಯೌವನದಲ್ಲಿ ಒಂದು ಉಳಿತಾಯದ ಯೋಜನೆಯನ್ನು ಆರಂಭಿಸಿದ್ದರೆ, ಇಂದು ನಾವು ಅದರ ಫಲವನ್ನು ಉಣ್ಣಬಹುದಿತ್ತು. ಆದರೆ ಕಳೆದುಹೋದ ಕಾಲ ಮರಳಿ ಬಾರದು.

ಕಳೆದುಹೋದ ಸಮಯದ ಬಗ್ಗೆ ಚಿಂತಿಸುತ್ತಾ ಕುಳಿತುಕೊಳ್ಳುವುದು ವ್ಯರ್ಥ. ನಾವು ಇಪ್ಪತ್ತು ವರ್ಷಗಳ ಹಿಂದೆ ಆ ಕೆಲಸವನ್ನು ಮಾಡಲಿಲ್ಲ ಎಂಬ ಕಾರಣಕ್ಕೆ, ಇಂದೂ ಕೂಡ ಮಾಡದೇ ಬಿಟ್ಟರೆ, ಮುಂದಿನ ಇಪ್ಪತ್ತು ವರ್ಷಗಳ ನಂತರವೂ ನಾವು ಇದೇ ಪಶ್ಚಾತ್ತಾಪವನ್ನು ಪಡಬೇಕಾಗುತ್ತದೆ.

ಇದನ್ನೂ ಓದಿ: Vishweshwar Bhat Column: ಜಪಾನಿಯರ ಹೆಸರುಗಳು

ಹೊಸದನ್ನು ಕಲಿಯಲು ಅಥವಾ ಒಳ್ಳೆಯದನ್ನು ಮಾಡಲು ಇಂದೇ ಮೊದಲ ದಿನ. ನಮ್ಮ ಕೈಯಲ್ಲಿರುವುದು ಇಂದಿನ ಈ ಕ್ಷಣ ಮಾತ್ರ. ನಾಳೆ ಎಂಬುದು ಅನಿಶ್ಚಿತ, ನಿನ್ನೆ ಎಂಬುದು ಇತಿಹಾಸ. ಈ ಗಾದೆಯಲ್ಲಿ ಮರವನ್ನು ಉದಾಹರಣೆಯಾಗಿ ನೀಡಿರುವುದು ಅರ್ಥಪೂರ್ಣವಾಗಿದೆ.

ಒಂದು ಮರ ಬೆಳೆದು ಹೆಮ್ಮರವಾಗಲು ಸಮಯ ಬೇಕು. ಹಾಗೆಯೇ ನಮ್ಮ ಯಶಸ್ಸು ಕೂಡ ರಾತ್ರೋರಾತ್ರಿ ಸಿಗುವಂಥದ್ದಲ್ಲ. ಅದಕ್ಕೆ ತಾಳ್ಮೆ ಮತ್ತು ನಿರಂತರ ಪ್ರಯತ್ನದ ಅಗತ್ಯವಿದೆ. ಇಂದು ನೀವು ಹಾಕುವ ಒಂದು ಸಣ್ಣ ಹೆಜ್ಜೆ ಅಥವಾ ನೀವು ಬಿತ್ತುವ ಒಂದು ಬೀಜ, ಭವಿಷ್ಯದಲ್ಲಿ ದೊಡ್ಡ ಬದಲಾವಣೆಗೆ ಕಾರಣವಾಗುತ್ತದೆ.

‘ನಾಳೆ ಮಾಡೋಣ’ ಎನ್ನುವ ಮನೋಭಾವವೇ ಪ್ರಗತಿಗೆ ದೊಡ್ಡ ಶತ್ರು. ಹಿಂದೆ ಮಾಡದ ತಪ್ಪನ್ನು ಈಗ ತಿದ್ದಿಕೊಳ್ಳಲು ಅವಕಾಶವಿದೆ. ಇಂದು ಮಾಡುವ ಸಣ್ಣ ಹೂಡಿಕೆ ಅಥವಾ ಓದು ಭವಿಷ್ಯದ ಬದುಕನ್ನು ಹಸನುಗೊಳಿಸುತ್ತದೆ. ಹಳೆಯ ಕಾಲದ ಬಗ್ಗೆ ವ್ಯಥೆ ಪಡುವುದಕ್ಕಿಂತ, ಭವಿಷ್ಯದ ಇಪ್ಪತ್ತು ವರ್ಷಗಳ ನಂತರ ‘ಅಂದು ನಾನು ಸರಿಯಾದ ನಿರ್ಧಾರ ತಳೆದೆ’ ಎಂದು ಹೆಮ್ಮೆಯಿಂದ ಹೇಳಿಕೊಳ್ಳುವಂತೆ ಇಂದು ಕೆಲಸ ಮಾಡುವುದು ಜಾಣತನ. ಸಮಯ ಯಾರೊಬ್ಬರಿಗೂ ಕಾಯುವುದಿಲ್ಲ.

ನದಿ ಹರಿದು ಹೋದಂತೆ ಕಾಲವೂ ಉರುಳುತ್ತದೆ. ಆದರೆ ಆ ಹರಿವಿನಲ್ಲಿ ನಾವು ಹೇಗೆ ಈಜುತ್ತೇವೆ ಎಂಬುದು ಮುಖ್ಯ. ಆದ್ದರಿಂದ, ನೀವು ಯಾವುದನ್ನಾದರೂ ಸಾಧಿಸಬೇಕು ಎಂದುಕೊಂಡಿದ್ದರೆ, ಅದು ಓದಿರಲಿ, ಬರವಣಿಗೆಯಿರಲಿ ಅಥವಾ ಪರಿಸರ ಸೇವೆಯಿರಲಿ... ಅದಕ್ಕೆ ಸಕಾಲ ‘ಈಗ’. ಇಂದೇ ಮರ ನೆಡಿ, ಇಂದೇ ಕನಸಿನತ್ತ ಹೆಜ್ಜೆ ಹಾಕಿ. ನಾವು ಇಂದು ಯಾವುದನ್ನು ‘ಈಗ’ ಎಂದು ಕರೆಯು ತ್ತಿದ್ದೇವೆಯೋ, ಅದು ಇನ್ನು 20 ವರ್ಷಗಳ ನಂತರ ‘ಹಿಂದಿನ ಕಾಲ’ ಎಂದೆನಿಸಿಕೊಳ್ಳುತ್ತದೆ.

ಇಂದು ನಾವು ಸೋಮಾರಿತನದಿಂದ ಕಾಲಹರಣ ಮಾಡಿದರೆ, 2046ರಲ್ಲಿ ಕುಳಿತು ‘2026ರಲ್ಲಿ ನಾನು ಆ ಕೆಲಸ ಮಾಡಬೇಕಿತ್ತು’ ಎಂದು ಮತ್ತೆ ಇದೇ ಗಾದೆಯನ್ನು ನೆನಪಿಸಿಕೊಳ್ಳಬೇಕಾಗುತ್ತದೆ. ಆ ಚಕ್ರ ವನ್ನು ಮುರಿಯಲು ಇಂದೇ ಶುಭ ಮುಹೂರ್ತ. ಯಾವುದೇ ಶುಭ ಕಾರ್ಯಕ್ಕೆ ಅಥವಾ ಪ್ರಗತಿಗೆ ‘ಈ ಕ್ಷಣ’ಕ್ಕಿಂತ ಉತ್ತಮವಾದ ಸಮಯ ಬೇರೊಂದಿಲ್ಲ.

‘ಇಂದಿನ ನಿರ್ಧಾರವೇ ನಾಳೆಯ ನೆರಳು’ ಎಂಬುದು ಬದುಕಿನ ಕರ್ಮ ಸಿದ್ಧಾಂತದ ಪ್ರತಿಫಲನ. ನಾವು ಇಂದು ತೆಗೆದುಕೊಳ್ಳುವ ಪ್ರತಿಯೊಂದು ಸಣ್ಣ ನಿರ್ಧಾರವೂ ನಮ್ಮ ಭವಿಷ್ಯದ ಆಕೃತಿ ಯನ್ನು ಕೆತ್ತುತ್ತದೆ. ನಾವು ಇಂದು ಯಾವ ಬೀಜ ಬಿತ್ತುತ್ತೇವೆಯೋ, ನಾಳೆ ಅದೇ ಮರವಾಗಿ ಬೆಳೆದು ನಮಗೆ ನೆರಳು ನೀಡುತ್ತದೆ.

ನೀವು ಬೇವಿನ ಬೀಜ ಬಿತ್ತಿ ಮಾವಿನ ಹಣ್ಣನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ. ಹಾಗೆಯೇ ಇಂದು ನೀವು ಕಷ್ಟಪಟ್ಟು ಓದುವ ನಿರ್ಧಾರ ಮಾಡಿದರೆ, ನಾಳೆ eನದ ನೆರಳು ಸಿಗುತ್ತದೆ. ಇಂದು ಸೋಮಾರಿತನ ಆರಿಸಿಕೊಂಡರೆ, ನಾಳೆ ಬಿಸಿಲಲ್ಲಿ (ಕಷ್ಟದಲ್ಲಿ) ನಿಲ್ಲಬೇಕಾಗುತ್ತದೆ. ನಮ್ಮ ಜೀವನ ನಾವು ಮಾಡುವ ಆಯ್ಕೆಗಳ ಮೊತ್ತ. ಬೆಳಗ್ಗೆ ಎದ್ದ ಕ್ಷಣದಿಂದ ರಾತ್ರಿ ಮಲಗುವವರೆಗೆ ನಾವು ತೆಗೆದುಕೊಳ್ಳುವ ಸಣ್ಣ ನಿರ್ಧಾರಗಳು (ಏನು ತಿನ್ನಬೇಕು, ಯಾರ ಜತೆ ಇರಬೇಕು, ಸಮಯವನ್ನು ಹೇಗೆ ಬಳಸಬೇಕು) ನಮ್ಮ ವ್ಯಕ್ತಿತ್ವವನ್ನು ರೂಪಿಸುತ್ತವೆ.

ಇಂದು ವ್ಯಾಯಾಮ ಮಾಡುವ ನಿರ್ಧಾರ, ವೃದ್ಧಾಪ್ಯದಲ್ಲಿ ಲವಲವಿಕೆಯ ಬದುಕನ್ನು ನೀಡುತ್ತದೆ. ಇಂದು ಅನಗತ್ಯ ಖರ್ಚು ಕಡಿಮೆ ಮಾಡುವ ನಿರ್ಧಾರ, ಭವಿಷ್ಯದ ಆರ್ಥಿಕ ಸಂಕಷ್ಟದ ಸಮಯ ದಲ್ಲಿ ಆಸರೆಯಾಗುತ್ತದೆ.