ದೃಶ್ಯಂ ಸಿನಿಮಾ ವೀಕ್ಷಿಸಿ ತಂದೆಯನ್ನೇ ಕೊಂದ ಪುತ್ರ: ಹತ್ಯೆ ಮಾಡಲೆಂದೇ 2,000 ಕಿ.ಮೀ ಪ್ರಯಾಣ, ಆರೋಪಿ ಸಿಕ್ಕಿ ಬಿದ್ದಿದ್ದೇ ರೋಚಕ
Son Kills Father: ವ್ಯಕ್ತಿಯೊಬ್ಬ ಬಾಲಿವುಡ್‌ನ ಕ್ರೈಂ ಥ್ರಿಲ್ಲರ್ ‘ದೃಶ್ಯಂ’ ಸಿನಿಮಾ ನೋಡಿ ತಂದೆಯನ್ನೇ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಬಿಹಾರದ ಸಮಸ್ತಿಪುರದಲ್ಲಿ ನಡೆದಿದೆ. ಜುಲೈ 26 ರ ತಡರಾತ್ರಿ ಈ ಕೊಲೆ ನಡೆದಿದೆ. 50 ವರ್ಷದ ರಘುವೀರ್ ಸಾಹ್ನಿ ಮೃತ ದುರ್ದೈವಿ. ಅವರು ಮನೆಯ ಹೊರಗೆ ಮಲಗಿದ್ದಾಗ ಅವರ 26 ವರ್ಷದ ಮಗ ಹತ್ಯೆ ಮಾಡಿ ಪರಾರಿಯಾಗಿದ್ದಾನೆ.
ಕೊಲೆಯಾದವರು (ಎಡ), ಆರೋಪಿ (ಬಲ) -
ಪಟನಾ, ಅ.4: ವ್ಯಕ್ತಿಯೊಬ್ಬ ಬಾಲಿವುಡ್‌ನ ಕ್ರೈಂ ಥ್ರಿಲ್ಲರ್ ‘ದೃಶ್ಯಂ’ ಸಿನಿಮಾ ನೋಡಿ ತಂದೆಯನ್ನೇ ಹತ್ಯೆ ಮಾಡಿರುವ ಆಘಾತಕಾರಿ ಘಟನೆ ಬಿಹಾರದ (Bihar) ಸಮಸ್ತಿಪುರದಲ್ಲಿ ನಡೆದಿದೆ. ಸೂರತ್‌ನಲ್ಲಿ ನೆಲೆಸಿದ್ದ ಆರೋಪಿಯು ಸುಮಾರು 2,000 ಕಿಲೋಮೀಟರ್ ದೂರದಲ್ಲಿರುವ ಸಮಸ್ತಿಪುರದಲ್ಲಿರುವ ತನ್ನ ಮನೆಗೆ ತೆರಳಿದ್ದಾನೆ. ಬಳಿಕ ಮೊಬೈಲ್ ಫೋನ್ ಸ್ವಿಚ್ ಆಫ್ ಮಾಡಿ, ನಿದ್ರಿಸುತ್ತಿದ್ದ ತನ್ನ ತಂದೆಯನ್ನು ಕೊಡಲಿಯಿಂದ ಹೊಡೆದು ಕೊಂದಿದ್ದಾನೆ. ನಂತರ ತಾನು ಮಾಡಿದ್ದ ಅಪರಾಧದ ಯಾವುದೇ ಸುಳಿವು ಸಿಗದಂತೆ ನೋಡಿಕೊಂಡಿದ್ದೇನೆ ಎಂದು ಭಾವಿಸಿ ಮತ್ತೆ ಸೂರತ್‌ಗೆ ಹಿಂದಿರುಗಿದ್ದಾನೆ. ಆದರೆ, ಆತ ತನ್ನ ಪತ್ನಿಗೆ ಮಾಡಿದ ಒಂದೇ ಒಂದು ಫೋನ್ ಕರೆ, ಆತ ಎಚ್ಚರಿಕೆಯಿಂದ ರೂಪಿಸಿದ್ದ ಕೊಲೆಯ ರಹಸ್ಯವನ್ನು ಬಯಲು ಮಾಡಿದೆ (Crime News).
ಸಮಷ್ಟಿಪುರ ಜಿಲ್ಲೆಯ ದರ್ವಾ ಗ್ರಾಮದಲ್ಲಿ ಜುಲೈ 26 ರ ತಡರಾತ್ರಿ ಈ ಕೊಲೆ ನಡೆದಿದೆ. 50 ವರ್ಷದ ರಘುವೀರ್ ಸಾಹ್ನಿ ಮೃತ ದುರ್ದೈವಿ. ಅವರು ಮನೆಯ ಹೊರಗೆ ಮಲಗಿದ್ದಾಗ ಅವರ 26 ವರ್ಷದ ಮಗ ಶಿವಶಂಕರ್ ಕೊಡಲಿಯಿಂದ ಕಡಿದು ಪರಾರಿಯಾಗಿದ್ದಾನೆ. ಶಿವಶಂಕರ್ ತನ್ನ ತಂದೆಯೊಂದಿಗೆ ಉತ್ತಮ ಸಂಬಂಧ ಹೊಂದಿರಲಿಲ್ಲ. ಸೂರತ್‌ನಲ್ಲಿ ವಾಸವಾಗಿದ್ದ ಆತ ಅಲ್ಲೇ ಉದ್ಯೋಗ ಮಾಡುತ್ತಿದ್ದ. ತನ್ನ ತಂದೆಯನ್ನು ಕೊಲೆ ಮಾಡಲು ಸೂರತ್‌ನಿಂದ ಸಮಸ್ತಿಪುರಕ್ಕೆ ತೆರಳಿದ್ದ.
ಜಮೀನು ವಿವಾದದ ವಿಚಾರವಾಗಿ ಆರೋಪಿ ಶಿವಶಂಕರ್ ತನ್ನ ತಂದೆ ರಘುವೀರ್ ಜೊತೆ ಹಲವು ಬಾರಿ ಜಗಳವಾಡಿದ್ದ. ಇದೇ ವಿಚಾರವು ಆತನಿಗೆ ತನ್ನ ತಂದೆಯನ್ನು ಕೊಲೆ ಮಾಡುವ ಯೋಜನೆ ರೂಪಿಸಲು ಪ್ರಚೋದಿಸಿರಬಹುದು ಎಂದು ಪೊಲೀಸರು ತಿಳಿಸಿದ್ದಾರೆ. ಮೊಬೈಲ್ ಫೋನ್ ಸ್ವಿಚ್ ಆನ್ ಮಾಡಿ ಪತ್ನಿಗೆ ಕರೆ ಮಾಡಿದ್ದಾನೆ. ಇದರಿಂದ ಶಿವಶಂಕರ್‌ನನ್ನು ಪೊಲೀಸರು ಸೂರತ್‌ನಲ್ಲಿ ಪತ್ತೆಹಚ್ಚಿದರು. ಆತನ ಈ ಕರೆ ಪೊಲೀಸರಿಗೆ ಮಹತ್ವದ ಸುಳಿವು ನೀಡಿದ್ದು, ಇದರ ಆಧಾರದ ಮೇಲೆ ಬಲೆ ಬೀಸಿ ಶಿವಶಂಕರ್‌ನನ್ನು ಬಂಧಿಸಲಾಯಿತು.
ತಂದೆಯಿಂದ 90 ಲಕ್ಷ ರೂ. ದೋಚಲು ಅಪಹರಣದ ನಾಟಕವಾಡಿದ 40 ವರ್ಷದ ಮಗ
ಕೊಲೆಗೆ ದೃಶ್ಯಂ ಚಿತ್ರ ಪ್ರೇರಣೆ!
ಬಾಲಿವುಡ್ ನಟ ಅಜಯ್ ದೇವಗನ್‌ ನಟಿಸಿರುವ ದೃಶ್ಯಂ ಸಿನಿಮಾ ಇದೇ ಹೆಸರಿನ ಮಲಯಾಳಂ ಚಿತ್ರದ ರಿಮೇಕ್ ಆಗಿದೆ. ಈ ಸಿನಿಮಾದಲ್ಲಿ ದೇವಗನ್‌ ನಟಿಸಿರುವ ವಿಜಯ್ ಸಾಲ್ಗಾಂವ್ಕರ್‌ ಪಾತ್ರವು ಕೊಲೆ ಮಾಡಿದ ಬಳಿಕ ತನ್ನ ಕುಟುಂಬವನ್ನು ರಕ್ಷಿಸಲು ಸುಳ್ಳು ದಾಖಲೆ ಸೃಷ್ಟಿಸಿ, ಘಟನೆಗಳ ಸಮಯಕ್ರಮವನ್ನು ಬದಲಿಸುವ ಮೂಲಕ ಪೊಲೀಸರನ್ನು ದಾರಿತಪ್ಪಿಸಲು ಪ್ರಯತ್ನಿಸುತ್ತಾನೆ.
ಅಪರಾಧ ನಡೆದ ಸಮಯದಲ್ಲಿ ತನ್ನ ಕುಟುಂಬ ಬೇರೆ ಸ್ಥಳದಲ್ಲಿತ್ತು ಎಂಬಂತೆ ಆತ ಸಾಕ್ಷ್ಯಗಳನ್ನು ಸೃಷ್ಟಿಸುತ್ತಾನೆ. ಜೊತೆಗೆ, ಸಾಮಾನ್ಯವೆನಿಸುವ ಹಲವು ಸಣ್ಣಪುಟ್ಟ ವಿವರಗಳನ್ನು ಬಳಸಿಕೊಂಡು ತನಿಖಾಧಿಕಾರಿಗಳನ್ನು ಗೊಂದಲಕ್ಕೀಡು ಮಾಡುತ್ತಾನೆ. ಪೊಲೀಸರಿಗಿಂತ ಒಂದು ಹೆಜ್ಜೆ ಮುಂದಿರಲು ಸುಳ್ಳು ಕಥನವನ್ನು ಎಚ್ಚರಿಕೆಯಿಂದ ರೂಪಿಸುವ ವಿಜಯ್‌ನ ಪ್ರಯತ್ನವೇ ಚಿತ್ರದ ಪ್ರಮುಖ ಕಥಾವಸ್ತುವಾಗಿದೆ.
ಈ ಪ್ರಕರಣದಲ್ಲಿ, ತನ್ನ ತಂದೆಯ ಕೊಲೆಗೆ ಸಂಚು ರೂಪಿಸುವಾಗ ಶಿವಶಂಕರ್ ಈ ಸಿನಿಮಾದಿಂದ ಪ್ರೇರಣೆ ಪಡೆದಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ. ವಿಶೇಷವಾಗಿ, ಘಟನೆಗಳ ಸಮಯಕ್ರಮವನ್ನು ಗೊಂದಲಗೊಳಿಸುವುದು ಮತ್ತು ಡಿಜಿಟಲ್‌ ಸಾಕ್ಷ್ಯಗಳನ್ನು ತಪ್ಪಿಸುವುದಕ್ಕೆ ಸಿನಿಮಾದಲ್ಲಿ ನೀಡಿರುವ ಒತ್ತು ಆತನ ಮೇಲೆ ಪ್ರಭಾವ ಬೀರಿತ್ತು ಎಂದು ಪೊಲೀಸರು ಹೇಳಿದ್ದಾರೆ.
ಮಹಿಳಾ ಪೊಲೀಸ್ ಸಿಬ್ಬಂದಿ ಮೇಲೆಯೇ ಹಲ್ಲೆ ನಡೆಸಿದ 22 ವರ್ಷದ ಯುವಕ; ವಿಡಿಯೊ ವೈರಲ್‌
ಪೊಲೀಸರ ಪ್ರಕಾರ, ಶಿವಶಂಕರ್ ತನ್ನ ತಂದೆಯೊಂದಿಗೆ ಭಿನ್ನಾಭಿಪ್ರಾಯ ಹೊಂದಿದ್ದ. ರಘುವೀರ್ ಸ್ನಾಹಿಯು ತನ್ನ ಪುತ್ರ ಹಾಗೂ ಆತನ ಪತ್ನಿಯನ್ನು ನಿಂದಿಸಿದ್ದರು ಎಂದು ಆರೋಪಿಸಲಾಗಿದೆ. ಕುಟುಂಬದ ಭೂಮಿ ಮಾರಾಟದ ವಿಷಯದಲ್ಲೂ ತಂದೆ-ಮಗ ಜಗಳವಾಡಿದ್ದರು.
ಶಿವಶಂಕರ್ ತನ್ನ ಹೆಂಡತಿಯೊಂದಿಗೆ ಕೆಲಸದ ನಿಮಿತ್ತ ಸೂರತ್‌ಗೆ ತೆರಳಿದ್ದ. ತನ್ನ ಹಳ್ಳಿಗೆ ಹಿಂತಿರುಗಿ ತಂದೆಯನ್ನು ಕೊಲ್ಲಲು ನಿರ್ಧರಿಸುವ ಮೊದಲು ಅವನು ದೃಶ್ಯಂ ಸಿನಿಮಾ ವೀಕ್ಷಿಸಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರಯಾಣ ಆರಂಭಿಸುವ ಮೊದಲು, ಅವನು ತನ್ನ ಮೊಬೈಲ್ ಫೋನ್ ಅನ್ನು ಸ್ವಿಚ್ ಆಫ್ ಮಾಡಿದನು. ಪ್ರಯಾಣದ ಸಮಯದಲ್ಲಿ ತನ್ನ ಫೋನ್ ಅನ್ನು ಸ್ವಿಚ್ ಆಫ್ ಮಾಡಿದ ನಂತರ, ಅವನು ಪಟೋರಿಯಲ್ಲಿ ಅದನ್ನು ಆನ್ ಮಾಡಿ ತನ್ನ ಹೆಂಡತಿಗೆ ಕರೆ ಮಾಡಿದನು. ನಂತರ ಅವನು ಅದನ್ನು ಮತ್ತೆ ಸ್ವಿಚ್ ಆಫ್ ಮಾಡಿದನು. ಇದು ತನಿಖಾಧಿಕಾರಿಗಳಿಗೆ ನಿರ್ಣಾಯಕ ಸುಳಿವು ನೀಡಿತು.