ಐಆರ್‌ಎಸ್ ಅಧಿಕಾರಿಯ ಪುತ್ರಿ ಅತ್ಯಾಚಾರ, ಕೊಲೆ; 2.5 ಲಕ್ಷ ರೂ. ದೋಚಿದ ಆರೋಪಿ, ತನಿಖೆಯಲ್ಲಿ ಬಯಲಾಗಿದ್ದೇನು?

ನವದೆಹಲಿ: ದಕ್ಷಿಣ ದೆಹಲಿ (South Delhi)ಯ ಹಿರಿಯ ಭಾರತೀಯ ಕಂದಾಯ ಸೇವೆ (Indian Revenue Service) ಅಧಿಕಾರಿಯೊಬ್ಬರ ಮನೆಯಲ್ಲಿ ಕೆಲಸಕ್ಕಿದ್ದ 19 ವರ್ಷದ ರಾಹುಲ್ ಮೀನಾ (Rahul Meena) ಎಂಬಾತ, ಅಧಿಕಾರಿಯ 22 ವರ್ಷದ ಪುತ್ರಿಯ ಮೇಲೆ ಅತ್ಯಾಚಾರವೆಸಗಿ, ಹತ್ಯೆ ಮಾಡಿ ಸುಮಾರು 2.5 ಲಕ್ಷ ರೂಪಾಯಿ ದೋಚಿರುವ ಘಟನೆ ಬೆಳಕಿಗೆ ಬಂದಿದೆ. ಮಾಡಿದ ಸಾಲ ಮರುಪಾವತಿಸದ ಕಾರಣಕ್ಕಾಗಿ ಎಂಟು ತಿಂಗಳ ಕೆಲಸದ ನಂತರ ಈತನನ್ನು ಕೆಲಸದಿಂದ ತೆಗೆದುಹಾಕಲಾಗಿತ್ತು. ಆದರೆ, ಕೆಲಸ ಕಳೆದುಕೊಂಡ ಒಂದು ತಿಂಗಳ ನಂತರ ಆತ ರಹಸ್ಯವಾಗಿ ಹಿಂದಿರುಗಿ ಈ ಭೀಕರ ಕೃತ್ಯವೆಸಗಿದ್ದಾನೆ.

ಅತ್ಯಾಚಾರ, ಕೊಲೆ ಮತ್ತು ದರೋಡೆ

ಯುಪಿಎಸ್ಸಿ ಆಕಾಂಕ್ಷಿಯಾಗಿದ್ದ ಯುವತಿಯನ್ನು ಫೋನ್ ಚಾರ್ಜರ್‌ನಿಂದ ಉಸಿರುಗಟ್ಟಿಸಿ ಕೊಂದ ನಂತರ, ಆರೋಪಿಯು ರಕ್ತಸಿಕ್ತವಾಗಿದ್ದ ತನ್ನ ಬಟ್ಟೆ ಮತ್ತು ಶೂಗಳನ್ನು ಬದಲಿಸಿ ಪರಾರಿಯಾಗಿದ್ದನು. ಕೈಲಾಶ್ ಹಿಲ್ಸ್‌ನ ಮನೆಯಲ್ಲಿ ಬುಧವಾರ ಬೆಳಿಗ್ಗೆ ಈ ಘಟನೆ ನಡೆದಿದೆ. ಸಿಸಿಟಿವಿ ದೃಶ್ಯಾವಳಿಗಳ ಪ್ರಕಾರ, ಆತ ಮನೆಯ ಯಜಮಾನರ ಮಗನ ಪ್ಯಾಂಟ್ ಮತ್ತು ಅಲ್ಲಿಯೇ ಇದ್ದ ಚಪ್ಪಲಿಯನ್ನು ಧರಿಸಿ ಹೋಗಿರುವುದು ಕಂಡುಬಂದಿದೆ. ಮನೆಯ ದಿನಚರಿ ತಿಳಿದಿದ್ದ ಆತ, ಮನೆಯಲ್ಲಿದ್ದ ಸುಮಾರು 2.5 ಲಕ್ಷ ರೂಪಾಯಿಗಳನ್ನು ಕದ್ದಿದ್ದಾನೆ ಎಂದು ಜಂಟಿ ಪೊಲೀಸ್ ಕಮಿಷನರ್ ವಿಜಯ್ ಕುಮಾರ್ ತಿಳಿಸಿದ್ದಾರೆ.

ಎರಡು ದಿನಗಳಲ್ಲಿ 2 ಅತ್ಯಾಚಾರ, ಒಂದು ಕೊಲೆ; ಮಾಜಿ IRS ಅಧಿಕಾರಿ ಮಗಳನ್ನು ಕೊಂದ ಮನೆಕೆಲಸದವ!

ಆನ್‌ಲೈನ್ ಗೇಮ್ ವ್ಯಸನ

ಆರೋಪಿ ಮೀನಾ ಆನ್‌ಲೈನ್ ಗೇಮ್‌ಗಳಿಗೆ ದಾಸನಾಗಿದ್ದನು. ಇದಕ್ಕಾಗಿ ಆತ ಅಕ್ಕಪಕ್ಕದ ಮನೆಯ ಕೆಲಸದವರಿಂದ ಹಣ ಸಾಲ ಪಡೆದು ಮರುಪಾವತಿಸುತ್ತಿರಲಿಲ್ಲ. ಇದೇ ಕಾರಣಕ್ಕೆ ಆತನನ್ನು ಕೆಲಸದಿಂದ ವಜಾಗೊಳಿಸಲಾಗಿತ್ತು. ದೆಹಲಿಗೆ ಬರುವ ಮುನ್ನ ರಾಜಸ್ಥಾನದ ಅಲ್ವಾರ್‌ನಲ್ಲಿ ತನ್ನ ಸ್ನೇಹಿತನ ಪತ್ನಿಯ ಮೇಲೆಯೂ ಈತ ಅತ್ಯಾಚಾರವೆಸಗಿದ್ದು, ಅಲ್ಲಿಯೂ ಈತನ ವಿರುದ್ಧ ಪ್ರಕರಣ ದಾಖಲಾಗಿದೆ.

ಪೂರ್ವಯೋಜಿತ ಸಂಚು

ಅಲ್ವಾರ್‌ನಿಂದ ದೆಹಲಿಗೆ ಕಾರು ಬಾಡಿಗೆಗೆ ಪಡೆದು ಬಂದಿದ್ದ ಮೀನಾ, ಚಾಲಕನಿಗೆ ಹಣ ನೀಡದೆ ಪರಾರಿಯಾಗಿದ್ದನು. ಮನೆಯ ಕೀ ಕಾರ್ಡ್ ಇಡುವ ರಹಸ್ಯ ಜಾಗ (ಶೂ ರಾಕ್) ತಿಳಿದಿದ್ದ ಆತ, ಪೋಷಕರು ಜಿಮ್ ಮತ್ತು ವಾಕಿಂಗ್‌ಗೆ ಹೋಗಿದ್ದ ಸಮಯ ಸಾಧಿಸಿ ಬೆಳಿಗ್ಗೆ 6:30ಕ್ಕೆ ಮನೆ ಪ್ರವೇಶಿಸಿದ್ದಾನೆ. ಕೇವಲ ಒಂದು ಗಂಟೆಯೊಳಗೆ ಕೃತ್ಯ ಮುಗಿಸಿ ಪರಾರಿಯಾಗಿದ್ದ ಮೀನಾನನ್ನು ದೆಹಲಿಯ ದ್ವಾರಕಾದ ಹೋಟೆಲೊಂದರಲ್ಲಿ ಪೊಲೀಸರು ಬಂಧಿಸಿದ್ದಾರೆ. ಹಳೆಯ ದ್ವೇಷ ಮತ್ತು ವಿಕೃತ ಮನಸ್ಥಿತಿಯೇ ಈ ಕೃತ್ಯಕ್ಕೆ ಕಾರಣವೆಂದು ಪೊಲೀಸರು ಶಂಕಿಸಿದ್ದಾರೆ.