ಮೂವರು ಸಹೋದರಿಯ ಆತ್ಮಹತ್ಯೆ ಪ್ರಕರಣ; ಮಾರಾಟ ಮಾಡಿದ್ದ ಫೋನ್ ವಶಪಡಿಸಿಕೊಂಡ ಪೊಲೀಸರು

ಗಾಜಿಯಾಬಾದ್‌, ಫೆ.12: ಕೊರಿಯನ್ ಗೇಮ್‌ನಿಂದ ಪ್ರೇರೇಪಿತರಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದ ಮೂವರು ಸಹೋದರಿಯರ ಪ್ರಕರಣ (Three sisters self-harming case) ಸಂಬಂಧ ಮಹತ್ವದ ಬೆಳವಣಿಗೆ ನಡೆದಿದೆ. ಈ ಭೀಕರ ಘಟನೆ ನಡೆಯುವ ಹದಿನೈದು ದಿನಗಳ ಮೊದಲು ಸಹೋದರಿಯರ ತಂದೆ ಅಂಗಡಿಗೆ ಮಾರಾಟ ಮಾಡಿದ್ದ ಮೊಬೈಲ್ ಫೋನ್ ಅನ್ನು ಗಾಜಿಯಾಬಾದ್ (Ghaziabad) ಪೊಲೀಸರು ವಶಪಡಿಸಿಕೊಂಡಿದ್ದು, ವಿಧಿವಿಜ್ಞಾನ ಪರೀಕ್ಷೆಗೆ ಕಳುಹಿಸಿದ್ದಾರೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಮೂವರು ಸಹೋದರಿಯರು ಒಟ್ಟಿಗೆ ಆತ್ಮಹತ್ಯೆ ಮಾಡಿಕೊಂಡಿದ್ದ ಪ್ರಕರಣ ದೇಶವನ್ನೇ ಬೆಚ್ಚಿ ಬೀಳಿಸಿತ್ತು. ಈ ಆತ್ಮಹತ್ಯೆಯು ಆನ್ಲೈನ್ ಕೊರಿಯನ್ ಗೇಮ್‌ಗೆ ಸಂಬಂಧಿಸಿವೆಯೇ ಎಂದು ಖಚಿತಪಡಿಸಿಕೊಳ್ಳಲು ಅದರ ಡೇಟಾವನ್ನು ಮರುಪಡೆಯುವುದು ಅತ್ಯಗತ್ಯವಾಗಿದೆ. ಮೂವರು ಹುಡುಗಿಯರು ಆಟಕ್ಕೆ ವ್ಯಸನಿಯಾಗಿದ್ದಾರೆಂದು ಹಲವರು ಹೇಳಿಕೊಂಡಿದ್ದಾರೆ ಎಂದು ಉಪ ಪೊಲೀಸ್ ಆಯುಕ್ತ (ಟ್ರಾನ್ಸ್ ಹಿಂಡನ್) ನಿಮಿಷ್ ಪಾಟೀಲ್ ತಿಳಿಸಿದ್ದಾರೆ.

ಆನ್‌ಲೈನ್‌ ಗೇಮ್‌ ಚಟ; 9 ನೇ ಮಹಡಿಯಿಂದ ಜಿಗಿದು ಮೂವರು ಅಪ್ರಾಪ್ತ ಸಹೋದರಿಯರು ಆತ್ಮಹತ್ಯೆ

ಫೆಬ್ರವರಿ 4 ರಂದು ಸಹೋದರಿಯರಾದ ನಿಶಿಕಾ (16), ಪ್ರಾಚಿ (14) ಮತ್ತು ಪಖಿ (12) ತಮ್ಮ ಕಟ್ಟಡದ ಒಂಭತ್ತನೇ ಮಹಡಿಯಿಂದ ಹಾರಿ ಮೃತಪಟ್ಟಿದ್ದರು. ಮೃತರ ತಂದೆ ಚೇತನ್ ಕುಮಾರ್ ಹೇಳಿದ ಪ್ರಕಾರ, ಅವರು ಸುಮಾರು ಮೂರು ವರ್ಷಗಳಿಂದ ಕೊರಿಯನ್ ಆಟವನ್ನು ಆಡುತ್ತಿದ್ದರು. ಅಂದಿನಿಂದ ಶಾಲೆಗೆ ಹೋಗಿಲ್ಲ ಎಂದು ಹೇಳಿದ್ದಾರೆ.

ಆರಂಭಿಕ ತನಿಖೆಗಳಲ್ಲಿ ಹುಡುಗಿಯರು ಯಾವುದೇ ಕೊರಿಯನ್ ಕಾರ್ಯ ಆಧಾರಿತ ಅಪ್ಲಿಕೇಶನ್ ಅನ್ನು ಬಳಸಿದ್ದಾರೆಂದು ಬಹಿರಂಗಪಡಿಸದಿದ್ದರೂ, ಮೂವರು ಸಹೋದರಿಯರ ಕೋಣೆಯಿಂದ ವಶಪಡಿಸಿಕೊಂಡ ಒಂಭತ್ತು ಪುಟಗಳ ಸಣ್ಣ ಡೈರಿಯಲ್ಲಿ ಕೆಲವಷ್ಟನ್ನು ಉಲ್ಲೇಖಿಸಿದ್ದಾರೆ. ಕೊರಿಯನ್ ಸಂಸ್ಕೃತಿಯ ಬಗ್ಗೆ ತೀವ್ರವಾದ ಬಾಂಧವ್ಯ ಮತ್ತು ಕೌಟುಂಬಿಕ ಕಲಹದ ಬಗ್ಗೆ ಅವರು ದುಃಖವನ್ನು ವ್ಯಕ್ತಪಡಿಸಿದ್ದರು.

ದೆಹಲಿಯ ಶಾಲಿಮಾರ್ ಗಾರ್ಡನ್ ಪ್ರದೇಶದಿಂದ ಮಂಗಳವಾರ (ಫೆ.10) ಪೊಲೀಸರು ಮೊಬೈಲ್ ಫೋನ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಹುಡುಗಿಯರು ಆತ್ಮಹತ್ಯೆ ಮಾಡಿಕೊಳ್ಳುವ ಹದಿನೈದು ದಿನಗಳ ಮೊದಲು ಅವರ ತಂದೆ ಕುಮಾರ್ ಆ ಮೊಬೈಲ್ ಫೋನನ್ನು ಅಂಗಡಿಯವನಿಗೆ 15,000 ರೂ.ಗೆ ಮಾರಾಟ ಮಾಡಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ತಮ್ಮ ತಂದೆ ಫೋನ್‌ಗಳನ್ನು ವಶಪಡಿಸಿಕೊಂಡಿದ್ದರಿಂದ, ಆನ್‌ಲೈನ್ ಆಟಗಳನ್ನು ಆಡದಂತೆ ಮತ್ತು ತಮ್ಮ ಕೊರಿಯನ್ ಸ್ನೇಹಿತರೊಂದಿಗೆ ಆನ್‌ಲೈನ್‌ನಲ್ಲಿ ಸಂವಹನ ನಡೆಸದಂತೆ ತಡೆದಿದ್ದರಿಂದ ಹುಡುಗಿಯರು ಖಿನ್ನತೆಗೆ ಒಳಗಾಗಿದ್ದರು ಎಂದು ತನಿಖೆಗಳು ಬಹಿರಂಗಪಡಿಸಿವೆ.

Killer Games: ಮೂವರು ಬಾಲಕಿಯರ ಪ್ರಾಣ ತೆಗೆದ ಕೊರಿಯನ್ ಗೇಮ್‌; ಏನಿದು ಕೊಲ್ಲುವ ಆಟ? ಭಾರತದಲ್ಲಿ ಬ್ಯಾನ್‌ ಆದ ಬ್ಲ್ಯೂ ವೇಲ್‌ಗೂ ಇದಕ್ಕೂ ಇರುವ ಸಾಮ್ಯತೆ ಏನು?

ಪೊಲೀಸರ ಪ್ರಕಾರ, ಸಹೋದರಿಯರ ದಿನಚರಿಯಲ್ಲಿ ಕೊರಿಯಾದ ಮೇಲಿನ ಅವರ ಪ್ರೀತಿಯ ಬಗ್ಗೆ ಮತ್ತು ಅದನ್ನು ತ್ಯಜಿಸಲು ಕುಟುಂಬವು ಮಾಡಿದ ಪ್ರಯತ್ನಗಳ ಬಗ್ಗೆ ಪದೇ ಪದೇ ಉಲ್ಲೇಖಗಳಿವೆ. ನಾವು ಕೊರಿಯನ್ ಅನ್ನು ತುಂಬಾ ಪ್ರೀತಿಸುತ್ತೇವೆ ಎಂದು ಡೈರಿಯಲ್ಲಿ ಉಲ್ಲೇಖಿಸಲಾಗಿದೆ. ಅದರಲ್ಲಿ ಬರೆದಿರುವುದು ಸತ್ಯ ಎಂದು ಉಲ್ಲೇಖಿಸಿದ್ದಾರೆ.

ಅವರ ಪೋಷಕರು ಬಾಲಕಿಯರ ಆಸಕ್ತಿಗಳು ಮತ್ತು ಮದುವೆ ಸೇರಿದಂತೆ ಭವಿಷ್ಯದ ಆಯ್ಕೆಗಳನ್ನು ವಿರೋಧಿಸುತ್ತಿದ್ದರು ಎಂದು ಪತ್ರದಲ್ಲಿ ಆರೋಪಿಸಲಾಗಿದೆ. ನೀವು ನಮ್ಮನ್ನು ಕೊರಿಯನ್ ಭಾಷೆಯಿಂದ ಹೊರಗಿಡಲು ಪ್ರಯತ್ನಿಸಿದ್ದೀರಿ. ಕೊರಿಯನ್ ಭಾಷೆ ನಮ್ಮ ಜೀವನವಾಗಿತ್ತು. ಭಾರತೀಯರನ್ನೇ ನಾವು ವಿವಾಹವಾಗಬೇಕೆಂಬುದಾಗಿ ನೀವು ಬಯಸುತ್ತೀರಿ. ಅದು ಎಂದಿಗೂ ಸಾಧ್ಯವಿಲ್ಲ ಎಂದು ಡೈರಿಯಲ್ಲಿ ಬರೆಯಲಾಗಿದೆ.

ಪತ್ರದಲ್ಲಿ ದೈಹಿಕ ಶಿಕ್ಷೆಯನ್ನೂ ಉಲ್ಲೇಖಿಸಲಾಗಿದೆ. ಅವರ ತಂದೆಗೆ ಕ್ಷಮೆಯಾಚಿಸುವ ಮೂಲಕ ಬರಹವನ್ನು ಕೊನೆಗೊಳಿಸಲಾಗಿದೆ. ನಿಮ್ಮ ಕೈಯಿಂದ ಹೊಡೆತ ತಿನ್ನುವ ಬದಲು ಸಾಯುವುದೇ ಮೇಲುಯ ಅದಕ್ಕಾಗಿಯೇ ನಾವು ಆತ್ಮಹತ್ಯೆ ಮಾಡಿಕೊಳ್ಳುತ್ತಿದ್ದೇವೆ, ಕ್ಷಮಿಸಿ ಅಪ್ಪಾ, ಎಂದು ಪತ್ರದಲ್ಲಿ ಉಲ್ಲೇಖಿಸಲಾಗಿದೆ.