ಇರಾನ್ ಬೆಂಬಲದೊಂದಿಗೆ ಇಸ್ರೇಲ್ ಮೇಲೆ ರಾಕೆಟ್ ದಾಳಿ ಮಾಡಿದ ಹೆಜ್ಬೊಲ್ಲಾ!
Hezbollah launches rocket attack: ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ಲೆಬನಾನ್ನ ಹೆಜ್ಬೊಲ್ಲಾ ಸಹಯೋಗದೊಂದಿಗೆ ಇಸ್ರೇಲ್ ವಿರುದ್ಧ ಪ್ರಮುಖ ಜಂಟಿ ದಾಳಿಯನ್ನು ನಡೆಸಿದೆ ಎಂದು ಹೇಳಿಕೊಂಡಿದೆ. ಉತ್ತರ ಇಸ್ರೇಲ್ ಕಡೆಗೆ ಹಲವಾರು ರಾಕೆಟ್ಗಳಿಂದ ದಾಳಿ ಮಾಡಿರುವುದಾಗಿ ತಿಳಿಸಿದೆ.
ಇಸ್ರೇಲ್ ಮೇಲೆ ರಾಕೆಟ್ ದಾಳಿ ಮಾಡಿದ ಹೆಜ್ಬೊಲ್ಲಾ -
ಜೆರುಸಲೆಮ್, ಮಾ.12: ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಸಂಘರ್ಷವು (Middle east crisis) ಮತ್ತೊಮ್ಮೆ ಅಪಾಯಕಾರಿ ತಿರುವು ತಲುಪಿದೆ. ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ (IRGC) ಲೆಬನಾನ್ನ ಹೆಜ್ಬೊಲ್ಲಾ (Hezbollah) ಸಹಯೋಗದೊಂದಿಗೆ ಇಸ್ರೇಲ್ ವಿರುದ್ಧ ಪ್ರಮುಖ ಜಂಟಿ ದಾಳಿಯನ್ನು ಪ್ರಾರಂಭಿಸಿದೆ ಎಂದು ಹೇಳಿಕೊಂಡಿದೆ. ಇದೇ ಸಮಯದಲ್ಲಿ ಇಸ್ರೇಲ್, ದಕ್ಷಿಣ ಬೇರುತ್ ಮೇಲೆ ಹೊಸ ದಾಳಿಗಳನ್ನು ನಡೆಸಿದೆ.
ಹೆಜ್ಬೊಲ್ಲಾ ತನ್ನ ಪ್ರಕಟಣೆಯಲ್ಲಿ, ಲೆಬನಾನ್ನ ಹಲವಾರು ನಗರಗಳು, ಪಟ್ಟಣಗಳು ಹಾಗೂ ಬೇರುತ್ನ ದಕ್ಷಿಣ ಉಪನಗರಗಳ ಮೇಲೆ ನಡೆದ ದಾಳಿಗಳಿಗೆ ಪ್ರತಿಕ್ರಿಯೆಯಾಗಿ, ತಮ್ಮ ಯೋಧರು ಉತ್ತರ ಇಸ್ರೇಲ್ ಕಡೆಗೆ ಹಲವಾರು ರಾಕೆಟ್ಗಳಿಂದ ದಾಳಿ ಮಾಡಿದ್ದಾರೆ ಎಂದು ತಿಳಿಸಿದೆ. ಈ ದಾಳಿಯಲ್ಲಿ ಇಸ್ರೇಲ್ನ ವಿವಿಧ ಭಾಗಗಳಲ್ಲಿ 50 ಕ್ಕೂ ಹೆಚ್ಚು ಸ್ಥಳಗಳನ್ನು ಗುರಿಯಾಗಿಸಿಕೊಂಡು ಐದು ಗಂಟೆಗಳ ಕಾಲ ನಿರಂತರ ಕ್ಷಿಪಣಿಗಳು, ರಾಕೆಟ್ಗಳು ಮತ್ತು ಡ್ರೋನ್ಗಳ ದಾಳಿ ನಡೆಯಿತು.
IRGC ಪ್ರಕಾರ, ಕಾರ್ಯಾಚರಣೆಯಲ್ಲಿ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಬಳಸಲಾಯಿತು. ಆದರೆ ಹೆಜ್ಬೊಲ್ಲಾ ಹೆಚ್ಚಿನ ಸಂಖ್ಯೆಯ ದಾಳಿ ಡ್ರೋನ್ಗಳು ಮತ್ತು ರಾಕೆಟ್ಗಳನ್ನು ನಿಯೋಜಿಸಿತು. ದಾಳಿಗಳು ಉತ್ತರ ನಗರವಾದ ಹೈಫಾದಿಂದ ಟೆಲ್ ಅವಿವ್ ಮತ್ತು ದಕ್ಷಿಣದ ಬೀರ್ಶೆಬಾವರೆಗೆ ಹಲವಾರು ಮಿಲಿಟರಿ ನೆಲೆಗಳನ್ನು ಗುರಿಯಾಗಿಸಿಕೊಂಡಿವೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಇರಾನ್ ಮತ್ತು ಹೆಜ್ಬೊಲ್ಲಾ, ಸಂಘಟಿತ ಕ್ಷಿಪಣಿ ದಾಳಿ ನಡೆಸಿದೆ ಎಂದು ಇಸ್ರೇಲಿ ಮಿಲಿಟರಿ ದೃಢಪಡಿಸಿದೆ. ಮಧ್ಯ ಇಸ್ರೇಲ್ ಮುಖ್ಯ ಗುರಿಯಾಗಿತ್ತು.
ಮೊಜ್ತಬಾ ಖಮೇನಿ ಸುರಕ್ಷಿತವಾಗಿದ್ದಾರೆ, ಅವರಿಗೆ ಯಾವುದೇ ಗಾಯವಾಗಿಲ್ಲ ಎಂದ ಇರಾನ್ ರಾಷ್ಟ್ರಾಧ್ಯಕ್ಷರ ಪುತ್ರ
ನಾವು ಇದಕ್ಕೆ ಖಂಡಿತ ಪ್ರತಿಕ್ರಿಯೆ ನೀಡುತ್ತೇವೆ ಎಂದು ಇಸ್ರೇಲ್ ಸೇನೆಯ ವಕ್ತಾರ ಅವಿಚಾಯ್ ಅದ್ರೇಯಿ ಅವರು ಎಕ್ಸ್ನಲ್ಲಿ ಹೇಳಿದ್ದು, ತೀವ್ರ ಪ್ರತಿದಾಳಿ ನಡೆಸುವುದಾಗಿ ಎಚ್ಚರಿಕೆ ನೀಡಿದ್ದಾರೆ.
ಇರಾಕ್ನಲ್ಲಿ ಅಮೆರಿಕದ ತೈಲ ಟ್ಯಾಂಕರ್ ಅನ್ನು ಸ್ಫೋಟಿಸಿದ ಇರಾನ್, ಒಬ್ಬ ಭಾರತೀಯ ಸಾವು
ಅಮೆರಿಕ ಸ್ವಾಮ್ಯದ ತೈಲ ಟ್ಯಾಂಕರ್ ಸಫೇಸಿ ವಿಷ್ಣುವನ್ನು ಗುರಿಯಾಗಿಸಿಕೊಂಡು ಇರಾನ್ ದಾಳಿ ನಡೆಸಿದೆ. ಇರಾಕಿನ ಬಳಿ ಆತ್ಮಹತ್ಯಾ ದೋಣಿಯಿಂದ ಈ ದಾಳಿ ನಡೆದಿದೆ ಎಂದು ವರದಿಯಾಗಿದೆ. ಈ ದಾಳಿಯಲ್ಲಿ ಹಡಗಿನಲ್ಲಿದ್ದ ಭಾರತೀಯ ಪ್ರಜೆಯೊಬ್ಬ ಮೃತಪಟ್ಟಿದ್ದಾನೆ ಎಂದು ವರದಿಯಾಗಿದೆ.
ಘಟನೆಯ ನಂತರ, ಈ ಪ್ರದೇಶದಲ್ಲಿ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಇರಾಕ್ನ ಜನರಲ್ ಕಂಪನಿ ಫಾರ್ ಪೋರ್ಟ್ಸ್ನ ಮುಖ್ಯಸ್ಥ ಫರ್ಹಾನ್ ಅಲ್-ಫರ್ತುಸಿ ಇರಾಕಿ ಸುದ್ದಿ ಸಂಸ್ಥೆಗೆ ತಿಳಿಸಿದ್ದು, ದೇಶದ ಎಲ್ಲಾ ತೈಲ ಟರ್ಮಿನಲ್ಗಳಲ್ಲಿ ಕಾರ್ಯಾಚರಣೆಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ. ಆದರೆ, ಇರಾಕ್ನ ಸಾಮಾನ್ಯ ವಾಣಿಜ್ಯ ಬಂದರುಗಳು ಇನ್ನೂ ಸಾಮಾನ್ಯವಾಗಿ ಕಾರ್ಯನಿರ್ವಹಿಸುತ್ತಿವೆ. ಸ್ಫೋಟಕಗಳನ್ನು ತುಂಬಿದ ದೋಣಿಗಳು ತೈಲವನ್ನು ಲೋಡ್ ಮಾಡಿದ ನಂತರ ಬಸ್ರಾ ಪ್ರಾಂತ್ಯದ ಉಮ್ ಖಾಸರ್ ಬಂದರಿನಿಂದ ಹೊರಟ ಎರಡು ಕಚ್ಚಾ ತೈಲ ಟ್ಯಾಂಕರ್ಗಳನ್ನು ಗುರಿಯಾಗಿಸಿಕೊಂಡ ನಂತರ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
