ಜಿ7 ಶೃಂಗಸಭೆಯಲ್ಲಿ ಮತ್ತೆ ಸದ್ದು ಮಾಡಿದ ‘ಮೆಲೋಡಿ’ ಜೋಡಿ; "ಇನ್ಸ್ಟಾಗ್ರಾಂ ಫೇವರೆಟ್ ಕಪಲ್‌" ಎಂದ ಮೆಲೋನಿ!

ಪ್ಯಾರಿಸ್‌: ಫ್ರಾನ್ಸ್‌ನ ಎವಿಯನ್-ಲೆ-ಬೆನ್ಸ್ನಲ್ಲಿ ನಡೆದ ಜಿ7 (Group of Seven - G7) ರಾಷ್ಟ್ರಗಳ ನಾಯಕರ ಸಭೆಯಲ್ಲಿ ಜಾಗತಿಕ ಸವಾಲುಗಳು ಉಕ್ರೇನ್‌ಗೆ ಬೆಂಬಲ ಹಾಗೂ ಅಮೆರಿಕಾ–ಇರಾನ್ ಒಪ್ಪಂದ (US–Iran Deal) ಕುರಿತು ಚರ್ಚೆಗಳು ನಡೆದವು. ಇದೇ ವೇಳೆ ಪ್ರಧಾನಿ ನರೇಂದ್ರ ಮೋದಿ (Prime Minister Narendra Modi) ಮತ್ತು ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ (Giorgia Meloni) ನಡುವಿನ ಸ್ನೇಹಪೂರ್ಣ ಮಾತುಕತೆ ಸಾಮಾಜಿಕ ಜಾಲತಾಣಗಳಲ್ಲಿ ಮತ್ತೆ ‘ಮೆಲೋಡಿ’ ಟ್ರೆಂಡ್ (Melodi Trend) ಗೆ ಕಾರಣವಾಗಿದೆ.

ವೈರಲ್ ಆಗಿರುವ ವಿಡಿಯೋದಲ್ಲಿ, ಗುಂಪು ಫೋಟೋಗೆ ನಿಲ್ಲುವ ಮೊದಲು ಪ್ರಧಾನಿ ಮೋದಿ ಮತ್ತು ಮೆಲೋನಿ ಪರಸ್ಪರ ಕೈಕುಲುಕಿ ಶುಭಾಶಯ ವಿನಿಮಯ ಮಾಡಿಕೊಳ್ಳುವ ದೃಶ್ಯ ಕಂಡುಬರುತ್ತದೆ. ಮಾತುಕತೆಯ ವೇಳೆ ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಜನಪ್ರಿಯತೆಯ ಬಗ್ಗೆ ಮೋದಿ ಉಲ್ಲೇಖಿಸಿದಂತೆ ಕಂಡುಬಂದರೆ, ಅದಕ್ಕೆ ಪ್ರತಿಕ್ರಿಯಿಸಿದ ಮೆಲೋನಿ, “ಹೌದು, ನಾವು ಇನ್‌ಸ್ಟಾಗ್ರಾಂನಲ್ಲಿ ಅತ್ಯಂತ ಪ್ರಸಿದ್ಧ ಜೋಡಿ” ಎಂದು ಹೇಳಿರುವುದು ಗಮನ ಸೆಳೆದಿದೆ.

‘ಮೆಲೋಡಿ’ಗೆ ಸಿಹಿ ಟ್ವಿಸ್ಟ್

ಕಳೆದ ತಿಂಗಳು ರೋಮ್ ಪ್ರವಾಸದ ವೇಳೆ ಪ್ರಧಾನಿ ಮೋದಿ, ‘ಮೆಲೋಡಿ’ ಟ್ರೆಂಡ್‌ಗೆ ಉಲ್ಲೇಖವಾಗಿ ಮೆಲೋನಿಗೆ ಭಾರತದ ಪ್ರಸಿದ್ಧ ‘Melody’ ಟಾಫಿಯ ಪ್ಯಾಕೆಟ್ ಉಡುಗೊರೆಯಾಗಿ ನೀಡಿದ್ದರು. ಈ ಸಂದರ್ಭದ ವಿಡಿಯೋವನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿದ್ದ ಮೆಲೋನಿ, “Thank you for the gift” ಎಂದು ಬರೆದುಕೊಂಡಿದ್ದರು.

ವಿಡಿಯೋದಲ್ಲಿ ಮೆಲೋನಿ, “ಪ್ರಧಾನಿ ಮೋದಿ ನನಗೆ ತುಂಬಾ ಒಳ್ಳೆಯ ಟಾಫಿಯನ್ನು ಉಡುಗೊರೆಯಾಗಿ ತಂದಿದ್ದಾರೆ” ಎಂದು ಹೇಳಿದರೆ, ಅದಕ್ಕೆ ಮೋದಿ “Melody” ಎಂದು ಪ್ರತಿಕ್ರಿಯಿಸಿದ್ದರು. ಈ ದೃಶ್ಯ ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗಿತ್ತು.

‘ಮೆಲೋಡಿ’ ಡಿಪ್ಲೊಮಸಿ ಎಂದರೇನು?

2023ರಲ್ಲಿ ನಡೆದ ದ್ವಿಪಕ್ಷೀಯ ಭೇಟಿಯ ಬಳಿಕ ಮೋದಿ ಮತ್ತು ಮೆಲೋನಿ ಹೆಸರಿನ ಸಂಯೋಜನೆಯಾದ ‘Melodi’ ಎಂಬ ಪದ ಸಾಮಾಜಿಕ ಜಾಲತಾಣಗಳಲ್ಲಿ ಹುಟ್ಟಿಕೊಂಡಿತ್ತು. ಇಬ್ಬರು ನಾಯಕರ ಸ್ನೇಹಪೂರ್ಣ ಕ್ಷಣಗಳು, ಸೆಲ್ಫಿಗಳು ಹಾಗೂ ಅನೌಪಚಾರಿಕ ಸಂಭಾಷಣೆಗಳು ನೆಟ್ಟಿಗರ ಗಮನ ಸೆಳೆದಿದ್ದವು.

2024ರಲ್ಲಿ ಮೆಲೋನಿ, ಮೋದಿ ಜೊತೆಗಿನ ಸೆಲ್ಫಿಯನ್ನು ಹಂಚಿಕೊಂಡು “Hi friends, from #Melodi” ಎಂದು ಪೋಸ್ಟ್ ಮಾಡಿದ್ದರು. ಬಳಿಕ 2025ರ ಜಿ7 ಶೃಂಗಸಭೆಯಲ್ಲೂ ಮೋದಿ ಜೊತೆಗಿನ ವಿಡಿಯೋ ಹಂಚಿಕೊಂಡು “Hello, from the Melodi team” ಎಂದು ಬರೆದು ಟ್ರೆಂಡ್‌ಗೆ ಮತ್ತಷ್ಟು ಬಲ ನೀಡಿದ್ದರು.

ಭಾರತ–ಇಟಲಿ ಸಂಬಂಧಕ್ಕೆ ಹೊಸ ಆಯಾಮ

‘ಮೆಲೋಡಿ’ ಎಂಬುದು ಕೇವಲ ಸಾಮಾಜಿಕ ಜಾಲತಾಣದ ಟ್ರೆಂಡ್ ಮಾತ್ರವಲ್ಲ. ಭಾರತ ಮತ್ತು ಇಟಲಿ ನಡುವಿನ ಬಲಿಷ್ಠ ರಾಜತಾಂತ್ರಿಕ ಸಂಬಂಧಗಳ ಪ್ರತೀಕವಾಗಿಯೂ ಇದು ಕಾಣಲಾಗುತ್ತಿದೆ. ಭಾರತ–ಮಧ್ಯಪ್ರಾಚ್ಯ–ಯುರೋಪ್ ಆರ್ಥಿಕ ಕಾರಿಡಾರ್ (IMEC) ಯೋಜನೆಯಲ್ಲಿ ಇಟಲಿ ಪ್ರಮುಖ ಪಾಲುದಾರ ರಾಷ್ಟ್ರವಾಗಿದೆ.

ಪ್ರಸ್ತುತ ಭಾರತ–ಇಟಲಿ ನಡುವಿನ ದ್ವಿಪಕ್ಷೀಯ ವ್ಯಾಪಾರ ವಹಿವಾಟು 16.77 ಬಿಲಿಯನ್ ಡಾಲರ್‌ಗಳನ್ನು ಮೀರಿದ್ದು, ಉಭಯ ರಾಷ್ಟ್ರಗಳ ಸಹಕಾರ ಮತ್ತಷ್ಟು ಬಲವಾಗುತ್ತಿದೆ.