ವಿಡಿಯೋ ಫೋಟೋ ಗ್ಯಾಲರಿ ಫ್ಯಾಷನ್​ ಕ್ರೈಂ ಧಾರ್ಮಿಕ ವಿಶ್ವವಾಣಿ ಪ್ರಾಪರ್ಟಿ ಪ್ರವಾಸಿ ಪ್ರಪಂಚ ವಿದೇಶ ಸಂಪಾದಕೀಯ ಉದ್ಯೋಗ
Ad

ಹೀಗೆ ಮಾಡಿದರೆ ಅನಗತ್ಯ ಟೆಸ್ಟ್‌, ಶಸ್ತ್ರಚಿಕಿತ್ಸೆಯ ಭಯವೇ ಇರಲ್ಲ! ಆರೋಗ್ಯ ಕ್ಷೇತ್ರದ ಸುಧಾರಣೆಗೆ ಮಹತ್ವದ ಸಲಹೆ ನೀಡಿದ ದಿಗ್ಗಜ ಉದ್ಯಮಿ

ವೈದ್ಯರ ಆದಾಯವು ಅವರು ಮಾಡುವ ಪರೀಕ್ಷೆಗಳು, ಸ್ಕ್ಯಾನಿಂಗ್ ಮತ್ತು ಶಸ್ತ್ರಚಿಕಿತ್ಸೆಗಳ ಸಂಖ್ಯೆಯನ್ನು ಅವಲಂಬಿಸಿರುವುದರಿಂದ ಸಹಜವಾಗಿಯೇ ಹೆಚ್ಚಿನ ಚಿಕಿತ್ಸೆಗಳತ್ತ ನಿರ್ಧಾರಗಳು ವಾಲುತ್ತವೆ; ಇದು ನೈತಿಕ ದೋಷವಲ್ಲ, ಬದಲಿಗೆ ಆದಾಯದ ಲೆಕ್ಕಾಚಾರದ ಪರಿಣಾಮವಾಗಿದೆ ಎಂದ ಅವರು, “ಬಹುತೇಕ ವೈದ್ಯರು ಪ್ರಾಮಾಣಿಕರಾಗಿದ್ದರೂ, ಶೇ. 2ರಿಂದ 5ರಷ್ಟು ಮಂದಿ ಹೆಚ್ಚುವರಿ ಹಣದ ಆಸೆಗೆ ಒಳಗಾದರೂ ಅನಾವಶ್ಯಕ ಚಿಕಿತ್ಸೆಗಳ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಹೆಚ್ಚುತ್ತದೆ,” ಎಂದರು.

ಹೀಗೆ ಮಾಡಿದರೆ ಅನಗತ್ಯ ಟೆಸ್ಟ್‌, ಶಸ್ತ್ರಚಿಕಿತ್ಸೆಯ ಭಯವೇ ಇರಲ್ಲ!

-

Profile
Ashok Nayak Nov 19, 2026 9:24 PM

ಬೆಂಗಳೂರು: ಖಾಸಗಿ ಆಸ್ಪತ್ರೆಗಳು ವೈದ್ಯರನ್ನು ಪ್ರತಿ ತಪಾಸಣೆ ಅಥವಾ ಶಸ್ತ್ರಚಿಕಿತ್ಸೆಗೆ ಹಣ ಪಡೆಯುವ ಗುತ್ತಿಗೆದಾರರಂತೆ ಪರಿಗಣಿಸುವ ಬದಲು, ಸಂಸ್ಥೆಯಲ್ಲಿ ಪಾಲುದಾರಿಕೆ ಹೊಂದಿರುವ ಪೂರ್ಣಾವಧಿ ವೇತನದಾರ ಉದ್ಯೋಗಿಗಳನ್ನಾಗಿ ನೇಮಿಸಿಕೊಳ್ಳಬೇಕು ಎಂದು ದಿಗ್ಗಜ ಉದ್ಯಮಿ, ಹ್ಯಾಪಿಯೆಸ್ಟ್ ಹೆಲ್ತ್ ಅಧ್ಯಕ್ಷ ಹಾಗೂ ಮುಖ್ಯ ಕಾರ್ಯತಂತ್ರ ಅಧಿಕಾರಿ ಅಶೋಕ್ ಸೂತಾ ಪ್ರತಿಪಾದಿಸಿದ್ದಾರೆ. ಬೆಂಗಳೂರಿನ ಸೇಂಟ್ ಜಾನ್ಸ್ ಆಡಿಟೋರಿಯಂನಲ್ಲಿ ಗುರುವಾರ ನಡೆದ ಎರಡು ದಿನಗಳ ‘ರೀಇಮ್ಯಾಜಿನಿಂಗ್ ಆ್ಯಂಡ್ ರೀಫಾರ್ಮಿಂಗ್ ಹೆಲ್ತ್‌ಕೇರ್ ಇನ್ ಇಂಡಿಯಾ’ ಶೃಂಗಸಭೆ ಯಲ್ಲಿ ಮಾತನಾಡಿದರು.

ರೋಗಿಗಳ ಸುರಕ್ಷತೆ ಮತ್ತು ಆರೈಕೆಯಲ್ಲಿ ವೈದ್ಯರೇ ಅತ್ಯಂತ ಪ್ರಮುಖರಾಗಿದ್ದರೂ, ಬಹುತೇಕ ಖಾಸಗಿ ಆಸ್ಪತ್ರೆಗಳಲ್ಲಿ ಅವರನ್ನು ಮಾತ್ರ ಗುತ್ತಿಗೆದಾರರಂತೆ ನಡೆಸಿಕೊಳ್ಳಲಾಗುತ್ತಿದೆ ಎಂದು ಸೂತಾ ಹೇಳಿದರು.

ವೈದ್ಯರ ಆದಾಯವು ಅವರು ಮಾಡುವ ಪರೀಕ್ಷೆಗಳು, ಸ್ಕ್ಯಾನಿಂಗ್ ಮತ್ತು ಶಸ್ತ್ರಚಿಕಿತ್ಸೆಗಳ ಸಂಖ್ಯೆಯನ್ನು ಅವಲಂಬಿಸಿರುವುದರಿಂದ ಸಹಜವಾಗಿಯೇ ಹೆಚ್ಚಿನ ಚಿಕಿತ್ಸೆಗಳತ್ತ ನಿರ್ಧಾರಗಳು ವಾಲುತ್ತವೆ; ಇದು ನೈತಿಕ ದೋಷವಲ್ಲ, ಬದಲಿಗೆ ಆದಾಯದ ಲೆಕ್ಕಾಚಾರದ ಪರಿಣಾಮವಾಗಿದೆ ಎಂದ ಅವರು, “ಬಹುತೇಕ ವೈದ್ಯರು ಪ್ರಾಮಾಣಿಕರಾಗಿದ್ದರೂ, ಶೇ. 2ರಿಂದ 5ರಷ್ಟು ಮಂದಿ ಹೆಚ್ಚುವರಿ ಹಣದ ಆಸೆಗೆ ಒಳಗಾದರೂ ಅನಾವಶ್ಯಕ ಚಿಕಿತ್ಸೆಗಳ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಹೆಚ್ಚುತ್ತದೆ,” ಎಂದರು.

ಇದನ್ನೂ ಓದಿ: Health Tips: ಮಹಿಳೆಯರಿಗೆ ಫ್ರೊಟೀನ್ ಆಹಾರ ಏಕೆ ಅಗತ್ಯ!

ಸುಮಾರು ನಾಲ್ಕು ವರ್ಷಗಳ ಹಿಂದೆ ತಮ್ಮನ್ನು ಪರೀಕ್ಷಿಸದೆಯೇ ಹೃದ್ರೋಗ ತಜ್ಞರೊಬ್ಬರು ಸಿಟಿ ಆ್ಯಂಜಿಯೋಗ್ರಾಮ್ ವರದಿ ನೋಡಿ ಶೇ. 50ರಷ್ಟು ಬ್ಲಾಕೇಜ್ ಇದೆ, ತುರ್ತು ಶಸ್ತ್ರಚಿಕಿತ್ಸೆ ಬೇಕು ಎಂದಿದ್ದನ್ನು ಸ್ಮರಿಸಿದ ಅವರು, ಎರಡನೇ ಅಭಿಪ್ರಾಯ ಪಡೆದಾಗ ಅದು ಸಣ್ಣ ರಕ್ತನಾಳದಲ್ಲಷ್ಟೇ ಇತ್ತು ಎಂಬುದು ತಿಳಿದು ಸ್ಟ್ರೆಸ್ ಟೆಸ್ಟ್‌ನಲ್ಲಿ ಸಾಮಾನ್ಯ ವರದಿ ಬಂದಿತ್ತು ಎಂದು ತಮ್ಮ ಕಹಿ ಅನುಭವ ಹಂಚಿಕೊಂಡರು.

ಗುತ್ತಿಗೆದಾರರಾಗಿದ್ದಾಗ ವೈದ್ಯರ ತೆರಿಗೆ ಪ್ರಮಾಣ ಶೇ. 20ರ ಆಸುಪಾಸಿನಲ್ಲಿದ್ದರೆ, ಉದ್ಯೋಗಿಗಳಾದರೆ ಶೇ. 35ರಷ್ಟಾಗುತ್ತದೆ. ಈ ತೆರಿಗೆ ಹೊರೆಯನ್ನು ಸರಿದೂಗಿಸಲು ಹ್ಯಾಪಿಯೆಸ್ಟ್ ಹೆಲ್ತ್ ತನ್ನ ಎಲ್ಲಾ ವೈದ್ಯರಿಗೆ ಪೂರ್ಣಾವಧಿ ವೇತನ, ಸಂಸ್ಥೆಯಲ್ಲಿ ಷೇರು ಪಾಲು ಹಾಗೂ ಹಿಂದಿನ ವೇತನಕ್ಕಿಂತ ಶೇ. 20ರಿಂದ 40ರಷ್ಟು ಹೆಚ್ಚು ಸಂಬಳ ನೀಡುತ್ತಿದೆ; ಇದರಿಂದ ಕಂಪನಿಯ ಲಾಭಾಂಶ ಕಡಿಮೆ ಯಾದರೂ ಚಿಂತೆಯಿಲ್ಲ ಎಂದು ಸೂತಾ ಸ್ಪಷ್ಟಪಡಿಸಿದರು.

Happiesnt Health

ವಿಮೆ ವ್ಯವಸ್ಥೆಯ ಬದಲಾವಣೆಗೆ ಆಗ್ರಹ: ಇನ್ನು ಆರೋಗ್ಯ ವಿಮೆಯು ಸ್ಕ್ಯಾನಿಂಗ್ ಮತ್ತು ಹೊರರೋಗಿ ಪರೀಕ್ಷೆಗಳಿಗೆ ದುಬಾರಿ ಹೆಚ್ಚುವರಿ ಪ್ರೀಮಿಯಂ ವಿಧಿಸುವ ಮೂಲಕ ಆರಂಭಿಕ ರೋಗ ಪತ್ತೆಗೆ ಅಡ್ಡಿಯಾಗುತ್ತಿದೆ ಎಂದ ಅವರು, ಪೂರ್ಣ ದೇಹದ ತಪಾಸಣೆ ಹೊರತುಪಡಿಸಿ ವೈದ್ಯರು ಶಿಫಾರಸು ಮಾಡುವ ಪರೀಕ್ಷೆಗಳಿಗೂ ಒಂದೇ ಪ್ರೀಮಿಯಂನಲ್ಲಿ ವಿಮೆ ಸಿಗುವಂತಾಗಬೇಕು ಹಾಗೂ ಕಾರ್ಪೊರೇಟ್ ಕಂಪನಿಗಳು ವಿಮಾ ಸಂಸ್ಥೆಗಳಿಂದ ಇಂತಹ ಪಾಲಿಸಿಗಳನ್ನು ಕೇಳಿ ಪಡೆಯಬೇಕು ಎಂದು ಸಲಹೆ ನೀಡಿದರು.

2027ರ ಮೇ 13ರಿಂದ ಸಂಪೂರ್ಣವಾಗಿ ಜಾರಿಗೆ ಬರಲಿರುವ ಡಿಜಿಟಲ್ ವೈಯಕ್ತಿಕ ದತ್ತಾಂಶ ಸಂರಕ್ಷಣಾ (ಡಿಪಿಡಿಪಿ) ನಿಯಮಗಳ ಪಾಲನೆಯು ಮೂಲಭೂತ ಅಗತ್ಯವಾಗಿದ್ದು, ಇದಕ್ಕೆ ಸಿದ್ಧತೆ ಮಾಡಿಕೊಳ್ಳದ ಸಂಸ್ಥೆಗಳು ಶೀಘ್ರದಲ್ಲೇ ದೊಡ್ಡ ಸಂಕಷ್ಟಕ್ಕೆ ಸಿಲುಕಲಿವೆ ಎಂದು ಎಚ್ಚರಿಸಿದ ಸೂತಾ, ಎಐ ಏಜೆಂಟ್‌ಗಳು ಮತ್ತು ಕ್ವಾಂಟಮ್ ಕಂಪ್ಯೂಟಿಂಗ್ ಭದ್ರತಾ ವ್ಯವಸ್ಥೆಗೆ ಸವಾಲು ಒಡ್ಡುವ ಮುನ್ನವೇ ಕಾನೂನಿಗಿಂತ ವೇಗವಾಗಿ ಹೆಜ್ಜೆ ಇಡಬೇಕು ಎಂದರು.

ಇದೇ ವೇಳೆ ಮಾತನಾಡಿದ ಹ್ಯಾಪಿಯೆಸ್ಟ್‌ ಹೆಲ್ತ್‌ನ ಸಿಟಿಒ ಸಿಟಿಒ ಮೈಥಿಲಿ ಕಂದುಲ, ರೋಗಿಗಳು ತಮ್ಮ ವೈಯಕ್ತಿಕ ದತ್ತಾಂಶದ ಬಳಕೆಯನ್ನು ನಿಯಂತ್ರಿಸಲು ಒಪ್ಪಿಗೆ ನಿರ್ವಹಣಾ ವೇದಿಕೆಯನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ತಿಳಿಸಿದರು.

ಹ್ಯಾಪಿಯೆಸ್ಟ್ ಹೆಲ್ತ್ ನವೆಂಬರ್ 12ರಂದು ‘ಹ್ಯಾಪಿಯೆಸ್ಟ್ ಡಿಜಿಟಲ್ ಹೆಲ್ತ್’ ಘಟಕ ಆರಂಭಿಸಿದ್ದು, ಮುಂದಿನ 5 ವರ್ಷಗಳಲ್ಲಿ 500 ಕೋಟಿ ರೂ. ಹೂಡಿಕೆಯೊಂದಿಗೆ 18 ತಿಂಗಳಲ್ಲಿ 11 ಆ್ಯಪ್‌ಗಳನ್ನು ತರಲಿದೆ. ಜೊತೆಗೆ ರೋಗಿಗಳ ಆರೋಗ್ಯ ಇತಿಹಾಸ ತಿಳಿದಿರುವ ‘ವೈಯಕ್ತಿಕ ವೈದ್ಯರ’ ಮಾದರಿ ಹಾಗೂ ‘ಅತಿಥಿ ಮಿತ್ರ’ ಆರೈಕೆ ವ್ಯವಸ್ಥೆಯನ್ನೂ ಪರಿಚಯಿಸುತ್ತಿದೆ.

ನೈತಿಕ ಚಿಕಿತ್ಸೆ ಮತ್ತು ಫಲಿತಾಂಶ ಆಧಾರಿತ ಆರೋಗ್ಯ ವ್ಯವಸ್ಥೆಯ ಕುರಿತ ಗೋಷ್ಠಿಯಲ್ಲಿ ಆಸ್ತ್ರಿಕಾ ಮಿಡ್‌ವೈಫರಿ ಸೆಂಟರ್‌ನ ಡಾ. ಜಾಹ್ನವಿ ನಿಲೇಕಣಿ, ವೈಸಾ ಸಂಸ್ಥಾಪಕಿ ಜೋ ಅಗರ್ವಾಲ್ ಹಾಗೂ ಈವನ್ ಹಾಸ್ಪಿಟಲ್ಸ್‌ನ ಡಾ. ಚಂದ್ರಿಕಾ ಕಂಬಂ ಪಾಲ್ಗೊಂಡಿದ್ದರು.

ಶೃಂಗಸಭೆಯಲ್ಲಿ ಡಾ. ದೇವಿ ಶೆಟ್ಟಿ, ನಚಿಕೇತ್ ಮೋರ್ ಮತ್ತು ಶರದ್ ಶರ್ಮಾ ಸೇರಿದಂತೆ ಹಲವು ತಜ್ಞರು ಭಾಗವಹಿಸಿದ್ದರು.

ಬೆಂಗಳೂರಿನ ಇಂದಿರಾನಗರ, ವೈಟ್‌ಫೀಲ್ಡ್, ಜಯನಗರ ಹಾಗೂ ಕೋರಮಂಗಲದಲ್ಲಿ ಆಸ್ಪತ್ರೆ-ರಹಿತ ವಿಶೇಷ ಚಿಕಿತ್ಸಾ ಕೇಂದ್ರಗಳನ್ನು ಹೊಂದಿರುವ ಹ್ಯಾಪಿಯೆಸ್ಟ್ ಹೆಲ್ತ್, ಶೀಘ್ರದಲ್ಲೇ ಜೆ.ಪಿ. ನಗರದಲ್ಲಿ ಸರ್ಜಿಕಲ್ ಸ್ಪೆಷಾಲಿಟಿ ಸೆಂಟರ್ ಮತ್ತು ಕೋರಮಂಗಲದಲ್ಲಿ ನರರೋಗ-ಮನೋ ವಿಜ್ಞಾನದ ‘ಬ್ರೇನ್‌ಸ್ಪಿಯರ್’ ಕೇಂದ್ರವನ್ನು ಆರಂಭಿಸಲಿದೆ.