18ನೇ ವಯಸ್ಸಿನಲ್ಲೇ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದ ಜಾನಕಮ್ಮ; ಗಾನ ಕೋಗಿಲೆಗೆ ಪತಿ ರಾಮ್‌ ಪ್ರಸಾದ್‌ ನೀಡಿದ ಬೆಂಬಲ ಹೀಗಿತ್ತು

ಗಾನ ಕೋಗಿಲೆ ಎಸ್. ಜಾನಕಿ ಅವರು ಭಾರತೀಯ ಚಿತ್ರರಂಗದಲ್ಲಿ ಮಹಾನ್ ಗಾಯಕಿಯಾಗಿ ಬೆಳಗಿದವರು. ಜಾನಕಮ್ಮ ತಮ್ಮ ಸುಮಧುರ ಗಾಯನವನ್ನು ಹೇಗೆ ತಮ್ಮ ಉಸಿರಾಗಿಸಿಕೊಂಡಿದ್ದರೋ, ಅದೇ ರೀತಿ ಜಾನಕಿ ಅವರನ್ನು ತಮ್ಮ ಇಡೀ ಜೀವನದ ಉಸಿರಾಗಿಸಿಕೊಂಡಿದ್ದವರು ಅವರ ಪತಿ ವಿ. ರಾಮ್ ಪ್ರಸಾದ್. ಮೊದಲ ನೋಟದಲ್ಲೇ ಆರಂಭವಾದ ಇವರ ಪ್ರೀತಿ, ಆನಂತರ ಸ್ನೇಹಕ್ಕೆ ತಿರುಗಿ ವೈವಾಹಿಕ ಜೀವನದ ಮೈಲಿಗಲ್ಲನ್ನು ತಲುಪಿತು. ಅಂದಿನಿಂದ ಹಿಡಿದು ತಮ್ಮ ಜೀವನದ ಕೊನೆಯ ಉಸಿರಿರುವವರೆಗೂ ಜಾನಕಮ್ಮನಿಗೆ ಹೆಗಲಿಗೆ ಹೆಗಲಾಗಿ, ನೆರಳಿನಂತೆ ಜೊತೆಯಾಗಿ ನಿಂತವರು ರಾಮ್‌ ಪ್ರಸಾದ್.

ಜಾನಕಿಯ ಪ್ರತಿಭೆಗೆ ಫಿದಾ ಆಗಿದ್ದ 'ರಾಮು'

ಎಸ್. ಜಾನಕಿ ಅವರು ಬಾಲ್ಯದಿಂದಲೇ ಅಪ್ರತಿಮ ಪ್ರತಿಭೆ. ಅವರು ವೇದಿಕೆಯೊಂದರಲ್ಲಿ ಹಾಡುತ್ತಿದ್ದಾಗ, ಮೊದಲ ಬಾರಿಗೆ ರಾಮಪ್ರಸಾದ್ ಅವರು ಆಕೆಯ ದಿವ್ಯ ಕಂಠವನ್ನು ಕೇಳಿದ್ದರು. ಆ ಮೊದಲ ಭೇಟಿಯಲ್ಲೇ ಜಾನಕಮ್ಮನ ಧ್ವನಿಗೆ ವಿ. ರಾಮ್‌ ಪ್ರಸಾದ್ ಸಂಪೂರ್ಣವಾಗಿ ಮನಸೋತಿದ್ದರು. ತದನಂತರ ರಾಮಪ್ರಸಾದ್ ಅವರ ತಂದೆಯ ಮೂಲಕ ಇಬ್ಬರ ನಡುವೆ ಔಪಚಾರಿಕ ಪರಿಚಯ ಏರ್ಪಟ್ಟು, ಆ ಪರಿಚಯ ಗಾಢವಾದ ಸ್ನೇಹವಾಗಿ ಬೆಳೆಯಿತು. ಈ ಪವಿತ್ರ ಬಾಂಧವ್ಯವೇ ಮುಂದೆ ಇಬ್ಬರನ್ನು ದಾಂಪತ್ಯ ಜೀವನದ ಕಡೆಗೆ ಮುನ್ನಡೆಸಿತು.

18ರ ಹರೆಯದಲ್ಲೇ ಶುರುವಾದ ದಾಂಪತ್ಯ

1956ರಲ್ಲಿ ಜಾನಕಿ ಮತ್ತು ರಾಮ್‌ ಪ್ರಸಾದ್‌ ಮದುವೆ ಆಯಿತು. ಆಗಿನ್ನೂ ಜಾನಕಮ್ಮಗೆ 18 ವರ್ಷ ವಯಸ್ಸು. ಮದುವೆಯಾದ ಹೊಸತರಲ್ಲಿ ರಾಮ್ ಪ್ರಸಾದ್ ಅವರು ಜಾನಕಿ ಅವರಲ್ಲಿದ್ದ ಗಾಯನ ಪ್ರತಿಭೆಯನ್ನು ಜಗತ್ತಿಗೆ ಪರಿಚಯಿಸಲು ಶ್ರಮಿಸಿದರು. ಎವಿಎಂ ಸ್ಟುಡಿಯೋಗೆ ಜಾನಕಿ ಅವರ ಗಾಯನ ಕೌಶಲ್ಯದ ಬಗ್ಗೆ ಪತ್ರ ಬರೆಸಿದರು. ಅವರಿಗೆ ಅವಕಾಶ ಸಿಗುವಂತೆ ನೋಡಿಕೊಂಡರು. ವಿವಾಹವಾದ ಕೇವಲ ಒಂದು ವರ್ಷದ ಅವಧಿಯಲ್ಲಿ, ಅಂದರೆ 1957ರಲ್ಲಿ ಜಾನಕಿ ಅವರಿಗೆ ಮೊದಲ ಬಾರಿಗೆ ಹಿನ್ನೆಲೆ ಗಾಯಕಿಯಾಗಿ ಹಾಡುವ ಅವಕಾಶ ಪಡೆದುಕೊಂಡರು. ಅಲ್ಲಿಂದ ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ಜಾನಕಮ್ಮನ ಯುಗ ಆರಂಭವಾಯಿತು.

"ನನ್ನನ್ನು ಒಂದು ಕ್ಷಣವೂ ಒಬ್ಬಳನ್ನೇ ಬಿಡುತ್ತಿರಲಿಲ್ಲ..."

ತಮ್ಮ ಪತಿಯನ್ನು ಜಾನಕಮ್ಮ ಪ್ರೀತಿಯಿಂದ 'ರಾಮು' ಎಂದೇ ಕರೆಯುತ್ತಿದ್ದರು. ರಾಮು ಅವರು ತಮ್ಮ ಇಡೀ ಬದುಕನ್ನು ಪತ್ನಿಯ ಸಂಗೀತ ಸಾಧನೆಗಾಗಿ ಧಾರೆಯೆರೆದಿದ್ದರು. ಸಿನಿಮಾ ಹಾಡುಗಳ ರೆಕಾರ್ಡಿಂಗ್‌ನ ಪ್ರತಿ ಸೆಷನ್‌ಗೂ ಅವರು ಜಾನಕಿ ಅವರ ಜೊತೆಗೇ ನೆರಳಿನಂತೆ ಸಾಗುತ್ತಿದ್ದರು.

ಹುಟ್ಟಿದ್ದು ಆಂಧ್ರ ಪ್ರದೇಶದಲ್ಲಾದರೂ ನೆಲೆಸಿದ್ದು ಕರುನಾಡಲ್ಲಿ; ಕನ್ನಡ ಚಿತ್ರ ಸಂಗೀತಕ್ಕೆ ಗಾನ ಕೋಗಿಲೆ ಜಾನಕಿ ಕೊಡುಗೆಯ ಮೆಲುಕು

ತಮ್ಮ ಪತಿಯ ಪ್ರೀತಿಯನ್ನು ಸಂದರ್ಶನವೊಂದರಲ್ಲಿ ನೆನಪಿಸಿಕೊಂಡಿದ್ದ ಜಾನಕಮ್ಮ, "ರಾಮು ಅವರು ನನ್ನ ಸಂಗೀತಕ್ಕೆ ಸಂಪೂರ್ಣವಾಗಿ ಹುಚ್ಚರಾಗಿದ್ದರು. ರೆಕಾರ್ಡಿಂಗ್ ಸಮಯದಲ್ಲೂ ನನ್ನನ್ನು ಎಲ್ಲೂ ಒಬ್ಬಳನ್ನೇ ಬಿಡುತ್ತಿರಲಿಲ್ಲ. ನನಗೂ ಅವರನ್ನು ಬಿಟ್ಟಿರಲು ಸಾಧ್ಯವಾಗುತ್ತಿರಲಿಲ್ಲ. ಅವರು ತಮ್ಮ ಇಡೀ ಜೀವನವನ್ನು ನನಗಾಗಿ ಮುಡಿಪಾಗಿಟ್ಟರು. ಅವರ ಆ ದೈವಿಕ ಬೆಂಬಲವಿಲ್ಲದಿದ್ದರೆ ನಾನು ಇಂದಿನ ಈ ಉನ್ನತ ಸ್ಥಾನಕ್ಕೆ ತಲುಪಲು ಸಾಧ್ಯವೇ ಇರಲಿಲ್ಲ" ಎಂದು ಭಾವುಕರಾಗಿದ್ದರು.

ಸಾವನ್ನೂ ಮೀರಿದ ಅಮರ ಪ್ರೇಮ ಬಾಂಧವ್ಯ

ರಾಮು ಮತ್ತು ಜಾನಕಿ ಅವರ ನಡುವಿನ ಸಂಬಂಧ ಕೇವಲ ಪತಿ-ಪತ್ನಿಯ ಚೌಕಟ್ಟಿಗೆ ಸೀಮಿತವಾಗಿರಲಿಲ್ಲ. ಅದು ಸ್ನೇಹ, ನಂಬಿಕೆ, ಪರಸ್ಪರ ಗೌರವ ಮತ್ತು ಅನನ್ಯ ಹೊಂದಾಣಿಕೆಯ ದಿವ್ಯ ಸಂಗಮವಾಗಿತ್ತು. ಜಾನಕಿ ಎಂಬ ಮಹಾನ್ ಗಾಯಕಿಯ ಯಶಸ್ಸಿನ ಹಿಂದಿನ ಬೆನ್ನೆಲುಬಾಗಿದ್ದ ರಾಮ್ ಪ್ರಸಾದ್ ಅವರು 1997ರಲ್ಲಿ ಇಹಲೋಕ ತ್ಯಜಿಸಿದರು.

ಗಾಯಕಿ ಎಸ್‌. ಜಾನಕಿ - ಎಸ್‌. ಪಿ. ಬಾಲಸುಬ್ರಹ್ಮಣ್ಯಂ ಬದುಕಿನಲ್ಲಿ ನಡೆದಿತ್ತು ಅದೊಂದು ಕಾಕತಾಳೀಯ ಘಟನೆ, ಇದ್ದವು ಹಲವು ಸಾಮ್ಯತೆಗಳು

ಪತಿ ದೂರವಾಗಿ ದಶಕಗಳೇ ಕಳೆದರೂ ಜಾನಕಮ್ಮ ಮಾತ್ರ ಅವರನ್ನು ತಮ್ಮ ಹೃದಯದಿಂದ ಒಂದು ಕ್ಷಣವೂ ದೂರ ಮಾಡಿರಲಿಲ್ಲ. "ಅವರು ಅಂದು ನನ್ನೊಂದಿಗಿದ್ದರು, ಇಂದು ನನ್ನೊಂದಿಗಿದ್ದಾರೆ ಮತ್ತು ಮುಂದೆಯೂ ನನ್ನ ಪ್ರತಿ ಆಲೋಚನೆ ಹಾಗೂ ಉಸಿರಿನಲ್ಲಿ ಜೀವಂತವಾಗಿರುತ್ತಾರೆ" ಎಂದು ಪತಿಯ ನೆನಪಿನಲ್ಲಿ ಜಾನಕಮ್ಮ ಸದಾ ಭಾವುಕರಾಗುತ್ತಿದ್ದರು. ಇಂದು ಗಾನಕೋಗಿಲೆ ಇಹಲೋಕ ತ್ಯಜಿಸಿದ್ದು, ಸ್ವರ್ಗದಲ್ಲಿ ಈ ಅಮರ ಜೋಡಿ ಮತ್ತೆ ಒಂದಾಗಿದೆ ಎಂದು ಅಭಿಮಾನಿಗಳು ಕಂಬನಿ ಮಿಡಿಯುತ್ತಿದ್ದಾರೆ.