Sonam Raghuvanshi: ಮೇಘಾಲಯ ಹತ್ಯೆ ಪ್ರಕರಣ: ಆರೋಪಿ ಸೋನಮ್ ರಘುವಂಶಿ ಗರ್ಭಿಣಿಯಲ್ಲ
ಮೇಘಾಲಯದಲ್ಲಿ ತನ್ನ ಪತಿ ರಾಜಾ ರಘುವಂಶಿ ಕೊಲೆ ಆರೋಪದ ಮುಖ್ಯ ಆರೋಪಿ ಸೋನಮ್ ರಘುವಂಶಿಯ ವೈದ್ಯಕೀಯ ಪರೀಕ್ಷೆಯಲ್ಲಿ ಆಕೆ ಗರ್ಭಿಣಿಯಲ್ಲ ಎನ್ನುವ ಅಂಶ ಬುಧವಾರ ಬೆಳಗ್ಗೆ ದೃಢಪಟ್ಟಿದೆ. ಶಿಲ್ಲಾಂಗ್ನ ಗಣೇಶ್ ದಾಸ್ ಆಸ್ಪತ್ರೆಯಲ್ಲಿ ಈ ಪರೀಕ್ಷೆ ನಡೆದಿದೆ. ಸೋನಮ್ ಪ್ರಸ್ತುತ ಮೇಘಾಲಯ ಪೊಲೀಸರ ಮೂರು ದಿನಗಳ ಟ್ರಾನ್ಸಿಟ್ ರಿಮ್ಯಾಂಡ್‌ನಲ್ಲಿದ್ದಾಳೆ.
Sushmitha Jain
Jun 11, 2025 6:31 PM
ಶಿಲ್ಲಾಂಗ್: ಮೇಘಾಲಯದಲ್ಲಿ (Meghalaya) ತನ್ನ ಪತಿ ರಾಜಾ ರಘುವಂಶಿ (Raja Raghuvanshi) ಕೊಲೆ ಆರೋಪದ ಮುಖ್ಯ ಆರೋಪಿಯಾದ ಸೋನಮ್ ರಘುವಂಶಿಯ (Sonam Raghuvanshi) ವೈದ್ಯಕೀಯ ಪರೀಕ್ಷೆಯಲ್ಲಿ ಆಕೆ ಗರ್ಭಿಣಿಯಲ್ಲ ಎಂದು ಬುಧವಾರ ಬೆಳಗ್ಗೆ ದೃಢಪಟ್ಟಿದೆ. ಶಿಲ್ಲಾಂಗ್ನ ಗಣೇಶ್ ದಾಸ್ ಆಸ್ಪತ್ರೆಯಲ್ಲಿ ಈ ಪರೀಕ್ಷೆ ನಡೆದಿದೆ. ಸೋನಮ್ ಪ್ರಸ್ತುತ ಮೇಘಾಲಯ ಪೊಲೀಸರ ಮೂರು ದಿನಗಳ ಟ್ರಾನ್ಸಿಟ್ ರಿಮ್ಯಾಂಡ್‌ನಲ್ಲಿದ್ದಾರೆ.
ಮಂಗಳವಾರ, ಮೇಘಾಲಯದ ಉಪ ಮುಖ್ಯಮಂತ್ರಿ ಪ್ರೆಸ್ಟನ್ ಟಿನ್‌ಸಾಂಗ್, ರಾಜಾ ರಘುವಂಶಿಯ ಕೊಲೆಯಲ್ಲಿ ಭಾಗಿಯಾದ ನಾಲ್ವರು ಆರೋಪಿಗಳನ್ನು ಶಿಲ್ಲಾಂಗ್‌ಗೆ ಕರೆತರಲಾಗುತ್ತಿದೆ ಎಂದು ತಿಳಿಸಿದ್ದರು. ರಾಜಾ ಮತ್ತು ಸೋನಮ್ ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಮೇ 10ರಂದು ವಿವಾಹವಾಗಿ, ಮೇ 20ರಂದು ಹನಿಮೂನ್‌ಗಾಗಿ ಮೇಘಾಲಯಕ್ಕೆ ಆಗಮಿಸಿದ್ದರು.
ಮೇ 23ರಂದು ದಂಪತಿ ಕಾಣೆಯಾದರು ಎಂದು ವರದಿಯಾಗಿ, ರಾಜ್ಯ ಪೊಲೀಸರು ಶೋಧ ಕಾರ್ಯ ಆರಂಭಿಸಿದರು. ಜೂನ್ 2ರಂದು ಚೆರಾಪುಂಜಿಯ ಕಂದಕದಲ್ಲಿ ಅಪರಿಚಿತ ಪುರುಷನ ಶವ ಪತ್ತೆಯಾಯಿತು. ಆ ಶವ ರಾಜಾ ಅವರದ್ದು ಎಂದು ದೃಢಪಟ್ಟು, ಆತನ ಚಿನ್ನದ ಸರ ಮತ್ತು ಉಂಗುರ ಕಾಣೆಯಾಗಿತ್ತು.
ಈ ಸುದ್ದಿಯನ್ನೂ ಓದಿ: Indore Couple Missing: ರೇನ್‌ ಕೋಟ್‌, ಶರ್ಟ್‌ನಿಂದ ಸಿಕ್ತು ಕೊಲೆಯ ಸುಳಿವು; ಹಂತಕರ ಬಂಧನ ಹೇಗಿತ್ತು?
ಸೋನಮ್‌ಗಾಗಿ ಶೋಧ ಮುಂದುವರಿಯಿತು. ಜೂನ್ 9ರಂದು ಉತ್ತರ ಪ್ರದೇಶದ ಘಾಜಿಪುರದಲ್ಲಿ ಆಕೆಯನ್ನು ಪತ್ತೆಹಚ್ಚಲಾಯಿತು. ಆಕೆ ಶರಣಾಗಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ. ಬಂಧನದ ವೇಳೆ, ಸೋನಮ್ ಯಾರೋ ನನ್ನನ್ನು ಅಪಹರಣ ಮಾಡಿ ಘಾಜಿಪುರದಲ್ಲಿ ಬಿಟ್ಟಿದ್ದಾರೆ ಎಂದು ಹೇಳಿದ್ದಾಳೆ. ಆಕೆ ತನ್ನ ಸಹೋದರನಿಗೆ ಕರೆ ಮಾಡಿ ತನ್ನ ಸ್ಥಳ ತಿಳಿಸಿದ್ದಳು.
ಘಾಜಿಪುರದ ಒಂದು ಅಂಗಡಿಯ ಕೆಲಸಗಾರ, ಸೋನಮ್ ರಾತ್ರಿ ವೇಳೆ ಬಂದು, ಕುಟುಂಬಕ್ಕೆ ಕರೆ ಮಾಡಲು ಮೊಬೈಲ್ ಕೇಳಿದ್ದು, ಅಳುತ್ತಿದ್ದಳು ಎಂದು ದೃಢಪಡಿಸಿದ್ದಾನೆ. ಈ ಪ್ರಕರಣದಲ್ಲಿ ಆಕಾಶ್ ರಜಪೂತ್‌, ವಿಶಾಲ್ ಸಿಂಗ್ ಚೌಹಾಣ್ ಮತ್ತು ಆನಂದ್‌ನನ್ನು ಬಂಧಿಸಲಾಗಿದೆ. ಸೋನಮ್‌ನ ಪ್ರಿಯಕರ ರಾಜ್ ಕುಶ್ವಾಹನನ್ನೂ ಅರೆಸ್ಟ್‌ ಮಾಡಲಾಗಿದೆ. ಆತ ಸೋನಮ್‌ನ ಕಚೇರಿಯಲ್ಲಿ ಅಕೌಂಟೆಂಟ್ ಕೆಲಸ ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಎಲ್ಲ ಆರೋಪಿಗಳು 20 ರಿಂದ 25 ವರ್ಷ ವಯಸ್ಸಿನವರು.