ಕೊಲೆ ಆರೋಪ ಹೊತ್ತ 105 ವರ್ಷದ ವೃದ್ಧನನ್ನು ಶಾಶ್ವತವಾಗಿ ಬಿಡುಗಡೆಗೊಳಿಸಿದ ಸುಪ್ರೀಂ ಕೋರ್ಟ್‌; ಏನಿದು ಪ್ರಕರಣ?

ನವದೆಹಲಿ, ಆ. 22: ಕೊಲೆ ಪ್ರಕರಣದ ಆರೋಪಿ 105 ವರ್ಷದ ವಯೋವೃದ್ಧ ರಸಿಕ್ ಚಂದ್ರ ಮಂಡಲ್ (Rasik Chandra Mondal) ಅವರಿಗೆ ಸುಪ್ರೀಂ ಕೋರ್ಟ್ (Supreme Court) ಮಾನವೀಯ ನೆಲೆಯಲ್ಲಿ ಮಹತ್ವದ ಪರಿಹಾರ ನೀಡಿದೆ. ಅತ್ಯಂತ ವೃದ್ಧಾಪ್ಯ ಮತ್ತು ಗಂಭೀರ ಆರೋಗ್ಯ ಸಮಸ್ಯೆಗಳನ್ನು ಪರಿಗಣಿಸಿ, ಅವರಿಗೆ ವಿಧಿಸಲಾಗಿದ್ದ ಜೀವಾವಧಿ ಶಿಕ್ಷೆಯಿಂದ ಅಕಾಲಿಕ ಬಿಡುಗಡೆ ನೀಡಲಾಗಿದೆ. ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ನೇತೃತ್ವದ ಮೂವರು ನ್ಯಾಯಮೂರ್ತಿಗಳ ಪೀಠವು ಶುಕ್ರವಾರ ಈ ಆದೇಶ ನೀಡಿದೆ. ನ್ಯಾಯಮೂರ್ತಿಗಳಾದ ಜೊಯ್ಮಲ್ಯ ಬಾಗ್ಚಿ ಮತ್ತು ವಿ. ಮೋಹನಾ ಪೀಠದಲ್ಲಿದ್ದರು.

ಪಶ್ಚಿಮ ಬಂಗಾಳದ ಮಾಲ್ದಾ ಜಿಲ್ಲೆಯ ರಸಿಕ್ ಚಂದ್ರ ಮಂಡಲ್ 1920ರಲ್ಲಿ ಜನಿಸಿದ್ದರು. 1988ರ ಕೊಲೆ ಪ್ರಕರಣದಲ್ಲಿ ಬಂಧಿತರಾಗಿದ್ದ ಅವರು, 1994ರ ಡಿಸೆಂಬರ್‌ನಲ್ಲಿ 68ನೇ ವಯಸ್ಸಿನಲ್ಲಿ ಅವರನ್ನು ದೋಷಿಯಾಗಿ ಪರಿಗಣಿಸಲಾಯಿತು. ಅವರ ವಿರುದ್ಧ ಐಪಿಸಿಯ ಸೆಕ್ಷನ್ 143, 448, 302 ಮತ್ತು 324ರ ಅಡಿಯಲ್ಲಿ ಪ್ರಕರಣ ದಾಖಲಾಗಿತ್ತು.

2018ರಲ್ಲಿ ಕಲ್ಕತ್ತಾ ಹೈಕೋರ್ಟ್‌ಗೆ ಸಲ್ಲಿಸಿದ್ದ ಮೇಲ್ಮನವಿ ತಿರಸ್ಕೃತಗೊಂಡಿತ್ತು. ಬಳಿಕ ಸುಪ್ರೀಂ ಕೋರ್ಟ್‌ನಲ್ಲಿಯೂ ಅವರ ಶಿಕ್ಷೆಗೆ ಸಂಬಂಧಿಸಿದ ಅರ್ಜಿಗೆ ಪರಿಹಾರ ದೊರಕಿರಲಿಲ್ಲ.

ನೀಟ್ ಪ್ರಶ್ನೆಪತ್ರಿಕೆ ಸೋರಿಕೆ ಖಂಡಿಸಿ ಪ್ರತಿಭಟನೆ: ಪೊಲೀಸ್ ದೌರ್ಜನ್ಯ ಆರೋಪ ತನಿಖೆಗೆ ಸುಪ್ರೀಂ ಕೋರ್ಟ್ ಉನ್ನತಾಧಿಕಾರ ಸಮಿತಿ

99ನೇ ವಯಸ್ಸಿನಲ್ಲಿ ಅಂದರೆ 2020ರಲ್ಲಿ ತಮ್ಮ ತೀವ್ರ ವೃದ್ಧಾಪ್ಯ ಮತ್ತು ಹದಗೆಟ್ಟ ಆರೋಗ್ಯವನ್ನು ಉಲ್ಲೇಖಿಸಿ ಮಂಡಲ್ ಅಕಾಲಿಕ ಬಿಡುಗಡೆಗಾಗಿ ಮತ್ತೆ ಸುಪ್ರೀಂ ಕೋರ್ಟ್ ಮೊರೆ ಹೋದರು. ಈ ಹಿನ್ನೆಲೆಯಲ್ಲಿ 2024ರ ನವೆಂಬರ್‌ನಲ್ಲಿ ಸುಪ್ರೀಂ ಕೋರ್ಟ್ ಅವರಿಗೆ ಮಧ್ಯಂತರ ಜಾಮೀನು/ಪರೋಲ್ ನೀಡಿತ್ತು. ಈಗ ನ್ಯಾಯಾಲಯ ಆ ಮಧ್ಯಂತರ ಆದೇಶವನ್ನು ಅಂತಿಮ ಮತ್ತು ಶಾಶ್ವತ ಎಂದು ಘೋಷಿಸಿದೆ. ಜೀವಾವಧಿ ಶಿಕ್ಷೆಯ ಅವಧಿ ಪೂರ್ಣಗೊಳ್ಳದಿದ್ದರೂ, ಮಂಡಲ್ ಅವರನ್ನು ಮತ್ತೆ ಬಂಧನಕ್ಕೆ ತೆಗೆದುಕೊಳ್ಳಬಾರದು ಎಂದು ಸುಪ್ರೀಂ ಕೋರ್ಟ್ ಸ್ಪಷ್ಟಪಡಿಸಿದೆ.

ಅತ್ಯಂತ ವೃದ್ಧಾಪ್ಯ, ಆರೋಗ್ಯ ಪರಿಸ್ಥಿತಿ ಮತ್ತು ಮಾನವೀಯ ಅಂಶಗಳನ್ನು ಪರಿಗಣಿಸಿ ತೆಗೆದುಕೊಳ್ಳಲಾದ ಈ ನಿರ್ಧಾರದಿಂದ, 105 ವರ್ಷದ ರಸಿಕ್ ಚಂದ್ರ ಮಂಡಲ್ ಉಳಿದ ಜೀವನವನ್ನು ಜೈಲಿನ ಹೊರಗೆ ಸ್ವತಂತ್ರವಾಗಿ ನಡೆಸಲು ಅವಕಾಶ ದೊರೆತಿದೆ.