ಭಾರತ ಕ್ರಿಕೆಟ್ ತಂಡದ ತವರು ಪಂದ್ಯಗಳ ಟೈಟಲ್ ಸ್ಪಾನ್ಸರ್ ಮುತ್ತೂಟ್ ಫಿನ್ಕಾರ್ಪ್!
ಮುತ್ತೂಟ್ ಫಿನ್ಕಾರ್ಪ್ ಸಂಸ್ಥೆ 2028ರ ಮಾರ್ಚ್ವರೆಗೆ ಭಾರತದಲ್ಲಿ ನಡೆಯುವ ಕ್ರಿಕೆಟ್ ಪಂದ್ಯಗಳಿಗೆ ಟೈಟಲ್ ಪ್ರಾಯೋಜಕರಾಗಿ ಆಯ್ಕೆಯಾಗಿದೆ. ಈ ಒಪ್ಪಂದದ ವ್ಯಾಪ್ತಿಯಲ್ಲಿ ಬಿಸಿಸಿಐ ಕ್ಯಾಲೆಂಡರ್ನಲ್ಲಿರುವ ಅಂತಾರಾಷ್ಟ್ರೀಯ ಪಂದ್ಯಗಳು, ದೇಶಿ ಟೂರ್ನಿಗಳು ಹಾಗೂ ವಯೋಮಿತಿ ಆಧಾರಿತ ತಂಡಗಳ ಪಂದ್ಯಗಳು ಸೇರಿವೆ.
ಭಾರತ ಕ್ರಿಕೆಟ್ ತಂಡಕ್ಕೆ ಮುತ್ತೊಟ್ ಫಿನ್ಕಾರ್ಪ್ ಟೈಟಲ್ ಸ್ಪಾನ್ಸರ್. -
ತಿರುವನಂತಪುರಂ: ಮುತ್ತೂಟ್ ಫಿನ್ಕಾರ್ಪ್ (Muthoot FinCorp) ಸಂಸ್ಥೆ ಭಾರತದಲ್ಲಿ ನಡೆಯುವ ತವರಿನ ಕ್ರಿಕೆಟ್ ಪಂದ್ಯಗಳಿಗೆ ಹೊಸ ಟೈಟಲ್ ಪ್ರಾಯೋಜಕರಾಗಿ ಆಯ್ಕೆಯಾಗಿದೆ. ಹಣಕಾಸು ಸೇವಾ ಸಂಸ್ಥೆಯಾದ ಮುತ್ತೂಟ್ ಫಿನ್ಕಾರ್ಪ್, ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಜೊತೆ 2028ರ ಮಾರ್ಚ್ವರೆಗೆ ಒಪ್ಪಂದ ಮಾಡಿಕೊಂಡಿದೆ. ಈ ಸಹಭಾಗಿತ್ವದಡಿ ಭಾರತದಲ್ಲಿ ನಡೆಯುವ ಎಲ್ಲಾ ಅಂತಾರಾಷ್ಟ್ರೀಯ ಸರಣಿಗಳು ಮತ್ತು ಟೂರ್ನಿಗಳ ಜತೆಗೆ ಬಿಸಿಸಿಐ ಆಯೋಜಿಸುವ ದೇಶಿ ಕ್ರಿಕೆಟ್ ಸ್ಪರ್ಧೆಗಳೂ ಒಳಗೊಂಡಿರಲಿವೆ.
ಸೆಪ್ಟೆಂಬರ್ 27ರಂದು ಭಾನುವಾರ ತಿರುವನಂತಪುರದಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ನಡೆಯಲಿರುವ ಭಾರತದ ಮೊದಲ ಏಕದಿನ ಪಂದ್ಯದೊಂದಿಗೆ ಮುತ್ತೂಟ್ ಫಿನ್ಕಾರ್ಪ್ನ ಟೈಟಲ್ ಪ್ರಾಯೋಜಕತ್ವ ಆರಂಭವಾಗಲಿದೆ ಎಂದು ಬಿಸಿಸಿಐ, ಸೆಪ್ಟೆಂಬರ್ 26ರಂದು ಶನಿವಾರ ಪ್ರಕಟಿಸಿದೆ.
ʻನನ್ನ ಕೆಲಸ ಇನ್ನೂ ಮುಗಿದಿಲ್ಲ, 2027ರ ಏಕದಿನ ವಿಶ್ವಕಪ್ ಗೆಲ್ಲಬೇಕುʼ: ರೋಹಿತ್ ಶರ್ಮಾ!
ಪುರುಷರ, ಮಹಿಳಾ ತಂಡಗಳಿಗೂ ಪ್ರಾಯೋಜಕತ್ವ
ಮುತ್ತೂಟ್ ಫಿನ್ಕಾರ್ಪ್ನ ಒಪ್ಪಂದವು ಭಾರತ ಪುರುಷರ ಮತ್ತು ಮಹಿಳಾ ಹಿರಿಯ ತಂಡಗಳಿಗೆ ಮಾತ್ರ ಸೀಮಿತವಾಗಿಲ್ಲ. ಭಾರತದ ಕ್ರಿಕೆಟ್ ವ್ಯವಸ್ಥೆಯ ಹಲವು ಹಂತಗಳನ್ನು ಇದು ಒಳಗೊಂಡಿದೆ. ಭಾರತ A, ಭಾರತ B, ವಯೋಮಿತಿ ಆಧಾರಿತ ತಂಡಗಳು ಸೇರಿದಂತೆ ಬಿಸಿಸಿಐನ ವಿವಿಧ ರಾಷ್ಟ್ರೀಯ ತಂಡಗಳು ಹಾಗೂ ಪ್ರಮುಖ ದೇಶಿ ಟೂರ್ನಿಗಳು ಈ ಒಪ್ಪಂದದ ವ್ಯಾಪ್ತಿಗೆ ಬರುತ್ತವೆ.
ಪ್ರಮುಖ ದೇಶಿ ಟೂರ್ನಿಗಳೂ ಇದು ಅನ್ವಯ
ಮುತ್ತೂಟ್ ಫಿನ್ಕಾರ್ಪ್ನ ಟೈಟಲ್ ಪ್ರಾಯೋಜಕತ್ವದ ಅಡಿಯಲ್ಲಿ ರಣಜಿ ಟ್ರೋಫಿ, ಇರಾನಿ ಕಪ್, ದುಲೀಪ್ ಟ್ರೋಫಿ, ವಿಜಯ್ ಹಜಾರೆ ಟ್ರೋಫಿ, ದೇವಧರ್ ಟ್ರೋಫಿ ಹಾಗೂ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿ ಸೇರಿದಂತೆ ಪ್ರಮುಖ ದೇಶಿ ಟೂರ್ನಿಗಳು ನಡೆಯಲಿವೆ.
ಇದರ ಮೂಲಕ ಮುತ್ತೂಟ್ ಫಿನ್ಕಾರ್ಪ್ಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಾತ್ರವಲ್ಲದೆ ಭಾರತದ ದೇಶಿ ಕ್ರಿಕೆಟ್ ವ್ಯವಸ್ಥೆಯಲ್ಲೂ ವ್ಯಾಪಕವಾದ ಬ್ರ್ಯಾಂಡ್ ಉಪಸ್ಥಿತಿ ದೊರೆಯಲಿದೆ. ರಾಷ್ಟ್ರೀಯ ತಂಡಗಳಿಗೆ ಆಟಗಾರರನ್ನು ರೂಪಿಸುವ ಕ್ರಿಕೆಟ್ನ ಅಭಿವೃದ್ಧಿ ಹಂತಗಳಲ್ಲೂ ಸಂಸ್ಥೆಯ ಹೆಸರು ಕಾಣಿಸಿಕೊಳ್ಳಲಿದೆ.
🚨 Announcement 🚨
— BCCI (@BCCI) September 26, 2026
BCCI announces Muthoot FinCorp Limited as the Title Sponsor for India Home Cricket, with the association running through March 2028.
More Details 🔽https://t.co/EQxPI8NR3P
IDFC First Bank ಬದಲಿಗೆ ಮುತ್ತೂಟ್ ಫಿನ್ಕಾರ್ಪ್
ಮುತ್ತೂಟ್ ಫಿನ್ಕಾರ್ಪ್, ಬಿಸಿಸಿಐನ ಹಿಂದಿನ ಟೈಟಲ್ ಪ್ರಾಯೋಜಕ IDFC First Bank ಬದಲಿಗೆ ಈ ಜವಾಬ್ದಾರಿ ವಹಿಸಿಕೊಂಡಿದೆ. IDFC First Bank ಮತ್ತು ಬಿಸಿಸಿಐ ನಡುವಿನ ಒಪ್ಪಂದ 2026ರ ಆಗಸ್ಟ್ನಲ್ಲಿ ಅಂತ್ಯಗೊಂಡಿತ್ತು.
ಅಪೋಲೋ ಟೈಯರ್ಸ್ ಮುಂದುವರಿಕೆ
ಮುತ್ತೂಟ್ ಫಿನ್ಕಾರ್ಪ್ ತವರಿನ ಕ್ರಿಕೆಟ್ನ ಟೈಟಲ್ ಪ್ರಾಯೋಜಕರಾಗಿ ಸೇರ್ಪಡೆಯಾದರೂ, ಅಪೋಲೋ ಟೈಯರ್ಸ್ ಭಾರತೀಯ ಕ್ರಿಕೆಟ್ ತಂಡಗಳ ಪ್ರಮುಖ (Lead) ಪ್ರಾಯೋಜಕರಾಗಿ ಮುಂದುವರಿಯಲಿದೆ. 2025ರಲ್ಲಿ ಅಪೋಲೋ ಟೈರ್ಸ್ ಡ್ರೀಮ್11 ಬದಲಿಗೆ ಟೀಮ್ ಇಂಡಿಯಾದ ಪ್ರಮುಖ ಪ್ರಾಯೋಜಕರಾಗಿ ಸೇರ್ಪಡೆಯಾಗಿತ್ತು. ಆ ಒಪ್ಪಂದವೂ 2028ರ ಮಾರ್ಚ್ವರೆಗೆ ಮುಂದುವರಿಯಲಿದೆ.
2027ರ ಏಕದಿನ ವಿಶ್ವಕಪ್ ಬಳಿಕ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸುತ್ತೇನೆಂದ ವಿರಾಟ್ ಕೊಹ್ಲಿ!
ಇದರ ಜೊತೆಗೆ ಬಿಸಿಸಿಐನ ಪ್ರಸ್ತುತ ಪ್ರಾಯೋಜಕತ್ವದ ಪಟ್ಟಿಯಲ್ಲಿ ಕ್ಯಾಂಪಾ, ಎಸ್ಬಿಐ ಲೈಫ್ ಮತ್ತು ChatGPT ಸಹ ಅಸೋಸಿಯೇಟ್ ಪ್ರಾಯೋಜಕರಾಗಿ ಸೇರಿವೆ. ಹೀಗಾಗಿ ಮುತ್ತೂಟ್ ಫಿನ್ಕಾರ್ಪ್ನ ಹೊಸ ಒಪ್ಪಂದವು ಭಾರತದಲ್ಲಿ ನಡೆಯುವ ಅಂತಾರಾಷ್ಟ್ರೀಯ ಪಂದ್ಯಗಳಿಂದ ಹಿಡಿದು ದೇಶಿ ಮತ್ತು ವಯೋಮಿತಿ ಕ್ರಿಕೆಟ್ವರೆಗೆ ಬಿಸಿಸಿಐನ ವಿಶಾಲ ಕ್ರಿಕೆಟ್ ವ್ಯವಸ್ಥೆಯಲ್ಲಿ ಸಂಸ್ಥೆಗೆ ದೊಡ್ಡ ಪ್ರಮಾಣದ ಉಪಸ್ಥಿತಿಯನ್ನು ಒದಗಿಸಲಿದೆ.