KKR vs GT: ಸಿಕ್ಸ್ ಹೊಡೆದು ಟಾಟಾ ಸಿಯೆರಾ ಕಾರಿಗೆ ಡೆಂಟ್ ಮಾಡಿದ ಕ್ಯಾಮೆರಾನ್ ಗ್ರೀನ್! ವಿಡಿಯೊ
ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಆಲ್ರೌಂಡರ್ ಕ್ಯಾಮೆರಾನ್ ಗ್ರೀನ್ ಅವರು ಹೊಡೆದ ಸಿಕ್ಸರ್ ಟಾಟಾ ಕಾರಿನ ಮೇಲೆ ಬಿದ್ದ ಪರಿಣಾಮವಾಗಿ ಕಾರಿನ ಮುಂಭಾಗದ ಎಡ ಬಾಗಿಲಿನಲ್ಲಿ ಡೆಂಟ್ ಉಂಟಾಗಿದೆ. ಕಳೆದ ಪಂದ್ಯಗಳಲ್ಲಿ ಬ್ಯಾಟಿಂಗ್ ವೈಫಲ್ಯ ಅನುಭವಿಸಿದ್ದ ಗ್ರೀನ್ ಈ ಪಂದ್ಯದಲ್ಲಿ ಅರ್ಧಶತಕ ಬಾರಿಸಿ ಫಾರ್ಮ್ಗೆ ಮರಳಿದ್ದಾರೆ.
ಟಾಟಾ ಸಿಯೆರಾ ಕಾರಿಗೆ ಚೆಂಡು ಹೊಡೆದ ಕ್ಯಾಮೆರಾನ್ ಗ್ರೀನ್. -
ಅಹಮದಾಬಾದ್: ಇಂಡಿಯನ್ ಪ್ರೀಮಿಯರ್ ಲೀಗ್ 2026ರ ಸಾಲಿನ (IPL 2026) ಎಲ್ಲಾ ಪಂದ್ಯಗಳಲ್ಲಿ ಟಾಟಾ ಪ್ರಾಯೋಜಿಸಿದ ಟಾಟಾ ಸಿಯೆರಾ ಕ್ರೀಡಾಂಗಣದೊಳಗೆ ಪ್ರದರ್ಶಿಸಲಾಗುತ್ತದೆ. ಕೋಲ್ಕತ್ತಾ ನೈಟ್ ರೈಡರ್ಸ್ (KKR) ಆಲ್ರೌಂಡರ್ ಕ್ಯಾಮೆರಾನ್ ಗ್ರೀನ್ (Cameron Green) ಹೊಡೆದ ಚೆಂಡು ನೇರವಾಗಿ ಆ ಕಾರಿನ ಮೇಲೆ ಬಿತ್ತು. ಅಹಮದಾಬಾದ್ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಈ ಘಟನೆ ನಡೆಯಿತು. ತಮ್ಮ ಇನಿಂಗ್ಸ್ ಅನ್ನು ನಿಧಾನವಾಗಿ ಪ್ರಾರಂಭಿಸಿದ ಗ್ರೀನ್ ಬಳಿಕ ತಮ್ಮ ವಿನಾಶಕಾರಿ ಬ್ಯಾಟಿಂಗ್ ಪರಾಕ್ರಮವನ್ನು ಪ್ರದರ್ಶಿಸಿದರು.
ಕೋಲ್ಕತ್ತಾ ನೈಟ್ ರೈಡರ್ಸ್ ಇನಿಂಗ್ಸ್ನ 13 ನೇ ಓವರ್ನಲ್ಲಿ ವೇಗದ ಬೌಲರ್ ಅಶೋಕ್ ಶರ್ಮಾ, ಗುಜರಾತ್ ಟೈಟನ್ಸ್ ಪರ ಬೌಲ್ ಮಾಡುತ್ತಿದ್ದರು. ಓವರ್ನ ಮೂರನೇ ಎಸೆತ ಗಂಟೆಗೆ 146 ಕಿಮೀ ವೇಗದಲ್ಲಿ ಬಂತು. ಕ್ಯಾಮೆರಾನ್ ಗ್ರೀನ್ ಡೀಪ್ ಸ್ಕ್ವೇರ್ ಲೆಗ್ ಮೇಲೆ ಬೃಹತ್ ಸಿಕ್ಸ್ಗೆ ಹೊಡೆದರು. ಈ ವೇಳೆ ಚೆಂಡು ಟಾಟಾ ಸಿಯೆರಾ ಮೇಲೆ ನೇರವಾಗಿ ಬಿದ್ದು, ವಾಹನದ ಮುಂಭಾಗದ ಎಡ ಬಾಗಿಲಿನ ಮೇಲೆ ಡೆಂಟ್ ಉಂಟಾಯಿತು. ಅಂದ ಹಾಗೆ ಈ ಸಿಕ್ಸರ್ನಿಂದಾಗಿ ಟಾಟಾ ಸಂಸ್ಥೆಯು ತಳಮಟ್ಟದ ಕ್ರಿಕೆಟ್ ಅಭಿವೃದ್ದಿಗೆ 5 ಲಕ್ಷ ರು ಗಳನ್ನು ದೇಣಿಗೆ ನೀಡಲಿದೆ.
IPL 2026: ಟಿ20 ಕ್ರಿಕೆಟ್ನಲ್ಲಿ 300 ಕ್ಯಾಚ್ ಮೈಲುಗಲ್ಲು ತಲುಪಿದ ಜೋಸ್ ಬಟ್ಲರ್!
ಈ ಪಂದ್ಯದಲ್ಲಿ ಕೆಕೆಆರ್ ಪರ ಕ್ಯಾಮೆರಾನ್ ಗ್ರೀನ್ 79 ರನ್ ಗಳಿಸಿದರು. ಪವರ್ಪ್ಲೇ ಸಮಯದಲ್ಲಿ ತಂಡವು ಮೂರು ವಿಕೆಟ್ಗಳನ್ನು ಕಳೆದುಕೊಂಡಿತ್ತು. ಆರಂಭದಲ್ಲಿ ಗ್ರೀನ್ ಎಚ್ಚರಿಕೆಯಿಂದ ಬ್ಯಾಟ್ ಮಾಡಿದರು. ಒಂದು ಹಂತದಲ್ಲಿ ಅವರು 29 ಎಸೆತಗಳಲ್ಲಿ ಕೇವಲ 27 ರನ್ ಗಳಿಸಿದ್ದರು, ಆದರೆ ನಂತರ ಅವರು 34 ಎಸೆತಗಳಲ್ಲಿ ಅರ್ಧಶತಕ ಬಾರಿಸಿದರು. ಇನಿಂಗ್ಸ್ನ ಕೊನೆಯ ಎಸೆತದಲ್ಲಿ ಅವರು 79 ರನ್ಗಳಿಗೆ ಔಟಾದರು. ಅವರ 55 ಎಸೆತಗಳಲ್ಲಿ ಗ್ರೀನ್ ಏಳು ಬೌಂಡರಿಗಳ ಜೊತೆಗೆ ನಾಲ್ಕು ಸಿಕ್ಸರ್ಗಳನ್ನು ಬಾರಿಸಿದರು.
ಕೋಲ್ಕತಾ ಫ್ರಾಂಚೈಸಿ ಆಸ್ಟ್ರೇಲಿಯಾದ ಆಲ್ರೌಂಡರ್ ಕ್ಯಾಮೆರಾನ್ ಗ್ರೀನ್ ಅವರನ್ನು 25.20 ಕೋಟಿ ರು ಗಳಿಗೆ ಹರಾಜಿನಲ್ಲಿ ಖರೀದಿಸಿತ್ತು. ಐಪಿಎಲ್ ಇತಿಹಾಸದಲ್ಲಿ ಅತ್ಯಂತ ದುಬಾರಿ ವಿದೇಶಿ ಆಟಗಾರ ಎಂಬ ಹೆಗ್ಗಳಿಕೆಗೂ ಅವರು ಪಾತ್ರರಾಗಿದ್ದಾರೆ.
Making a strong statement 💪
— IndianPremierLeague (@IPL) April 17, 2026
Cameron Green getting a move on for #KKR 💜
Updates ▶️ https://t.co/FACeUzse3B#TATAIPL | #KhelBindaas | #GTvKKR | @KKRiders pic.twitter.com/utzOHFRbGx
ಕೊನೆಯ 5 ಓವರ್ಗಳಲ್ಲಿ 32 ರನ್
ಟಾಸ್ ಗೆದ್ದ ನಂತರ ಕೆಕೆಆರ್ ನಾಯಕ ಅಜಿಂಕ್ಯ ರಹಾನೆ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡರು. ಅದರಂತೆ ಕೆಕೆಆರ್ ನಿಗದಿತ 20 ಓವರ್ಗಳಲ್ಲಿ ಕೇವಲ 180 ರನ್ಗಳನ್ನು ಗಳಿಸುವಲ್ಲಿ ಯಶಸ್ವಿಯಾಯಿತು. 15 ಓವರ್ಗಳ ನಂತರ ತಂಡದ ಸ್ಕೋರ್ 148 ರನ್ಗಳಿಗೆ ತಲುಪಿತ್ತು. ಡೆತ್ ಓವರ್ಗಳಲ್ಲಿ ಗುಜರಾತ್ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿತು. 16 ಮತ್ತು 18 ನೇ ಓವರ್ಗಳ ನಡುವೆ ಗ್ರೀನ್ ಒಂದೇ ಎಸೆತವನ್ನು ಎದುರಿಸಿದರು. ಗುಜರಾತ್ ಪರ, ಕಗಿಸೊ ರಬಾಡ ಮೂರು ವಿಕೆಟ್ಗಳನ್ನು ಕಬಳಿಸಿದರೆ, ಅಶೋಕ್ ಶರ್ಮಾ ಮತ್ತು ಮೊಹಮ್ಮದ್ ಸಿರಾಜ್ ತಲಾ ಎರಡು ವಿಕೆಟ್ಗಳನ್ನು ಪಡೆದರು.