IPL 2027 Mini Auction: ಸಿಎಸ್‌ಕೆಗೆ ಅಕ್ಷರ್ ಪಟೇಲ್? ಡೆಲ್ಲಿ ಕ್ಯಾಪಿಟಲ್ಸ್‌ಗೆ ವಾರ್ನಿಂಗ್‌ ಕೊಟ್ಟ ಆರ್‌ ಅಶ್ವಿನ್!
ಅಕ್ಷರ್ ಪಟೇಲ್ ಅವರನ್ನು ಚೆನ್ನೈ ಸೂಪರ್ ಕಿಂಗ್ಸ್‌ಗೆ ಟ್ರೇಡ್ ಮಾಡುವ ವದಂತಿಗಳ ನಡುವೆ ರವಿಚಂದ್ರನ್ ಅಶ್ವಿನ್ ಪ್ರತಿಕ್ರಿಯಿಸಿದ್ದಾರೆ. ಅಕ್ಷರ್ ಬದಲಿಗೆ ಬ್ರೆವಿಸ್ ಅಥವಾ ನೂರ್ ಅಹ್ಮದ್ ಆಯ್ಕೆಯಾಗಬಹುದು ಎಂದಿದ್ದಾರೆ. ರಿಷಭ್ ಪಂತ್‌ಗೆ ನಾಯಕತ್ವ ನೀಡುವ ಬದಲು ಕೆಎಲ್ ರಾಹುಲ್‌ಗೆ ಜವಾಬ್ದಾರಿ ವಹಿಸಲು ಅವರು ಸಲಹೆ ನೀಡಿದ್ದಾರೆ.
ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಎಚ್ಚರಿಕೆ ನೀಡಿದ ಆರ್‌ ಅಶ್ವಿನ್. -
ನವದೆಹಲಿ: ಮುಂಬರುವ 2027ರ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ (IPL 2027) ಟೂರ್ನಿಯ ಮಿನಿ ಹರಾಜಿಗೂ ಮುನ್ನ ಆಟಗಾರರ ವರ್ಗಾವಣೆ ವಿಚಾರವಾಗಿ ಮತ್ತೊಂದು ಮಹತ್ವದ ಚರ್ಚೆ ಶುರುವಾಗಿದೆ. ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ನಾಯಕ ಅಕ್ಷರ್ ಪಟೇಲ್ ಅವರನ್ನು ಚೆನ್ನೈ ಸೂಪರ್ ಕಿಂಗ್ಸ್‌ಗೆ ವರ್ಗಾಯಿಸುವ ಕುರಿತು ಮಾತುಕತೆ ನಡೆಯುತ್ತಿದೆ ಎಂಬ ವರದಿಗಳು ಹರಿದಾಡುತ್ತಿವೆ. ಈ ಬೆಳವಣಿಗೆಯ ಬಗ್ಗೆ ಭಾರತದ ಮಾಜಿ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ (R Ashwin) ಪ್ರತಿಕ್ರಿಯಿಸಿದ್ದು, ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ಕೆಲವು ಮಹತ್ವದ ಸಲಹೆಗಳನ್ನು ನೀಡಿದ್ದಾರೆ.
ಅಕ್ಷರ್ ಪಟೇಲ್ ಅವರನ್ನು ಬಿಟ್ಟುಕೊಟ್ಟರೆ ಡೆಲ್ಲಿ ತಂಡಕ್ಕೆ ನಾಯಕತ್ವದ ಜೊತೆಗೆ ತಂಡದ ಸಮತೋಲನ ಕಾಪಾಡುವ ಸವಾಲು ಎದುರಾಗಲಿದೆ ಎಂದು ಅಶ್ವಿನ್ ಅಭಿಪ್ರಾಯಪಟ್ಟಿದ್ದಾರೆ. ಅಲ್ಲದೆ, ರಿಷಭ್ ಪಂತ್ ಅವರಿಗೆ ಮತ್ತೆ ನಾಯಕತ್ವದ ಜವಾಬ್ದಾರಿ ನೀಡುವ ಬದಲು ಕೆಎಲ್ ರಾಹುಲ್ ಅವರನ್ನು ಪರಿಗಣಿಸುವಂತೆ ಸಲಹೆ ನೀಡಿದ್ದಾರೆ.
ಟ್ರೇಡ್ ಡೀಲ್‌ ಮೂಲಕ ಮುಂಬೈ ಇಂಡಿಯನ್ಸ್‌ ಸೇರಿದ ಅರ್ಷದೀಪ್‌ ಸಿಂಗ್‌: ಖಚಿತಪಡಿಸಿದ ವೇಗಿಯ ತಂಡ!
ಅಕ್ಷರ್ ಬದಲಿಗೆ ಬ್ರೆವಿಸ್ ಅಥವಾ ನೂರ್ ಅಹ್ಮದ್?
ಅಕ್ಷರ್ ಪಟೇಲ್ ಅವರನ್ನು ಚೆನ್ನೈ ತಂಡಕ್ಕೆ ನೀಡಿದರೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಪ್ರತಿಯಾಗಿ ದಕ್ಷಿಣ ಆಫ್ರಿಕಾದ ಯುವ ಆಟಗಾರ ಡೆವಾಲ್ಡ್ ಬ್ರೆವಿಸ್ ಅಥವಾ ಅಫ್ಘಾನಿಸ್ತಾನದ ಸ್ಪಿನ್ನರ್ ನೂರ್ ಅಹ್ಮದ್ ಅವರನ್ನು ಕೇಳಬಹುದು ಎಂದು ಅಶ್ವಿನ್ ಹೇಳಿದ್ದಾರೆ.
ತಮ್ಮ ಯೂಟ್ಯೂಬ್ ಚಾನೆಲ್ 'ಆಶ್ ಕಿ ಬಾತ್'ನಲ್ಲಿ ಮಾತನಾಡಿದ ಅವರು, ಅಕ್ಷರ್ ಅವರಂತಹ ಆಲ್‌ರೌಂಡರ್ ತಂಡಕ್ಕೆ ಉತ್ತಮ ಸಮತೋಲನ ಒದಗಿಸಬಲ್ಲರು ಎಂದು ತಿಳಿಸಿದ್ದಾರೆ.
"ಈ ಟ್ರೇಡ್ ಹೇಗೆ ಸಾಧ್ಯವಾಗಬಹುದು ಎಂಬುದೇ ನನಗೆ ಅರ್ಥವಾಗುತ್ತಿಲ್ಲ. ಅಕ್ಷರ್ ಪಟೇಲ್ ತಂಡಕ್ಕೆ ಬಂದರೆ ಚೆನ್ನೈಗೆ ಸಾಕಷ್ಟು ಸಮತೋಲನ ಸಿಗಲಿದೆ. ಆಗ ಅವರಿಗೆ ಅಕೀಲ್ ಹುಸೇನ್ ಅಗತ್ಯವೂ ಇರಲಿಕ್ಕಿಲ್ಲ. ಡೆಲ್ಲಿ ಈ ಬಗ್ಗೆ ಯೋಚಿಸುತ್ತಿದ್ದರೆ, ಅವರು ಪ್ರತಿಯಾಗಿ ಯಾರನ್ನು ಪಡೆಯಲು ಬಯಸಬಹುದು ಎಂಬುದನ್ನು ನೋಡಬೇಕು. ಬ್ರೆವಿಸ್ ಉತ್ತಮ ಆಟಗಾರ. ಡೆಲ್ಲಿ ಅವರ ಮೇಲೆ ಆಸಕ್ತಿ ತೋರಬಹುದು. ಕುಲ್ದೀಪ್ ಯಾದವ್ ಈಗಾಗಲೇ ತಂಡದಿಂದ ಹೊರಹೋಗಿರುವುದರಿಂದ ನೂರ್ ಅಹ್ಮದ್ ಕೂಡ ಡೆಲ್ಲಿಗೆ ಆಕರ್ಷಕ ಆಯ್ಕೆಯಾಗಬಹುದು," ಎಂದು ಅಶ್ವಿನ್ ಹೇಳಿದ್ದಾರೆ.
2028ರಿಂದ ಐಪಿಎಲ್‌ ಟೂರ್ನಿಗೆ ಹೊಸ 2 ತಂಡಗಳ ಸೇರ್ಪಡೆಗೆ ಬಿಸಿಸಿಐ ಚಿಂತನೆ!
ಪಂತ್‌ಗೆ ನಾಯಕತ್ವ ಬೇಡ, ಕೆಎಲ್ ರಾಹುಲ್‌ಗೆ ಅವಕಾಶ
ಅಕ್ಷರ್ ಪಟೇಲ್ ತಂಡ ತೊರೆದರೆ ಡೆಲ್ಲಿ ಕ್ಯಾಪಿಟಲ್ಸ್ ಹೊಸ ನಾಯಕನನ್ನು ಹುಡುಕಬೇಕಾಗುತ್ತದೆ. ಈ ಸಂದರ್ಭದಲ್ಲಿ ಹಿಂದೆ ತಂಡವನ್ನು ಮುನ್ನಡೆಸಿರುವ ರಿಷಭ್ ಪಂತ್‌ಗೆ ಮತ್ತೆ ನಾಯಕತ್ವ ನೀಡುವ ಬಗ್ಗೆ ಅಶ್ವಿನ್ ಒಲವು ತೋರಿಲ್ಲ.
ಪಂತ್ ಯಾವುದೇ ಒತ್ತಡವಿಲ್ಲದೆ ಸ್ವತಂತ್ರವಾಗಿ ಬ್ಯಾಟಿಂಗ್ ಮಾಡುವುದಕ್ಕೆ ಅವಕಾಶ ನೀಡಬೇಕು ಎಂಬುದು ಅಶ್ವಿನ್ ಅಭಿಪ್ರಾಯ. ಅವರ ಪ್ರಕಾರ, ಅನುಭವಿ ಆರಂಭಿಕ ಬ್ಯಾಟರ್ ಕೆಎಲ್ ರಾಹುಲ್ ನಾಯಕತ್ವದ ಜವಾಬ್ದಾರಿ ನಿಭಾಯಿಸಲು ಸೂಕ್ತ ಆಯ್ಕೆಯಾಗಬಹುದು.
"ಕೆಎಲ್ ರಾಹುಲ್ ಉತ್ತಮ ಮತ್ತು ಅನುಭವಿ ಆಯ್ಕೆ. ಪಂತ್ ಮುಕ್ತವಾಗಿ ಆಡಬೇಕು. ನಾಯಕತ್ವದ ಜವಾಬ್ದಾರಿ ತೆಗೆದುಕೊಳ್ಳದೆ ಆಟಗಾರನಾಗಿ ಸ್ವತಂತ್ರವಾಗಿ ಆಡುವಂತೆ ಪಂತ್ ಅವರನ್ನು ಮನವೊಲಿಸಲು ಸಾಧ್ಯವಿರುವ ವ್ಯಕ್ತಿ ಸೌರವ್ ಗಂಗೂಲಿ. ಅವರಿಂದ ಇದು ಸಾಧ್ಯವಾಗಬಹುದು. ಇದು ಕೆಟ್ಟ ನಿರ್ಧಾರವಾಗುವುದಿಲ್ಲ," ಎಂದು ಅಶ್ವಿನ್ ತಿಳಿಸಿದ್ದಾರೆ.
ವಿರಾಟ್ ಕೊಹ್ಲಿ ಸಲಹೆಯೇ ನಿವೃತ್ತಿ ನಿರ್ಧಾರಕ್ಕೆ ಕಾರಣ: ಕೇನ್ ವಿಲಿಯಮ್ಸನ್ ಮನದಾಳ!
ಅಕ್ಷರ್ ಪಟೇಲ್ ಅವರನ್ನು ಬಿಟ್ಟುಕೊಡುವುದು ಡೆಲ್ಲಿಗೆ ಸೂಕ್ತವೇ?
ಕ್ರಿಕೆಟ್ ದೃಷ್ಟಿಯಿಂದ ಅಕ್ಷರ್ ಪಟೇಲ್ ಅವರನ್ನು ಉಳಿಸಿಕೊಳ್ಳುವುದೇ ಡೆಲ್ಲಿ ಕ್ಯಾಪಿಟಲ್ಸ್‌ಗೆ ಹೆಚ್ಚು ಪ್ರಯೋಜನಕಾರಿ ಎಂಬ ಅಭಿಪ್ರಾಯವೂ ವ್ಯಕ್ತವಾಗಿದೆ. ನಾಲ್ಕು ಓವರ್‌ಗಳ ಎಡಗೈ ಸ್ಪಿನ್ ಬೌಲಿಂಗ್ ಜೊತೆಗೆ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವ ಸಾಮರ್ಥ್ಯ ಅಕ್ಷರ್ ಅವರಲ್ಲಿದೆ.
ಐಪಿಎಲ್‌ನಲ್ಲಿ ಇಂತಹ ಭಾರತೀಯ ಆಲ್‌ರೌಂಡರ್‌ಗಳು ಅಪರೂಪ. ಐದನೇ ಕ್ರಮಾಂಕದಿಂದ ಏಳನೇ ಕ್ರಮಾಂಕದವರೆಗೆ ಬ್ಯಾಟ್ ಮಾಡುವುದರ ಜೊತೆಗೆ ಬೌಲಿಂಗ್‌ನಲ್ಲಿಯೂ ಕೊಡುಗೆ ನೀಡಬಲ್ಲ ಅಕ್ಷರ್ ಡೆಲ್ಲಿ ತಂಡದ ಪ್ರಮುಖ ಆಟಗಾರರಾಗಿದ್ದಾರೆ. ಮತ್ತೊಂದೆಡೆ, ಚೆನ್ನೈ ಸೂಪರ್ ಕಿಂಗ್ಸ್‌ನ ತವರು ಮೈದಾನ ಚೆಪಾಕ್ ಸ್ಪಿನ್ನರ್‌ಗಳಿಗೆ ಅನುಕೂಲಕರವಾಗಿದೆ.
ಹೀಗಾಗಿ ಅಕ್ಷರ್ ತಂಡಕ್ಕೆ ಬಂದರೆ ಚೆನ್ನೈ ಬೌಲಿಂಗ್ ವಿಭಾಗಕ್ಕೆ ಹೆಚ್ಚಿನ ಬಲ ಸಿಗಬಹುದು. ಆದರೆ ಡೆಲ್ಲಿ ಅವರನ್ನು ಬಿಟ್ಟುಕೊಡುವುದಾದರೆ ಪ್ರತಿಯಾಗಿ ಪ್ರಮುಖ ಭಾರತೀಯ ಮಧ್ಯಮ ಕ್ರಮಾಂಕದ ಬ್ಯಾಟರ್ ಅಥವಾ ಅನುಭವಿ ವೇಗದ ಬೌಲರ್‌ನಂತಹ ಆಟಗಾರನನ್ನು ಪಡೆಯಬೇಕಾಗುತ್ತದೆ.