ಇತಿಹಾಸ ನಿರ್ಮಿಸಿದ ರಹಮತ್ ಶಾ; ಈ ಸಾಧನೆಗೈದ ಮೊದಲ ಅಫ್ಘಾನಿಸ್ತಾನ ಆಟಗಾರ

ಮುಲ್ಲನ್‌ಪುರ, ಜೂ.7: ಇಲ್ಲಿನ ಮಹಾರಾಜ ಯಾದವೀಂದ್ರ ಸಿಂಗ್ ಅಂತರರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಭಾರತ ವಿರುದ್ಧದ ಏಕೈಕ ಟೆಸ್ಟ್ (IND vs AFG Test)ಪಂದ್ಯದಲ್ಲಿ ಅಫ್ಘಾನಿಸ್ತಾನದ ಸ್ಟಾರ್ ಬ್ಯಾಟ್ಸ್‌ಮನ್ ರಹಮತ್ ಶಾ(Rahmat Shah) ಇತಿಹಾಸವೊಂದನ್ನು ನಿರ್ಮಿಸಿದ್ದಾರೆ.

ಅಫ್ಘಾನಿಸ್ತಾನ ಆರಂಭಿಕ ವಿಕೆಟ್‌ಗಳನ್ನು ಕಳೆದುಕೊಂಡರೂ, ದಿಟ್ಟ ಬ್ಯಾಟಿಂಗ್‌ ನಡೆಸುತ್ತಿರುವ ಶಾ, 43 ರನ್‌ ಗಳಿಸಿ ಮೂರನೇ ದಿನಕ್ಕೆ ಬ್ಯಾಟಿಂಗ್‌ ಕಾಯ್ದುಕೊಂಡಿದ್ದಾರೆ. ಅವರು ತಮ್ಮ ದೇಶದ ಪರ ಟೆಸ್ಟ್ ಕ್ರಿಕೆಟ್‌ನಲ್ಲಿ 1000 ರನ್ ಗಳಿಸಿದ ಮೊದಲ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಎರಡನೇ ದಿನದಾಟದ ಮೂರನೇ ಮತ್ತು ಅಂತಿಮ ಅವಧಿಯಲ್ಲಿ ಮಾನವ್ ಸುತಾರ್ ಅವರ ಫೈನ್ ಲೆಗ್ ಎಸೆತವನ್ನು ಬೌಂಡರಿ ಬಾರಿಸುವ ಮೂಲಕ ಶಾ ಈ ಸಾಧನೆ ಮಾಡಿದರು. ಮೈಲಿಗಲ್ಲು ತಲುಪಲು ಅವರಿಗೆ 30 ರನ್‌ಗಳು ಬೇಕಾಗಿದ್ದವು.

ಏತನ್ಮಧ್ಯೆ, ದೇಶೀಯ ಕ್ರಿಕೆಟ್‌ನಲ್ಲಿ ದೀರ್ಘ ಹೋರಾಟದ ನಂತರ ಭಾರತ ತಂಡಕ್ಕೆ ಕಾಲಿಟ್ಟ ಎಡಗೈ ಸ್ಪಿನ್-ಬೌಲಿಂಗ್ ಆಲ್‌ರೌಂಡರ್ ಮಾನವ್ ಸುತಾರ್ ಅವರಿಗೆ ಇದು ಬಲವಾದ ಚೊಚ್ಚಲ ಪಂದ್ಯವಾಗಿತ್ತು. ಪಂದ್ಯದ 2 ನೇ ದಿನದಂದು ಮೂರು ವಿಕೆಟ್‌ ಪಡೆದರು. ತಮ್ಮ ವೃತ್ತಿಜೀವನದ ಮೊದಲ ಓವರ್‌ನಲ್ಲಿಯೇ ಆರಂಭಿಕ ಆಟಗಾರ ಅಬ್ದುಲ್ ಮಲಿಕ್ ಅವರನ್ನು ಔಟ್ ಮಾಡಿ ತಮ್ಮ ಚೊಚ್ಚಲ ಟೆಸ್ಟ್ ವಿಕೆಟ್ ಪಡೆದರು.

ಭಾರತದ ಬಿಗಿ ಹಿಡಿತದಲ್ಲಿ ಮುಲ್ಲನ್‌ಪುರ ಟೆಸ್ಟ್‌; ಫಾಲೋ ಆನ್ ಭೀತಿಯಲ್ಲಿ ಆಫ್ಘಾನ್‌

ಅಫ್ಘಾನಿಸ್ತಾನ 2018 ರಲ್ಲಿ ಭಾರತ ವಿರುದ್ಧ ಚೊಚ್ಚಲ ಪಂದ್ಯ ಆಡಿದಾಗಿನಿಂದ ಟೆಸ್ಟ್ ಆಡಲು ಪ್ರಾರಂಭಿಸಿತು. ಜೂನ್ 2017 ರಲ್ಲಿ ಟೆಸ್ಟ್ ರಾಷ್ಟ್ರ ಸ್ಥಾನಮಾನ ಪಡೆದ ನಂತರ ಅವರು ತಮ್ಮ 13 ನೇ ಟೆಸ್ಟ್ ಪಂದ್ಯವನ್ನು ಆಡುತ್ತಿದ್ದಾರೆ.

ಮೊದಲ ಇನಿಂಗ್ಸ್‌ನಲ್ಲಿ ಭಾರತ 8ಕ್ಕೆ 564ರನ್‌ ಗಳಿಸಿದರೆ, ಆಫ್ಘಾನ್‌ 113 ರನ್‌ಗಳಿಗೆ 5 ವಿಕೆಟ್ ಕಳೆದುಕೊಂಡಿದ್ದು, ಇನ್ನೂ 451 ರನ್‌ಗಳ ಹಿನ್ನಡೆಯಲ್ಲಿದೆ. ಮೂರು ದಿನಗಳ ಆಟ ಕೂಡ ಬಾಕಿ ಇರುವ ಕಾರಣ ಭಾರತ ಪಂದ್ಯದಲ್ಲಿ ಸುಲಭ ಗೆಲುವು ಸಾಧಿಸುವ ನಿರೀಕ್ಷೆಯಲ್ಲಿದೆ. ಅಫ್ಸರ್ ಜಜೈ(3) ವಿಕೆಟ್‌ ಪತನಗೊಳ್ಳುತ್ತಿದ್ದಂತೆ ದಿನದಾಟ ಮುಕ್ತಾಯಗೊಳಿಸಲಾಯಿತು. ನಾಯಕ ಹಶ್ಮತುಲ್ಲಾ ಶಾಹಿದಿ(20), ಆರಂಭಕಾರ ಸೇದಿಕುಲ್ಲಾ ಅಟಲ್(17) ಸಣ್ಣ ಮೊತ್ತಕ್ಕೆ ವಿಕೆಟ್‌ ಕಳೆದುಕೊಂಡರು.