ಭಾರತಕ್ಕೆ ಬರ್ತಿದೆ 'ದ ಮೆಸ್ಸಿ ಎಕ್ಸ್‌ಪೀರಿಯನ್ಸ್': ಫುಟ್‌ಬಾಲ್ ಅಭಿಮಾನಿಗಳಿಗೆ ಹಬ್ಬ!

ನವದೆಹಲಿ, ಫೆ. 5: ಇತ್ತೀಚೆಗಷ್ಟೇ ಜಾಗತಿಕ ಫುಟ್‌ಬಾಲ್ ತಾರೆ ಲಿಯೋನೆಲ್ ಮೆಸ್ಸಿ(lionel messi) ಮೂರು ದಿನಗಳ ಪ್ರವಾಸಕ್ಕೆ ಭಾರತಕ್ಕೆ ಭೇಟಿ ನೀಡಿದ್ದರು. ಇದೀಗ ಅಂತರಾಷ್ಟ್ರೀಯ ಮಟ್ಟದಲ್ಲಿ ಖ್ಯಾತಿ ಗಳಿಸಿರುವ "ದ ಮೆಸ್ಸಿ ಎಕ್ಸ್‌ಪೀರಿಯನ್ಸ್ - ಎ ಡ್ರೀಮ್ ಕಮ್ ಟ್ರೂ" (The Messi Experience - A Dream Come True) ಈ ಮಾರ್ಚ್‌ನಲ್ಲಿ ಭಾರತಕ್ಕೆ ಬರುತ್ತಿದೆ. 2026ರ ವಿಶ್ವ ಪ್ರವಾಸದ ಅತ್ಯಂತ ನಿರೀಕ್ಷಿತ ಕಾರ್ಯಕ್ರಮಗಳಲ್ಲಿ ಒಂದಾದ ಈ ವಿಶಿಷ್ಟ ಪ್ರದರ್ಶನವು ಫುಟ್‌ಬಾಲ್ ಅಭಿಮಾನಿಗಳಿಗೆ ಹಬ್ಬವಾಗಲಿದ್ದು, ಭಾರತದ ಪ್ರಮುಖ ಮನರಂಜನಾ ಸಂಸ್ಥೆಯಾದ ಬುಕ್‌ಮೈಶೋ ಲೈವ್ (BookMyShow Live) ಇದನ್ನು ಆಯೋಜಿಸುತ್ತಿದೆ.

ಈ ಅದ್ಭುತ ಪ್ರದರ್ಶನವು ಮಾರ್ಚ್ 20, 2026 ರಂದು ಮುಂಬೈನ ಸೆಂಚುರಿ ಮಿಲ್ಸ್ (ಲೋವರ್ ಪರೇಲ್) ನಲ್ಲಿ ಪ್ರಾರಂಭವಾಗಲಿದೆ ಮತ್ತು ಜೂನ್ 19, 2026 ರಂದು ಬೆಂಗಳೂರಿನ ಭಾರತೀಯ ಸಿಟಿ ಮಾಲ್‌ಗೆ ಬರಲಿದೆ.

ಈ ಬಗ್ಗೆ ಮಾತನಾಡಿದ ಲಿಯೋ ಮೆಸ್ಸಿ, "ಈ ಯೋಜನೆಯು ಸಾಕಾರಗೊಳ್ಳುತ್ತಿರುವುದು ಮತ್ತು ಅಭಿಮಾನಿಗಳನ್ನು ನನ್ನ ಜೀವನದ ಕಥೆಗೆ ಇನ್ನಷ್ಟು ಹತ್ತಿರ ತರುತ್ತಿರುವುದು ನನಗೆ ಖುಷಿ ತಂದಿದೆ. ನನ್ನ ಫುಟ್‌ಬಾಲ್ ಪ್ರೀತಿಯ ಮೂಲಕ ಜನರನ್ನು ಪ್ರೇರೇಪಿಸಲು ನಾನು ಯಾವಾಗಲೂ ಪ್ರಯತ್ನಿಸುತ್ತೇನೆ. ಈ ಅನುಭವವು ಭಾರತೀಯ ಅಭಿಮಾನಿಗಳಿಗೆ ನನ್ನ ವೃತ್ತಿಜೀವನದ ಮರೆಯಲಾಗದ ಕ್ಷಣಗಳನ್ನು ಪುನಃ ನೆನಪಿಸಿಕೊಳ್ಳಲು ಅವಕಾಶ ನೀಡುತ್ತದೆ," ಎಂದಿದ್ದಾರೆ.

ಧೋನಿ, ಮೆಸ್ಸಿ ಸೇರಿ ಈ ವರ್ಷ ನಿವೃತ್ತಿ ಹೇಳಲಿರುವ ಕ್ರೀಡಾ ದಿಗ್ಗಜರು

ಬುಕ್‌ಮೈಶೋ ಲೈವ್‌ನ ಚೀಫ್ ಬಿಸಿನೆಸ್ ಆಫೀಸರ್ ನಮನ್ ಪುಗಾಲಿಯಾ ಮಾತನಾಡಿ, "ಭಾರತದಲ್ಲಿ ಬೆಳೆಯುತ್ತಿರುವ ಫುಟ್‌ಬಾಲ್ ಪ್ರೇಮಕ್ಕೆ ಈ ಪ್ರದರ್ಶನವು ಹೊಸ ಆಯಾಮ ನೀಡಲಿದೆ. ಕ್ರೀಡೆ, ಕಥೆ ಹೇಳುವಿಕೆ ಮತ್ತು ತಂತ್ರಜ್ಞಾನದ ಸಮ್ಮಿಲನವಾಗಿರುವ ಇದು 2026ರ ಅತ್ಯಂತ ಆಕರ್ಷಕ ಸಾಂಸ್ಕೃತಿಕ ಕೇಂದ್ರವಾಗಲಿದೆ," ಎಂದಿದ್ದಾರೆ.

ಸುಮಾರು 75 ನಿಮಿಷಗಳ ಕಾಲ ನಡೆಯುವ ಈ ಪ್ರದರ್ಶನದಲ್ಲಿ ಅಭಿಮಾನಿಗಳು ಮೆಸ್ಸಿಯ ಬಾಲ್ಯದಿಂದ ಹಿಡಿದು ವಿಶ್ವಕಪ್ ಗೆಲುವಿನವರೆಗಿನ ಹಾದಿಯನ್ನು ಅತ್ಯಾಧುನಿಕ ತಂತ್ರಜ್ಞಾನದ ಮೂಲಕ ಅನುಭವಿಸಬಹುದು.