106ನೇ ನಿಮಿಷದಲ್ಲಿ ಗೋಲು ದಾಖಲಿಸಿ ಸ್ಪೇನ್‌ಗೆ ಫಿಫಾ ವಿಶ್ವಕಪ್‌ ಗೆದ್ದುಕೊಟ್ಟ ಫೆರಾನ್‌ ಟೊರೆಸ್‌ ಯಾರು?

ನ್ಯೂಯಾರ್ಕ್: ಫಿಫಾ ವಿಶ್ವಕಪ್ 2026ರ ಟೂರ್ನಿಯ(FIFA World Cup 2026) ರೋಚಕ ಫೈನಲ್‌ ಪಂದ್ಯದಲ್ಲಿ 10 ಆಟಗಾರರೊಂದಿಗೆ ಆಡುತ್ತಿದ್ದ ಅರ್ಜೆಂಟೀನಾ ವಿರುದ್ಧ 106ನೇ ನಿಮಿಷದಲ್ಲಿ ನಿರ್ಣಾಯಕ ಗೋಲು ಬಾರಿಸಿದ ಫೆರಾನ್ ಟೊರೆಸ್ (Ferran Torres), ಸ್ಪೇನ್‌ನ ಗೆಲುವಿನ ಹೀರೋ ಆಗಿ ಹೊರಹೊಮ್ಮಿದರು. ಪಂದ್ಯದುದ್ದಕ್ಕೂ ಎಲ್ಲರ ಗಮನ ಯುವ ತಾರೆ ಲಮೀನ್ ಯಮಾಲ್ ಅವರತ್ತ ನೆಟ್ಟಿದ್ದರೂ, ನಿರ್ಣಾಯಕ ಕ್ಷಣದಲ್ಲಿ ಮಿಂಚಿದ ಟೊರೆಸ್ ಸ್ಪೇನ್‌ಗೆ ಎರಡನೇ ವಿಶ್ವಕಪ್ ಪ್ರಶಸ್ತಿಯನ್ನು ತಂದುಕೊಟ್ಟರು. 2010ರ ವಿಶ್ವಕಪ್ ವಿಜೇತ ಸ್ಪೇನ್ ತಂಡದ ಆಟಗಾರರು ಪ್ರೇಕ್ಷಕ ಗ್ಯಾಲರಿಯಲ್ಲಿ ಉಪಸ್ಥಿತರಿದ್ದ ವೇಳೆ, ಟೊರೆಸ್ ಗೋಲು ದಾಖಲಿಸುತ್ತಿದ್ದಂತೆಯೇ ಇಡೀ ಕ್ರೀಡಾಂಗಣ ಸಂಭ್ರಮದಲ್ಲಿ ಮುಳುಗಿತು.

106ನೇ ನಿಮಿಷದಲ್ಲಿ ಮಾರ್ಟಿನ್ ಜುಬಿಮೆಂಡಿ ನೀಡಿದ ಪಾಸ್‌ ಅನ್ನು ನಿಕೊ ವಿಲಿಯಮ್ಸ್ ಹೆಡರ್ ಮೂಲಕ ಬಾಕ್ಸ್‌ನ ಮಧ್ಯಭಾಗಕ್ಕೆ ತಲುಪಿಸಿದರು. ಯಾವುದೇ ರಕ್ಷಣಾ ಆಟಗಾರರ ಕಣ್ಗಾವಲಿಲ್ಲದೆ ನಿಂತಿದ್ದ ಫೆರಾನ್ ಟೊರೆಸ್, ಮೊದಲ ಸ್ಪರ್ಶದಲ್ಲೇ ಅದ್ಭುತ ಫಿನಿಶಿಂಗ್ ಮೂಲಕ ಚೆಂಡನ್ನು ಗೋಲುಪೆಟ್ಟಿಗೆಯೊಳಗೆ ಸೇರಿಸಿ ಸ್ಪೇನ್‌ಗೆ 1-0 ಮುನ್ನಡೆ ತಂದುಕೊಟ್ಟರು.

ARG vs SPA: ಲಿಯೊನೆಲ್‌ ಮೆಸ್ಸಿ ಕನಸು ಭಗ್ನ, ಎರಡನೇ ಫಿಫಾ ವಿಶ್ವಕಪ್‌ ಮುಡಿಗೇರಿಸಿಕೊಂಡ ಸ್ಪೇನ್!

ಫೆರಾನ್ ಟೊರೆಸ್‌ರ ಸ್ಮರಣೀಯ ಗೋಲು

ವಿಶೇಷವೆಂದರೆ, ಫಿಫಾ ವಿಶ್ವಕಪ್ 2026ರಲ್ಲಿ ಫೆರಾನ್ ಟೊರೆಸ್ ದಾಖಲಿಸಿದ ಇದು ಮೊದಲ ಗೋಲಾಗಿತ್ತು. ಆದರೆ ಇದೇ ಗೋಲು ಸ್ಪೇನ್‌ಗೆ ವಿಶ್ವಕಪ್ ಪ್ರಶಸ್ತಿಯನ್ನು ತಂದುಕೊಟ್ಟ ಕಾರಣ, ಫುಟ್ಬಾಲ್‌ ಇತಿಹಾಸದಲ್ಲಿ ಚಿರಸ್ಥಾಯಿಯಾಗಿ ದಾಖಲಾಗುವಂತಾಯಿತು.

26ರ ವಯಸ್ಸಿನ ಟೊರೆಸ್ ಪ್ರಸ್ತುತ ಸ್ಪೇನ್‌ನ ಪ್ರತಿಷ್ಠಿತ ಕ್ಲಬ್ ಬಾರ್ಸಿಲೋನಾ ಪರ ಆಡುತ್ತಿದ್ದಾರೆ. 2022ರಲ್ಲಿ ಮ್ಯಾಂಚೆಸ್ಟರ್ ಸಿಟಿಯಿಂದ ಬಾರ್ಸಿಲೋನಾಗೆ ಸೇರ್ಪಡೆಯಾದ ಬಳಿಕ ಅವರು ತಂಡದೊಂದಿಗೆ ಮೂರು ಲಾ ಲೀಗಾ ಪ್ರಶಸ್ತಿಗಳು, ಮೂರು ಸ್ಪ್ಯಾನಿಷ್ ಸೂಪರ್ ಕಪ್ ಹಾಗೂ ಒಂದು ಕೋಪಾ ಡೆಲ್ ರೇ ಟ್ರೋಫಿ ಗೆದ್ದಿದ್ದಾರೆ.

ಇತ್ತೀಚಿನ ದಿನಗಳಲ್ಲಿ ಕ್ಲಬ್ ಮಟ್ಟದಲ್ಲಿ ಅವರ ಭವಿಷ್ಯದ ಕುರಿತು ಹಲವು ಊಹಾಪೋಹಗಳು ಕೇಳಿಬರುತ್ತಿದ್ದರೂ, ವಿಶ್ವಕಪ್ ಫೈನಲ್‌ನಲ್ಲಿ ದಾಖಲಿಸಿದ ಈ ಐತಿಹಾಸಿಕ ಗೋಲು ಫೆರಾನ್ ಟೊರೆಸ್ ಅವರ ವೃತ್ತಿಜೀವನದ ಅತ್ಯಂತ ಸ್ಮರಣೀಯ ಕ್ಷಣಗಳಲ್ಲಿ ಒಂದಾಗಿ ಉಳಿದಿದೆ.

ಬಾರ್ಸಿಲೋನಾ ಪರ ಮಿಂಚುತ್ತಿರುವ ಟೊರೆಸ್

ಫೆರಾನ್ ಟೊರೆಸ್ ಅವರ ಇತ್ತೀಚಿನ ಕ್ಲಬ್ ಪ್ರದರ್ಶನವೂ ಅತ್ಯಂತ ಗಮನಾರ್ಹವಾಗಿದೆ. ಮ್ಯಾಂಚೆಸ್ಟರ್ ಸಿಟಿಯಲ್ಲಿ ಪೆಪ್ ಗಾರ್ಡಿಯೊಲಾ ಅವರ ಮಾರ್ಗದರ್ಶನದಲ್ಲಿ ಪ್ರೀಮಿಯರ್ ಲೀಗ್ ಪ್ರಶಸ್ತಿ ಗೆದ್ದಿದ್ದಲ್ಲದೆ, ಚಾಂಪಿಯನ್ಸ್ ಲೀಗ್‌ನಲ್ಲಿ ರನ್ನರ್-ಅಪ್ ಆಗಿದ್ದ ಟೊರೆಸ್, ಕಳೆದ ಋತುವಿನಲ್ಲಿ ಬಾರ್ಸಿಲೋನಾಗೆ ಸತತ ಎರಡನೇ ಲಾ ಲೀಗಾ ಪ್ರಶಸ್ತಿ ಗೆಲ್ಲುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಅವರು ತಂಡಕ್ಕಾಗಿ 16 ಗೋಲುಗಳು ಮತ್ತು 2 ಅಸಿಸ್ಟ್‌ಗಳನ್ನು ದಾಖಲಿಸಿದ್ದರು.

ಆದರೆ, ವೇಲೆನ್ಸಿಯಾ ಅಕಾಡೆಮಿಯಿಂದ ಹೊರಹೊಮ್ಮಿದ ಈ ಸ್ಟ್ರೈಕರ್ ಬಗ್ಗೆ ವರ್ಗಾವಣೆಯ ಸುದ್ದಿಗಳು ಕೂಡ ಕೇಳಿಬರುತ್ತಿವೆ. ಯುಇಎಫ್‌ಎ ಚಾಂಪಿಯನ್ಸ್ ಲೀಗ್ ವಿಜೇತ ಪ್ಯಾರಿಸ್ ಸೇಂಟ್-ಜರ್ಮೈನ್ (PSG) ಟೊರೆಸ್ ಅವರನ್ನು ತಂಡಕ್ಕೆ ಸೇರಿಸಿಕೊಳ್ಳಲು ಆಸಕ್ತಿ ತೋರಿದೆ ಎನ್ನಲಾಗಿದೆ. ಲೂಯಿಸ್ ಎನ್ರಿಕೆ ನೇತೃತ್ವದ ಪಿಎಸ್‌ಜಿ ಜೊತೆ ಮಾತುಕತೆ ಮುಂದುವರಿದಿದ್ದು, ಟೊರೆಸ್‌ಗಾಗಿ ಸುಮಾರು 90 ಮಿಲಿಯನ್ ಡಾಲರ್ ವರ್ಗಾವಣೆ ಶುಲ್ಕದ ಬಗ್ಗೆ ಚರ್ಚೆಗಳು ನಡೆಯುತ್ತಿವೆ.