ಬಿಸಿಸಿಐ ಜೂ. ಕ್ರಿಕೆಟ್​ ಆಯ್ಕೆ ಸಮಿತಿಗೆ ಪರ್ವಿಂದರ್​ ಮುಖ್ಯಸ್ಥ

ನವದೆಹಲಿ, ಅ.24: ಭಾರತದ ಮಾಜಿ ವೇಗದ ಬೌಲರ್ ಪರ್ವಿಂದರ್ ಅವಾನಾ ಅವರನ್ನು, ಹೊಸದಾಗಿ ರಚಿಸಲಾದ ಬಿಸಿಸಿಐ ಜೂನಿಯರ್ ಆಯ್ಕೆ ಸಮಿತಿಯ ಅಧ್ಯಕ್ಷರನ್ನಾಗಿ ನೇಮಕ ಮಾಡಲಾಗಿದೆ. ಅವಾನಾ ಭಾರತಕ್ಕಾಗಿ ಎರಡು ಟಿ20 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದರು ಮತ್ತು 62 ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಭಾಗವಹಿಸಿ, 191 ವಿಕೆಟ್‌ಗಳನ್ನು ಪಡೆದಿದ್ದಾರೆ.

ಕ್ರಿಕೆಟ್​ ಸಲಹಾ ಸಮಿತಿಯ (ಸಿಎಸಿ) ಸಲಹೆಯ ಮೇರೆಗೆ ಜೂ.ಆಯ್ಕೆ ಸಮಿತಿ ರಚಿಸಲಾಗಿದ್ದು, ದೆಹಲಿಯ ಪರ್ವಿಂದರ್​ ಅವಾನ ಜತೆಗೆ ಕೃಷ್ಣ ದಾಸ್​, ರಾಕೇಶ್​ ಪಟೇಲ್​ ಹಾಗೂ ಎನ್​.ಅರ್ಜುನ್​ ಯಾದವ್​ ಇತರ ಸದಸ್ಯರಾಗಿರಲಿದ್ದಾರೆ. 5ನೇ ಸದಸ್ಯರನ್ನು ಶ್ರೀದಲ್ಲೇ ನೇಮಕ ಮಾಡುವುದಾಗಿ ಬಿಸಿಸಿಐ ತಿಳಿಸಿದೆ.

40 ವರ್ಷದ ಪರ್ವಿಂದರ್​ ಐಪಿಎಲ್​ನಲ್ಲಿ ಪಂಜಾಬ್​ ಕಿಂಗ್ಸ್​ ತಂಡದ ಭಾಗವಾಗಿದ್ದ ಅವರು , ಭಾರತ ಎ ಮತ್ತು ಶೇಷ ಭಾರತ ಪರವೂ ಆಡಿದ ಅನುಭವ ಹೊಂದಿದ್ದಾರೆ. ಕ್ರಿಕೆಟ್​ಗೆ ನಿವೃತ್ತಿ ಘೋಷಿಸಿದ ನಂತರ ಬಿಸಿಸಿಐ ಶ್ರೇಷ್ಠತಾ ಕೇಂದ್ರ (ಸಿಒಇ) ಹಾಗೂ 16, 19, 23 ವಯೋಮಿತಿ ದೆಹಲಿ ತಂಡ, 19 ವಯೋಮಿತಿ ಭಾರತ ತಂಡದ ತರಬೇತಿ ಬಳಗದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು.

ಜೂನಿಯರ್ ಕ್ರಿಕೆಟ್ ಸಮಿತಿಗೆ ಸದಸ್ಯರನ್ನು ನೇಮಕ ಮಾಡುವ ಸಲುವಾಗಿ ಕ್ರಿಕೆಟ್ ಸಲಹಾ ಸಮಿತಿಯು ಆಯ್ಕೆ ಪ್ರಕ್ರಿಯೆಯನ್ನು ನಡೆಸಿತು.

ನ್ಯೂಜಿಲೆಂಡ್ 'ಎ' ವಿರುದ್ಧ ಮೊದಲ ಅನಧಿಕೃತ ಟೆಸ್ಟ್; 113ಕ್ಕೆ ಭಾರತ ಆಲೌಟ್‌

"ಸಿಎಸಿ ಅರ್ಜಿದಾರರನ್ನು ಪರಿಶೀಲಿಸಿ ಸಂದರ್ಶನ ನಡೆಸಿತು. ಈ ಪ್ರಕ್ರಿಯೆಯ ನಂತರ, ಪರ್ವಿಂದರ್ ಅವಾನಾ ಅವರನ್ನು ಅಧ್ಯಕ್ಷರನ್ನಾಗಿ ಹಾಗೂ ಕೃಷ್ಣ ದಾಸ್, ರಾಕೇಶ್ ಪಟೇಲ್ ಮತ್ತು ಎನ್. ಅರ್ಜುನ್ ಯಾದವ್ ಅವರನ್ನು ಸಮಿತಿಯ ಸದಸ್ಯರನ್ನಾಗಿ ನೇಮಿಸಲು ಶಿಫಾರಸು ಮಾಡಿತು" ಎಂದು ಬಿಸಿಸಿಐ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಅಸ್ಸಾಂ ಮತ್ತು ಗೋವಾ ತಂಡಗಳ ಮಾಜಿ ವೇಗದ ಬೌಲರ್ ದಾಸ್, 49 ಪ್ರಥಮ ದರ್ಜೆ ಪಂದ್ಯಗಳನ್ನು ಆಡಿ 166 ವಿಕೆಟ್‌ಗಳನ್ನು ಪಡೆದಿದ್ದಾರೆ. ಅವರು ಭಾರತದ ಅಂಡರ್-19 ಮತ್ತು 'ಇಂಡಿಯಾ ಎ' ತಂಡಗಳನ್ನು ಪ್ರತಿನಿಧಿಸಿದ್ದರು. ನಂತರ, ಭಾರತದ ಅಂಡರ್-19 ತಂಡದ ಬೌಲಿಂಗ್ ಕೋಚ್ ಆಗಿ ಹಾಗೂ ಉತ್ತರಾಖಂಡ ರಣಜಿ ಟ್ರೋಫಿ ತಂಡದ ಬೌಲಿಂಗ್ ಕೋಚ್ ಆಗಿ ಕಾರ್ಯನಿರ್ವಹಿಸಿದ್ದಾರೆ.

ಪಟೇಲ್ ಗುಜರಾತ್ ಮತ್ತು ಬರೋಡಾ ತಂಡಗಳನ್ನು ಪ್ರತಿನಿಧಿಸಿದ್ದಾರೆ ಹಾಗೂ 'ಇಂಡಿಯಾ ಎ' ತಂಡಕ್ಕಾಗಿ ಆಡಿದ್ದಾರೆ. ಇದಲ್ಲದೆ ಅವರು ದುಲೀಪ್ ಟ್ರೋಫಿ, ದೇವಧರ್ ಟ್ರೋಫಿ ಮತ್ತು ಇರಾನಿ ಟ್ರೋಫಿಗಳಲ್ಲಿಯೂ ಭಾಗವಹಿಸಿದ್ದಾರೆ. ಅವರು ಬರೋಡಾ ಮತ್ತು ಗುಜರಾತ್ ತಂಡಗಳಲ್ಲಿ ಅಂಡರ್-19, ಅಂಡರ್-23 ಮತ್ತು ಹಿರಿಯರ ವಿಭಾಗಗಳಲ್ಲಿ ತರಬೇತುದಾರರಾಗಿ (ಕೋಚ್) ಕೆಲಸ ಮಾಡಿದ್ದಾರೆ. ಅಲ್ಲದೆ, 2025-26ರ ಋತುವಿನಲ್ಲಿ ಬರೋಡಾ ಅಂಡರ್-23 ತಂಡದ ಮುಖ್ಯ ತರಬೇತುದಾರರಾಗಿಯೂ ಕಾರ್ಯನಿರ್ವಹಿಸಿದ್ದಾರೆ.