ಭಾರತ ಟೆಸ್ಟ್ ತಂಡಕ್ಕೆ ಚೊಚ್ಚಲ ಕರೆ ಪಡೆದ 33 ವರ್ಷದ ಸರನ್ಶ್ ಜೈನ್ ಯಾರು?

ನವದೆಹಲಿ, ಜು. 28: ಶ್ರೀಲಂಕಾ ವಿರುದ್ಧದ ಎರಡು ಟೆಸ್ಟ್ ಸರಣಿಗೆ ಮಂಗಳವಾರ ಬಿಸಿಸಿಐ 15 ಸದಸ್ಯರ ಭಾರತ ತಂಡವನ್ನು ಪ್ರಕಟಿಸಿತು. ದೇಶೀಯ ಕ್ರಿಕೆಟ್‌ನಲ್ಲಿ ವರ್ಷಗಳ ಸ್ಥಿರ ಪ್ರದರ್ಶನದ ನಂತರ 33 ವರ್ಷದ ಸರನ್ಶ್ ಜೈನ್ ಮೊದಲ ಬಾರಿಗೆ ಟೆಸ್ಟ್ ತಂಡಕ್ಕೆ ಆಯ್ಕೆಯಾಗಿದ್ದಾರೆ. ಈ ಮೂಲಕ ಮಧ್ಯಪ್ರದೇಶದ ಆಲ್‌ರೌಂಡರ್‌ನ ಭಾರತ ಪರ ಆಡುವ ದೀರ್ಘ ಕಾಲದ ಕನಸು ನನಸಾಗುವ ಕಾಲ ಕೂಡಿಬಂದಿದೆ.

ದೇಶೀಯ ಕ್ರಿಕೆಟ್ ಅಭಿಮಾನಿಗಳಿಗೆ ಜೈನ್ ಸೇರ್ಪಡೆ ಅಚ್ಚರಿಯೇನಲ್ಲ. ಆಫ್-ಸ್ಪಿನ್ನರ್ ಭಾರತದ ಆಲ್‌ರೌಂಡರ್‌ಗಳಲ್ಲಿ ಅತ್ಯಂತ ಬಲಿಷ್ಠವಾದ ರೆಡ್-ಬಾಲ್ ದಾಖಲೆಗಳಲ್ಲಿ ಒಂದನ್ನು ನಿರ್ಮಿಸಿದ್ದಾರೆ. ಬ್ಯಾಟಿಂಗ್ ಮತ್ತು ಬಾಲಿಂಗ ಎರಡರಲ್ಲೂ ಪ್ರದರ್ಶನ ನೀಡುತ್ತಾ ಬಂದರೂ ಅವರಿಗೆ ಹಿರಿಯರ ತಂಡದಲ್ಲಿ ಅವಕಾಶ ಸಿಕ್ಕಿರಲಿಲ್ಲ. ಇದೀಗ ಮೊದಲ ಬಾರಿಗೆ ರಾಷ್ಟ್ರೀಯ ತಂಡದ ಕರೆ ಪಡೆದಿದ್ದಾರೆ.

ಸ್ನಾಯು ಸೆಳೆತದ ಗಾಯದಿಂದ ಚೇತರಿಸಿಕೊಳ್ಳುತ್ತಿರುವ ವಾಷಿಂಗ್ಟನ್ ಸುಂದರ್ ಬದಲಿಗೆ ಜೈನ್ ಅವಕಾಶ ಪಡೆದರು. ಸ್ಪಿನ್‌ ಜತೆಗೆ ಕೆಳ ಕ್ರಮಾಂಕದ ಬ್ಯಾಟಿಂಗ್‌ನಲ್ಲಿಯೂ ಅಮೂಲ್ಯವಾದ ಸಾಮರ್ಥ್ಯವನ್ನು ಹೊಂದಿರುವ ಕಾರಣ ಆಯ್ಕೆದಾರರು ಮೊದಲ ಪಂದ್ಯದಲ್ಲಿ ಜೈನ್ ಅವರನ್ನು ಆಡಿಸುವ ಸಾಧ್ಯತೆ ಬಲವಾಗಿದೆ. ಇತ್ತೀಚೆಗೆ ಶ್ರೀಲಂಕಾದ ಭಾರತ ಎ ಪ್ರವಾಸದಲ್ಲಿ ಜೈನ್ ಪ್ರಭಾವಿತರಾಗಿದ್ದರು. ಎರಡು ಪಂದ್ಯಗಳಲ್ಲಿ ಆರು ವಿಕೆಟ್‌ಗಳನ್ನು ಕಬಳಿಸುವುದರ ಜೊತೆಗೆ ಅಜೇಯ 70 ರನ್‌ಗಳನ್ನು ಗಳಿಸಿದ್ದರು.

ಜೈನ್ ಗಾಲೆಯಲ್ಲಿ ಪದಾರ್ಪಣೆ ಮಾಡಿದರೆ, 2021 ರಲ್ಲಿ ಬ್ರಿಸ್ಬೇನ್‌ನಲ್ಲಿ ವಾಷಿಂಗ್ಟನ್ ಸುಂದರ್ ನಂತರ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ ಭಾರತದ ಮೊದಲ ಸ್ಪೆಷಲಿಸ್ಟ್ ಆಫ್-ಸ್ಪಿನ್ನರ್ ಆಗಲಿದ್ದಾರೆ.

ಯಾರು ಈ ಸರನ್ಶ್ ಜೈನ್?

ಇಂದೋರ್‌ನಲ್ಲಿ ಜನಿಸಿದ ಜೈನ್, 2014-15ರ ಋತುವಿನಲ್ಲಿ ಮಧ್ಯಪ್ರದೇಶ ಪರ ಪ್ರಥಮ ದರ್ಜೆ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದರು. ಅಂದಿನಿಂದ ತಂಡದ ಅತ್ಯಂತ ವಿಶ್ವಾಸಾರ್ಹ ಪ್ರದರ್ಶನ ನೀಡುವವರಲ್ಲಿ ಒಬ್ಬರಾಗಿದ್ದಾರೆ. 54 ಪ್ರಥಮ ದರ್ಜೆ ಪಂದ್ಯಗಳಲ್ಲಿ, ಬಲಗೈ ಆಫ್ ಸ್ಪಿನ್ನರ್ 31.75 ರ ಸರಾಸರಿಯಲ್ಲಿ 2,000 ಕ್ಕೂ ಹೆಚ್ಚು ರನ್ ಗಳಿಸಿದ್ದಾರೆ. 27.30 ರ ಸರಾಸರಿಯಲ್ಲಿ 188 ವಿಕೆಟ್‌ಗಳನ್ನು ಕಬಳಿಸಿದ್ದಾರೆ.

ಕ್ರಿಕೆಟ್‌ ಕುಟುಂಬದಿಂದ ಬಂದವರಾಗಿರುವ ಸರನ್ಶ್ ಅವರ ತಂದೆ ಸುಬೋಧ್ ಜೈನ್ ರಣಜಿ ಟ್ರೋಫಿಯಲ್ಲಿ ಮಧ್ಯಪ್ರದೇಶವನ್ನು ಪ್ರತಿನಿಧಿಸಿದ್ದರು. ಸರನ್ಶ್ ಅವರ ವೃತ್ತಿಜೀವನದ ಆರಂಭದಲ್ಲಿ, ಆಸ್ಟ್ರೇಲಿಯಾದಲ್ಲಿ ಕ್ರಿಕೆಟ್ ಪ್ರವಾಸಕ್ಕೆ ಹೋಗಿದ್ದಾಗ ಅವರ ತಂದೆ ಕ್ಯಾನ್ಸರ್ ಶಸ್ತ್ರಚಿಕಿತ್ಸೆಗೆ ಒಳಗಾದರು. ಈ ವೇಳೆ ಕುಟುಂಬ ಕಠಿಣ ಹಂತವನ್ನು ಎದುರಿಸಿತು. ಶಸ್ತ್ರಚಿಕಿತ್ಸೆಯ ನಂತರ ಮಾತನಾಡಲು ಸಾಧ್ಯವಾಗದ ಸುಬೋಧ್ ತಮ್ಮ ಮಗನಿಗೆ ಕ್ರಿಕೆಟ್‌ನತ್ತ ಗಮನಹರಿಸುವಂತೆ ಕೇಳಿಕೊಂಡು ಒಂದು ಟಿಪ್ಪಣಿ ಬರೆದರು. ಜೈನ್ ತಮ್ಮ ವೃತ್ತಿಜೀವನದುದ್ದಕ್ಕೂ ಆ ಕೈಬರಹದ ಸಂದೇಶವನ್ನು ಸಂರಕ್ಷಿಸಿದ್ದಾರೆ.

ದುರಂತವನ್ನೇ ಸೋಲಿಸಿ ಚೊಚ್ಚಲ ಪ್ರಯತ್ನದಲ್ಲೇ ಕಾಮನ್‌ವೆಲ್ತ್ ಪದಕ ಗೆದ್ದ ಕನ್ನಡತಿ ಶಿಲ್ಪಾ

ಸರನ್ಶ್ ಮಧ್ಯಪ್ರದೇಶದ ಐತಿಹಾಸಿಕ 2021-22 ರಣಜಿ ಟ್ರೋಫಿ ವಿಜೇತ ತಂಡದ ಪ್ರಮುಖ ಸದಸ್ಯರಾಗಿದ್ದರು. ಮುಂಬೈ ವಿರುದ್ಧದ ಫೈನಲ್‌ನಲ್ಲಿ ನಿರ್ಣಾಯಕ 57 ರನ್ ಗಳಿಸುವ ಮೊದಲು ನಾಕೌಟ್ ಹಂತಗಳಲ್ಲಿ ಉತ್ತಮ ಪ್ರದರ್ಶನ ನೀಡಿ ತಂಡವು ತಮ್ಮ ಚೊಚ್ಚಲ ಪ್ರಶಸ್ತಿಯನ್ನು ಎತ್ತಿ ಹಿಡಿಯಲು ಸಹಾಯ ಮಾಡಿದರು. 2022-23ರ ರಣಜಿ ಟ್ರೋಫಿಯಲ್ಲಿ, ಜೈನ್ 360 ರನ್ ಗಳಿಸಿದರು ಮತ್ತು 35 ವಿಕೆಟ್‌ಗಳನ್ನು ಕಬಳಿಸಿದರು, ಈ ಪ್ರದರ್ಶನವು ಅವರಿಗೆ ಟೂರ್ನಮೆಂಟ್‌ನ ಅತ್ಯುತ್ತಮ ಆಲ್‌ರೌಂಡರ್ ಆಗಿ ಲಾಲಾ ಅಮರನಾಥ್ ಪ್ರಶಸ್ತಿಯನ್ನು ತಂದುಕೊಟ್ಟಿತು.

ನಂತರ ಅವರು ಮತ್ತೊಂದು ಅಸಾಧಾರಣ ರಣಜಿ ಅಭಿಯಾನವನ್ನು ನಡೆಸಿದರು. 57.55 ಸರಾಸರಿಯಲ್ಲಿ 518 ರನ್‌ಗಳನ್ನು ಗಳಿಸಿದರು ಮತ್ತು 20.43 ಸರಾಸರಿಯಲ್ಲಿ 30 ವಿಕೆಟ್‌ಗಳನ್ನು ಪಡೆದರು. 2025ರ ದುಲೀಪ್ ಟ್ರೋಫಿಯಲ್ಲಿ ಜೈನ್ ತಮ್ಮ ಖ್ಯಾತಿಯನ್ನು ಹೆಚ್ಚಿಸಿಕೊಂಡರು. ಅಲ್ಲಿ ಅವರು 16 ವಿಕೆಟ್‌ಗಳನ್ನು ಪಡೆದು ಸೆಂಟ್ರಲ್ ಝೋನ್ ತಂಡವನ್ನು ಪ್ರಶಸ್ತಿಗೆ ಕೊಂಡೊಯ್ದರು.