ನೋಡ ನೋಡುತ್ತಿದ್ದಂತೆ ನದಿ ತಟದಲ್ಲಿದ್ದ 12 ವರ್ಷದ ಬಾಲಕನನ್ನೇ ಎಳೆದೊಯ್ದ ಮೊಸಳೆ; ಬೆಚ್ಚಿಬಿದ್ದ ಗ್ರಾಮಸ್ಥರು
ಉತ್ತರ ಪ್ರದೇಶದ ಬಹ್ರೈಚ್ ಜಿಲ್ಲೆಯ ಘಾಘ್ರಾ ನದಿಯಲ್ಲಿ 12 ವರ್ಷದ ಬಾಲಕನ ಮೇಲೆ ದೈತ್ಯ ಮೊಸಳೆ ದಾಳಿ ನಡೆಸಿ ಎಳೆದೊಯ್ದ ಪರಿಣಾಮ ಬಾಲಕ ಮೃತಪಟ್ಟಿದ್ದಾನೆ. ಬಾಲಕನನ್ನು ರಕ್ಷಿಸಲು ಮಾವ ಪ್ರಾಣಪಣವಾಗಿ ಪ್ರಯತ್ನಿಸಿದರೂ ಸಾಧ್ಯವಾಗಲಿಲ್ಲ. ಅರಣ್ಯ ಇಲಾಖೆ ಮತ್ತು ಪೊಲೀಸರು ನಡೆಸಿದ ಶೋಧ ಕಾರ್ಯಾಚರಣೆಯಲ್ಲಿ ಸಂಜೆ ವೇಳೆಗೆ ಮೃತದೇಹ ಪತ್ತೆಯಾಗಿದೆ. ಘಟನೆ ಸ್ಥಳೀಯರಲ್ಲಿ ತೀವ್ರ ಆತಂಕ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ.
ಸಾಂದರ್ಭಿಕ ಚಿತ್ರ -
ಲಖನೌ: ವನ್ಯಜೀವಿಗಳ ದಾಳಿಗಳು ದಿನೇ ದಿನೇ ಹೆಚ್ಚಾಗುತ್ತಿರುವ ಬೆನ್ನಲ್ಲೇ, ಉತ್ತರ ಪ್ರದೇಶ (Uttar Pradesh)ದ ಬಹ್ರೈಚ್(Bahraich) ಜಿಲ್ಲೆಯಲ್ಲಿ ಅತ್ಯಂತ ಭೀಕರ ಘಟನೆಯೊಂದು ಸಂಭವಿಸಿದೆ. ಹಸನ್ಪುರ (Hasanpur) ತಹಸಿಲ್ ವ್ಯಾಪ್ತಿಯ ಘಾಘ್ರಾ ನದಿಯಲ್ಲಿ ದೈತ್ಯ ಮೊಸಳೆ (crocodile)ಯೊಂದು 12 ವರ್ಷದ ಬಾಲಕನನ್ನು ಎಳೆದೊಯ್ದು ಬಲಿಪಡೆದ ದಾರುಣ ಘಟನೆ ವರದಿಯಾಗಿದೆ. ಈ ಆಘಾತಕಾರಿ ಘಟನೆ ಇಡೀ ಭಾಗದ ಜನತೆಯನ್ನು ಕಣ್ಣೀರಲ್ಲಿ ಮುಳುಗಿಸಿದ್ದು, ತೀವ್ರ ಭೀತಿ ಹುಟ್ಟಿಸಿದೆ.
ಘಟನೆಯ ವಿವರ:
ಪೊಲೀಸರು ಮತ್ತು ಅರಣ್ಯ ಇಲಾಖೆ ಅಧಿಕಾರಿಗಳು ನೀಡಿರುವ ಮಾಹಿತಿಯ ಪ್ರಕಾರ, ಮೃತ ದುರ್ದೈವಿ ಬಾಲಕ ತನ್ನ ಮಾವ ಉದಯ್ರಾಜ್ ಸಿಂಗ್ ಅವರೊಂದಿಗೆ ಘಾಘ್ರಾ ನದಿಯ ಸಮೀಪದಲ್ಲಿದ್ದ ತಮ್ಮ ಕೃಷಿ ಜಮೀನಿಗೆ ಕೆಲಸದ ನಿಮಿತ್ತ ತೆರಳಿದ್ದನು. ಮಧ್ಯಾಹ್ನದ ವೇಳೆಗೆ ಜಮೀನಿನಲ್ಲಿದ್ದಾಗ, ಬಾಲಕನು ಶೌಚಕ್ಕಾಗಿ ನದಿಯ ದಡದ ಕಡೆಗೆ ಒಬ್ಬನೇ ಹೋಗಿದ್ದನು. ಇದೇ ವೇಳೆ ದಡದಲ್ಲಿ ಮೊದಲೇ ಹೊಂಚು ಹಾಕಿ ಕುಳಿತಿದ್ದ ದೈತ್ಯ ಮೊಸಳೆಯೊಂದು ಹಠಾತ್ತಾಗಿ ಬಾಲಕನ ಮೇಲೆ ಎರಗಿದೆ.
ಮಾವನ ಸಾಹಸ ವಿಫಲ:
ಬಾಲಕನ ಭೀಕರ ಕಿರುಚಾಟವನ್ನು ಕೇಳಿದ ಉದಯ್ರಾಜ್ ತಕ್ಷಣವೇ ನದಿಯ ದಡದತ್ತ ಓಡಿಬಂದಿದ್ದಾರೆ. ಮೊಸಳೆಯ ದವಡೆಯಿಂದ ಮಗುವನ್ನು ಬಿಡಿಸಲು ಅವರು ತಮ್ಮ ಪ್ರಾಣದ ಹಂಗು ತೊರೆದು ತೀವ್ರವಾಗಿ ಹೋರಾಟ ನಡೆಸಿದರು. ಆದರೆ, ಅತ್ಯಂತ ಬಲಶಾಲಿಯಾಗಿದ್ದ ಆ ಮೊಸಳೆ, ಉದಯ್ರಾಜ್ ಅವರ ಹಿಡಿತದಿಂದ ಬಾಲಕನನ್ನು ಕಸಿದುಕೊಂಡು, ಆಳವಾದ ನೀರಿನತ್ತ ಎಳೆದೊಯ್ದು ಕಣ್ಮರೆಯಾಗಿದೆ. ಕಣ್ಣೆದುರೇ ಈ ದುರಂತ ನಡೆದರೂ ಏನು ಮಾಡಲಾಗದ ಅಸಹಾಯಕ ಸ್ಥಿತಿ ಅವರದ್ದಾಗಿತ್ತು.
ಮೃತದೇಹ ಪತ್ತೆ, ಗ್ರಾಮಸ್ಥರ ಆಕ್ರೋಶ:
ಈ ಭೀಕರ ದಾಳಿಯ ಸುದ್ದಿ ಕಾಡ್ಗಿಚ್ಚಿನಂತೆ ಹರಡುತ್ತಿದ್ದಂತೆಯೇ ನೂರಾರು ಗ್ರಾಮಸ್ಥರು ನದಿಯ ದಡದಲ್ಲಿ ಜಮಾಯಿಸಿದರು. ವಿಷಯ ತಿಳಿದ ತಕ್ಷಣವೇ ಕಾರ್ಯಪ್ರವೃತ್ತರಾದ ಬಹ್ರೈಚ್ ಅರಣ್ಯ ವಿಭಾಗದ ಸಿಬ್ಬಂದಿ ಮತ್ತು ಸ್ಥಳೀಯ ಪೊಲೀಸರು ಜಂಟಿ ಶೋಧ ಕಾರ್ಯಾಚರಣೆಯನ್ನು ಆರಂಭಿಸಿದರು. ನದಿಯಲ್ಲಿ ದೊಡ್ಡ ಬಲೆಗಳನ್ನು ಹಾಕಿ ಬಾಲಕನಿಗಾಗಿ ವ್ಯಾಪಕ ಶೋಧ ನಡೆಸಲಾಯಿತು. ಆರಂಭಿಕ ಗಂಟೆಗಳಲ್ಲಿ ಯಾವುದೇ ಸುಳಿವು ಸಿಗದಿದ್ದರೂ, ನಿರಂತರ ಕಾರ್ಯಾಚರಣೆಯ ನಂತರ ಅಂತಿಮವಾಗಿ ಸಂಜೆ ವೇಳೆಗೆ ಬಾಲಕನ ಮೃತದೇಹ ಪತ್ತೆಯಾಗಿದೆ. ನದಿ ಪಾತ್ರದ ಜನರಲ್ಲಿ ಘಟನೆ ತೀವ್ರ ಆತಂಕ ಮನೆಮಾಡುವಂತೆ ಮಾಡಿದೆ.