ಮರಿ ಕಳೆದುಕೊಂಡು ದುಃಖದಲ್ಲಿ 3 ತಿಂಗಳ ಹಸುಗೂಸನ್ನು ಒತ್ತೆ ಇರಿಸಿಕೊಂಡ ಮಂಗ!

ಲಖನೌ: ಉತ್ತರ ಪ್ರದೇಶ (Uttar Pradesh)ದ ಮುಜಾಫರ್‌ನಗರ ಜಿಲ್ಲೆಯಲ್ಲಿ ಮಂಗವೊಂದು ಮೂರು ತಿಂಗಳ ಹಸುಗೂಸನ್ನು ಸುಮಾರು ಎರಡು ಗಂಟೆಗಳ ಕಾಲ ಮನೆಯೊಳಗೆ ಒತ್ತೆ ಇರಿಸಿಕೊಂಡ ಅಪರೂಪದ ಹಾಗೂ ಆತಂಕಕಾರಿ ಘಟನೆ ನಡೆದಿದೆ. ಜಿಲ್ಲಾ ಕೇಂದ್ರದಿಂದ ಸುಮಾರು 15 ಕಿಮೀ ದೂರದಲ್ಲಿರುವ ಚಾರ್ತಾವಾಲ್ ಪಟ್ಟಣದಲ್ಲಿ ಮಂಗಳವಾರ ಈ ಘಟನೆ ಸಂಭವಿಸಿದ್ದು, ಇದಕ್ಕೆ ಸಂಬಂಧಿಸಿದ ವಿಡಿಯೋ ಬುಧವಾರ ಹೊರಬಿದ್ದಿದೆ. ಈ ಘಟನೆಯು ಇಡೀ ಗ್ರಾಮದಲ್ಲಿ ತಲ್ಲಣ ಮೂಡಿಸಿತ್ತು.

ಮಗುವಿನ ಮೇಲಿನ ವಿಚಿತ್ರ ಮಮಕಾರ

ಕುಟುಂಬದ ಸದಸ್ಯರು ಮನೆಯ ಕೆಲಸದಲ್ಲಿ ನಿರತರಾಗಿದ್ದಾಗ, ಮಧ್ಯಾಹ್ನ 2 ಗಂಟೆಯ ಸುಮಾರಿಗೆ ಹೆಣ್ಣು ಮಂಗವೊಂದು ಮನೆಯ ಮೇಲ್ಛಾವಣಿಯ ಮೂಲಕ ರಹಸ್ಯವಾಗಿ ಒಳಗೆ ಪ್ರವೇಶಿಸಿದೆ. ಮಗು ಕೋಣೆಯ ಹಾಸಿಗೆಯ ಮೇಲೆ ಮಲಗಿದ್ದಾಗ ಅಲ್ಲಿಗೆ ಬಂದ ಮಂಗ, ಮಗುವಿನ ಮೇಲೆ ದಾಳಿ ಮಾಡುವ ಬದಲು ಅತ್ಯಂತ ಪ್ರೀತಿಯಿಂದ ಮಗುವನ್ನು ಮುಟ್ಟುತ್ತಾ ಆಟವಾಡತೊಡಗಿದೆ. ಮಗುವಿನ ಅಳು ಕೇಳಿ ತಾಯಿ ಓಡಿ ಬಂದಾಗ, ಮಗುವಿನ ಪಕ್ಕದಲ್ಲಿ ಮಂಗ ಕುಳಿತಿರುವುದನ್ನು ಕಂಡು ಆಕೆ ಕಿರುಚಾಡಿದ್ದಾರೆ. ಇದರಿಂದ ಗಾಬರಿಗೊಂಡ ನೆರೆಹೊರೆಯವರು ಸ್ಥಳಕ್ಕೆ ಧಾವಿಸಿದರು.

Viral News: ಶೇಕಡಾ 49 ಅಂಕ ಪಡೆದ SSLC ವಿದ್ಯಾರ್ಥಿಯ ಫೋಟೊ ಶೇರ್ ಮಾಡಿದ ವ್ಯಕ್ತಿಯ ವಿರುದ್ಧ ನೆಟ್ಟಿಗರ ಆಕ್ರೋಶ

ಸೇರಿದ್ದ ಜನರು ಮಂಗನನ್ನು ಓಡಿಸಲು ಕೋಲು ಮತ್ತು ಆಹಾರವನ್ನು ಬಳಸಿದರೂ ಸಹ, ಅದು ಮಗುವನ್ನು ಬಿಟ್ಟು ಕದಲದೆ ಜನರ ಮೇಲೆ ದಾಳಿ ಮಾಡಲು ಮುಂದಾಯಿತು. ಪರಿಸ್ಥಿತಿ ಗಂಭೀರವಾಗುತ್ತಿರುವುದನ್ನು ಕಂಡು ಪ್ರಾಣಿ ರಕ್ಷಕ ಸನ್ನಿ ಚೋಪ್ರಾ ಅವರನ್ನು ಸಂಪರ್ಕಿಸಲಾಯಿತು. ಅವರು ತಮ್ಮ ತಂಡದೊಂದಿಗೆ ಬಂದು ವಿಭಿನ್ನವಾಗಿ ಕಾರ್ಯಾಚರಣೆ ನಡೆಸಿದರು. ಮಂಗನ ಗಮನವನ್ನು ಬೇರೆಡೆಗೆ ಸೆಳೆಯಲು ಮೊಬೈಲ್ ಫೋನ್‌ನಲ್ಲಿ ವನ್ಯಜೀವಿಗಳ ವಿಡಿಯೋಗಳನ್ನು ಪ್ರಸಾರ ಮಾಡಲಾಯಿತು.

ಮಂಗವು ವಿಡಿಯೋ ನೋಡುವಲ್ಲಿ ಮಗ್ನವಾದ ಕ್ಷಣವನ್ನು ಬಳಸಿಕೊಂಡ ರಕ್ಷಕರು ಜಾಗರೂಕತೆಯಿಂದ ಮಗುವನ್ನು ಸುರಕ್ಷಿತವಾಗಿ ಮಂಗನ ಹಿಡಿತದಿಂದ ಹೊರತೆಗೆದರು. ಆರು ದಿನಗಳ ಹಿಂದೆಯಷ್ಟೇ ಈ ಮಂಗವು ತನ್ನ ಸ್ವಂತ ಮರಿಯನ್ನು ಕಳೆದುಕೊಂಡಿತ್ತು ಎಂದು ತಿಳಿದುಬಂದಿದೆ. ಮರಿಯನ್ನು ಕಳೆದುಕೊಂಡ ದುಃಖದಲ್ಲಿದ್ದ ಆ ಮಂಗ, ಮಗುವನ್ನೇ ತನ್ನ ಮರಿ ಎಂದು ಭಾವಿಸಿ ಈ ರೀತಿ ನಡೆದುಕೊಂಡಿರಬಹುದು ಎಂದು ಚೋಪ್ರಾ ವಿವರಿಸಿದ್ದಾರೆ. ಅದೃಷ್ಟವಶಾತ್ ಎರಡು ಗಂಟೆಗಳ ಕಾಲ ಮಂಗನ ವಶದಲ್ಲಿದ್ದರೂ ಮಗುವಿಗೆ ಯಾವುದೇ ಗಾಯಗಳಾಗಿಲ್ಲ ಮತ್ತು ಮಗು ಈಗ ಸಂಪೂರ್ಣ ಸುರಕ್ಷಿತವಾಗಿದೆ.