ಶುಲ್ಕ ಕಡಿತ, ಗ್ರಾಹಕರಿಗೆ ರಿಯಾಯಿತಿಯಿಂದ ಆರ್ಥಿಕ ಹೊರೆ: ಸ್ವಿಗ್ಗಿಗೆ ಬೆಂಗಳೂರಿನ ಹೊಟೇಲ್ ಆಡಳಿತ ಮಂಡಳಿಯಿಂದ ಪತ್ರ

ಬೆಂಗಳೂರು: ಹೊಟೇಲ್ ಮತ್ತು ರೆಸ್ಟೋರೆಂಟ್ ಮಾಲೀಕರು (Bengaluru Hotels Association) ಸ್ವಿಗ್ಗಿ (Swiggy) ಪ್ಲಾಟ್‌ಫಾರ್ಮ್‌ನಲ್ಲಿ ಎದುರಿಸುತ್ತಿರುವ ಹಲವಾರು ಕಾರ್ಯಾಚರಣೆಯ ಸಮಸ್ಯೆಗಳ ಕುರಿತು ಕಳವಳ ವ್ಯಕ್ತಪಡಿಸಿರುವ ಬೆಂಗಳೂರಿನ ಹೊಟೇಲ್ ಆಡಳಿತ ಮಂಡಳಿಯು ಈ ಕುರಿತು ಕ್ರಮ ಕೈಗೊಳ್ಳುವಂತೆ ಸ್ವಿಗ್ಗಿ ಸಿಇಒ ರೋಹಿತ್ ಕಪೂರ್ (Swiggy CEO Rohit Kapoor) ಅವರಿಗೆ ಪತ್ರ ಬರೆದಿದೆ. ಬಡ್ತಿ, ಕಮಿಷನ್‌, ಸೇವಾ ಶುಲ್ಕ ಮತ್ತು ರಿಯಾಯಿತಿಗಳು ಸೇರಿದಂತೆ ಹಲವಾರು ಸಮಸ್ಯೆಗಳ ಕುರಿತು ತಕ್ಷಣ ಕ್ರಮ ಕೈಗೊಳ್ಳುವಂತೆ ಸಂಘವು ಮನವಿ ಮಾಡಿದ್ದು, ಹೊಟೇಲ್ ಮಾಲೀಕರ ಲಿಖಿತ ಒಪ್ಪಿಗೆಯಿಲ್ಲದೆ ಯಾವುದೇ ಬಡ್ತಿಗಳನ್ನು ಸಕ್ರಿಯಗೊಳಿಸದಂತೆ ಒತ್ತಾಯಿಸಿದೆ.

ಸ್ವಿಗ್ಗಿಯಿಂದ ಹೊಟೇಲ್ ಮತ್ತು ರೆಸ್ಟೋರೆಂಟ್ ಮಾಲೀಕರಿಗೆ ಉಂಟಾಗುತ್ತಿರುವ ಆರ್ಥಿಕ ಹೊರೆಯ ಬಗ್ಗೆ ಪತ್ರದಲ್ಲಿ ಉಲ್ಲೇಖಿಸಿರುವ ಬೆಂಗಳೂರಿನ ಹೊಟೇಲ್ ಆಡಳಿತ ಮಂಡಳಿಯು, ಪಾವತಿಗಳಿಂದ ಕಡಿತಗೊಳಿಸುವಿಕೆ ಮೇಲೆ ನಿರ್ಬಂಧ ವಿಧಿಸುವಂತೆ ಮನವಿ ಮಾಡಿದೆ.

ಭೀಮ ಮಳಿಗೆಯ 22ನೇ ಸುವರ್ಣ ವಾರ್ಷಿಕೋತ್ಸವ

ಒಪ್ಪಿಕೊಂಡಿರುವ ಕಮಿಷನ್ ಮತ್ತು ಶಾಸನಬದ್ಧ ಶುಲ್ಕಗಳನ್ನು ಮಾತ್ರ ಕಡಿತಗೊಳಿಸಬೇಕು ಎಂದು ಹೇಳಿರುವ ಹೊಟೇಲ್ ಆಡಳಿತ ಮಂಡಳಿಯು, ಬಿಲ್ ನ ಆಹಾರದ ಮೇಲೆ ಮಾತ್ರ ಸೇವಾ ಶುಲ್ಕ ವಿಧಿಸಬೇಕು. ಜಿಎಸ್‌ಟಿ ಮೊತ್ತದ ಮೇಲೆ ಅಲ್ಲ. ಪ್ರಚಾರ ಮತ್ತು ಮಾರುಕಟ್ಟೆ ಒಪ್ಪಂದಗಳ ನವೀಕರಣಕ್ಕೂ ಮೊದಲು ಹೊಟೇಲ್ ಮಾಲೀಕರ ಸ್ಪಷ್ಟ ಒಪ್ಪಿಗೆಯನ್ನು ಪಡೆಯಬೇಕು ಎಂದು ಒತ್ತಾಯಿಸಿದೆ.

ಆರ್ಥಿಕ ಹೊರೆಯನ್ನು ಉಂಟು ಮಾಡುವ ದೂರದ ಶುಲ್ಕ, ಪಾವತಿ ಸಂಗ್ರಹ ಶುಲ್ಕ, ಪಾಕೆಟ್ ಹೀರೋ ಶುಲ್ಕ, ಸ್ವಿಗ್ಗಿ ಒನ್ ಶುಲ್ಕ, ರೆಸ್ಟೋರೆಂಟ್ ರದ್ದತಿ ಶುಲ್ಕ, ಕಾಲ್ ಸೆಂಟರ್ ಶುಲ್ಕ, ರೆಸ್ಟೋರೆಂಟ್ ಪ್ರಾಯೋಜಿತ ವಿತರಣಾ ಶುಲ್ಕ ಮತ್ತು ಬೋಲ್ಟ್ ಶುಲ್ಕಗಳು ಸೇರಿದಂತೆ ಅನಧಿಕೃತ ಶುಲ್ಕಗಳನ್ನು ರದ್ದುಗೊಳಿಸುವಂತೆ ಮನವಿ ಮಾಡಿರುವ ಹೊಟೇಲ್ ಆಡಳಿತ ಮಂಡಳಿಯು, ಕಾರ್ಯಾಚರಣೆ ಕುರಿತು ಉಂಟಾಗುತ್ತಿರುವ ಸಮಸ್ಯೆಗಳ ಕುರಿತು ಚರ್ಚೆ ನಡೆಸಿ ಪರಿಹರಿಸಲು ಸ್ವಿಗ್ಗಿಯ ಸಂಪರ್ಕ ಕೇಂದ್ರವು ತಿಂಗಳಿಗೊಮ್ಮೆಯಾದರೂ ಪ್ರತಿ ಹೊಟೇಲ್‌ಗೆ ಭೇಟಿ ನೀಡುವಂತೆ ಒತ್ತಾಯಿಸಿದೆ.

ಕಾರ್ಯಾಚರಣೆ, ಲೆಕ್ಕಪತ್ರ ನಿರ್ವಹಣೆ ಮತ್ತು ಪಾವತಿ ಸಂಬಂಧಿತ ಸಮಸ್ಯೆಗಳ ಕುರಿತು ಸಹಾಯಕ್ಕೆ ಹೊಟೇಲ್ ಮಾಲೀಕರಿಗೆ ಅನುಕೂಲವಾಗುವಂತೆ ಪ್ರತಿ ಶುಕ್ರವಾರ ಸಂಘದ ಕಚೇರಿಯಲ್ಲಿ ಮೀಸಲಾದ ಸಹಾಯವಾಣಿಯನ್ನು ಸ್ಥಾಪಿಸಲು ಮನವಿ ಮಾಡಿರುವ ಮಂಡಳಿಯು ಹೊಟೇಲ್ ಮತ್ತು ರೆಸ್ಟೋರೆಂಟ್ ಮಾಲೀಕರ ಈ ಕಳವಳಗಳನ್ನು ಆದ್ಯತೆಯಾಗಿ ಪರಿಗಣಿಸಿ ತಕ್ಷಣ ಸರಿ ಪಡಿಸುವಂತೆ ಮನವಿ ಮಾಡಿದೆ.

ಹೊಟೇಲ್ ಆಡಳಿತ ಮಂಡಳಿಯ ಬೇಡಿಕೆಗಳನ್ನು ಈಡೇರಿಸದೇ ಇದ್ದರೆ ಆಗಸ್ಟ್ 15ರ ಬಳಿಕ ಸ್ವಿಗ್ಗಿ ಸೇವೆಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸುವುದಾಗಿ ಎಚ್ಚರಿಕೆ ನೀಡಿದೆ. ಇತ್ತೀಚೆಗೆ ನಡೆದಿರುವ ಹೊಟೇಲ್ ಮಾಲೀಕರ ಸಭೆಯಲ್ಲಿ ಈ ನಿರ್ಣಯ ಕೈಗೊಳ್ಳಲಾಗಿದ್ದು, ನ್ಯಾಯಯುತ ಹಾಗೂ ಪಾರದರ್ಶಕ ಪಾಲುದಾರಿಕೆಗಾಗಿ ಸ್ವಿಗ್ಗಿಯನ್ನು ಒತ್ತಾಯಿಸಿದೆ.

ದಶಕದ ಮೈಲುಗಲ್ಲಿನಲ್ಲಿ ಜಿ.ಎಸ್.ಟಿ.: ಮುಂದಿನ ತಲೆಮಾರಿನ ಸುಧಾರಣೆಗಳಿಗೆ ಎಫ್.ಐ.ಎಸ್.ಎಂ.ಇ. ಕರೆ

ಗ್ರಾಹಕರು ದೂರು ನೀಡಿದ ತಕ್ಷಣ ಹೊಟೇಲ್ ಖಾತೆಯಿಂದ ಹಣ ಕಡಿತಗೊಳಿಸಬಾರದು. ಆಹಾರ ಸಿದ್ಧವಾದ ಬಳಿಕ ಆರ್ಡರ್ ರದ್ದಾದರೆ ನಷ್ಟದ ಹೊರೆಯನ್ನು ರೆಸ್ಟೋರೆಂಟ್ ಮೇಲೆ ಹಾಕಬಾರದು. ಪ್ರತಿಯೊಂದು ಶುಲ್ಕ ಕಡಿತದ ಬಗ್ಗೆಯು ವರದಿ ನೀಡಬೇಕು. ಸಮಸ್ಯೆಗಳ ತ್ವರಿತ ಪರಿಹಾರಕ್ಕಾಗಿ ಪ್ರತಿ ರೆಸ್ಟೋರೆಂಟ್‌ಗೆ ಪ್ರತ್ಯೇಕ ಸಂಪರ್ಕಾಧಿಕಾರಿಯನ್ನು ನೇಮಿಸುವಂತೆ ಸ್ವಿಗ್ಗಿಯನ್ನು ಒತ್ತಾಯಿಸಲು ಹೊಟೇಲ್ ಮಾಲೀಕರ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.