ಹಣ ಸಾಗಿಸುತ್ತಿದ್ದ ಬೊಲಿವಿಯಾದ ಮಿಲಿಟರಿ ವಿಮಾನ ಹೆದ್ದಾರಿಯಲ್ಲಿ ಪತನ; 15 ಸಾವು

ಸುಕ್ರೆ, ಫೆ. 28: ನೋಟುಗಳನ್ನು ಸಾಗಿಸುತ್ತಿದ್ದ ಬೊಲಿವಿಯಾದ ಮಿಲಿಟರಿ ವಿಮಾನ ಹೆದ್ದಾರಿಯಲ್ಲಿ ಪತನಗೊಂಡಿದ್ದು (plane crash), 15 ಮಂದಿ ಮೃತಪಟ್ಟಿದ್ದಾರೆ. ಬೊಲಿವಿಯಾ ದಕ್ಷಿಣ ಅಮೆರಿಕ ಖಂಡದಲ್ಲಿರುವ ಒಂದು ದೇಶ. ಇಲ್ಲಿ ಶುಕ್ರವಾರ (ಫೆಬ್ರವರಿ 27) ಹಣ ಸಾಗಿಸುತ್ತಿದ್ದ ಸರಕು ವಿಮಾನವೊಂದು ಪತನಗೊಂಡಿದೆ (Plane carrying banknotes crashes). ಪರಿಣಾಮ ಹೆದ್ದಾರಿಯಲ್ಲಿ ಹಲವು ವಾಹನಗಳಿಗೆ ಹಾನಿಯಾಗಿದ್ದು, ಕನಿಷ್ಠ 15 ಜನರು ಸಾವಿಗೀಡಾಗಿದ್ದಾರೆ ಮತ್ತು ಹಲವರು ಗಾಯಗೊಂಡಿದ್ದಾರೆ.

ಹರ್ಕ್ಯುಲಸ್ ಸಿ-130 ವಿಮಾನವು ಹೊಸದಾಗಿ ಮುದ್ರಿತ ಬೊಲಿವಿಯನ್ ಕರೆನ್ಸಿಯನ್ನು ಸಾಗಿಸುತ್ತಿದ್ದಾಗ, ಲಾ ಪಾಜ್ ರಾಜಧಾನಿಗೆ ಹೊಂದಿಕೊಂಡಿರುವ ಎಲ್ ಆಲ್ಟೊ ವಿಮಾನ ನಿಲ್ದಾಣದಲ್ಲಿ ಇಳಿದ ನಂತರ ರನ್‌ವೇಯಿಂದ ಹೊರಗೆ ಜಾರಿ ಹೊಲದಲ್ಲಿ ನಿಂತಿತು ಎಂದು ರಕ್ಷಣಾ ಸಚಿವ ಮಾರ್ಸೆಲೊ ಸಲಿನಾಸ್ ಹೇಳಿದ್ದಾರೆ. ವಿಮಾನಕ್ಕೆ ಬೆಂಕಿ ಹೊತ್ತಿಕೊಂಡಿದ್ದರೂ, ಅಗ್ನಿಶಾಮಕ ಸಿಬ್ಬಂದಿ ಆ ಬೆಂಕಿಯನ್ನು ನಂದಿಸಲು ಯಶಸ್ವಿಯಾದರು.

ವಿಡಿಯೊ ಇಲ್ಲಿದೆ:

ಅಗ್ನಿಶಾಮಕ ದಳದ ಮುಖ್ಯಸ್ಥ ಪಾವೆಲ್ ಟೋವರ್ ಕನಿಷ್ಠ 15 ಜನರು ಮೃತಪಟ್ಟಿದ್ದಾರೆ ಎಂದು ಹೇಳಿದರು. ಆದರೆ ಮೃತಪಟ್ಟವರು ವಿಮಾನದಲ್ಲಿದ್ದರೋ ಅಥವಾ ಹೆದ್ದಾರಿಯಲ್ಲಿರುವ ಕಾರುಗಳಲ್ಲಿದ್ದರೋ ಎಂಬುದನ್ನು ಅವರು ಸ್ಪಷ್ಟಪಡಿಸಲಿಲ್ಲ. ಅಪಘಾತದಲ್ಲಿ ಎಷ್ಟು ಜನರು ಮೃತಪಟ್ಟಿದ್ದಾರೆಂದು ನಿರ್ದಿಷ್ಟವಾಗಿ ತಿಳಿದುಬಂದಿಲ್ಲ. ಈ ಸಂಬಂಧ ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ.

ದಟ್ಟ ಹೊಗೆ, ಧಗಧಗಿಸಿದ ಬೆಂಕಿ: ಬಾರಾಮತಿಯಲ್ಲಿ ಲ್ಯಾಂಡಿಂಗ್ ವೇಳೆ ಅಜಿತ್‌ ಪವಾರ್‌ ಇದ್ದ ವಿಮಾನ ಪತನ

ಶುಕ್ರವಾರ ತಡರಾತ್ರಿಯವರೆಗೂ ವಿಮಾನದ ಆರು ಸಿಬ್ಬಂದಿ ಪೈಕಿ ಇಬ್ಬರು ಪತ್ತೆಯಾಗಿಲ್ಲ ಎಂದು ಬೊಲಿವಿಯನ್ ವಾಯುಪಡೆಯ ಜನರಲ್ ಸೆರ್ಗಿಯೊ ಲೋರಾ ಹೇಳಿದ್ದಾರೆ. ವಿಮಾನವು ಪೂರ್ವ ನಗರವಾದ ಸಾಂತಾ ಕ್ರೂಜ್‌ನಿಂದ ಆಗಮಿಸುತ್ತಿತ್ತು. ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡ ಫೋಟೊಗಳಲ್ಲಿ ವಿಮಾನದ ಅವಶೇಷಗಳು, ನಾಶವಾದ ಕಾರುಗಳು ಮತ್ತು ರಸ್ತೆಯಲ್ಲಿ ಹರಡಿಕೊಂಡಿರುವ ಮೃತದೇಹಗಳನ್ನು ತೋರಿಸುತ್ತವೆ. ಟೋವರ್ ಪ್ರಕಾರ, ಕನಿಷ್ಠ 15 ವಾಹನಗಳು ಹಾನಿಗೊಳಗಾಗಿವೆ.

ಬೊಲಿವಿಯನ್ ವಾಯುಪಡೆಗೆ ಸೇರಿದ ವಿಮಾನವು ಸೆಂಟ್ರಲ್ ಬ್ಯಾಂಕಿನಿಂದ ನೋಟುಗಳನ್ನು ಸಾಗಿಸುತ್ತಿತ್ತು. ಸಾಮಾಜಿಕ ಮಾಧ್ಯಮದಲ್ಲಿನ ಚಿತ್ರಗಳು ಅಪಘಾತದ ಸ್ಥಳದಲ್ಲಿ ಚದುರಿದ ನೋಟುಗಳನ್ನು ಸಂಗ್ರಹಿಸಲು ಜನರು ಧಾವಿಸುತ್ತಿರುವುದನ್ನು ತೋರಿಸಿವೆ. ಆದರೆ ಗಲಭೆ ನಿಗ್ರಹ ದಳದಲ್ಲಿದ್ದ ಪೊಲೀಸರು ಅವರನ್ನು ಚದುರಿಸಲು ಪ್ರಯತ್ನಿಸಿದರು.

ಆ ನೋಟುಗಳಿಗೆ ಇನ್ನೂ ಕಾನೂನುಬದ್ಧ ಚಲಾವಣೆಯ ಸ್ಥಾನಮಾನ ಇರಲಿಲ್ಲ. ಏಕೆಂದರೆ ಅವು ಇನ್ನೂ ಚಲಾವಣೆಗೆ ಬರಬೇಕಾಗಿದೆ. ಅವುಗಳಲ್ಲಿ ಸರಣಿ ಸಂಖ್ಯೆಗಳು ಇರಲಿಲ್ಲ ಎಂದು ಕೇಂದ್ರ ಬ್ಯಾಂಕ್ ಅಧ್ಯಕ್ಷ ಡೆವಿಡ್ ಎಸ್ಪಿನೋಸಾ ಹೇಳಿದ್ದಾರೆ. ಈ ನೋಟುಗಳನ್ನು ಲಾ ಪಾಸ್‌ಗೆ ಸಾಗಿಸಲಾಗುತ್ತಿತ್ತು ಎಂದು ತಿಳಿಸಿದ್ದಾರೆ. ಆದರೆ ಎಷ್ಟು ನೋಟುಗಳನ್ನು ಸಾಗಿಸಲಾಗುತ್ತಿತ್ತು ಎಂಬುದನ್ನು ಸ್ಪಷ್ಟಪಡಿಸಲಿಲ್ಲ. ಅಧಿಕಾರಿಗಳು ತಾತ್ಕಾಲಿಕವಾಗಿ ಆ ವಿಮಾನ ನಿಲ್ದಾಣಕ್ಕೆ ಲ್ಯಾಂಡಿಂಗ್ ಆಗುವ ಮತ್ತು ಟೇಕಾಫ್ ಆಗುವ ಎಲ್ಲ ವಿಮಾನ ಸಂಚಾರವನ್ನು ಸ್ಥಗಿತಗೊಳಿಸಿದರು.