ಲೆಬನಾನ್‌ನಲ್ಲಿರುವ ಹೆಜ್ಬೊಲ್ಲಾ ತಾಣಗಳ ಮೇಲೆ ಇಸ್ರೇಲ್ ದಾಳಿ: ಬೀದಿಯಲ್ಲೇ ದಿನ ಕಳೆದ ನಾಗರಿಕರು

ಬೈರುತ್‌, ಮಾ. 6: ಲೆಬನಾನ್‌ನ ಬೈರುತ್‌ನ ದಕ್ಷಿಣ ಉಪನಗರಗಳ ಮೇಲೆ ಗುರುವಾರ (ಮಾ. 5) ರಾತ್ರಿಯಿಡೀ ಮತ್ತು ಶುಕ್ರವಾರ (ಮಾ. 6) ಇಸ್ರೇಲಿ ವಾಯುಪಡೆ ಬಾಂಬ್ ದಾಳಿ ನಡೆಸಿತು. ಇರಾನ್ ಬೆಂಬಲಿತ ಹೆಜ್ಬೊಲ್ಲಾ (Hezbollah) ಉಗ್ರ ಜತೆಗಿನ ಸಂಘರ್ಷ ಹೆಚ್ಚುತ್ತಿದ್ದು, ಇದು ನಗರದ ಬೀದಿಗಳನ್ನು ಧ್ವಂಸಗೊಳಿಸಿತು. ಬಾಂಬ್ ದಾಳಿಯಿಂದ ಹತ್ತಾರು ಸಾವಿರ ಲೆಬನಾನ್‌ಗಳು (Lebanon) ನಿರಾಶ್ರಿತರಾಗಿದ್ದಾರೆ.

ಹಿಜ್ಬೊಲ್ಲಾದ ಪ್ರಬಲ ಪ್ರದೇಶವಾದ ಈ ಜನನಿಬಿಡ ಉಪನಗರಗಳ ನಿವಾಸಿಗಳನ್ನು ಹೊರಹೋಗುವಂತೆ ವೈಮಾನಿಕ ದಾಳಿಗೆ ಮುಂಚಿತವಾಗಿ ಇಸ್ರೇಲ್ ತಿಳಿಸಿತ್ತು. ಈ ಹಿಂದೆ ನಾಗರಿಕರು ದಕ್ಷಿಣ ಮತ್ತು ಪೂರ್ವ ಲೆಬನಾನ್‌ನ ಪ್ರದೇಶಗಳನ್ನು ತೊರೆಯಬೇಕೆಂದು ಹೇಳಲಾಗಿತ್ತು.

ದಾಳಿಯ ವಿಡಿಯೊ ಇಲ್ಲಿದೆ:

ದಕ್ಷಿಣ ಭಾಗದಲ್ಲಿ ಇಸ್ರೇಲ್‍ನ ಭೂಸೇನೆ ವಿರುದ್ಧ ತಾವು ಹೋರಾಟ ನಡೆಸುತ್ತಿದ್ದೇವೆ ಎಂದು ಹೆಜ್ಬೊಲ್ಲಾ ಶುಕ್ರವಾರ (ಮಾ. 6) ಬೆಳಗ್ಗೆ ತಿಳಿಸಿದೆ. ದಕ್ಷಿಣದಲ್ಲಿರುವ ಖಿಯಾಮ್ ಪಟ್ಟಣದ ಸಮೀಪ ಸೇನಾ ವಾಹನಗಳು ಸೇರಿಕೊಂಡಿದ್ದ ಪ್ರದೇಶವನ್ನು ಗುರಿಯಾಗಿಸಿಕೊಂಡು ದಾಳಿ ನಡೆಸಿದ್ದೇವೆ ಎಂದು ಸಂಘಟನೆ ತಿಳಿಸಿದೆ.

ಇದೇ ವೇಳೆ ಗಡಿ ಭಾಗದ ಸಮೀಪದಲ್ಲಿರುವ ಇಸ್ರೇಲ್ ಸಮುದಾಯಗಳ ನಿವಾಸಿಗಳು ಆ ಪ್ರದೇಶವನ್ನು ತಕ್ಷಣ ತೊರೆಯುವಂತೆ ಹೆಜ್ಬೊಲ್ಲಾ ಎಚ್ಚರಿಕೆ ನೀಡಿದೆ. ಹೆಜ್ಬೊಲ್ಲಾ ಸಂಘಟನೆ ಇಸ್ರೇಲ್ ಮೇಲೆ ರಾಕೆಟ್ ದಾಳಿ ನಡೆಸಿದ ನಂತರ ಪರಿಸ್ಥಿತಿ ಮತ್ತಷ್ಟು ಉದ್ವಿಗ್ನಗೊಂಡಿತು.

ನೂರಾರು ಕನಸು ಹೊತ್ತು ಲೆಬನಾನ್‍ಗೆ ತೆರಳಿದ ಮುಂಬೈ ಮೂಲದ ಯುವಕ ಯುದ್ಧದ ಚಕ್ರವ್ಯೂಹದಲ್ಲಿ ಬಂಧಿ

ಈ ದಾಳಿಯ ಪರಿಣಾಮವಾಗಿ, ಶಿಯಾ ಮುಸ್ಲಿಂ ಸಂಘಟನೆಯಾದ ಹೆಜ್ಬೊಲ್ಲಾ ವಿರುದ್ಧ ಇಸ್ರೇಲ್ ಹೊಸ ಸೈನಿಕ ದಾಳಿ ಆರಂಭಿಸಿದೆ. 2024ರಲ್ಲಿ ನಡೆದ ದೊಡ್ಡ ಯುದ್ಧದ ಬಳಿಕ ಎರಡು ದೇಶಗಳೂ ಮಾಡಿಕೊಂಡಿದ್ದ ಯುದ್ಧ ವಿರಾಮ ಒಪ್ಪಂದದ 15 ತಿಂಗಳ ನಂತರ ಮತ್ತೆ ಸಂಘರ್ಷ ಪ್ರಾರಂಭವಾಗಿದೆ.

ನಾವು ಇಲ್ಲಿ ಬೀದಿಗಳಲ್ಲಿ ಮಲಗುತ್ತಿದ್ದೇವೆ. ಕೆಲವರು ಕಾರುಗಳಲ್ಲಿ, ಕೆಲವರು ಬೀದಿಯಲ್ಲಿ, ಕೆಲವರು ಕಡಲತೀರದಲ್ಲಿ ಆಶ್ರಯ ಪಡೆಯುತ್ತಿದ್ದಾರೆ ಎಂದು ಬೈರುತ್‌ನ ದಕ್ಷಿಣ ಉಪನಗರಗಳಿಂದ ಪಲಾಯನ ಮಾಡಿ ರಾಜಧಾನಿಯ ಡೌನ್‌ಟೌನ್ ಜಿಲ್ಲೆಯಲ್ಲಿ ರಾತ್ರಿಯನ್ನು ಕಳೆದ 43 ವರ್ಷದ ಜಮಾಲ್ ಸೈಫೆದ್ದೀನ್ ಹೇಳಿದರು. ನಾನು ಈ ರೀತಿ ನೆಲದ ಮೇಲೆ ಎಂದಿಗೂ ಮಲಗಿಲ್ಲ. ಯಾರೂ ಕಂಬಳಿ ಕೂಡ ತಂದಿಲ್ಲ ಎಂದು ಅವರು ಹೇಳಿದರು.

ದಕ್ಷಿಣ ಉಪನಗರಗಳಲ್ಲಿ ಹೆಜ್ಬೊಲ್ಲಾ ವಿರುದ್ಧ ಹಲವು ದಾಳಿಗಳನ್ನು ನಡೆಸಲಾಯಿತು. ಅಧಿಕಾರಿ ಹೇಳುವಂತೆ ಪ್ರಧಾನ ಕಚೇರಿಯಾಗಿ ಬಳಸುತ್ತಿದ್ದ ವಸತಿ ಕಟ್ಟಡಗಳು ಸೇರಿದಂತೆ ಸುಮಾರು 115 ಗುರಿಗಳ ಮೇಲೆ ದಾಳಿ ನಡೆಸಲಾಯಿತು.

ಇಸ್ರೇಲಿ ವಾಯುದಾಳಿಗಳು ಲೆಬನಾನ್‌ನ ಉತ್ತರದಲ್ಲಿರುವ ಟ್ರಿಪೋಲಿ, ದಕ್ಷಿಣದಲ್ಲಿರುವ ಟೈರ್, ಸಿಡಾನ್ ಮತ್ತು ನಬಾತಿಹ್ ಮತ್ತು ಪೂರ್ವದಲ್ಲಿರುವ ಬಾಲ್‌ಬೇಕ್ ಗುರಿಯಾಗಿಸಿಕೊಂಡಿವೆ ಎಂದು ಅಧಿಕಾರಿ ತಿಳಿಸಿದ್ದಾರೆ. ಇಸ್ರೇಲಿ ಮಿಲಿಟರಿ ವಿಡಿಯೊವು ಲೆಬನಾನ್‌ನಲ್ಲಿರುವ ಕಮಾಂಡ್ ಕೇಂದ್ರಗಳು ಮತ್ತು ಶಸ್ತ್ರಾಸ್ತ್ರ ಸೌಲಭ್ಯಗಳ ಮೇಲೆ ದಾಳಿಗಳನ್ನು ಬಹಿರಂಗಪಡಿಸಿದೆ.

ಒಂದು ವಾರದ ಹಿಂದೆ ಇರಾನ್ ವಿರುದ್ಧ ಇಸ್ರೇಲ್ ಮತ್ತು ಅಮೆರಿಕ ನಡೆಸಿದ ದಾಳಿಯಲ್ಲಿ ದೇಶದ ಸರ್ವೋಚ್ಚ ನಾಯಕ, ಹೆಜ್ಬೊಲ್ಲಾದ ಪ್ರಮುಖ ನಾಯಕ ಮೃತಪಟ್ಟಿದ್ದರು. ಇದು ಮಧ್ಯಪ್ರಾಚ್ಯವನ್ನು ಹೊತ್ತಿ ಉರಿಯುವಂತೆ ಮಾಡಿತು.