2+ Movie: 1 ಹಾಡು, 34 ಭಾಷೆ, 60 ಗಾಯಕರು; ಹೊಸ ದಾಖಲೆ ಬರೆದ ಅಭಿಮನ್‌ ರಾಯ್‌, ಸಾಥ್‌ ನೀಡಿದ ನಟ ಬಾಲಾಜಿ

ಸ್ಯಾಂಡಲ್‌ವುಡ್‌ನಲ್ಲಿ ಅನೇಕ ಹಿಟ್‌ ಹಾಡುಗಳನ್ನು ಕೊಟ್ಟವರು ಸಂಗೀತ ನಿರ್ದೇಶಕ ಅಭಿಮನ್‌ ರಾಯ್.‌ "ಖುಷಿಯಾಗಿದೆ ಏಕೋ ನಿನ್ನಿಂದಲೇ..", "ಕಣ್ಣಲ್ಲೇ ನನ್ನ ಚಿತ್ರ ಬರೆದನು..." ಹೀಗೆ ಅನೇಕ ಜನಪ್ರಿಯ ಮೆಲೋಡಿ ಗೀತೆಗಳನ್ನು ಸಂಯೋಜಿಸಿದ್ದ ಅಭಿಮನ್‌ ರಾಯ್‌ ಇದೀಗ ಹೊಸದೊಂದು ದಾಖಲೆಯ ಹೆಜ್ಜೆ ಇಟ್ಟಿದ್ದಾರೆ‌.

2+ ಸಿನಿಮಾಗೆ ಸಂಗೀತ ನೀಡಿದ ಅಭಿಮನ್ ರಾಯ್‌

ಸಂಗೀತ ನಿರ್ದೇಶಕ ಅಭಿಮನ್ ರಾಯ್‌ ಅವರು ʻ2+ʼ ಎಂಬ ಡಿಫರೆಂಟ್‌ ಟೈಟಲ್‌ ಇರುವ ಸಿನಿಮಾಕ್ಕೆ ಸಂಗೀತ ನೀಡಿದ್ದಾರೆ. ಈ ಚಿತ್ರದ ಹಾಡೊಂದನ್ನು ಅವರು 34 ಭಾಷೆಗಳಲ್ಲಿ ಹೊರತಂದಿರುವುದು ವಿಶೇಷ. ಹೌದು, ಕನ್ನಡ ಚಿತ್ರರಂಗದ ಇತಿಹಾಸದಲ್ಲೇ ಇಂಥದ್ದೊಂದು ಸಾಹಸವನ್ನು ಯಾರೊಬ್ಬರೂ ಮಾಡಿಲ್ಲ. ಆದರೆ ಅದನ್ನು ಅಭಿಮನ್‌ ರಾಯ್‌ ಅವರು ಮಾಡಿದ್ದಾರೆ. "ನನಗೂ ನಿನಗೂ ನಡುವೆ.." ಎಂದು ಕನ್ನಡದಲ್ಲಿ ಶುರುವಾಗುವ ಈ ಗೀತೆಯನ್ನು ಬೇರೆ ಬೇರೆ ಭಾಷೆಗಳಲ್ಲಿ ಹೊರತರಲಾಗಿದೆ. ಈಚೆಗೆ ಒಂದೇ ಹಾಡಿನ ಈ 34 ಭಾಷೆಯ ಬೇರೆ ಬೇರೆ ವರ್ಷನ್‌ಗಳನ್ನು ರಿಲೀಸ್‌ ಮಾಡಲಾಗಿದೆ. ಈ ಹಾಡಿಗೆ ಬೇರೆ ಬೇರೆ ಭಾಷೆಗಳಲ್ಲಿ ಬಹುತೇಕ ಪ್ರಸಿದ್ದ ಗಾಯಕರೇ ದನಿಯಾಗಿದ್ದಾರೆ.

ಅಭಿಮನ್ ರಾಯ್ ಏನಂದ್ರು ನೋಡಿ

"ನಾನು ಈ ಸಾಹಸಕ್ಕೆ ಕೈಹಾಕಲು ಲಹರಿ ವೇಲು ಅವರೇ ಸ್ಪೂರ್ತಿ. ಆರಂಭದಲ್ಲಿ ಈ ಹಾಡನ್ನು 4 ಭಾಷೆಯಲ್ಲಿ ಮಾತ್ರವೇ ಕಂಪೋಸ್‌ ಮಾಡಿದ್ದೆ. ಆದರೆ ಹಾಡು ಕೇಳಿದ ವೇಲು ಅವರು ಈ ಸಾಂಗ್ ಎಲ್ಲ ಭಾಷೆಗಳಿಗೂ ಸಲ್ಲುವಂತಿದೆ. ಇನ್ನೂ ಬೇರೆ ಬೇರೆ ಭಾಷೆಗಳಲ್ಲಿ ಮಾಡುವಂತೆ ಸಲಹೆ ನೀಡಿದರು. ಕನ್ನಡದಲ್ಲೇ ಉತ್ತರ ಕನ್ನಡ, ದಕ್ಷಿಣ ಕನ್ನಡ, ಉತ್ತರ ಕರ್ನಾಟಕ, ಕೊಡವ, ಬ್ಯಾರಿ, ಕುಂದಾಪುರ, ಮಂಡ್ಯ, ಕೊಂಕಣಿ, ತುಳು ಸೇರಿದಂತೆ 8 ಶೈಲಿ ಇದೆ. ಉಳಿದಂತೆ ತಮಿಳು, ತೆಲುಗು, ಮಲಯಾಳಂ, ಹಿಂದಿ, ಒಡಿಯಾ, ಬೆಂಗಾಲಿ, ಪಂಜಾಬಿ, ಗುಜರಾತಿ ಅಲ್ಲದೆ, ಇಂಗ್ಲಿಷ್, ರಷ್ಯನ್, ಜಪಾನೀಸ್, ಇಟಾಲಿಯನ್ ಭಾಷೆಗಳಲ್ಲಿಯೂ ಈ ಹಾಡು ಮೂಡಿಬಂದಿದೆ" ಎನ್ನುತ್ತಾರೆ ಅಭಿಮನ್ ರಾಯ್.

ಈ 2+ ಚಿತ್ರಕ್ಕೆ ಅಭಿಮನ್ ರಾಯ್ ಸಂಗೀತ ನೀಡುವುದರ ಜೊತೆಗೆ ಮೊದಲ ಬಾರಿಗೆ ಕಥೆ, ಚಿತ್ರಕಥೆಯನ್ನು ಕೂಡ ಬರೆದಿದ್ದಾರೆ. ಅವರ ಸಹೋದರ ಅಶೋಕ್ ರಾಯ್ ಈ ಸಿನಿಮಾವನ್ನು ನಿರ್ದೇಶನ ಮಾಡಿದ್ದಾರೆ. "ಈ ಹಾಡಿಗೆ 60 ಹೊಸ ಗಾಯಕರು ದನಿಯಾಗಿದ್ದಾರೆ. ಚಿತ್ರದಲ್ಲಿ ಒಟ್ಟು 5 ಹಾಡುಗಳಿದ್ದು, ಈಗಾಗಲೇ 60% ಚಿತ್ರೀಕರಣ ಮುಗಿದಿದ್ದು, ಮಾರ್ಚ್ ಅಥವಾ ಏಪ್ರಿಲ್ ವೇಳೆಗೆ ರಿಲೀಸ್ ಮಾಡುವ ಯೋಜನೆ ಇದೆ. ಒಂದೇ ಸಿನಿಮಾದಲ್ಲಿ ಎರಡು ಕಥೆ ಇದ್ದು, ಇಂಟರ್ ವೆಲ್‌ಗೂ ಮೊದಲು ಒಂದು ಕಥೆ, ಆನಂತರ ಮತ್ತೊಂದು ಕಥೆ ‌ನಡೆಯುತ್ತದೆ. + ನಿಂದಲೇ ಕಥೆ ಶುರುವಾಗುತ್ತದೆ. ನಾಯಕ ಡಾ. ವರದರಾಜ್ ಅವರು ತೆರೆಮೇಲೂ ಡಾಕ್ಟರ್ ಆಗಿಯೇ ನಟಿಸಿದ್ದಾರೆ. ಮೆಡಿಕಲ್‌ಗೆ ಸಂಬಂಧಿಸಿದ ಕಂಟೆಂಟ್ ಕೂಡ ಈ ಚಿತ್ರದಲ್ಲಿದೆ" ಎನ್ನುತ್ತಾರೆ ಅಶೋಕ್‌ ರಾಯ್

ಲಹರಿ ಆಡಿಯೋ ಸಂಸ್ಥೆ ಹೊರ ತಂದಿರುವ ಈ 34 ಹಾಡುಗಳನ್ನು ನಟ ಬಾಲಾಜಿ, ಲಹರಿ ವೇಲು, ರಘುರಾಮ್, ಮಂಜು ಸ್ವರಾಜ್, ವೆಂಕಟಗೌಡ, ಶಿವರಾಜ್, ತ್ಯಾಗರಾಜು, ಡಾ.‌ ಮಹೇಂದ್ರ, ಡಾ. ಭಗವಾನ್ ಸೇರಿ 34 ಗಣ್ಯರು ಬಿಡುಗಡೆ ಮಾಡಿದರು.