ಗಣೇಶ ಚತುರ್ಥಿ ಅನ್ನದಾನದ ವೇಳೆ ಘೋರ ದುರಂತ: ಕುದಿಯುವ ಸಾಂಬಾರ್ ಪಾತ್ರೆಗೆ ಬಿದ್ದು ಮಹಿಳೆ ಸಾವು! ವಿಡಿಯೊ ವೈರಲ್‌

ಅಮರಾವತಿ, ಸೆ. 22: ಗಣೇಶ ಚತುರ್ಥಿ (Ganesh Chaturthi) ಹಬ್ಬದ ಅನ್ನದಾನ ಕಾರ್ಯಕ್ರಮದ ವೇಳೆ ಕುದಿಯುತ್ತಿದ್ದ ಬಿಸಿಬಿಸಿ ಸಾಂಬಾರ್ ಪಾತ್ರೆಗೆ ಆಕಸ್ಮಿಕವಾಗಿ ಕೆಳಮುಖವಾಗಿ ಬಿದ್ದು 46 ವರ್ಷದ ಮಹಿಳೆಯೊಬ್ಬರು ದಾರುಣವಾಗಿ ಸಾವನ್ನಪ್ಪಿರುವ ಅತ್ಯಂತ ಮನಕಲಕುವ ಘಟನೆ ಆಂಧ್ರ ಪ್ರದೇಶದ (Andrha Pradesh) ವಿಜಯವಾಡದಲ್ಲಿ ನಡೆದಿದೆ. ಮೃತ ದುರ್ದೈವಿ ಮಹಿಳೆಯನ್ನು ಸ್ಥಳೀಯ ನಿವಾಸಿ 46 ವರ್ಷದ ಸುಜಾತಾ ಎಂದು ಗುರುತಿಸಲಾಗಿದೆ.

ಸೆಪ್ಟೆಂಬರ್ 20ರಂದು ವಿನಾಯಕ ಚೌತಿಯ ಮಹೋತ್ಸವದ ಅಂಗವಾಗಿ ಆಯೋಜಿಸಲಾಗಿದ್ದ ಅನ್ನದಾನ ಪ್ರಸಾದಕ್ಕೆ ಅಡುಗೆ ತಯಾರಿಸುವ ಕಾರ್ಯದಲ್ಲಿ ಸುಜಾತಾ ಅತ್ಯಂತ ಉತ್ಸಾಹದಿಂದ ತೊಡಗಿಸಿಕೊಂಡಿದ್ದರು. ಭಕ್ತರಿಗೆ ಬಡಿಸಲು ಬೃಹತ್ ಪಾತ್ರೆಯಲ್ಲಿ ಸಿದ್ಧಪಡಿಸಲಾಗಿದ್ದ ಕುದಿಯುವ ಸಾಂಬಾರ್ ಅನ್ನು ಕಿರಿದಾದ ಸಂದಿಯ ಮಾರ್ಗದಲ್ಲಿ ಮತ್ತೊಬ್ಬ ಮಹಿಳೆಯ ನೆರವಿನೊಂದಿಗೆ ಸಾಗಿಸಿಕೊಂಡು ಹೋಗುತ್ತಿದ್ದ ಸಂದರ್ಭದಲ್ಲಿ ಈ ಘೋರ ದುರಂತ ಸಂಭವಿಸಿದೆ. ಅತಿಯಾದ ತೂಕ ಹಾಗೂ ಕಾಲು ಜಾರಿದ ಪರಿಣಾಮ ಸುಜಾತಾ ಹಠಾತ್ ಸಮತೋಲನ ತಪ್ಪಿ, ಕೆಳಮುಖವಾಗಿ ನೇರವಾಗಿ ಆ ಬಿಸಿ ಸಾಂಬಾರ್‌ ಪಾತ್ರೆಯೊಳಗೆ ಬಿದ್ದಿದ್ದಾರೆ.

ಸಾಂಬಾರ್‌ ಪಾತ್ರೆಯೊಳಗೆ ಬಿದ್ದು ಮಹಿಳೆ ಸಾವು:

ಪಾತ್ರೆಯ ಒಳಗಿಂದ ಭಾರಿ ಪ್ರಮಾಣದ ಆವಿ ಮತ್ತು ಹಬೆ ಮೇಲೇಳುತ್ತಿದ್ದು, ತೀವ್ರ ಸುಟ್ಟ ಗಾಯ ಹಾಗೂ ಅಸಹನೀಯ ನೋವಿನಿಂದ ಆಕೆಯ ಕಾಲುಗಳು ವಿಲವಿಲನೆ ನರಳಾಡುತ್ತಿರುವುದು ಸ್ಥಳದಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸ್ಪಷ್ಟವಾಗಿ ಸೆರೆಯಾಗಿದೆ. ತಕ್ಷಣವೇ ಸುತ್ತಮುತ್ತಲಿನ ಜನರು ಗಾಬರಿಯಿಂದ ಧಾವಿಸಿ ಬಂದು, ಕುದಿಯುವ ಸಾಂಬಾರ್‌ನಿಂದ ಆಕೆಯನ್ನು ಮೇಲಕ್ಕೆತ್ತಿ ಕುಳ್ಳಿರಿಸುವಷ್ಟರಲ್ಲಿ ದೇಹದ ಬಹುತೇಕ ಭಾಗ ಸಂಪೂರ್ಣ ಸುಟ್ಟು ಹೋಗಿತ್ತು.

2.90 ಕೋಟಿ ರೂಪಾಯಿ ಮೌಲ್ಯದ ನೋಟುಗಳಿಂದ ಕಂಗೊಳಿಸುತ್ತಿರುವ ಗಣೇಶ ಮೂರ್ತಿ

ಸ್ಥಳೀಯರು ತಕ್ಷಣವೇ ಗಂಭೀರ ಸ್ಥಿತಿಯಲ್ಲಿದ್ದ ಸುಜಾತಾ ಅವರನ್ನು ಆಂಬುಲೆನ್ಸ್ ಮೂಲಕ ವಿಜಯವಾಡ ಸಮೀಪದ ಸರ್ಕಾರಿ ಆಸ್ಪತ್ರೆಗೆ ತುರ್ತು ಚಿಕಿತ್ಸೆಗಾಗಿ ದಾಖಲಿಸಿದ್ದರು. ಆದರೆ ಮುಖ, ಕುತ್ತಿಗೆ ಹಾಗೂ ಎದೆಯ ಭಾಗಕ್ಕೆ ತೀವ್ರ ಪ್ರಮಾಣದ ಸುಟ್ಟ ಗಾಯಗಳಾಗಿದ್ದ ಕಾರಣ, ವೈದ್ಯರ ಸತತ ಪ್ರಯತ್ನದ ಹೊರತಾಗಿಯೂ ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಿಸದೆ ಕೊನೆಯುಸಿರೆಳೆದಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಸಿಸಿಟಿವಿ ದೃಶ್ಯಾವಳಿಗಳನ್ನು ವಶಪಡಿಸಿಕೊಂಡಿರುವ ಸ್ಥಳೀಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಸಮಗ್ರ ತನಿಖೆ ಕೈಗೊಂಡಿದ್ದಾರೆ. ಹಬ್ಬದ ಸಂದರ್ಭದಲ್ಲಿ ಸಾಮೂಹಿಕ ಅಡುಗೆ ತಯಾರಿಕೆ ಮತ್ತು ಸಾಗಾಟದ ವೇಳೆ ಸೂಕ್ತ ಸುರಕ್ಷತಾ ಮಾನದಂಡಗಳು ಹಾಗೂ ಮುನ್ನೆಚ್ಚರಿಕೆಗಳನ್ನು ವಹಿಸಲಾಗಿತ್ತೇ ಅಥವಾ ಸಂಘಟಕರ ನಿರ್ಲಕ್ಷ್ಯವೇನಾದರೂ ಇತ್ತೇ ಎಂಬ ಕುರಿತು ಅಧಿಕಾರಿಗಳು ತನಿಖೆ ಮುಂದುವರಿಸಿದ್ದಾರೆ. ಅನ್ನದಾನದ ಸಂಭ್ರಮ ಹಾಗೂ ಗಣೇಶ ಚತುರ್ಥಿ ಹಬ್ಬದ ವಾತಾವರಣವು ಈ ಅನಿರೀಕ್ಷಿತ ದುರಂತದಿಂದಾಗಿ ಕ್ಷಣಾರ್ಧದಲ್ಲಿ ಆಕ್ರಂದನ ಮತ್ತು ಶೋಕಸಾಗರದಲ್ಲಿ ಮುಳುಗಿದೆ.