Raj Thackeray's Party: ಮರಾಠಿ ಭಾಷೆ ವಿಚಾರಕ್ಕೆ ಪ್ರತಿಭಟನೆ; ರಾಜ್ ಠಾಕ್ರೆಯ ಎಂಎನ್‌ಎಸ್ ಕಾರ್ಯಕರ್ತರ ಬಂಧನ

ಮುಂಬೈ: ಮಹಾರಾಷ್ಟ್ರದ (Maharashtra) ಮೀರಾ ಭಯಾಂದರ್‌ನಲ್ಲಿ ಮರಾಠಿ (Marathi) ಭಾಷೆಯನ್ನು ಮಾತನಾಡದ ಫುಡ್ ಸ್ಟಾಲ್ ಮಾಲೀಕನ ಮೇಲಿನ ಹಲ್ಲೆಯ ವಿರುದ್ಧ ವ್ಯಾಪಾರಿಗಳು ನಡೆಸಿದ ಪ್ರತಿಭಟನೆಗೆ ಪ್ರತಿಯಾಗಿ ರಾಜ್ ಠಾಕ್ರೆಯ (Raj Thackeray) ಮಹಾರಾಷ್ಟ್ರ ನವನಿರ್ಮಾಣ ಸೇನೆ (Maharashtra Navnirman Sena) ಕಾರ್ಯಕರ್ತರು ರ‍್ಯಾಲಿ ಆಯೋಜಿಸಿದ್ದರು. ಈ ರ‍್ಯಾಲಿಯಿಂದ ಥಾಣೆ ಜಿಲ್ಲೆಯಲ್ಲಿ ವಾಹನ ಸಂಚಾರ ಸ್ಥಗಿತಗೊಂಡು, ಭಾರೀ ಪೊಲೀಸ್ ಬಿಗಿಭದ್ರತೆಯಿಂದ ಗೊಂದಲ ಉಂಟಾಯಿತು. ರ‍್ಯಾಲಿಗೆ ಅನುಮತಿಯಿಲ್ಲದಿದ್ದರೂ, ಎಂಎನ್‌ಎಸ್ ಕಾರ್ಯಕರ್ತರು ಮುಂಬೈಗೆ ಮೆರವಣಿಗೆ ಮೂಲಕ ತೆರಳಲು ಮುಂದಾಗಿದ್ದರು. ಆದರೆ ಎಂಎನ್‌ಎಸ್‌ನ ಥಾಣೆ ಮತ್ತು ಪಾಲ್ಘರ್ ಮುಖ್ಯಸ್ಥ ಅವಿನಾಶ್ ಜಾಧವ್ ಸೇರಿದಂತೆ ಇತರ ನಾಯಕರನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.

"ಇದು ತುರ್ತು ಪರಿಸ್ಥಿತಿಯಂತೆ ಇದೆ. ಗುಜರಾತಿ ವ್ಯಾಪಾರಿಗಳ ಪ್ರತಿಭಟನೆಗೆ ಗೌರವ ಕೊಡುವ ಪೊಲೀಸರು, ಮರಾಠಿ ಜನರ ರ‍್ಯಾಲಿಗೆ ಅನುಮತಿ ನಿರಾಕರಿಸಿದ್ದಾರೆ. ಇದು ಮಹಾರಾಷ್ಟ್ರ ಸರ್ಕಾರವೇ ಗುಜರಾತ್ ಸರ್ಕಾರವೇ?" ಎಂದು ಎಂಎನ್‌ಎಸ್‌ನ ಸಂದೀಪ್ ದೇಶಪಾಂಡೆ ಆಕ್ರೋಶ ವ್ಯಕ್ತಪಡಿಸಿದರು. ಆದರೆ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್, "ಪ್ರತಿಭಟನೆಗೆ ಅನುಮತಿ ನಿರಾಕರಿಸಿಲ್ಲ. ಸಭೆಗೆ ಅನುಮತಿ ಕೇಳಿದ್ದರು, ಆದರೆ ಪರ್ಯಾಯ ಮಾರ್ಗವನ್ನು ಸೂಚಿಸಿದಾಗ ಒಪ್ಪಿಗೆ ನೀಡಲಿಲ್ಲ" ಎಂದು ಸ್ಪಷ್ಟನೆ ನೀಡಿದರು.

ಈ ಸುದ್ದಿಯನ್ನು ಓದಿ: Viral News: ಬಾಲ್ಯದ ಗೆಳತಿಯನ್ನರಸಿ ಹೊರಟ ಭೂಪ- ನೆಟ್ಟಿಗರಿಂದ ಭರ್ಜರಿ ರೆಸ್ಪಾನ್ಸ್‌!

ಈ ತಿಂಗಳ ಆರಂಭದಲ್ಲಿ, ಭಯಾಂದರ್‌ನಲ್ಲಿ ಫುಡ್ ಸ್ಟಾಲ್ ಮಾಲೀಕನ ಮೇಲೆ ಮರಾಠಿ ಮಾತನಾಡದ ಕಾರಣಕ್ಕೆ ಎಂಎನ್‌ಎಸ್ ಕಾರ್ಯಕರ್ತರು ಹಲ್ಲೆ ನಡೆಸಿದ್ದರು. ಈ ಘಟನೆಯ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿ, ವ್ಯಾಪಾರಿಗಳಲ್ಲಿ ಆಕ್ರೋಶಕ್ಕೆ ಕಾರಣವಾಯಿತು. ಏಳು ಎಂಎನ್‌ಎಸ್ ಕಾರ್ಯಕರ್ತರನ್ನು ವಶಕ್ಕೆ ತೆಗೆದುಕೊಂಡು ವಿಚಾರಣೆ ನಡೆಸಿ ಬಿಡುಗಡೆ ಮಾಡಲಾಯಿತು. ಗಲಭೆ, ಬೆದರಿಕೆ ಮತ್ತು ಹಲ್ಲೆಗೆ ಸಂಬಂಧಿಸಿದಂತೆ ಭಾರತೀಯ ನ್ಯಾಯ ಸಂಹಿತೆಯಡಿ ಪ್ರಕರಣ ದಾಖಲಾಗಿದೆ.

ಇದಕ್ಕೂ ಮುಂಚೆ ಮುಂಬೈಯಲ್ಲಿ 30 ವರ್ಷಗಳಿಂದ ವಾಸಿಸಿದ್ದರೂ ಮರಾಠಿ ಸರಾಗವಾಗಿ ಮಾತನಾಡದಿರುವ ಉದ್ಯಮಿ ಸುಶೀಲ್ ಕೇಡಿಯಾ ಅವರ ಕಚೇರಿಯನ್ನು ಎಂಎನ್‌ಎಸ್ ಕಾರ್ಯಕರ್ತರು ಧ್ವಂಸಗೊಳಿಸಿದ್ದರು. ಈ ಬಗ್ಗೆ ಕೇಡಿಯಾ ಎಕ್ಸ್‌ನಲ್ಲಿ ರಾಜ್ ಠಾಕ್ರೆಗೆ ಸವಾಲು ಹಾಕಿದ್ದರು. ಈ ಘಟನೆಗಳು ಮಹಾರಾಷ್ಟ್ರದಲ್ಲಿ ಮರಾಠಿ ಭಾಷೆಯ ಬಳಕೆಯ ಕುರಿತಾದ ವಿವಾದವನ್ನು ತೀವ್ರಗೊಳಿಸಿವೆ.