ʼʼ72 ಗಂಟೆಗಳಲ್ಲಿ ಪಾಕಿಸ್ತಾನದ ಮೇಲೆ ಭಾರತ ಪ್ರಾಬಲ್ಯ ಸಾಧಿಸಿತುʼʼ: ಆಪರೇಷನ್ ಸಿಂದೂರ್ ಕಾರ್ಯಾಚರಣೆಗೆ ಅಮೆರಿಕ ಮೆಚ್ಚುಗೆ
ಆಪರೇಷನ್ ಸಿಂದೂರ್ಗೆ ಒಂದು ವರ್ಷ ಪೂರೈಸಿದ ಸಂದರ್ಭದಲ್ಲಿ ಅಮೆರಿಕದ ಮಿಲಿಟರಿ ತಜ್ಞ ಜಾನ್ ಸ್ಪೆನ್ಸರ್ ಭಾರತ ಸೇನೆಯ ಕಾರ್ಯತಂತ್ರವನ್ನು ಶ್ಲಾಘಿಸಿದ್ದಾರೆ. ಕೇವಲ 72 ಗಂಟೆಗಳಲ್ಲಿ ಭಾರತವು ಪಾಕಿಸ್ತಾನದ ಮೇಲೆ ವಾಯು ಪ್ರಾಬಲ್ಯ ಸಾಧಿಸಿತು ಎಂದು ಅವರು ವಿಶ್ಲೇಷಿಸಿದ್ದಾರೆ. ಹ್ಯಾರೋಪ್ ಡ್ರೋನ್, S-400 ವ್ಯವಸ್ಥೆ ಹಾಗೂ ನಿಖರ ಕ್ಷಿಪಣಿ ದಾಳಿಗಳ ಮೂಲಕ ಪಾಕಿಸ್ತಾನದ ವಾಯು ರಕ್ಷಣಾ ವ್ಯವಸ್ಥೆಯನ್ನು ಭಾರತ ಧ್ವಂಸಗೊಳಿಸಿತು ಎಂದು ಹೇಳಿದ್ದಾರೆ.
ಅಮೆರಿಕದ ಮಿಲಿಟರಿ ತಜ್ಞ ಜಾನ್ ಸ್ಪೆನ್ಸರ್ (ಸಂಗ್ರಹ ಚಿತ್ರ) -
ದೆಹಲಿ, ಮೇ 7: ಆಪರೇಷನ್ ಸಿಂದೂರ್ (Operation Sindoor) ಕಾರ್ಯಾಚರಣೆ ನಡೆದು ಒಂದು ವರ್ಷ ಪೂರೈಸಿರುವ ಈ ಸಂದರ್ಭದಲ್ಲಿ ಅಮೆರಿಕದ ಮಿಲಿಟರಿ ತಜ್ಞ ಜಾನ್ ಸ್ಪೆನ್ಸರ್ (US military expert John Spencer) ಭಾರತದ ಸೇನಾ ಸಾಮರ್ಥ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸಿದ್ದಾರೆ. ಸಂಘರ್ಷ ಆರಂಭವಾದ ಕೇವಲ 72 ಗಂಟೆಗಳಲ್ಲೇ ಭಾರತವು ಪಾಕಿಸ್ತಾನದ ಮೇಲೆ ಪೂರ್ಣ ಪ್ರಮಾಣದ ವಾಯು ಪ್ರಾಬಲ್ಯ (Air Superiority) ಸಾಧಿಸಿತು ಎಂದು ಅವರು ವಿಶ್ಲೇಷಿಸಿದ್ದಾರೆ. ಇದು ಭಾರತದ ವಿಕಸನಗೊಳ್ಳುತ್ತಿರುವ ಮಿಲಿಟರಿ ಶಕ್ತಿ ಮತ್ತು ಸಂಯೋಜಿತ ಯುದ್ಧ ತಂತ್ರಕ್ಕೆ ಸಾಕ್ಷಿ ಎಂದು ಅವರು ಬಣ್ಣಿಸಿದ್ದಾರೆ.
ಕಳೆದ ವರ್ಷ ಏಪ್ರಿಲ್ನಲ್ಲಿ ಪಹಲ್ಗಾಮ್ನಲ್ಲಿ ನಡೆದ ಭಯೋತ್ಪಾದನಾ ದಾಳಿಗೆ ಪ್ರತಿಯಾಗಿ ಭಾರತವು ಮೇ 7ರಂದು ಆಪರೇಷನ್ ಸಿಂದೂರ್ ಕಾರ್ಯಾಚರಣೆ ಆರಂಭಿಸಿತು. ಈ ಕಾರ್ಯಾಚರಣೆಯ ಆರಂಭದಲ್ಲಿ ಭಾರತದ ವಿಮಾನಗಳು ಪತನಗೊಂಡ ವರದಿಗಳಿಂದಾಗಿ ಪಾಕಿಸ್ತಾನಕ್ಕೆ ಮೇಲುಗೈ ಸಿಕ್ಕಿದೆ ಎಂಬ ಜಾಗತಿಕ ಅಭಿಪ್ರಾಯವಿತ್ತು. ಆದರೆ ವಾಸ್ತವದಲ್ಲಿ ಭಾರತವು ವ್ಯವಸ್ಥಿತವಾಗಿ ಶತ್ರುಗಳ ವಾಯು ರಕ್ಷಣಾ ಜಾಲವನ್ನು ಧ್ವಂಸಗೊಳಿಸುವ ಮೂಲಕ ಯುದ್ಧದ ದಿಕ್ಕನ್ನೇ ಬದಲಿಸಿತು ಎಂದು ಸ್ಪೆನ್ಸರ್ ಹೇಳಿದ್ದಾರೆ.
ಆಪರೇಷನ್ ಸಿಂದೂರ್ ಮೊದಲ ವರ್ಷಾಚರಣೆ: ಭಯೋತ್ಪಾದನೆಯನ್ನು ಸೋಲಿಸುವ ಸಂಕಲ್ಪಕ್ಕೆ ಭಾರತ ಬದ್ಧ - ಪ್ರಧಾನಿ ಮೋದಿ
ಜಾನ್ ಸ್ಪೆನ್ಸರ್ ವಿಶ್ಲೇಷಣೆಯ ಮುಖ್ಯ ಅಂಶಗಳು:
ರಕ್ಷಣಾ ವ್ಯವಸ್ಥೆಯ ಧ್ವಂಸ: ಭಾರತವು ಇಸ್ರೇಲ್ ನಿರ್ಮಿತ ಹ್ಯಾರೋಪ್ ಮತ್ತು ಹಾರ್ಪಿ ಡ್ರೋನ್ಗಳನ್ನು ಬಳಸಿ ಪಾಕಿಸ್ತಾನದ ಅತ್ಯಾಧುನಿಕ HQ-9 ರೇಡಾರ್ ಮತ್ತು ಕ್ಷಿಪಣಿ ನೆಲೆಗಳನ್ನು ಯಶಸ್ವಿಯಾಗಿ ನಾಶಪಡಿಸಿತು.
S-400 ಪ್ರಭಾವ: ಭಾರತದ S-400 ವಾಯು ರಕ್ಷಣಾ ವ್ಯವಸ್ಥೆಯು ಪಾಕಿಸ್ತಾನದ F-16 ಮತ್ತು JF-17 ವಿಮಾನಗಳ ಹಾರಾಟದ ಮೇಲೆ ತೀವ್ರ ನಿಯಂತ್ರಣ ಹೇರಿತು. ಇದರಿಂದ ಪಾಕಿಸ್ತಾನವು ತನ್ನ ವಿಮಾನಗಳನ್ನು ಎಲ್ಲಿ ಹಾರಿಸಬೇಕು ಎಂಬ ಬಗ್ಗೆ ಅನಿವಾರ್ಯವಾಗಿ ಮರುಚಿಂತನೆ ನಡೆಸುವಂತಾಯಿತು.
ನಿರ್ಣಾಯಕ ದಾಳಿ: ಮೇ 10ರಂದು ಭಾರತವು ಪಾಕಿಸ್ತಾನದ ಆಳದಲ್ಲಿರುವ ನೂರ್ ಖಾನ್, ಮುರಿದ್, ಸರ್ಗೋಧಾ ಮತ್ತು ಜಕೋಬಾಬಾದ್ ವಾಯುನೆಲೆಗಳ ಮೇಲೆ ಏಕಕಾಲಕ್ಕೆ ಸುದೀರ್ಘ ಶ್ರೇಣಿಯ ಕ್ಷಿಪಣಿ ದಾಳಿ ನಡೆಸಿತು. ಇದು ಶತ್ರುಗಳ ಕಮಾಂಡ್ ಸೆಂಟರ್ ಮತ್ತು ಡ್ರೋನ್ ಸೌಲಭ್ಯಗಳನ್ನು ಸಂಪೂರ್ಣವಾಗಿ ಹೈರಾಣಾಗಿಸಿತು.
ಈ ತೀವ್ರವಾದ ದಾಳಿಗಳಿಂದಾಗಿ ಪಾಕಿಸ್ತಾನವು ಮೇ 10ರ ಮಧ್ಯಾಹ್ನದ ವೇಳೆಗೆ ಕದನ ವಿರಾಮಕ್ಕಾಗಿ ಮೊರೆ ಇಟ್ಟಿತ್ತು. ಕೇವಲ ರಾಜತಾಂತ್ರಿಕ ಒತ್ತಡದಿಂದಲ್ಲ, ಬದಲಿಗೆ ಯುದ್ಧಭೂಮಿಯಲ್ಲಿ ಉಂಟಾದ ಪರಿಸ್ಥಿತಿಯಿಂದಾಗಿ ಪಾಕಿಸ್ತಾನ ಶರಣಾಯಿತು ಎಂದು ಸ್ಪೆನ್ಸರ್ ಅಭಿಪ್ರಾಯಪಟ್ಟಿದ್ದಾರೆ. ಭಾರತದ ಸಂಯೋಜಿತ ವಾಯು ರಕ್ಷಣಾ ವ್ಯವಸ್ಥೆ ಮತ್ತು ನೆಟ್ವರ್ಕ್-ಕೇಂದ್ರಿತ ಯುದ್ಧ ತಂತ್ರವು ಈ ವಿಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದೆ. ಅಂತಿಮವಾಗಿ, ಆಪರೇಷನ್ ಸಿಂದೂರ್ ಆಧುನಿಕ ಭಾರತೀಯ ಮಿಲಿಟರಿ ಕಾರ್ಯತಂತ್ರದ ಒಂದು ನಿರ್ಣಾಯಕ ಮೈಲಿಗಲ್ಲಾಗಿ ಹೊರಹೊಮ್ಮಿದೆ ಎಂದಿದ್ದಾರೆ.