ದೆಹಲಿ ಆಸ್ಪತ್ರೆಯಲ್ಲಿ ಅಫ್ಘಾನಿಸ್ತಾನದ ಮಾಜಿ ವೇಗಿ ಶಪೂರ್ ಜದ್ರಾನ್ ಜೀವನ್ಮರಣ ಹೋರಾಟ

ನವದೆಹಲಿ, ಎ.20: ಅಫ್ಘಾನಿಸ್ತಾನದ ಮಾಜಿ ವೇಗಿ ಶಪೂರ್ ಜದ್ರಾನ್(Shapoor Zadran) ಅವರಿಗೆ ಅಪರೂಪದ ಮತ್ತು ಮಾರಣಾಂತಿಕ ಸ್ಥಿತಿಯಾದ ಹಿಮೋಫಾಗೊಸೈಟಿಕ್ ಲಿಂಫೋಹಿಸ್ಟಿಯೊಸೈಟೋಸಿಸ್ (HLH) ಇರುವುದು ಪತ್ತೆಯಾದ ನಂತರ ಅವರು ಜೀವನ್ಮರಣ ಹೋರಾಟ ನಡೆಸುತ್ತಿದ್ದಾರೆ. 38 ವರ್ಷದ ಅವರನ್ನು ಪ್ರಸ್ತುತ ನವದೆಹಲಿಯ ಆಸ್ಪತ್ರೆಯ ತೀವ್ರ ನಿಗಾ ಘಟಕದಲ್ಲಿ ದಾಖಲಿಸಲಾಗಿದ್ದು, ಜನವರಿಯಿಂದ ಅವರಿಗೆ ಚಿಕಿತ್ಸೆ ನೀಡಲಾಗುತ್ತಿದೆ.

ಅಫ್ಘಾನಿಸ್ತಾನ ಕ್ರಿಕೆಟ್‌ಗೆ ಜದ್ರಾನ್ ಅವರ ದೀರ್ಘಕಾಲೀನ ಕೊಡುಗೆಯನ್ನು ಗಮನದಲ್ಲಿಟ್ಟುಕೊಂಡು ಈ ಬೆಳವಣಿಗೆ ಕ್ರಿಕೆಟ್ ವಲಯದಲ್ಲಿ ಕಳವಳ ಮೂಡಿಸಿದೆ. "ಇದು ತುಂಬಾ ಗಂಭೀರವಾದ ಸೋಂಕು" ಎಂದು ಅವರ ಕಿರಿಯ ಸಹೋದರ ಘಮೈ ಜದ್ರಾನ್ ಇಎಸ್‌ಪಿಎನ್‌ ಕ್ರಿಕ್‌ಇನ್ಫೊಗೆ ತಿಳಿಸಿದರು. "ಅವರ ಇಡೀ ದೇಹವು ಟಿಬಿ (ಕ್ಷಯರೋಗ) ಸೇರಿದಂತೆ ಸೋಂಕಿನಿಂದ ತುಂಬಿತ್ತು. ಇದು ಅವರ ಮೆದುಳಿಗೆ ಸಹ ಹರಡಿತು. ಎಂಆರ್‌ಐ ಮತ್ತು ಸಿಟಿ ಸ್ಕ್ಯಾನ್ ನಂತರ ಬಹಿರಂಗವಾಯಿತು" ಎಂದು ಘಮೈ ಜದ್ರಾನ್ ಹೇಳಿದರು.

ಹಿಮೋಫಾಗೊಸೈಟಿಕ್ ಲಿಂಫೋಹಿಸ್ಟಿಯೊಸೈಟೋಸಿಸ್ ಕಾಯಿಲೆ ಮೂಳೆ ಮಜ್ಜೆ, ಯಕೃತ್ತು, ಗುಲ್ಮ ಮತ್ತು ದುಗ್ಧರಸ ಗ್ರಂಥಿಗಳಂತಹ ಪ್ರಮುಖ ಅಂಗಗಳಿಗೆ ಹಾನಿಯಾಗುತ್ತದೆ. ಇದು ಪ್ರಾಥಮಿಕವಾಗಿ ಮಕ್ಕಳ ಮೇಲೆ ಪರಿಣಾಮ ಬೀರುತ್ತದೆಯಾದರೂ, ಇದು ವಯಸ್ಕರಲ್ಲಿಯೂ ಸಹ ಸಂಭವಿಸಬಹುದು ಮತ್ತು ದೀರ್ಘಕಾಲದ, ತೀವ್ರವಾದ ಚಿಕಿತ್ಸೆಯ ಅಗತ್ಯವಿರುತ್ತದೆ.

MI vs GT: ಮುಂಬೈ ಇಂಡಿಯನ್ಸ್‌ ಪರ ಐಪಿಎಲ್‌ಗೆ ಪದಾರ್ಪಣೆ ಮಾಡಿದ ದಾನಿಶ್, ಭಗತ್‌ ಯಾರು?

ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ಜದ್ರಾನ್ ಮೊದಲು ಅಸ್ವಸ್ಥರಾದರು, ಮತ್ತು ನಂತರ ಅಫ್ಘಾನಿಸ್ತಾನದ ವೈದ್ಯರು ವಿಶೇಷ ಚಿಕಿತ್ಸೆಗಾಗಿ ಭಾರತಕ್ಕೆ ಪ್ರಯಾಣಿಸಲು ಸಲಹೆ ನೀಡಿದರು. ಆರಂಭದಲ್ಲಿ ಅವರು ಉತ್ತಮವಾಗಿ ಪ್ರತಿಕ್ರಿಯಿಸಿದರು ಮತ್ತು ಡಿಸ್ಚಾರ್ಜ್‌ ಮಾಡಲಾಯಿತು. ಆದರೆ 20 ದಿನಗಳಲ್ಲಿ ಅವರು ಮತ್ತೆ ಅನಾರೋಗ್ಯಕ್ಕೆ ಒಳಗಾದರು, ಇದರಿಂದಾಗಿ ಅವರು ಪ್ರಸ್ತುತ ತೀವ್ರ ನಿಗಾ ಘಟಕದಲ್ಲಿ ದಾಖಲಾಗಿದ್ದಾರೆ.

ಎಡಗೈ ವೇಗಿ 2009 ಮತ್ತು 2020 ರ ನಡುವೆ 44 ಏಕದಿನ ಪಂದ್ಯಗಳು ಮತ್ತು 36 ಟಿ20 ಪಂದ್ಯಗಳಲ್ಲಿ ಅಫ್ಘಾನಿಸ್ತಾನವನ್ನು ಪ್ರತಿನಿಧಿಸಿದ್ದರು. 80 ಅಂತರರಾಷ್ಟ್ರೀಯ ವಿಕೆಟ್‌ಗಳನ್ನು ಕಬಳಿಸಿದ್ದರು. 2015 ರಲ್ಲಿ ಐಸಿಸಿ ಏಕದಿನ ವಿಶ್ವಕಪ್‌ನಲ್ಲಿ ತಮ್ಮ ರಾಷ್ಟ್ರದ ಮೊದಲ ಗೆಲುವಿನಲ್ಲಿ ಅವರು ಗೆಲುವಿನ ರನ್‌ ಬಾರಿಸಿದ್ದರು. ಅದೇ ಪಂದ್ಯದಲ್ಲಿ, ವೇಗಿ 38ಕ್ಕೆ 4 ವಿಕೆಟ್‌ ಕಿತ್ತಿದ್ದರು. ಮತ್ತು ವಿಶ್ವಕಪ್‌ನಲ್ಲಿ ತಮ್ಮ ರಾಷ್ಟ್ರದ ಪರ ಅತಿ ಹೆಚ್ಚು ವಿಕೆಟ್ ಪಡೆದ ಬೌಲರ್ ಎನಿಸಿದ್ದರು. ಜದ್ರಾನ್ ಕೊನೆಯ ಬಾರಿಗೆ 2019 ರಲ್ಲಿ ಮಾರ್ಚ್ 10 ರಂದು ಡೆಹ್ರಾಡೂನ್‌ನಲ್ಲಿ ಐರ್ಲೆಂಡ್ ವಿರುದ್ಧದ ಐದು ಪಂದ್ಯಗಳ ಸರಣಿಯಲ್ಲಿ ಅಫ್ಘಾನಿಸ್ತಾನ ಪರ ಆಡಿದ್ದರು.