IND vs ENG 2nd ODI: ಭಾರತಕ್ಕೆ ಬೃಹತ್‌ ಗೆಲುವಿನ ಗುರಿ ನೀಡಿದ ಇಂಗ್ಲೆಂಡ್‌
ರೂಟ್‌ ಅರ್ಧಶತಕ ಬಾರಿಸುವ ಮೂಲಕ ಇಂಗ್ಲೆಂಡ್‌ ಪರ ಏಕದಿನದಲ್ಲಿ ಅತ್ಯಧಿಕ ಬಾರಿ 50 ಪ್ಲಸ್‌ ರನ್ ಬಾರಿಸಿದ ಮೊದಲ ಆಟಗಾರ ಎನಿಸಿಕೊಂಡರು. ಇದಕ್ಕೂ ಮುನ್ನ ಈ ದಾಖಲೆ ಮಾಜಿ ಆಟಗಾರ ಇಯಾನ್‌ ಮಾರ್ಗನ್‌(55) ಹೆಸರಿನಲ್ಲಿತ್ತು.
Abhilash BC
Feb 9, 2025 5:29 PM
ಕಟಕ್‌: ಜೋ ರೂಟ್‌(65) ಮತ್ತು ಬೆನ್‌ ಡಕೆಟ್‌(69) ಬಾರಿಸಿದ ಅರ್ಧಶತಕದ ನೆರವಿನಿಂದ ಭಾರತ ವಿರುದ್ಧದ ದ್ವಿತೀಯ ಏಕದಿನ(IND vs ENG 2nd ODI) ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್‌ ನಡೆಸಿದ ಇಂಗ್ಲೆಂಡ್‌ ಬೃಹತ್‌ ಮೊತ್ತ ಪೇರಿಸಿ ಸವಾಲೊಡ್ಡಿದೆ. ರೋಹಿತ್‌ ಪಡೆ ಗೆಲುವಿಗೆ 305 ರನ್ ಬಾರಿಸಬೇಕಿದೆ.
ಇಲ್ಲಿನ ಬಾರಾಬತಿ ಸ್ಟೇಡಿಯಂನಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಟಾಸ್‌ ಗೆದ್ದು ಬ್ಯಾಟಿಂಗ್‌ ಆಯ್ದುಕೊಂಡ ಇಂಗ್ಲೆಂಡ್‌, ಮೊದಲ ಪಂದ್ಯದಂತೇ ಬಿರುಸಿನ ಬ್ಯಾಟಿಂಗ್‌ ಮೂಲಕ ಉತ್ತಮ ರನ್ ಕಲೆಹಾಕಿತು. ಆರಂಭಿಕರಾದ ಫಿಲ್‌ ಸಾಲ್ಟ್‌ ಮತ್ತು ಬೆನ್‌ ಡಕೆಟ್‌ ಸೇರಿಕೊಂಡು ಓವರ್‌ಗೆ 10ರ ಸರಾಸರಿಯಲ್ಲಿ ರನ್ ಗಳಿಸುವ ಮೂಲಕ ಭಾರತೀಯ ಬೌಲರ್‌ಗಳನ್ನು ದಂಡಿಸಿದರು.
ಜಿದ್ದಿಗೆ ಬಿದ್ದವರಂತೆ ಬ್ಯಾಟ್‌ ಬೀಸುತ್ತಿದ್ದ ಈ ಜೋಡಿಯನ್ನು ಪದಾರ್ಪಣ ಪಂದ್ಯವನ್ನಾಡಿದ ವರುಣ್‌ ಚಕ್ರವರ್ತಿ ಕೊನೆಗೂ ಬೇರ್ಪಡಿಸಿ ಭಾರತಕ್ಕೆ ಮೊದಲ ಮುನ್ನಡೆ ತಂದುಕೊಟ್ಟರು. 26 ರನ್ ಗಳಿಸಿದ್ದ ಫಿಲ್‌ ಸಾಲ್ಟ್‌ ವಿಕೆಟ್‌ ಕಿತ್ತರು. ಡಕೆಟ್‌ ಮತ್ತು ಸಾಲ್ಟ್‌ ಮೊದಲ ವಿಕೆಟ್‌ಗೆ 81 ರನ್ ಒಟ್ಟುಗೂಡಿಸಿದರು. ಈ ವಿಕೆಟ್‌ ಪತನದ ಬಳಿಕ ರೂಟ್‌ ಜತೆ ಇನಿಂಗ್ಸ್‌ ಬೆಳೆಸಿದ ಡಕೆಟ್‌ ಅರ್ಧಶತಕ ಬಾರಿಸಿದರು. ಒಟ್ಟು 10 ಬೌಂಡರಿ ನೆರವಿನಿಂದ 65 ರನ್ ಬಾರಿಸಿದರು.
Fifties from Joe Root and Ben Duckett took England past 300 in the second ODI 👊#INDvENG 📝: https://t.co/6P66iIrFim pic.twitter.com/6wDQYb9GFq
— ICC (@ICC) February 9, 2025
ರೂಟ್‌ ಅರ್ಧಶತಕ ಬಾರಿಸುವ ಮೂಲಕ ಇಂಗ್ಲೆಂಡ್‌ ಪರ ಏಕದಿನದಲ್ಲಿ ಅತ್ಯಧಿಕ ಬಾರಿ 50 ಪ್ಲಸ್‌ ರನ್ ಬಾರಿಸಿದ ಮೊದಲ ಆಟಗಾರ ಎನಿಸಿಕೊಂಡರು. ಇದಕ್ಕೂ ಮುನ್ನ ಈ ದಾಖಲೆ ಮಾಜಿ ಆಟಗಾರ ಇಯಾನ್‌ ಮಾರ್ಗನ್‌(55) ಹೆಸರಿನಲ್ಲಿತ್ತು. ರೂಟ್‌ 56 ಬಾರಿ 50 ಪ್ಲಸ್‌ ರನ್ ಬಾರಿಸಿದರು. 72 ಎಸೆತ ಎದುರಿಸಿದ ರೂಟ್‌ 69 ರನ್ ಗಳಿಸಿ ಈ ಪಂದ್ಯದಲ್ಲಿಯೂ ಜಡೇಜಾಗೆ ವಿಕೆಟ್‌ ಒಪ್ಪಿಸಿದರು. ಉಳಿದಂತೆ ಹ್ಯಾರಿ ಬ್ರೂಕ್‌(31), ಜಾಸ್‌ ಬಟ್ಲರ್‌(34) ರನ್ ಬಾರಿಸಿದರು. ಅಂತಿಮ ಹಂತದಲ್ಲಿ ಸಿಡಿದು ನಿಂತ ಲಿಯಾಂಗ್‌ ಲಿವಿಂಗ್‌ಸ್ಟೋನ್‌ 41 ಬಾರಿಸಿ ತಂಡದ ಮೊತ್ತವನ್ನು 300ರ ಗಡಿ ದಾಟಿಸಿದರು.
ಇದನ್ನೂ ಓದಿ IND vs ENG: ಚಾಂಪಿಯನ್ಸ್‌ ಟ್ರೋಫಿಗೆ ವರುಣ್‌ ಚಕ್ರವರ್ತಿ? ರೋಹಿತ್‌ ಶರ್ಮಾ ಹೇಳಿದ್ದಿದು!
ಭಾರತ ಪರ ರವೀಂದ್ರ ಜಡೇಜಾ ಒಂದು ಮೇಡನ್‌ ಸಹಿತ 35 ರನ್ ವೆಚ್ಚದಲ್ಲಿ 3 ವಿಕೆಟ್‌ ಕಿತ್ತರು. ಚೊಚ್ಚಲ ಪಂದ್ಯವನ್ನಾಡಿದ ಚಕ್ರವರ್ತಿ, ಅನುಭವಿ ಮೊಹಮ್ಮದ್‌ ಶಮಿ, ಯುವ ವೇಗಿ ಹರ್ಷಿತ್‌ ರಾಣಾ ಮತ್ತು ಹಾರ್ದಿಕ್‌ ಪಾಂಡ್ಯ ದುಬಾರಿಯಾಗಿ ಪರಿಣಮಿಸಿ ತಲಾ ಒಂದೊಂದು ವಿಕೆಟ್‌ ಪಡೆದರು. ಅಂತಿಮವಾಗಿ ಇಂಗ್ಲೆಂಡ್‌ 49.5 ಓವರ್‌ಗಳಲ್ಲಿ 304 ರನ್ ಬಾರಿಸಿತು.